Мэдээлэл холбооны сүлжээ компани

31/05/2026

Аз жаргалын их ундарга 🌈🌸✨🤗
Аав ээжийн амин эрдэнэ 🤱👼🧑‍🍼💕

Эх орны ирээдүй болсон ✨🇲🇳✨
Энхрий бяцхан хүүхэд багачууддаа ☘️🤗☘️

Олон улсын хүүхдийн эрхийг хамгаалах өдрийн баярын мэнд хүргэе! 🌟🌸🌈🎊🎉

25/05/2026

МОНГОЛ УЛСЫН ЕРӨНХИЙ САЙДЫН ИВЭЭЛ ДОР “НАЙЗ БАЙЯ” ҮНДЭСНИЙ НӨЛӨӨЛЛИЙН АЯН УЛС ОРОН ДАЯАР ЭХЭЛЛЭЭ

Хүүхэд, өсвөр үеийнхнийг цахим орчин дахь үе тэнгийн дарамт, дээрэлхэл, ялгаварлан гадуурхалтаас урьдчилан сэргийлэх, тэдний аюулгүй байдлыг хангах, эерэг харилцаа, хариуцлагатай цахим хэрэглээний соёлыг төлөвшүүлэх зорилготой “Найз байя” үндэсний нөлөөллийн аяныг харилцаа холбоо, мэдээллийн технологийн өсвөрийн “ХУРДАН” клубийн 3000 гаруй гишүүний идэвх оролцоо, манлайлал дээр тулгуурлан зохион байгуулж байна.

Тус аяныг Цахим хөгжил, инновац, харилцаа холбооны яам, Төрийн цахим үйлчилгээний зохицуулалтын газар, “Дэлхийн Зөн Монгол” олон улсын байгууллага, 108 хүүхдийн шуурхай тусламж, хамгааллын төв, “Yes Mongolia” төрийн бус байгууллага зэрэг төр, хувийн хэвшил, олон улсын байгууллага, иргэний нийгмийн хамтын оролцоонд түшиглэн хэрэгжүүлэх юм.

Харилцаа холбооны зохицуулах хорооноос 2020 онд хийсэн судалгаагаар 13–18 насны хүүхдүүдийн 89 хувь нь цахим орчинд дээрэлхэл, гадуурхал, халдлагад өртөж байсан нь асуудал ноцтой түвшинд байгааг илтгэж байна.

Цахим хөгжил, инновац, харилцаа холбооны яамнаас 2024 онд гаргасан судалгаагаар хүүхдүүдийн 57 хувь нь цахим орчинд бие биеэ гадуурхах хандлагатай байгаа бол цахим дарамтад өртсөн хүүхдүүдийн 59 хувь нь энэ талаар эцэг, эхдээ хэлдэггүй, харин эцэг эхчүүдийн 91 хувь нь хүүхдээ ийм төрлийн эрсдэлд өртөөгүй гэж үзэж буй нь ойлголтын зөрүү байгааг харуулж байна.

Мөн өсвөр үеийнхний цахим хэрэглээний судалгаагаар хүүхдүүд интернэтийн хэрэглээг ихэвчлэн өөрсдөө бие даан сурдаг бөгөөд багш, сурган хүмүүжүүлэгчдийн 33 хувь нь цахим орчинд хүчирхийлэлд өртсөн хүүхдэд зөвлөгөө өгөх хангалттай мэдлэг, арга зүй дутмаг гэж үзжээ.

Төрийн цахим үйлчилгээний зохицуулалтын газар нь үндэсний хэмжээнд 21 аймгийн Цахим шилжилт, үйлчилгээний хэлтэс, өсвөрийн “ХУРДАН” клуб, 108 хүүхдийн шуурхай тусламж, хамгааллын төв, хүүхэд гэр бүлийн 748 нийгмийн ажилтнуудаар дамжуулан Монгол улсын 330 сум, алслагдсан бүс нутаг, нийслэл хотын 9 дүүрэгт хүрч хүүхэд, өсвөр үеийнхэнд мэдлэг мэдээлэл түгээх, сэтгэлзүйн дэмжлэг үзүүлэх, шаардлагатай тохиолдолд холбогдох байгууллагуудтай хамтран ажиллаж хүүхдийн эрхийг хамгаалах, эрсдэлийг бууруулахад чиглэсэн, хүртээмжтэй аяныг хэрэгжүүлэхийг зорьж байна.

