Essential Mobile -YE-U

09/02/2022

Programming ဆိုတာ ဘာလဲ
−−−−−−−−−−−−−−−−−−−−−−
Programming ဆိုတာကို မြန်မာလို အဓိပ္ပါယ် ဖွင့်ရရင် ညွှန်ကြားချက် အစီအစဉ်ချခြင်း ဒါမှမဟုတ် ခိုင်းစေချက် အစီအစဉ်ချခြင်းလို့ ပြောရင် ရမယ်ထင်တယ်။ အဲ့လို အစီအစဉ်တွေချတာ ဘာလုပ်ဖို့လဲဆိုရင် ပြဿနာ ဖြေရှင်းဖို့ပါပဲ။ ပြဿနာဆိုတာ ဘာလဲ နောက်မှ ဆက်ပြောမယ်နော်။

အဲ့တော့ အစီအစဉ်ချခြင်းဆိုတာက ကွန်ပြူတာတွေ၊ ဖုန်းတွေကို ဘာပြီးရင် ဘာလုပ်။ ဘာတွေ့ရင် ဘာပြော။ ဒီတန်ဖိုးနဲ့ နီးစပ်ရင်တော့ ဒီအဖြေဆိုပြီးပြ။ ဘယ်ခလုတ်နှိပ်လိုက်ရင် ဘယ်ကိုရွေ့။ ဘယ်လို ပြဿနာဆိုရင် ဘယ်လိုတွက်ချက်ပြီး ဖြေရှင်း။ အစရှိသဖြင့် လုပ်ဆောင်သင့်တာကို အလိုအလျောက်လုပ်သွားဖို့ ညွှန်ကြားချက်တွေရေးထားလိုက်တယ်။ အဲ့ဒီလို ညွှန်ကြားချက်တွေ၊ ခိုင်းစေချက်တွေကို ခဏခဏ ပြောနေစရာမလိုအောင် စနစ်တကျ ထုတ်ပိုးပြီး File တစ်ခုဖန်တီးလိုက်ရာကနေမှ Software/Program ဆိုတာ ဖြစ်လာတာပေါ့။ အဲ့တော့ Programming ဆိုတာ ခိုင်းစေချက်တွေကို တန်းစီရေးထားတဲ့ File လေးတစ်ခု ဖန်တီးတာလို့ အလွယ်တကူ နားလည်လိုက်လို့ရပါတယ်။

အဲ့လို Program လေး တစ်ခုဖြစ်လာပြီဆိုရင် ကျွန်တော် အပေါ်မှာပြောခဲ့သလို ပြဿနာတွေ ဖြေရှင်းပေးနိုင်တော့မယ်။ ပြဿနာဆိုတာက အခက်အခဲတစ်ခုခုကို ဆိုလိုချင်တာ။ ဥပမာအားဖြင့် ကျွန်တော်တို့ အရင်ခေတ်က စာပို့ချင်တယ်ဆိုရင် ဘယ်လို လုပ်ရမလဲ။ အရင်ဆုံး စာရေးရမယ်။ ပြီးတော့ စာအိတ်ဝယ်ရမယ်။ ပြီးရင် တံဆိပ်ခေါင်းဝယ်ကပ်ရမယ်။ ပြီးတော့ စာတိုက်သွားပြီးပို့ရမယ်။ စာတိုက်ရောက်တာနဲ့ ကိုယ်ပို့ချင်လူဆီတန်းမရောက်ဘူး။ ကြာထဲမှာ စာလာသိမ်းတာတွေ၊ စာရောက်သွားတာတွေ၊ အဆင့်တွေ အများကြီးရှိသေးတယ်။

ဆိုတော့ ဒါကဘာလဲဆိုရင် ပြဿနာတစ်ခုပဲ။ ဒီပြဿနာကို ဘယ်လိုဖြေရှင်းလိုက်ကြလဲဆိုတော့ Email ဆိုတဲ့ Program နဲ့ ဖြေရှင်းလိုက်တယ်ဆိုပါတော့။ အခုပို့တာနဲ့ တစ်ခါတည်းတန်းရောက်ပဲ။ ကြားထဲမှ ဘာမှ စောင့်နေစရာမလိုတော့ဘူး။ Email ဆိုတဲ့ Program လေးကလဲ သူ့အလိုလို ကွန်ပျူတာက မွေးလိုက်လို့ ထွက်လာတာတော့ မဟုတ်ဘူး။ လူက ဘယ်လို အလုပ်မျိုးတွေ လုပ်သွားဆိုပြီး ခိုင်းစေချက်တွေကို သေသေချာချာရေးပေးလိုက်လို့ Email ဆိုတာလေးရလာတာ။ ဒါဟာ Programming ရဲ့ သဘောတရားပါပဲ။

