12/05/2023
امبارح جوجل عملت مؤتمر ساعتين
وقد يكون واحد من أفضل مؤتمراتها من فترة طويلة..
يلا بينا 💨 🚗
🤖البداية كانت مع منافس جوجل المباشر قصاد ChatGPT
واللي اسمه Bard
مبقاش فيه قايمة انتظار
الخدمة مفتوحة للكل في 180 دولة (bard.google.com)
قريب هيدعم 40 لغة منهم العربية
بيعمل صور مع Adobe Firefly من الأوامر النصية
بقى فيه كمان دارك موود
بيفهم صور.. يعني تسأله بنصوص وصور
يرد عليك عادي بنصوص وصور بسهولة جدا
جوجل عملت شراكات مع OpenTable/Khan academy / Wolfram / Instacart عشان تخلي بارد يقدر ينافس بقوة "بينج شات" و"شات جي بي تي"
كمان Bard يقدر يتداخل مع خدمات جوجل زي
انه يعمل export لاجاباته مباشرة جوا ايميل جيميل او وورد على Docs او جداول في Sheets أو يعرض اجاباته عن سؤال للأماكن مباشرة على خريطة من Maps في قلب الشات!
🔍دلوقتي مع السيرش🔍
بصراحة كنت قلقان جوجل تتأخر أكتر
من كدا في إطلاق الذكاء الاصطناعي في
قلب جوجل سيرش، لان اكتر من كدا كان
بينج بتاع مايكروسوفت هيركب ويدلدل
على عرش سوق السيرش في العالم..
جوجل سيرش جاله حاجة اسمها AI Snapshots
ودي ياسيدي ميزة "تجريبية"
لما تيجي تسيرش ف جوجل كالعادة
هتظهرلك مساحة تحت بوكس السيرش
فيها إجابة تلخيصية تقدملك معلومات مركزة عن اللي بتسأل عنه..
تحت المساحة دي فيه أسئلة إضافية
تخليك تتعمق ف البحث ف الموضوع
لما تدوس عليها او على زرار Ask a followup
هتتنقل تماما الى شاشة تانية واخدة
شكل الشات بقى "على طريقة بينج"
وتبدأ تسأل والسيرش يظهرلك معلومات
عن اللي أنت عايزه..
بس جوجل مقتلتش روح جوجل سيرش
يعني الموضوع مش هيتحول بالكامل لشات بس
لا ده هيبقى ميكس بين الشات وبين
نتايج البحث اللي تفيدك..
فمثلا لو بتسيرش على منتج، هتقدر
تكتب وتشأل ويترد عليك وف نفس الوقت
جمب الاجابات هيظهرلك مصادر ترجعلها
ده غير انك تقدر تشوف المتاجر اللي عارضة المنتج وأسعاره والعروض..
عايز ترجع وتشوف نتايج السيرش العادي🤔
سهلة، اعمل سكرول داون هترجع تاني
ودي بالمناسبة نفس طريقة بينج شات بالمللي
اللطيف برضو ان جوجل قدمت حاجة
اسمها Perspectives ودي بتخليك تشوف
زوايا مختلفة للموضوع اللي بتسيرش عليه..
والميزة دي مش مخصوصة لشكل
السيرش الجديد، لا دي للسيرش التقليدي كمان..
