30/07/2026
🌟Миний өсөлтийн түүх- Смарттай хамт өнгөрүүлсэн 9 жил
Сайн байна уу. Намайг Чулуунбаатарын Отгончулуун гэдэг.
Би 2017 онд Смарт Софтвэйр группт анх ажилд орсон. Өнөөдөр Смарт Дистро Системс ХХК-ийн Гүйцэтгэх захирлаар ажиллаж байна. Эргээд харахад Смартын гэр бүлийн нэг хэсэг болоод 9 жил өнгөрчээ.
Би 2011 онд Монгол Улсын Их Сургуулийн Математик, Компьютерийн сургуулийг Мэдээллийн системийн инженер мэргэжлээр төгссөн. 2017 онд Смарттай нэгдсэн ба тэр үед байгууллагын алсын хараа, хөгжүүлэх бүтээгдэхүүн, хамт олон нь надад маш их таалагдсан. Үнэнийг хэлэхэд тухайн үед би цалингаа ч асуулгүйгээр хамт ажиллахаар шийдэж байсан. Учир нь миний хувьд ажлын байрнаас илүү хамтдаа үнэ цэнтэй зүйл бүтээх боломж хамгийн чухал байсан. Ингэж Смарт Ложик ХХК-д Төслийн захирлаар ажлын гараагаа эхэлсэн.
👩💻Энэ хугацаанд би зөвхөн албан тушаалаараа бус, мэргэжлийн хувьд ч тасралтгүй өссөн байна. Төслийн удирдлагаас эхлээд өнөөдрийн охин компанийн Гүйцэтгэх захирлын түвшинд хүртэл ажиллаж, компанитайгаа хамт хөгжсөн гэж боддог. Миний хөдөлмөр, үр дүнг байгууллага үргэлж үнэлж ирсэн. Үүний нэг илэрхийлэл нь өнгөрсөн хугацаанд миний цалин 15-аас дээш удаа нэмэгдсэн явдал юм.
Намайг ажилд ороход манай компани 10 ч хүрэхгүй ажилтантай байлаа. Би компанийн анхны төслийн менежер байсан учраас шинэ төсөл бүрийг жижигхэн самбарын өмнө бүгдээрээ ярилцаж, нэг ойлголттой болж эхлүүлдэг байсан.
Харин хамгийн тод үлдсэн дурсамж бол ажилд орсон эхний өдөр харилцагч дээр очоод:
"Нэг сарын дараа шинэ системээ танилцуулна." гэж амлаад гарсан явдал. Тэр амлалтаа бид яг нэг сарын дараа биелүүлж, системээ амжилттай танилцуулсан.
Тэр үеэс нэг зүйлийг би маш сайн ойлгосон.
📌Амжилтыг зөвхөн том баг бий болгодоггүй. Харин нэг зорилготой, бие биедээ итгэдэг, хурдтай хамт олон бүтээдэг.
Өнгөрсөн 9 жилийн хугацаанд би олон төрлийн ERP болон бизнесийн системийг хөгжүүлэх, бүтээгдэхүүн болгох, байгууллагуудад нэвтрүүлэх ажилд оролцсон. Энэ хугацаанд зөвхөн программ хөгжүүлээгүй. Харин олон байгууллагын бизнесийн арга барил, шилдэг туршлага, амжилт, алдаанаас суралцсан. Мэдээж алдаа гаргаж байсан. Гэхдээ тэр бүх алдаа дараагийн төслүүдийн хамгийн том сургамж, давуу тал болсон гэж боддог.
Өнөөдөр миний ажиллах зарчим дараах зүйлс дээр тулгуурладаг:
-Бизнесийн процессыг гүнзгий ойлгож шийдэл боловсруулах.
-Харилцагчийн бодит хэрэгцээнээс бүтээгдэхүүнээ хөгжүүлэх.
-Алдааг засахаас илүү урьдчилан сэргийлэх шийдэл бүтээх.
-Стандартчилал, автоматжуулалтыг тасралтгүй сайжруулах.
-Нэг төслийн туршлагыг бүх бүтээгдэхүүндээ шингээх.
-Харилцагчийн санал хүсэлт бүрийг хөгжүүлэлтийн үндэс болгох.
🤗Эдгээр зарчмаа ажил хэрэг болгохын тулд:
-Өөрийгөө тасралтгүй хөгжүүлэх.
-Байгууллагын бизнес процессыг газар дээр нь судлах.
-Харилцагчийн шаардлагыг системийн шийдэл болгон хөрвүүлэх.
-ERP-ийн шинэ модуль, бүтээгдэхүүний концепц боловсруулах.
-Хөгжүүлэлт, тест, нэвтрүүлэлт бүрт идэвхтэй оролцох.
-Хөгжүүлэлтийн болон хэрэгжүүлэлтийн багийг нэг зорилгын дор уялдуулах.
-Хэрэглэгчийн санал хүсэлтэд тулгуурлан бүтээгдэхүүнээ байнга сайжруулах.
-Шилдэг туршлагыг нэг байгууллагаас нөгөөд түгээх.
-Чанар, стандарт, автоматжуулалтыг бүтээгдэхүүний салшгүй хэсэг болгох байсан.
🌟Смарт Софтвэйр групп надад зөвхөн ажил биш, өөрийгөө хөгжүүлэх маш том боломжийг олгосон. Би жил бүр дунджаар 2–3 мэргэжлийн сургалтад хамрагдаж, Harvard ManageMentor, Монгол–Японы төвийн Бизнесийн хөтөлбөр, CEO College, ISO 9001, ISO 27001, ISO 22301 Lead Auditor зэрэг олон улсын болон дотоодын сургалтуудыг амжилттай төгссөн.
Мөн энэ хугацаанд:
-Оны шилдэг ажилтан болсон.
-Оны шилдэг удирдагчаар шалгарсан.
-Хоёр удаа гадаад аяллын эрхээр шагнагдсан.
-Цахим хөгжил, инновац, харилцаа холбооны яамны Жуух бичгээр шагнагдсан.
-Салбарын тэргүүний ажилтан цол хүртсэн.
Гэхдээ миний хувьд хамгийн том амжилт эдгээр шагнал биш.
Харин бидний хөгжүүлсэн системүүд өнөөдөр олон байгууллагын өдөр тутмын үйл ажиллагааг хөнгөвчилж, олон зуун хэрэглэгчийн ажлыг илүү үр бүтээлтэй болгож байгаа нь хамгийн үнэ цэнтэй үр дүн гэж боддог.
Энэ бүхнийг хамтдаа бүтээсэн хамт олон, удирдлагууддаа чин сэтгэлээсээ талархаж явдаг. Миний хувьд Смарт бол зүгээр нэг ажлын байр биш. Харин хүн бүр өсөж хөгжих боломжтой, хамтдаа үнэ цэн бүтээдэг орчин юм💙