“Цахимд ч найз байя” үндэсний нөлөөллийн аяны гол зарчим нь хүүхэд хүүхдэдээ эерэгээр нөлөөлөх замаар өсвөр үеийнхний дунд итгэлцэлд суурилсан харилцааг бий болгож, мэдээллийг илүү хүлээн зөвшөөрөгдөх, бодит нөлөөлөл үзүүлэх хэлбэрээр түгээх давуу талтай.

Аяны хүрээнд сурагчид, эцэг эх, асран хамгаалагчид, багш, сурган хүмүүжүүлэгчдэд зориулсан:

• мэдээ, мэдээлэл, зөвлөмж түгээх,
• сурагчдын дунд сошиал хөдөлгөөн, уралдаан тэмцээн зохион байгуулах,
• сургалт, нөлөөллийн арга хэмжээг орон даяар хэрэгжүүлэх зэрэг ажлуудыг зохион байгуулна.

Монгол Улсын Засгийн газар
Цахим хөгжил, инновац, харилцаа холбооны яам
Дэлхийн Зөн Монгол / World Vision Mongolia
108 хүүхдийн шуурхай тусламж, хамгааллын төв
YES Mongolia

20/05/2026

29/04/2026

ЭМГЭНЭЛ
АЛТАЙН ЛУВСАН-ОЧИР
(1977-2026)

Бидний эрхэм нөхөр, хамтран зүтгэгч Алтай овогтой Лувсан-Очир 2026 оны 04 дүгээр сарын 28-ны өдөр зуурдаар таалал төгсөж, бид бүхэнд төдийгүй харилцаа холбооны салбарт нөхөж баршгүй хүнд гарз тохиолоо.

Тэрээр харилцаа холбооны салбарт тасралтгүй 26 жил үр бүтээлтэй ажиллаж, мэдлэг чадвар, сэтгэл зүрхээ салбарынхаа хөгжилд зориулсан, хүлээн зөвшөөрөгдсөн, мэргэшсэн боловсон хүчин, удирдан манлайлагч байлаа.

А.Лувсан-Очир нь 1977 онд Улаанбаатар хотноо төрж, 1995 онд Сэлэнгэ аймгийн Орхонтуул сумын дунд сургууль, 2000 онд Монгол Улсын Техникийн их сургуулийн Холбоо, Мэдээллийн технологийн сургууль, 2024 онд Монгол Улсын Их сургуулийн Хууль зүйн сургуулийг төгссөн, харилцаа холбооны инженер, эрх зүйч, техникийн ухааны магистр, Монгол Улсын зөвлөх инженер, салбарын өндөр боловсролтой боловсон хүчин байлаа.

Тэрээр ажил хөдөлмөрийн гараагаа 2000 оноос Монголын Цахилгаан холбоо ХК-д ээлжийн инженер, ачаалал судалгаа, өгөгдөл зохицуулалтын инженерээр эхлүүлж, Монгол Улсад Харилцаа холбооны зохицуулах хороо анх байгуулагдсан 2002 оноос эхлэн өнөөг хүртэл мэргэжилтнээс Ажлын албаны дарга, Хорооны гишүүн хүртэл тасралтгүй 24 жил ажилласан мэргэшсэн зохицуулагч байлаа.

Харилцаа холбооны зохицуулах хороонд ажиллах хугацаандаа сүлжээ хоорондын харилцан холболт, дугаарлалтын зохицуулалт, өрсөлдөөний зохицуулалтын мэргэжилтэн, Харилцаа холбоо, мэдээллийн технологийн хөгжил, зохицуулалтын хэлтсийн дарга, Радио давтамжийн зохицуулалт, хяналтын албаны дарга, Зах зээл, үнэ тарифын албаны дарга, Өргөн нэвтрүүлгийн зохицуулалтын газрын дарга, Ажлын албаны даргаар тус тус ажиллаж байв.

