03/08/2026
عمرہ بچت پروگرام: کچھ ضروری وضاحتیں...!
گزشتہ کل میں نے ”عمرہ کے لیے بچت کا پروگرام“ کے عنوان سے ایک سادہ سا چارٹ شیئر کیا تھا۔ میرا ہرگز اندازہ نہیں تھا کہ اللّٰه تعالیٰ اسے اس قدر قبولیت عطا فرمائیں گے۔ اللّٰه تعالیٰ کے فضل و کرم سے ابھی 48 گھنٹے بھی مکمل نہیں ہوئے ہیں کہ وہ پوسٹ تقریباً ساڑھے چار لاکھ افراد تک پہنچ گئی ہے۔ ہزاروں احباب نے اسے پسند کیا، شیئر کیا، اور کمنٹس، میسنجر اور واٹس ایپ پر فارم طلب کیا۔
اللہ گواہ ہے، ابتداء میں میری پوری کوشش تھی کہ جس جس بھائی یا بہن نے رابطہ کیا، انہیں فرداً فرداً فارم بھیج دوں۔ چنانچہ جن احباب نے میسنجر پر پیغام بھیجا، انہیں وہیں فارم ارسال کیا، جنہوں نے کمنٹس کیے، انہیں جواب میں فارم بھیجا، اور جنہوں نے اپنا واٹس ایپ نمبر بھیجا، ان میں سے ایک ایک کا نمبر سیو کر کے فارم بھیجتا رہا۔ لیکن پیغامات کی تعداد اس قدر بڑھ گئی کہ اب فرداً فرداً سب کو بھیجنا میرے لیے ممکن ہی نہیں رہا۔ اور نئے نمبروں پر مسلسل پیغامات بھیجنے کی وجہ سے واٹس ایپ نے 24 گھنٹوں کی عارضی پابندی بھی لگا دی۔ اندیشہ ہے کہ اگر یہی سلسلہ جاری رکھا گیا تو اکاؤنٹ بھی متاثر ہو سکتا ہے۔ البتہ ابھی تک مسلسل کمنٹس میں واٹس ایپ نمبر بھیج کر فارم کا مطالبہ کیا جا رہا ہے، مگر معذرت کے ساتھ اب میرے لیے اس طریقے سے سب تک انفرادی طور پر فارم پہنچانا ممکن نہیں رہا۔
اسی لئے اب سہولت کے پیشِ نظر میں یہ فارم دوبارہ یہاں شیئر کر رہا ہوں تاکہ ہر ضرورت مند اسے بآسانی حاصل کر سکے۔ البتہ جس کسی کو صاف ستھری PDF کاپی درکار ہو، وہ فارم پر درج میرے واٹس ایپ نمبر پر رابطہ کر کے حاصل کر سکتا ہے۔
اس پوسٹ کی غیر معمولی مقبولیت اس بات کا واضح ثبوت ہے کہ حرمین شریفین کی حاضری کی تڑپ لاکھوں مسلمانوں کے دلوں میں موجزن ہے۔ بہت سے لوگ جانا چاہتے ہیں، مگر انہیں صرف ایک منظم منصوبے کی ضرورت ہوتی ہے۔ اگر انسان تھوڑی سی مستقل مزاجی کے ساتھ روزانہ، ہفتہ وار یا ماہانہ معمولی رقم بھی بچاتا رہے تو ان شاء اللّٰه العزیز ایک نہ سہی تو دو سال کے اندر ضرور عمرہ کے اسباب مہیا ہو جائیں گے۔