ဒါပေမယ့် ကွန်ပြူတာကို ခိုင်းဖို့ ရည်ရွယ်ပြီး ရေးရတဲ့ ခိုင်းစေချက်တွေဖြစ်ဖို့က မြန်မာစာ၊ အင်္ဂလိပ်စာ တွေနဲ့ သွားပြီး Program ရေးလို့ မရပါဘူး။ ကွန်ပြူတာနားလည်တဲ့ Low-level Machine Language ဖြစ်တဲ့ Binary Code 0 1 တွေသုံးပြီး Program ရေးပြီး ခိုင်းရတာပေါ့ဗျာ။ ဥပမာ A လို့ပြောချင်ရင် 01000001။ ဒီလိုဖော်ပြပေးမှ ကွန်ပျူတာက A လို့သိမယ်။ ဆိုတော့ လန့်သွားသလား။

မလန့်ပါနဲ့နော်။ အခုခေတ်မှာ Program ရေးဖို့အတွက် ၁ တွေ ၀ တွေ အမြဲတမ်း သုံးနေစရာ မလိုတော့ပါဘူး။ ရှေးရှေးတုန်းကတော့ ဒီလိုလုပ်ခဲ့ရတာပေါ့။ ဒီနေ့ခေတ်မှာတော့ဖြင့် Programming Language တွေဟာ နာမည် အမျိုးမျိုးနဲ့ မြောက်များစွာ ရှိပါတယ်။ လိုချင်တဲ့ Software အမျိုးအစား ရဖို့ လိုအပ်တဲ့ Programming Lanugage ကို အသုံးပြုပြီး ရေးသားလို့ ရပါတယ်။ သူတို့ကမှ တစ်ဆင့် ကွန်ပြူတာဘာသာစကား 0 1 တွေကို ဘာသာပြန်ပေးနိုင်တဲ့ အတွက်ကြောင့် ကျွန်တော်တို့ ဒီကိစ္စ စိတ်ပူစရာ မလိုပါဘူး။ ကျွန်တော်တို့ လိုချင်တဲ့ Software တစ်ခုရဖို့ Programming Language တစ်ခုခုကို အသုံးပြုပြီး ကွန်ပျူတာကို ခိုင်းလိုက်ရင် ရသွားပါပြီ။

Programming Language က ဘယ်လိုမျိုးလဲ ဆိုတာကိုတော့ အသေးစိတ်လေး နောက်မှထပ်ပြောပြပါမယ်။ အခုလောလောဆယ်မှာတော့ Programming ဆိုတဲ့ အလုပ်က ဘာကိုပြောတာလဲကို သဘောပေါက်သွားမယ်လို့ထင်ပါတယ်ခင်ဗျ။

အကယ်၍ Programming ကို စိတ်ဝင်စားတယ်။ လူတွေရဲ့ ပြဿနာတွေကို Program ရေးပြီး ဖြေရှင်းပေးချင်တယ်ဆိုရင် ကျွန်တော်ကိုယ်တိုင် ပရိုဂရမ်းမင်းကို သူငယ်တန်းက စပြီး သင်ပေးပါတယ်နော်။ သင်တန်းစုံစမ်းလိုရင် (m.me/onezeromm) ကို ဆက်သွယ်နိုင်ပါတယ်။

ကျွန်တော်ပြောခဲ့တာ လိုအပ်ချက်များ ရှိပါက ဝင်ရောက်ထောက်ပြဆွေးနွေး မေးမြန်းနိုင်ပါတယ်နော်။ သဘောကျ နှစ်သက်ခဲ့တယ်ဆိုရင် Like, Follow and Share လေးလဲ လုပ်ပေးသွားပါဦးခင်ဗျာ။

