07/18/2018
ស្តូបរូបស្តេចស្វាពាលី ច្បាំងជាមួយក្របីទូភី ៖
ស្តូបនេះស្ថិតនៅខាងត្បូងវិមានឯករាជ្យ ខ្ញុំមិនដឹងថាគេលើកចេញពីពេលណាដែរ តែក្នុងទសវត្ស៨០ ខ្ញុំឃើញវានៅទីនោះនៅឡើយទេ ។
រូបនេះគឺដកស្រង់ចេញពីឈុតមួយនៃរឿងរាមកេរ្តិ៍ខ្មែរ ត្រង់ឈុតស្តេចស្វាពាលីច្បាំងជាមួយក្របីទូភី ។
សង្ខេបរឿង ៖ ទូភីគឺជាក្របីដ៏ខ្លាំងពូកែមួយដែលមានឪពុកឈ្មោះ មហឹង្សាសូរ(កូនឥសូរ) មហឹង្សាសូរនេះអោយតែកូនកើតមកឈ្មោលគឺសម្លាប់ចោល លុះម្តាយទូភីនេះផើមក៏រត់ចេញពីហ្វូង ទៅរកស៊ីតែឯងរហូតទាល់តែកើតកូនបានទូភីនេះមក ពេលទូភីធំសួរម្តាយរកឪពុក ម្តាយថាបាឯងខ្លាំងពូកែណាស់ ចង់ជួបត្រូវតែហាត់វធ័ផ្លែកន្ទួតព្រៃ និងក្រសាំង៧ដើម វធ័កុំអោយផ្លែនោះជ្រុះដល់ដីសិន និងទៅរៀនស៊ីស្មៅ៧វាល ផឹកទឹក៧បឹងសិនចាំទៅជួប ។ លុះហាត់បានសម្រេចហើយ ថ្ងៃមួយក្របីមហឹង្សាសូរ ឃើញទូភី ក៏បោះពួយមកសម្លាប់ទូភី ឯទូភីមិនស្គាល់មហឹង្សាសូរជាឪពុកក៏វធ័ស្លាប់ទៅ ។ ដោយមានអំនួតពីថ្វីដៃខ្លាំងពូកែរបស់ខ្លួនក្របីទូភី ក៏បន្តទៅរាតត្បាតដល់នគរខះខឹម ដែលមានស្តេចស្វាពាលីសោយរាជ្យ ។ ស្តេចស្វាពាលីច្បាំងជាមួយក្របីទូភី អស់ប៉ុន្មានយប់ប៉ុន្មានថ្ងៃមិនចាញ់ឈ្នះ ក៏បបួលទូភីទៅច្បាំងគ្នាក្នុងរូងភ្នំ កុំអោយរំខានដល់ប្រជារាស្រ្ត ។ លុះទៅច្បាំងក្នុងរូងភ្នំក៏នៅតែមិនចាញ់ឈ្នះ កក្រើកផ្អើលអស់ទេវតា អ្នកតាព្រៃភ្នំ ស្តេចស្វាពាលីចេះតែដេញសួរក្របីទូភីថា ៖ឯងខ្លាំងយ៉ាងនេះដោយសារអ្វី ? ដំបូងក្របីទូភីឆ្លើយត្រង់ថាដោយសារទេវតា១០អង្គនៅលើស្នែងអញ លុះច្បាំងតទៅទៀតរកចាញ់ឈ្នះមិនឃើញ ស្តេចស្វាពាលីចេះតែដេញសួរពាក្យដដែលៗ ក្របីទូភីក៏តាំងមានអំនួតហើយក៏ឆ្លើយថា ៖ អញខ្លាំងព្រោះតែអញស៊ីស្មៅ៧វាល ផឹកទឹក៧បឹង ។ ទេវតាដែលនៅការពារទូភីទាំង១០អង្គ ខឹងក៏រត់ទៅជួយស្តេចស្វាពាលីវិញ ក្របីទូភីក៏ថមថយកម្លាំង ស្តេចស្វាពាលីក៏ចាប់ក្បាលក្របីទូភីកាត់កយកតែម្តងទៅ ។
(សូមស្វែងរករឿងរាមកេរ្តិ៍អានបន្តខ្លួនឯង)
ប្រភព:Tara Om