А. Лувсан-Очир нь харилцаа холбоо, радио долгион, мэдээллийн технологи, шуудангийн зохицуулалтын орчинг боловсронгуй болгох, хууль эрх зүйн шинэчлэлтийг хэрэгжүүлэх, Өргөн нэвтрүүлгийн хуулийг шинээр боловсруулж батлуулах, салбарыг хөгжүүлэх үйлсэд өөрийн мэдлэг чадвар, оюун ухаан, хүч авьяасаа бүрэн зориулан гар бие оролцон, манлайлан ажиллаж байсан юм. Тэрээр найз нөхөд, хамт олон, салбарт хамтран зүтгэгчдийнхээ хайр хүндэтгэлийг хүлээсэн, нэр хүндтэй, мэргэшсэн, туршлагатай мэргэжилтэн, удирдан манлайлагч байлаа.

Түүний хөдөлмөр, зүтгэл, харилцаа холбооны салбарын хөгжилд оруулсан хувь нэмрийг төр засгаас өндрөөр үнэлж, Онц холбоочин цол, төрийн дээд шагнал “Хөдөлмөрийн хүндэт медаль”, “Алтан гадас одон”, “Хөдөлмөрийн гавьяаны улаан тугийн одон”-оор тус тус шагнасан юм.

Эрхэм нөхрийн минь чигч шударга, хүнлэг нинжин, өгөөмөр тусч сэтгэл, эрч хүчтэй, бүтээлч, нөхөрсөг зан чанар нь найз нөхөд, хамт олон бидний сэтгэл зүрхэнд үүрд үгүйлэгдэн дурсагдах болно.

Талийгаачийн гэр бүл, үр хүүхэд, ах дүү, найз нөхөд, төрөл төрөгсдөд нь гүн эмгэнэл илэрхийлье.

УМ МА НИ БАД МЭ ХУМ

ЦАХИМ ХӨГЖИЛ, ИННОВАЦ, ХАРИЛЦАА ХОЛБООНЫ ЯАМ
ХАРИЛЦАА ХОЛБООНЫ ЗОХИЦУУЛАХ ХОРОО
МОНГОЛЫН ЦАХИЛГААН ХОЛБОО ХК
МЭДЭЭЛЭЛ ХОЛБООНЫ СҮЛЖЭЭ ХХК
ШУТИС-ИЙН МЭДЭЭЛЭЛ, ХОЛБООНЫ ТЕХНОЛОГИЙН СУРГУУЛЬ
МЭДЭЭЛЭЛ ХОЛБООНЫ ОПЕРАТОРУУДЫН АССОЦИАЦИ
МОНГОЛЫН ТЕЛЕВИЗҮҮДИЙН ХОЛБОО
МОНГОЛЫН АРИЛЖААНЫ ТЕЛЕВИЗҮҮДИЙН “ДУУН” ХОЛБОО
ОРОН НУТГИЙН ТЕЛЕВИЗҮҮДИЙН “ГАЛ ХӨГЖИЛ” ХОЛБОО
МОНГОЛЫН ОЛОН СУВАГ ДАМЖУУЛАГЧДЫН ХОЛБОО
МОНГОЛЫН ФМ РАДИОНУУДЫН НЭГДСЭН ХОЛБОО
"МОНГОЛЫН ОЮУНЫ ӨМЧ ХАМГААЛАХ ХОЛБОО" ГҮТББ
ХЭВЛЭЛ МЭДЭЭЛЛИЙН ЗӨВЛӨЛ