ကျေးဇူးတင်ပါတယ်ခင်ဗျာ။
−တစ်သုည−

02/02/2022

အိမ်တွေ စက်ရုံတွေ အလုပ်ရုံတွေမှာ အသုံးပြုနေတဲ့
MCB ( Miniature Circuit Breaker )
အကြောင်းလေး Share လေးလုပ်ချင်ပါတယ်
-MCB တွေကို Switching device
တစ်ခုအနေနဲ့အသုံးပြုပြီး overload နှင့် short circuit ကဲ့သို့သောပုံမှန်မဟုတ်သောအခြေအနေများကို
ကာကွယ်ဖို့အတွက်အသုံးပြုပါတယ်။
MCB ကိုအသုံးပြုမယ်ဆိုရင် Shock Current အခြေနေနဲ့ Overload အခြေနေကို နားလည်ဖို့ရန်လိုအပ်ပါတယ်

1.Shock Current ဆိုတာဘာလဲ
Shock Current ဆိုတာ နားလည်ဖို့
Single Phase and Three Phaseကို သိထားဖို့လိုအပ်ပါတယ်
Single Phase (2 Wire)မှာဆိုရင်
Line (အပူကြိုး) နဲ့ Neutral (အအေးကြိုး )
ပါဝင်ပြီး
Three Phase (4 Wire) မှာဆိုရင် Line 1 , Line 2 , Line
3 , Neutral တို့ပါဝင်ပါတယ်
Shock Current ကို ဆက်ပြောပါ့မယ့်
Shock Current ကို ဖြစ်ပေါ်စေတဲ့ အကြောင်းရင်း သုံးခုရှိပါတယ် ။
a . Line နဲ့ Neutral ထိရင်ဖြစ်စေ
b. Line နဲ့ Line ထိရင်ဖြစ်စေ
c. Line နဲ့ Ground ထိသည်ဖြစ်စေ
Shock Current ကိုဖြစ်ပေါ် စေပါတယ်

2. Over Load ဆိုတာဘာလဲ
Breaker သတ်မှတ်ထား သော Current (Ampere) ထက် Load ရဲ့ Current (Ampere) ပို သုံးခဲ့မယ်ဆိုရင်
Over Load ကို ဖြစ်ပေါ်စေပါတယ် ။
Load ဆိုတာ လျှပ်စစ်စွမ်းအင်မှ အခြားစွမ်းအင်တစ်ခုသို့ ကူးပြောင်းပေးသောအရာ ဖြစ်ပါတယ်။

- MCB တွေကို အသုံးပြုနိုင်ဖို့ Name Plate
ကြည့်တက်ဖို့လည်း လိုအပ်ပါတယ်။ (See Photo)
- MCB တွေမှာ 1Pole,2Pole,3Pole ,4 Pole ဆိုပြီး
အမျိုးစား 4 မျိုးနဲ့ ထုတ်လုပ်ထားပါတယ်။
- MCBတွေဟာ 100Ampereအောက်မှာသာရှိပါတယ်။
- MCBတွေကို Standard Code - IEC 60947-2 နဲ့ခွဲခြားသိနိုင်ပါတယ်။

Curve type ဘယ်နစ် မျိုး ရှိလဲ
*******************************
- အိမ်တွေ ရုံးတွေ သုံးဖို့ အတွက် ၃ မျိုးရှိပါတယ်။
- အသုံးများတဲ့ Curve type B type ,C type ,D type
တွေဖြစ်ပါတယ် ။
- သတ်မှတ်ချက်တွေ ကတော့
B type (control and electronic loads
တွေမှာအသုံးများပါတယ် )
- C type (Normal standard loads such as
heater, lighting တွမှာအသုံးများပါတယ် )
- D type (loads with a high inrush current
such as motors, transformers, etc
တွေမှာအသုံးများပါတယ်.)
- အခုနောက်မှာ တခြား အမည် နဲ့ curve type တွေလဲ ထွက်လာပါတယ်။ equivalent ကိုကြည့်ပြီးရွေးရမှာပါ။
- အိမ်တွေ မှာဆိုရင်တော့ B , C type ကိုပဲ အသုံးများပါတယ် ။ အဓိကကတော့ C type ကို အသုံး များပါတယ် ။ C type ကို အဓိကထားအသုံးပြုပါတယ်။ B type ကို သုံးချင်ရင်တော့ TV, computer socket တွေ မှာထားပါတယ်။အိမ်တွေ မှာ တပ်ရင် တော့ C type ကိုသာ General use အနေ နဲ့တပ်ရင် ပို သင့်တော်ပါတယ်။