مجھے اس بات سے انتہائی خوشی ہوئی کہ بہت سے احباب نے پیغام بھیج کر اطلاع دی کہ انہوں نے اسی طرز پر عمرہ کے لیے باقاعدہ بچت کا آغاز کر دیا ہے۔ اگر اس معمولی سی کوشش کے نتیجے میں کسی ایک شخص کو بھی بیت اللّٰه شریف کی حاضری نصیب ہوئی تو یہ میرے لیے بہت بڑی سعادت ہوگی، اور اللّٰه تعالیٰ کے فضل سے اس نیکی میں میرا بھی حصہ ہوگا۔ اس موقع پر اپنے استاذِ محترم حضرت مولانا عبد القدوس محمدی صاحب مدظلہ کا ذکر بھی ضروری سمجھتا ہوں، جن کی فکر انگیز ترغیب نے ہمیں اس جانب متوجہ کیا۔ اللّٰه تعالیٰ انہیں جزائے خیر عطا فرمائے۔ یقیناً اس کارِ خیر کا اجر، جس کی طرف انہوں نے ہم جیسے سینکڑوں بلکہ شاید ہزاروں طلبہ کی رہنمائی فرمائی؛ ان شاء اللّٰه العزیز ان کے نامۂ اعمال میں بھی مسلسل لکھا جاتا رہے گا۔
اس فارم میں یہ ہدف (تین لاکھ روپے) میں نے اپنی ذاتی منصوبہ بندی کے مطابق رکھا تھا، کیونکہ میری خواہش تھی کہ آئندہ رمضان المبارک میں عمرہ ادا کروں۔ آپ اپنے حالات، سفر کے وقت اور اخراجات کے مطابق اس ہدف میں کمی بیشی کر سکتے ہیں، کیونکہ عمرہ کے اخراجات وقت کے ساتھ تبدیل ہوتے رہتے ہیں۔
اسی مناسبت سے چند احباب یہ بھی دریافت کر رہے ہیں کہ اس چارٹ پر عمل کرنے کا طریقہ کیا ہے؟ اس کا طریقہ بالکل سادہ ہے۔ جب بھی آپ کو جتنی رقم میسر آئے، اسی کے مطابق متعلقہ خانے پر نشان لگا دیں۔ مثلاً اگر 100 روپے بچائے ہیں تو 100 روپے والا خانہ پُر کر دیں، اگر 500 روپے بچائے ہیں تو 500 روپے والا خانہ پُر کر دیں، اگر 5,000 روپے بچا لیے ہیں تو 5,000 روپے والا خانہ پُر کر دیں۔ اسی طرح بتدریج تمام خانے مکمل ہوتے جائیں گے، اور ان شاء اللّٰه العزیز دیکھتے ہی دیکھتے عمرہ کے لیے مطلوبہ رقم جمع ہو جائے گی۔
ایک اہم وضاحت:
یہ چارٹ مصنوعی ذہانت (AI) کی مدد سے تیار کیا گیا ہے۔ گزشتہ دو دن میں متعدد مرتبہ کوشش کی گئی کہ اس میں موجود چیک باکس (خانے) کی تعداد بالکل درست ہو جائے، مگر AI کی تکنیکی حدود کی وجہ سے یہ کام مکمل درست نہ ہو سکا۔
لہٰذا اگر کوئی صاحب؛ گرافک ڈیزائن (CorelDRAW، Illustrator، InDesign یا کسی اور پروگرام) میں مہارت رکھتے ہوں اور اسی ڈیزائن کو برقرار رکھتے ہوئے تمام خانوں کی صحیح تعداد کے ساتھ اسے دوبارہ تیار کر سکیں، تو یہ ایک بہت بڑا صدقۂ جاریہ ہوگا۔ اللّٰه تعالیٰ اس کے ذریعے بے شمار مسلمانوں کو عمرہ کی تیاری میں آسانی عطا فرمائے گا۔
اللہ تعالیٰ ہم سب کو بار بار اپنے گھر اور اپنے محبوب ﷺ کے روضۂ اقدس کی حاضری نصیب فرمائے، ہماری نیتوں کو قبول فرمائے، اور اس معمولی سی کوشش کو اپنی بارگاہ میں شرفِ قبولیت عطا فرمائے۔ آمین یا رب العالمین۔
✍️ علامہ شکیل احمد مصطفائی۔
