12/05/2023
Talooyin taxane ah, una gaar ah ardayda fasalka 12aad ee Shahaadada Dugsiga Sare.
Qaybta Koowaad: Adeegsiga Buugga jawaabaha Imtixaanka.
Sida caadadeennu ahaydba marka la soo gaaro xilliyadaan oo kale ee uu Imtixaanka Qaranku soo dhawaado waxa aan talooyin iyo wacyigelinba siinnaa ardayda fasalka 8aad ee shahaadada dugsiga dhexe iyo fasalka 12aad ee shahaadada dugsiga sare.
Talooyinkeenna maanta waxa ay u gaar yihiin ardayda fasalka 12aad ee la filayo inay dhawaan u fariistaan Imtixaanka Qaranka ee sanad dugsiyeedka 2022/2023. Taladeenna koowaad waxaan ku sharxaynaa adeegsiga buugga jawaabaha lagu qoro.
Buugga Jawaabuhu waa buug ka kooban 12 warqadood oo ay dheer yihiin labada jaldi, wejiga koowaad ee buugga qaybtiisa kore-midig iyo kore-bidix waxaa ku qoran erayga “Code” kaas oo uu hortiisa ku qoran yahay calaamad laydi ahaan u samaynsan oo loogu talagalay in guddiga Imtixaanku ku qortaan lambar sireedka u gaarka ah ardayga, qaybtaan waa ka mamnuuc in uu ardaygu wax ku dhex qoro.
Bogga ama jaldiga koowaad ee buugga jawaabaha qaybtiisa bidix waxaa ku qoran talobixin ka kooban 10 qodob kuwaas oo u qoran sidatan:
1- Fadlan si wanaagsan oo deggan u aqri su’aal walba inta aadan ka jawaabin.
2- Fadlan ka jawaab dhammaan su’aalaha, hana ka tegin qaar.
3- Ku qor dhammaan jawaabaha su’aalaha buugga jawaabaha.
4- Fadlan ha ku qorin jawaabaha warqadaha su’aalaha Imtixaanka.
5- Fadlan si muuqata u qor lambarrada su’aalaha aad ka jawaabtay.
6- Magacaaga iyo taxanahaaga (Rollambarkaaga) si sax ah oo muuqata ugu dul qor buuga jawaabaha.
7- Fadlan ha isku dayin qish, taas waxay sababi kartaa in darajooyinkaaga la baabi’iyo.
8- Fadlan wax calaamad ama summad ah oo loo aqoonsan karo afgarasho ha ku dul qorin buugga jawaabaha.
9- Haddii waqti kuu soo haro iska hubi in aad ka jawaabtay dhammaan su’aalaha.
10- Ku kalsoonow naftaada iyo aqoontaada, Ilaahayna talo saaro.
Qaybta midig ee jaldiga ama bogga koowaad ee buugga waxaa ku sawiran astaanta qaranka ee labada shabeel, hoosteedana waxaa ku qoran magaca Wasaaradda Waxbarashada, intaas ka dib waxaa ku sii hoos dhigan far waaweynna ku qorana BUUGGA JAWAABAHA IMTIXAANKA iyo sanad dugsiyeedka la marayo.
Waxaa ku sii hoos qoran qaybtaan Magaca ardayga:____________________________________
Dugsiga Ardayga:________________________________________________________________
Xarunta (Goobta Imtixaanka lagu gelayo):_____________________________________________
Rool Lambarka (Taxanaha u gaarka ah ardayga):_______________________________________
Maaddada:_____________________________________________________________________
Taariikh: _______/________/_________________
Warqadaha looga jawaabayo Imtixaanka jog-taxa koowaad (column) waxaa ku qoran lambarka su’aasha, ka dibna horteeda waxaa ku qoran jawaabta su’aasha oo ah halkii lagu qorayey jawaabta, warqadaha lagu jawaabayo ayaa qiyaastii ah 12 bog.
Jaldiga dambe ee buugga jawaabaha qaybtiisa kore waxaa ku qoran NATIIJADA IMTIXAANKA oo u jadwalaysan qaab tireed, hoosteedana waxaa ku sii qoran wadarta guud ee jawaabaha ardayga tiro ahaan iyo boqolley ahaanba u qoran, tani waxay u gaar tahay guddiga Imtixaanka saxayo, ardayguna shaqo kuma lahan.
Qaybta hoose ee boggaan waxaa ku qoran Guddiga Saxayaasha iyo Saxiixyadooda, kuwaas oo kala ah:
1- Minguuriyaha.
2- Wadareeyaha.
3- Madaxa Guddiga.
FG: La wadaag arday saaxiibkaa ah oo sanad dugsiyeedka 2022/2023 isu diyaarinaya Imtixaanka Qaranka.
Naga filo talooyin kale oo la xiriira u diyaarinta ardayda Imtixaanka Qaran.
Smart T-Hub.