فخلال الاسابيع الجاية، لما تعمل سيرش
خصوصا من الموبايل، هيظهرلك تصنيف
جمب الصور والاخبار والفيديوهات اللي
بتبقى فوق نتايج البحث عشان تصنفها،
هيبقى فيه Perspectives، وده لما تختاره
هيجيلك كومنتات من السوشيال ميديا و
فيديوهات من تيك توك وكمان بوستات من
ريديت واي سوشيال ميديا، الغرض الظاهر
من الميزة دي ان جوجل تقدملك تجارب ناس حقيقية مع الموضوع اللي بتسأل عنه،
أما اللي مقلتهوش جوجل هي ان الميزة دي
هتخف شوية من اتجاه صغار السن والمراهقين ناحية انستجرام وتيك توك عشان يستخدموهم كمحركات بحث بديلة لجوجل سيرش اصلا.. فكدا حرفيا جوجل بتضربهم بأيديهم! 😅
طبعا جوجل منسيتش تطمن المعلنين🤑
جوجل قالتها صريحة انها بتفكر ازاي
تعرض الاعلانات جوا ميزة Snapshots الجديدة، ولحد ما ده يحصل، الاعلانات هتفضل ف أماكنها عادي ف نتايج السيرش بالشكل التقليدي، وهيبقى مكتوب بوضوح عليها Sponsored 🫡
قدرات السيرش الجديدة جوجل سميتها SGE أو Search Generative Experience وتقدر تجربه دلوقتي لو اشتركت في برنامج اختبارات السيرش الجديدة Search Labs واللي تقدر توصلها وتشترك من هنا g.co/labs من جوجل كروم على الكمبيوتر أو من أبلكيشن Google app على أي موبايل..
🤖 نيجي بقى للـDuet AI 🤖
ده ياسيدي مساعد شخصي ذكي من جوجل
هتقدمهولك في قلب عيلة خدماتها المكتبية Workspace
بس جوا كل واحد فيهم ليها وظيفة مختلفة..
📃 جوا Docs
المساعد اسمه Sidekick
وده وانت بتكتب أو تعدل في أي تيكست
المساعد طول الوقت بيقترح عليك تعمل ايه
وتكمل ازاي اللي بتكتبه، وانت تختار أنهي تعديل يتعمل
وطبعا القرار في الأول والآخر ليك في التحرير والشكل النهائي للمحتوى..
📃 🖼 جوا Slides
المساعد برضو اسمه Sidekick
وهنا بيساعدك تعمل البرزنتيشن
بيسهل عليك تكتب تيكست من شوية ملاحظات بيحولهالك نص كامل
كمان لو نسيت تكتب ملاحظات ليك تشوفها في تقديم البرزنتيشن أو
اللي هو Speaker Notes..
بس اسمه بيتغير مع الصور ويبقى Help Me Visualize
واللي بيعمل عظمة في تصميم الصور بمجرد أوامر نصية من خلال منصة ذكية مدمجة في قلبه..
📝 جوا Sheets
هنا اسمه Help Organize
فتقدر تعمل جداول جديدة تماما من قلب جداول بيانات موجودة
بحيث تقدر تنظم الداتا بشكل واضح..
🤖كمان كان فيه مزايا AI للايميلات والخرايط والصور🤖
📧جوا جيميل
فيه Help Me Write
ميزة بتكتبلك ردود على أي إيميل يجيلك حسب التفاصيل اللي جايالك
كمان تقدر تخليه يضيف ويطول في الايميل أو يقصر ويلخص وكمان
ممكن تخليه يحسن أو انت اللي تدخل بايديك وتحرر وتغير وتضيف..
🖼جوا جوجل فوتوز
فيه Magic Editor
تقدر تغير وتحرك العناصر جوا صورك بحيث تقدر انك تغير في الصور
وتحرك وتشيل العناصر براحتك، من غير ما شكل الصورة وملامحها
تتغير أو تبان غريبة.. مثلا لو طفل متصور ببلالين بس الكادر قاطع البلالين
تقدر تحرك الطفل وتخليه في نص الصورة.. طب والبلالين؟
الذكاء الاصطناعي يتدخل ويكمل شكل البلالين المقطوعة وكمان
يعدل المكان اللي فضي في الصورة بعد نقل الطفل!
📍جوا خرايط Maps بقى
فيه Immersive View for Routes
تخليك تشوف مسار الطريق بتاعك وكإنك درون طايرة
وتخليك تمشي المسار كلو فوق الشوارع اللي هتمشيها بجد
وكمان بتعرضلك نموذج ديجيتال للزحمة والطقس حسب الساعة
على مدار اليوم عشان تقدر تعرف تتحرك امتى وتلبس ايه
عشان توصل ف معادك جاهز!