Credit:

02/02/2022

Electricity နဲ့ပတ်သက်ပါက ဂရုစိုက်ရမည့် အချက်များ
==============================

၁။ Electricity နဲ့ပတ်သက်ပြီး လုပ်ကိုင်မည့် သူများအနေဖြင့် ၎င်းတို့ ပတ်ဝန်းကျင်တွင် စိုစွတ်သော အခြေအနေများ ၊ ရေများ မရှိရပါ။ Electrical Equipment များနှင့် Circuit Board များအား ရေစိုသော လက်များဖြင့် ကိုင်တွယ်ခြင်း လုံး၀ မပြုလုပ်ရပါ။ စိုစွတ်နေသော အခြေအနေသည် လျှပ်စစ်စီးဆင်းမှုကို ပိုမို ဖြစ်ပေါ်စေပါသည်။

၂။ Electronic ပစ္စည်းများ အစိတ်အပိုင်းများတွင် တပ်ဆင်အသုံးပြုသော Power Cable များ ၊ တစ်နေရာမှ နောက်တစ်နေရာသို့ ဆက်သွယ်ရာတွင် အသုံးပြုသော ဝါယာကြိုးများအား ပေါက်ပြဲနေသော ဝါယာကြိုးများ ၊ အပေါ်ယံ Insulation များ အနေဖြင့် ပျက်စီးနေသော ဝါယာကြိုးများအား အသုံးမပြုသင့်ပေ။

၃။ Electricity နဲ့ပတ်သက်ပြီး ပြုပြင်ခြင်း ၊ အစားထိုးခြင်း စသော အလုပ်များ လုပ်ဆောင်ရာတွင် Main Panel ရှိ Main Switch ကို ပိတ်ပြီးမှသာ ဆက်လက်ပြီး အလုပ်လုပ်ဆောင်ပါ။

၄။ Electricity နဲ့ ပတ်သတ်ပြီး လုပ်ကိုင်နေသော အချိန်တိုင်း Insulating သေချာစွာ ပြုလုပ်ထားသော Tools များကို အသုံးပြုပါ။

၅။ အချို့သော Electrical Equipment များသည် မည်သည့်အခြေအနေ ၊ မည်သည့် အနေအထားတွင် Shock ဖြစ်စေနိုင်သည် ဟူသော အချက်အား ရေးသားထားပါတယ်။ အဆိုပါ သတိပေး ဖော်ပြထားသော အချက်များအား သေချာစွာလိုက်နာပြီး လုပ်ဆောင်ရပါမည်။

၆။ Electricity နဲ့ပတ်သက်ပြီး အလုပ်များ လုပ်ဆောင်ရာတွင် Insulation ဖြစ်သော လက်အိတ်များ ၊ မျက်မှန် စသည်တို့ကို တပ်ဆင်ပြီး လုပ်ဆောင်ရပါမည်။

၇။ Voltage ကို Store ပြုလုပ်စေနိုင်သော အီလက်ထရောနစ်ပစ္စည်းများအား ပြုပြင်ရာတွင် သေချာစွာ ဂရုစိုက်ပါ။ အဆိုပါ Store ပြုလုပ်ထားသော Component များ ၊ Circuit အစိတ်အပိုင်းများအား ပထမဦးစွာ Store ပြုလုပ်ထားသော Voltage များ ပြန်လည်ထုတ်ရပါမည်။ အဆိုပါ Voltage တန်ဖိုးများသည် အီလက်ထရောနစ်ပစ္စည်းအား Plug ဖြုတ်ထားသော်လည်း ဆက်လက်တည်ရှိနေနိုင်ပါသည်။ တွဲလောင်းကျနေသော ဝါယာကြိုးများအား ၊ တစ်နေရာမှ နောက်တစ်နေရာသို့ သွယ်တန်းထားသော ဝါယာကြိုးများလုပ်ဆောင်ရာတွင် Voltage တန်ဖိုးရောက်ရှိခြင်း ရှိ / မရှိအား သေချာစွာ စစ်ဆေးပြီးမှသာ ဆက်လက်လုပ်ဆောင်ရပါမည်။

