29/09/2026
मन्त्रिपरिषद्का ६ निर्णय : स्वास्थ्य अनुदानदेखि उच्च तहका कर्मचारीको पदस्थापनसम्म:-
प्रधानमन्त्री तथा मन्त्रिपरिषद्को कार्यालयमा बसेको मन्त्रिपरिषद् बैठकले स्वास्थ्य सेवा सुधार, कानुनी संशोधन, राष्ट्रिय वन क्षेत्र उपयोग र उच्च तहका कर्मचारीको पदस्थापन लगायतका विषयमा ६ वटा महत्वपूर्ण निर्णय गरेको छ।
🔹 २०.७ मिलियन अमेरिकी डलरको स्वास्थ्य अनुदान स्वीकार गर्ने निर्णय
अमेरिकी सरकारबाट स्वास्थ्य सेवा सुधारका लागि प्राप्त हुने २०.७ मिलियन अमेरिकी डलर बराबरको अनुदान सहायता स्वीकार गर्ने निर्णय गरिएको छ।
🔹 राष्ट्रिय वन क्षेत्र उपयोग गर्न स्वीकृति
कमला–ढल्केबर–पथलैया सडकखण्ड, गजार्ङ खोला साना जलविद्युत् आयोजना, ४० मेगावाटको बलेफी खोला जलविद्युत् आयोजना तथा सशस्त्र प्रहरीका तालिम शिक्षालय, गुल्म र सीमा सुरक्षा पोस्ट निर्माणका लागि राष्ट्रिय वन क्षेत्र उपयोग गर्न स्वीकृति दिइएको छ।
🔹 पशु वधशाला तथा मासु जाँचसम्बन्धी विधेयक संसद् लैजाने
पशु वधशाला र मासु जाँच ऐन, २०५५ संशोधन गर्न बनेको विधेयक संघीय संसद्मा पेश गर्न स्वीकृति प्रदान गरिएको छ।
🔹 संघीय निजामती सेवा कानून संशोधन प्रस्ताव
संघीय निजामती सेवा सम्बन्धी कानूनलाई संशोधन तथा एकीकरण गर्न बनेको विधेयक संघीय संसद्मा पेश गर्ने निर्णय भएको छ।
🔹 अपाङ्गता भएका व्यक्तिको अधिकारसम्बन्धी कानून संशोधन
अपाङ्गता भएका व्यक्तिको अधिकार सम्बन्धी ऐन, २०७४ संशोधन गर्न बनेको विधेयक पनि संसद्मा पेश गर्न स्वीकृति दिइएको छ।
🔹 दुई उच्च तहका कर्मचारीको बढुवा तथा पदस्थापन
सहसचिव आभा श्रेष्ठ कर्णलाई राजपत्राङ्कित विशिष्ट श्रेणीमा बढुवा गरी गण्डकी प्रदेशको प्रमुख सचिवमा पदस्थापन गर्ने निर्णय भएको छ।
त्यस्तै, डा. जगदीश्वर कर्माचार्यलाई विशिष्ट श्रेणीमा बढुवा गरी ऊर्जा, जलस्रोत तथा सिँचाइ मन्त्रालयको सचिवमा पदस्थापन गर्ने निर्णय गरिएको छ।