الميزة شغالة بالـAI
عن طريق تحليل صور خدمة StreetView وكمان صور جوية
عشان تبني نموذج متكامل رقمي واقعي للشوارع
الميزة نازلة آخر السنة في 15 مدينة
بس مفيش ولا واحدة منهم في دول عربية..
🛡 جوجل كمان نزلت 3 مزايا لحماية أمن المستخدمين أونلاين
الأولى ميزة اسمها About this Image
ودي ميزة عظيمة هتقدر توصلها لما تعمل سيرش على الصور في جوجل
ولما تشوف صورة تستغربها وتفتحها هتلاقي 3 نقط تدوس عليهم
وتدوس على اختيار About this Image عشان تعرف أصلها وهل هي حقيقية ولا لأ أساسا وكمان هتشوف نازلة في مواقع ايه ومنشور عنها ايه أونلاين
الميزة التانية هي تشجيع صناع المحتوى والمواقع انهم يكتبوا
في الميتاداتا بتاعت صورهم اللي معمولة بالذكاء الاصطناعي انها أصلا معمولة بالـAI.. وجوجل بدأت بنفسها وقالت انها أي صورة تتعمل بأي خدمات جوجل الذكية، هيتضاف جواها أوتوماتيك جملة Made by AI with Google.. جوجل قالت ان فيه شركات بدأت تبادر وتشارك في استخدام الميزة مع صورها زي ShutterStock وكمان ميدجورني
الميزة التالتة هي ان جوجل درايف هيعمل Scan لكل الملفات
وأي ملف تلقط انظمة جوجل انها أو مصدرها أساسا مش موثوقين
وفيه احتمالية يكون كونتنت نصب او احتيال أو فيه لينكات خبيثة
هيصنفهالك انها Spam عشان متتفاعلش معاها خالص، زي بظبط ما بيحصل أوقات كتير في مواقع الويب على كروم أو كمان على الايميلات في جيميل
الميزة التالتة Dark Web Report بقى دي هايلة جدا، وهي ان جوجل هتعمل سيرش بإيميلك في الدارك ويب، بحيث تنبهم لو أي أكونتات معمولة بإيميلك بتتباع أو بيتم تداولها أو تم تسريبها بأي شكل عشان تاخد بالك، وهيجيلك نوتفكيشن بالموضوع ده لو لقى حاجة مش تمام!
📱تعالى بقى للذكاء الاصطناعي في الأندرويد📱
جوجل نزلت 3 مزايا لطاف الأولى Magic Compose تخليك
ترد على رسايل الـSMS في قلب شات Google Messages
بردود جاهزة عاملهالك الذكاء الاصطناعي مكتوبة بأساليب مختلفة
والردود طبعا مكتوبة بعد تحليل سير الشات والرسايل بينك وبين الطرف التاني
التانية بقى AI Wallpaper ودي بتخليك تقدر تكتب تيكست
عشان تصمم خلفيات للموبايل،
وكمان فيه ميزة تالتة هي Cinematic Wallpaper اللي بتخليك
تحول أي صورة ثابتة إلى متحركة من خلال تحريك خلفية الصورة
وتبقى تتحرك لما تيجي تفتح اللوك سكرين
📍 برضو من المزايا العظيمة ان جوجل قلدت أبل
وخلت شبكة Find My Device تشتغل وتلاقي أي جهاز متسجل
بأكونت جوجل بسهولة حتى لو مش واصل بالإنترنت!
وطبعا ده بيحصل من خلال ان أي جهاز موجود حوالين جهازك الضايع/المسروق هيقدر يستقبل داتا منه وبدورها الأجهزة المحيطة تقدر ترفع
الداتا اللي جاية من الجهاز الضايع إلى شبكة Find My Device وبعدها
انت تقدر تحدد مكانه..