၈။ Electricity နဲ့ပတ်သက်သော လုပ်ငန်းများဆောင်ရွက်ရာတွင် စတီးလှေကားများနှင့် အလူမီနီယံလှေကားများအား အသုံးမပြုသင့်ပါတယ်။ အဆိုပါ လှေကားများအနေဖြင့် Current သည် လူ့ခန္ဓာကိုယ်မှတဆင့် လှေကားကို ဖြတ်စီးသွားပြီး မြေကြီးဆီသို့ စီးဝင်သွားခြင်းဖြင့် လုပ်ဆောင်သူအား Shock ဖြစ်စေနိုင်ပါသည်။ အဆိုပါ လှေကားများနေရာတွင် သစ်သားလှေကားဖြစ်စေ ၊ ဝါးလှေကား ဖြစ်စေ၊ Fiberglass လှေကားဖြစ်စေ အသုံးပြုလုပ်ဆောင်သင့်ပါသည်။

၉။ အသုံးပြုမည့် ဝါယာကြိုး၏ Gauge တန်ဖိုးနှင့် ပတ်သက်သော အချက်အလက်များအား သေချာစွာ သိရှိထားရပါမည်။

၁၀။ အိမ်တွင်း Electricity နဲ့ပတ်သက်သော အခြေအနေများတွင်ဖြစ်စေ ၊ အခြား လုပ်ငန်းသုံး Electricity နဲ့ပတ်သက်သော လုပ်ငန်းများတွင် ဖြစ်စေ သင့်တော်သော Current Rating ရှိသည့် Fuse (သို့မဟုတ်) Breaker များအား တပ်ဆင်အသုံးပြုသင့်ပါသည်။ ထိုသို့ အသုံးပြုမှသာ Short Circuit(Over Current စီးဆင်းမှု) ဖြစ်ပေါ်လာပါက အဆိုပါ Fuse (သို့မဟုတ်) Breaker မှတဆင့် Over Current အား မစီးဆင်းစေခြင်းဖြင့် ကာကွယ်နိုင်မည်ဖြစ်ပါသည်။

၁၁။ Electricity နဲ့ပတ်သက်ပါက မြေအောက် Cable ကြိုးများ အသုံးပြုခြင်းကို သေချာစွာ ဂရုစိုက်ရမည်ဖြစ်ပါသည်။ မြေကြီးဆိုသည်မှာ အစိုဓာတ်ဖြစ်ပါသည်။ အဆိုပါ မြေကြီး အစိုဓာတ်သည် လျှပ်စစ်စီးမှုအား လွယ်ကူစွာ ဖြစ်ပေါ်စေနိုင်သော အရာဖြစ်ပါသည်။ ထို့ကြောင့် မြေအောက်မှ တဆင့် Electricity နဲ့ပတ်သက်သော လုပ်ဆောင်ချက်များတွင် ဝါယာကြိုး၏ Insulation ကို သေချာစွာဖြင့် လုပ်ဆောင်ပေးရမည်ဖြစ်ပါသည်။ နောက်တစ်ချက်အနေဖြင့် မြေကြီးအား ဂေါ်ပြားများ ၊ ပေါက်တူးများဖြင့် တူးဆွခြင်း ပြုလုပ်ရာတွင် မြေအောက် ဝါယာကြိုးများအား ထိခိုက်မိပြီး Insulator များ ပေါက်ကာ Short ဖြစ်ပေါ်စေနိုင်ပါသည်။

၁၂။ Power Rating များသော အီလက်ထရောနစ်ပစ္စည်းများ ၊ Volt တန်ဖိုး များသော အီလက်ထရောနစ်ပစ္စည်းများရှိ Circuit Board များမှ Capacitor များအား ဖြုတ်ရာတွင်ဖြစ်စေ ၊ လဲလှယ်ခြင်းပြုလုပ်ရာတွင်ဖြစ်စေ အဆိုပါ Capacitor တွင် သိုလှောင်ထားသော Voltage များအား ပြန်လည်ပြီး ထုတ်ပစ်ရမည်ဖြစ်ပါသည်။ ပါဝါအား ပေးမထားသော်လည်း အဆိုပါ Capacitor ထဲတွင် သိုလှောင်ထားသော Voltage တန်ဖိုးသည် ရှိနေမည်ဖြစ်ပါသည်။

ကျေးဇူးတင်ပါတယ်
Writer by
ကိုမျိုး (အီလက်ထရောနစ်)

