21/10/2025
Mbahet punëtoria “Format e ndryshme të dhunës me bazë gjinore dhe mbrojtja nga dhuna kibernetike”
Komuna e Kamenicës, përmes Zyrës për Barazi Gjinore dhe në bashkëpunim me Koordinatoren e Njësisë Komunale për të Drejtat e Njeriut, ka organizuar një punëtori ndërgjegjësuese me temën: “Format e ndryshme të dhunës me bazë gjinore dhe mbrojtja nga dhuna kibernetike.”
Ky aktivitet është zhvilluar në kuadër të Planit Lokal të Veprimit për Barazinë Gjinore, me mbështetjen e projektit “Gender Equality Facility”, i financuar nga Bashkimi Evropian, zbatuar nga UN Women, dhe është mbajtur në hapësirat e Parkut Teknologjik – Cacttus Education.
Punëtoria është udhëhequr nga trajnerja e UN Women, Mirjeta Nagavci, e cila përmes diskutimeve, ushtrimeve praktike dhe reflektimeve, ka trajtuar format e ndryshme të dhunës me bazë gjinore, me fokus të veçantë te dhuna digjitale dhe mbrojtja nga sulmet kibernetike.
Në mesin e pjesëmarrësve ishte edhe pedagogu i shkollës së mesme të lartë në Komunën e Kamenicës, Afrim Hoda.
Qëllimi i këtij aktiviteti është të kontribojë në ngritjen e vetëdijes dhe në krijimin e mjediseve të sigurta, gjithëpërfshirëse dhe të barabarta për të gjithë qytetarët e komunës.
