31/05/2026
‘समृद्ध सुन्दरहरैंचा’को एजेण्डासहित मैदानमा देवराज तामाङ
योगेन्द्र योगी
सुन्दरहरैंचा (मोरङ) : नेपाली कांग्रेस मोरङ क्षेत्र नम्बर ६ का सभापति देवराज तामाङले स्थानीय तह निर्वाचनको तयारीलाई लक्षित गर्दै सुन्दरहरैंचा नगरपालिकाका विभिन्न वडामा अगुवा कार्यकर्ता तथा क्रियाशील सदस्यहरूसँगको भेटघाट र छलफललाई तीव्रता दिएका छन्।
सुन्दरहरैंचा नगरपालिका वडा नम्बर १ बाट सुरु गरिएको भेटघाट कार्यक्रमअन्तर्गत उनले हालसम्म वडा नम्बर २, ५, ८, ९ र १२ का अगुवा कार्यकर्ता तथा क्रियाशील सदस्यहरूसँग प्रत्यक्ष संवाद गरेका छन्। कार्यक्रममार्फत पार्टी संगठन सुदृढीकरण, आगामी निर्वाचनको रणनीति, स्थानीय जनताका अपेक्षा तथा नगरको विकासका विषयमा व्यापक छलफल भइरहेको बताइएको छ।
स्थानीय तह निर्वाचन नजिकिँदै जाँदा तामाङले कार्यकर्तासँगको सम्पर्कलाई प्राथमिकतामा राखेका छन्। पार्टीभित्र लोकप्रिय युवा नेताका रूपमा चिनिएका उनी नेपाली कांग्रेसको तर्फबाट सुन्दरहरैंचा नगरपालिकाको मेयर पदका बलिया दावेदारका रूपमा हेरिएका छन्।
भेटघाटका क्रममा सभापति तामाङले सुन्दरहरैंचाको समृद्धि, सुशासन र दिगो विकासलाई आफ्नो प्रमुख एजेण्डा बनाएको बताएका छन्। नगरको समग्र विकास, गुणस्तरीय सेवा प्रवाह, रोजगार सिर्जना, पूर्वाधार विस्तार तथा पारदर्शी स्थानीय शासन स्थापना आफ्नो प्राथमिकतामा रहेको उनको भनाइ छ।
उनले पार्टी संगठनलाई अझ मजबुत बनाउँदै जनताको विश्वास जितेर आगामी निर्वाचनमा नेपाली कांग्रेसलाई विजयी बनाउने लक्ष्यका साथ आफू अघि बढिरहेको बताए। कार्यकर्ताको सुझाव र जनताको अपेक्षालाई समेटेर विकासको स्पष्ट खाका तयार गरिने उनको प्रतिबद्धता छ।
तामाङको अभियानमा नेपाली कांग्रेस सुन्दरहरैंचा नगर सभापति भक्तिप्रसाद सिटौला, मोरङ जिल्ला सचिव ललित श्रेष्ठ, महासमिति सदस्य लोकप्रसाद संग्रौलालगायतका नेताहरूको समेत सक्रिय सहभागिता रहेको छ। उनीहरू विभिन्न वडामा पुगेर कार्यकर्तासँग संवाद गर्दै संगठन विस्तार र पार्टीको भावी रणनीतिबारे छलफल गरिरहेका छन्।
कार्यकर्ता भेटघाट कार्यक्रमलाई स्थानीय कांग्रेसजनले सकारात्मक रूपमा लिएका छन्। आगामी दिनमा नगरका सबै वडामा पुगेर कार्यकर्तासँग प्रत्यक्ष संवाद गर्ने तथा पार्टीलाई थप एकताबद्ध र सशक्त बनाउने अभियानलाई निरन्तरता दिइने सभापति तामाङले बताएका छन्।