Mobile phone shop

02/02/2022

Hard Disk

အဝိုင်းပြား အမာကြီး။ အင်း။

Hard Disk ဆိုပြီးထည့်ပြောနေစရာ လိုသေးလို့လားဗျာ

နည်းနည်းတော့ ပြောချင်ပါတယ်။ RAM က Data တွေကို Program တစ်ခု Run နေတဲ့အချိန်မှာ ခဏပဲ ထမ်းထားရပေမယ့်။ သူကတော့ သူ့ရဲ့ လုပ်ဆောင် နိုင်စွမ်း မပျက်မဆီး သေးသ၍ Data တွေကို သိမ်းထားပေးရပါတယ်။ OS(Windows) တွေရဲ့ Data တွေကလည်း သူ့ပေါ်မှာပဲ နေပါတယ်။ RAM ကလိုအပ်တဲ့ အချိန်မှာ လာတောင်းရင် ပေးလိုက်ပါတယ်။ သူ့ဆီကနေ ကူးပေးလိုက်တာပါ။ မူရင်း Data တွေကိုတော့ သူထဲမှာပဲ ထားထားတာပါ။ သူ့တာဝန်က Data တွေကို မပျောက်ဖို့ လိုတာကို။

သိပ်တော့ ထွေထွေထူးထူး ပြောစရာ မလိုပါဘူး။ ဒါပေမယ့် Hard Disk မှာလည်း Data သိမ်းတဲ့ စတိုင်ကွာပြီး အမျိုးအစားကွဲ ၂ ခု ရှိတယ်နော်။ အဲ့ဒီ အချက်ကြောင့် ထည့်ပြောရတာပါ။

Magnetic Drive(MD) နဲ့ Solid State Drive(SSD) ဆိုပြီး နှစ်မျိုးရှိတယ်ဗျ။ Magnetic က တစ်ကယ့်ကို သူ့နာမည် အတိုင်း သံလိုက်မှုန်တွေနဲ့ ခင်ဗျားတို့ Data တွေကို အသွင်းအထုတ် လုပ်ပေးတာ။ ဆိုလိုတာက အရမ်း Physical ဆန်တယ်။ နည်းနည်းတော့ ကြာတယ်ပေါ့။

SSD ကတော့ လျှပ်စစ်နဲ့ Transistor တွေကိုအဖွင့်အပိတ်လုပ်ပြီး သိမ်းတာဗျ။ ဒီဘဲကတော့ ခေတ်မီသွားပြီ။ လျှပ်စစ်နဲ့ လုပ်တဲ့ ကောင်ဆိုတော့ ဘာကွာသွားပြီလည်း။ အောင်မလေး 128 GB လောက်ကို ဈေးကြီးပေးဝယ်ရတယ်ဗျ။ ဒါပေမယ့် အသွင်းအထုတ် ကတော့ ပက်ပက်စက်စက် မြန်တယ်နော်။

အဲ့ MD နဲ့ SSD ကို တွဲပြီး တပ်သုံးလိုက်ရင်တော့ လန်ထွက်သွားတာပေါ့ဗျာ။ SSD တစ်လုံးမှာ OS(Windows) တင်ပြီး၊ နောက်တစ်လုံးမှာ Data သိမ်းရင်ပေါ့။ သုံးလုံးဆိုရင် ပိုလန်းတာပေါ့ဗျာ။

👇ဟုတ်ပြီ အဲ့ဒီလို အနေအထားလေးတွေနဲ့ ဘယ်အခြေအနေမှာ ဘာကိုသုံးသင့်သလဲ👇

- စာစီစာရိုက် သီးသန့် - အနည်းဆုံး MD 250GB 📈 အကောင်းဆုံး MD 500GB

- Photo Editing၊ သာမန် 2D၊ 3D ဂိမ်းတွေပါဆော့မယ် − အနည်းဆုံး MD 500GB 📈 အကောင်းဆုံး MD 1000GB and Above

- Video Editing၊ Engineering Softwares၊ နောက်ဆုံးပေါ် 3D Games တွေဆော့မယ် − အနည်းဆုံး MD 1000GB 📈 အကောင်းဆုံး 1xSSD 128GB (For OS' Data) + 1xMD 1000GB and Above

