17/01/2024
الناس البتعاني من قِلة أو إنخفاض تقدير الذات .. مرات كتير بقول الكلام دا وتختلف طريقة الصياغة .. لأنه مهم .. مهم لأنه .. مهم شديد ..
تقديرك لذاتك وحبك لنفسك ما رفاهية أو زيادة خير .. ده الخير كلو .. دي الحاجة البتزودك بالطاقة عشان تقدر تواصل حياتك وتتجاوز مشاكلك وتدير علاقاتك وتتعامل مع ضغوطك ..
حُبك لنفسك وتقديرك لذاتك بتصنعو بنفسك .. وبيطلع من جواك .. أي تشوه في نظرتك وتقديرك لنفسك بينعكس على مدى إنجازاتك في حياتك وفي شكل علاقتك مع غيرك ..
كتير بنلوم الناس على إنهم كعبين معانا وإنهم بيظلمونا .. المشكلة ما فيهم دائماً .. نعم في ناس كعبين .. ولكن ممكن يكون الخلل في حِتة تانية ..
ممكن تكون في تفسيرنا الغلط لزول بيتعامل معانا بطريقة عادية ولكن ثقته عالية في نفسه دي بنفسرها بإنها غُرور على حِسابنا وهو زول عادي متوازن ..
أو إنو بيذكرنا بخلل أو ضعف معين في نفسنا .. هنا نحن بنعكس مشكلتنا في غيرنا ..
يمكن من غير وعي نرضى بطريقة تعامل ناس ما لطيفة معانا ويكون المهم بالنسبة لينا إنو يكونوا موجودين في حياتنا ويحتونا أو إننا نستمد قوتنا من تقديرهم ونظرتهم لينا ..
أو ما بنخت حدود واضحة وقواعد محددة تحكم شكل علاقاتنا .. و دا كلو بسبب نظرتنا المشوهة لذاتنا ..
تقدير الذات رحلة .. ما محطة أو هدف ثابت .. مجموعة من التمارين والخطوات تعملها وإنت مواصل في حياتك ..
ما حاجة بتتولد بيها و لا بتمشي تشتريها ولا حاجة تعملها وفجأة تبقى واثق في نفسك و تقدر ذاتك ..
إتعلم من الآن تقدم مصلحة نفسك على أي مصلحة تانية .. عارفك ما حا تكون أناني .. إنت طيب وعندك رغبة وجاهزية كبيرة للعطاء حتى لو على حساب نفسك والأنانية بعيدة منك وفكرة محرمة بالنسبة ليك ..
و إتذكر برضو إنو المبالغة في حُبك لنفسك لدرجة البرود مع الحولك برضو ما كويس .. ما نعالج قلة تقدير الذات بالنرجسية😄 !! ..
الفرق بين الغُرور والثقة في النفس .. واضح
والفرق بين حُب الذات والأنانية .. واضح
وفي أثناء ما قاعد تتمرن يا صديقي إتذكر👇:
١- ما تسمح لزول يتلاعب بيك ويهز ثقتك في نفسك ويوصفك بالمغرور لمجرد إنك بادرت بمهمة أو إتكلمت عن إنجازك أو سوقت لنفسك أو مشروعك أو مهاراتك مثلاً ..
٢- ما تسمح لزول يتلاعب بيك ويهز تقديرك لذاتك لمجرد إنك رفضت تلبي ليهو طلب أو رغبة منو أو طالبك بإهتمام زايد على حساب نفسك ..
صحتك النفسية صمام أمانك 💚