30/03/2026

ХАРИЛЦАН ХҮНДЭТГЭЕ АЯН 2026

Монгол Улсын Засгийн газар, Жендэрийн үндэсний хорооноос Олон улсын эмэгтэйчүүдийн эрхийг хамгаалах өдөр болон Монгол цэргийн өдрийг тохиолдуулан жил бүрийн 3 дугаар сарын 1-нээс 4 дүгээр сарын 1-ний өдрийг хүртэл үндэсний хэмжээнд уламжлал болгон зохион байгуулдаг “Харилцан хүндэтгэе” нэг сарын аянд Мэдээлэл холбооны сүлжээ ХХК нэгдэж байна.
Энэ аян нь нийгэмд харилцан хүндэтгэл, жендэрийн тэгш байдал, хүний эрхийг дээдлэх соёлыг төлөвшүүлэх, гэр бүл, хамт олон, нийгмийн харилцаанд хүндлэл, ойлголцлыг нэмэгдүүлэх зорилготой юм.

24/03/2026

Мэдээлэл холбооны сүлжээ ХХК-ийн Сургалтын төв нь 2026 оны 03 дугаар сарын 16--20-ны өдрүүдэд энэ оны эхний удаагийн сэдэвт кабельчны мэргэжил олгох сургалтаа амжилттай зохион байгуулж, суралцагч нартаа олголоо. Тус сургалтанд: МХС ХХК-ийн Дундговь, Завхан, Баянхонгор, Архангай, Өмнөговь аймгийн газраас болон Skynetworks , SKYtel , Unitel Univision Mongolia, Хөвсгөл теле камерын хяналтын төв гэсэн байгууллагуудаас суралцаж төгслөө.
Сургалтад хамрагдсан нийт суралцагч нартаа цаашдын ажил хөдөлмөрт нь өндөр амжилт хүсэн ерөөе.

18/03/2026

Эрхэм хүндэт mobicom корпорацын хамт олон Та бүхэнд,

Монгол Улсад анхны үүрэн холбооны сүлжээг амжилттай нэвтрүүлж, харилцаа холбооны салбарын хөгжилд түүхэн шинэ хуудсыг нээсэн 30 жилийн ойн баярын мэндийг Мэдээлэл холбооны сүлжээ ХХК-ийн хамт олны зүгээс халуун дотноор хүргэж байна.

Та бүхэн өнгөрсөн хугацаанд технологийн дэвшлийг манлайлан, Монгол орны өнцөг булан бүрт хүмүүсийг холбож, мэдээллийн хүртээмжийг нэмэгдүүлэхэд үнэтэй хувь нэмэр оруулж ирсэн билээ. Энэхүү 30 жилийн замнал нь зөвхөн байгууллагын амжилт төдийгүй Монгол Улсын харилцаа холбооны салбарын хөгжлийн бахархалт түүх юм.

Цаашид ч Та бүхэн инноваци, чанар, найдвартай байдлыг эрхэмлэн, шинэ үеийн дэвшилтэт технологийг нэвтрүүлж, салбарын хөгжлийг үргэлжлүүлэн манлайлах болно гэдэгт итгэл төгс байна.

Та бүхэнд эрүүл энх, аз жаргал, улам их амжилт бүтээлийн дээдийг хүсэн ерөөе.

30 жилийн ойн баярын мэнд хүргэе!

Хүндэтгэсэн,
Мэдээлэл холбооны сүлжээ ХХК

18/03/2026

🪖 Галын шугамд ч үл шантрах зориг,
Амь биеэ үл хайрлах тангараг,
Эх орныхоо төлөө бүхнээ зориулах тэр л ариун сэтгэл —
энэ бүхэн Монгол цэргийн мөн чанар билээ.

Цаг үе улиран өнгөрсөн ч
эр зориг, үнэнч зүтгэл хэзээ ч бөхдөггүй.

✨ ОРЧИН ЦАГИЙН ЗЭВСЭГТ ХҮЧИН ҮҮСЭН БАЙГУУЛАГДСАНЫ ТҮҮХТ 105 ЖИЛИЙН ОЙ,
МОНГОЛ ЦЭРГИЙН ӨДРИЙН БАЯРЫН МЭНДИЙГ ӨРГӨН ДЭВШҮҮЛЬЕ!

Эх орон мөнх байг