كمان جوجل اتعاونت مع تقريبا كل اللي بيقدموا أجهزة تتبع المفقودات
في السوق وعلى راسهم أبل وTile وسامسونج عشان تقدر تحذرك
لو فيه حد رامي جهاز تتبع في شنطته او جيبك او عربيتك وانت متعرفش
ساعتها اوتوماتيك موبايلك الأندرويد هينبهك من غير ما تبقى محتاج تداونلود أبلكيشن أساسا!
📱 جوجل نزلت كمان أول موبايل قابل للطي Pixel Fold
وده جاي بسعر يبدأ من 1800 دولار بصراحة ملفتش انتباهي بامكانياته
لانه يعتبر نسخة ف الامكانيات من بيكسل 7 برو ماعدا سينسور الكاميرا الخلفية
أما اللي لفت انتباهي بجد هو تصميم المفصلة العظيم انها قوية جدا
ومتماسكة وفي أكتر من Hands-on بيقولوا انها أفضل بمراحل من جلاكسي فولد 4..
كمان أوضح نقطة للفرق بين الاتنين كانت ان بيكسل فولد تصميمه
مش طويل زيادة ولا رفيع زيادة، وده مخلي حجم الموبايل عظيم ميختلفش
كتير عن عرض وطول الموبايلات العادية، وده كمان خلى استخدام الشاشة
الصغيرة الخارجية مريح اوي للإيد في الكتابة، بس تصميم الموبايل عموما معرفش ليه بس فكرني بموبايل نوكيا الدمعة بتاع زمان 😅
🗣 رأيي المتواضع في المؤتمر عموما عظيم جدا
جوجل قدرت تفرد عضلاتها وتوظف الذكاء الاصطناعي صح
مع استغلال أسماء منتجاتها اللي مليارات البشر بيستخدموها يوميا
من خرايط لتحرير مستندات لصور وسيرش وكتابة ايميلات
جوجل عملت مع الذكاء الاصطناعي زي ما أبل من 2016
بتعمل مع الآيفون.. الاتنين بيستغلوا الخدمات اللي بيقدموها للمستخدم
عشان يبيعوا أي حاجة تانية وبصراحة انا محترم جدا
خطوات جوجل البطيئة لدخول الذكاء الاصطناعي
لان خطواتها هتتحسب عليها لو عملت حاجة غلط وهتكلفها مليارات غرامة
في دعاوى قضائية هيرفعها عليها طوب الأرض..
كمان خطواتها محسوبة خصوصا في السيرش مع تقدم تيك توك
كمحرك بحث، بس عبقرية حركة الـ Perspectives وهتحسن كتير من السيرش
ومهما كان بينج سيرش بتاع مايكروسوفت (اللي هو محركي المفضل للبحث حاليا) قدر ينجح ويكسب أرض في سوق السيرش، جوجل برضو مسيطرة
ومش سهلة وبالعة السوق وهيبان حجم سيطرتها على سوق الديجيتال
لما كل الخدمات تبدأ توصل بشكل واسع على موبايلات وكمبيوترات المستخدمين خلال الفترة الجاية ولحد آخر السنة
و2024 هتبقى فيّصل في شكل ووضع جوجل في المستقبل جدا!
بالمناسبة،
فيه بوست كمان هنزله إن شاء الله عن PaLM 2 اللي هو الجيل الجديد من نموذج جوجل اللغوي الضخم واللي بيفهم أكتر من 100 لغة منهم العربي
واللي كمان يعتبر منافس راس براس قصاد GPT-4 بتاع OpenAI
وفيه بوست هنزله منفصل عن كل اللي قالته جوجل عن رجوعها بعد غياب طويل عن سوق.... النضارات الذكية.. والمرة دي مع سامسونج! 😮
Help test early-stage experiments to shape the future of technology, together.
