11/03/2025
#خاطرة
سؤال جادي انت كسوداني الاغاني المصرية خلي نقول من باب الوطنية ساي بتوصل ليك إحساس الشوق و اللهفة لبلدك او اي احساس افضل من السودانية انا بتكلم عننا كسودانين ما كمستمعين...!!؟
شايف اغلب الناس الفاتت مصر او غيرها من الدول بقت تتداول المقاطع الغنائية التانية بدلا من السودانية.
ده ما اعتراض ده سوال جادي واصلا ذوق الاستماع متبادل بين الشعوب بس كمان مستغرب من ترك الإرث الفني السوداني والاتجاه لنسيان فننا كسودانين.
عموما انا في رأيي إنه الناس ما تحاول تبعد عن اصلها نعم في تغيرات هتحصل في مواكبة للمجتمع بس ده ما يكون علي ارثك الفني حاولوا الفترة دي كلموا أولادكم عن السودان كتير عرفوهم عليه أكتر من زمان لانه نحنا في فترة طمس الهوية بقي شي متعمد فالناس تحاول كل مرة تنشط ذاكرة اطفالها بأنه نحنا سودانين عن قيمنا عن أخلاقنا عن عاداتنا عن ثقافتنا عن فننا عن كورتنا عن اي شي بخص البلد دي لأنه مافي حاجة بتجي صدفة الاجيال الجاية دي لازم تكون همها الأول والآخر البلد ما شي تاني حتى داسة الأطفال وتطورهم حاولوا اربطو ليهم بالسودان.
خلاصة الموضوع عيالنا لازم يكونوا ما شايفين غير السودان ده ما نفاق ولا تباهي بس حماية الأرض والعرض بعد الله سبحانه وتعالى في الأجيال الجاية.
الناس ما تستصغر المواضيع دي انا ملاحظ في الميديا هويتنا بقت تختفي رغم انتشارها ليه لانه مركزين في هوية غيرنا.
وآخر شيء الناس لازم كل يوم تخلي اطفالها تشاهد التلفزيون القومي عشان الأطفال يعرف دي حاجاتنا ودي إمكانياتنا وإنه في حرب علينا من كل الدول وإنه زراعة حب البلد والجيش والعقيدة دي مهمة كل بيت سوداني داخل او خارج السودان.
وفي نقطة مهمة ملاحظها في التلفزيون القومي إذا أنا غلط قوموني مافي مساحة للأطفال في التلفزيون القومي اي انحنا في حرب بس حاليا كل الناس الفي جيلنا والبعدهم والقدامهم فاتو سن العشرين يعني ده ما الجيل الممكن يتعمد عليه في استلام البلد دي بعد 20 سنة انحنا مهمتنا إنه في عز الحرب دي نربط الطفل بانتماءه و وطنه و لازم يكون في شغف وحماس لأنه يتعلم عشان بلده قبل نفسه وأهله ليه لانه انحنا بدون وطن لا نسوى شيء.
انا كلامي ده ما معاناه في تقصير بس في جوانب الدولة في وضع زي ده بتغيب عنها رغم انه المجهودات الموجودة من حكومة و شعب ما حاجة هينة وفي ضغط كبير إعلامي و دولي وشعبي بس حقهم علينا ولو ساعة في اليوم تكون في ذكَريات تربطهم بالقومية بتاعتنا كسودانين.
لو ربنا مدا في العمر في مواضيع نحنا نشوف ليها حل من بيوتنا قبل الدولة والحكومة وإن شاء الله اقدر اقيف عليها واكتب عنها.
الكلام يطول واحتمال في عدم ترتيب بس دي حاجة في الخاطر وربنا
ينصر القوات المسلحة السودانية والقوات المساندة باذن الله تعالى 🇸🇩