⚠️ဘာကိုသတိပြုဝယ်ရမလဲ⚠️

- Power Supply က ထောက်ပံ့နိုင်မှု ရှိမရှိ
- ရှိပြီးသား Hard Disk ကမလောက်လို့ နောက်တစ်လုံးထပ် ထည့်မယ်ဆိုရင် Mother Board မှာ SATA Port ကျန်မကျန်စစ်
- OS(Windows) က အရမ်းနိမ့်နေတဲ့ အခါမှာ 4000GB ကိုသွားထည့်လည်း သုံးလို့မရတာတွေ ဖြစ်တတ်တာကို သတိထားပါ

02/02/2022

GPU

Graphics Processing Unit လို့ အရှည် ခေါ်ပါတယ်။

သူက ဘာလဲဆိုတော့ CPU လိုမျိုးပဲ သူက တွက်နိုင်ချက်နိုင်တယ်။ ဒါပေမယ့် သူက ဘာကို အဓိက တွက်ချက်သလဲ ဆိုတော့ ကျွန်တော်တို့ Monitor မှာ မြင်နေရမယ့် ပုံရိပ်တွေကို အဓိက ဖန်တီးပေးဖို့ တွက်ချက်ပေးတယ်။ ဆိုတော့ နောက်တစ်နည်းပြောရရင် GPU က Monitor မှာ ပုံရိပ်ပေါ်လာဖို့ ဖန်တီးပေးတဲ့ ကောင်ကြီးလို့ သိထားလိုက်ရင်ရပြီ။ ထပ်ရှင်းအောင် ပြောရရင် သူက ကွန်ပျူတာ တစ်လုံးရဲ့ ပန်းချီဆရာတစ်ယောက်ပဲ။ CPU ကဆွဲခိုင်းလိုက်တဲ့ ပုံတွေကို ကျွန်တော်တို့ Monitor ပေါ်မှာ အချိန်နဲ့ တစ်ပြေးညီ လိုက်ဆွဲပေးနေတာ။ တစ်ခုပဲ CPU ကဆွဲခိုင်းတဲ့ အချိန်နဲ့ တစ်ပြေးညီပေါ်နေအောင် သွက်သွက်လက်လက် မြန်မြန်ဆန်ဆန် ဆွဲနေနိုင်ဖို့တော့ လိုတယ်။ မဟုတ်ရင် Game ထဲမှာ သေနတ်က ပစ်လိုက်ပြီ။ ကျည်ဆံက အပိုင်းပိုင်းပြတ်ပြီး ထွက်သွားတာမျိုးပေါ့။ ဒီလိုဖြစ်ရတာက GPU က နှေးပြီး အချိန်မီလိုက်မဆွဲပေးနိုင်တော့လို့ပါ။ ဒါဆိုရင်တော့ သဘောပေါက်လောက်မယ်ထင်ပါတယ်။

အဲ့အတွက် Game တွေဆော့တယ်၊ Video Editing တွေလုပ်တယ်၊ 3D တွေဆွဲတယ်၊ အထူးသဖြင့် Graphic Image တွေ အကြီးအကျယ်ဖန်တီးတဲ့နေရာမှာ သူက မရှိမဖြစ်ပဲ။ သူမရှိရင် ကျွန်တော်တို့ Monitor မှာ ဘာပုံမှ ပေါ်လာမဟုတ်ဘူး။ သူ့ကို ပုံရိပ်တွေနဲ့ ပတ်သက်မှပဲ သုံးတာတော့ မဟုတ်ပါဘူး။ တစ်ခြား သုံးလို့ ရတဲ့နေရာတွေတော့ ရှိပါသေးတယ်။ ဥပမာ Bitcoin Mining လုပ်တာတို့ ဘာတို့လိုပေါ့။ အဲ့အကြောင်းတွေတော့ မပြောတော့ဘူးနော်။

ဒီနေ့အထိတော့ Display ပြဖို့ကို Mother Board တော်တော်များများမှာ On Board GPU ဆိုပြီးပါလာပါတယ်။ ဆိုလိုတာက GPU တွေကို RAM လိုမျိုးသီးသန့်ကြီး မဖြစ်မနေ ထည့်ကိုထည့်ရမှာ မဟုတ်ပါဘူး။ Mother Board ဝယ်လိုက်တာနဲ့ ပါနေမှာပါ။ အဲ့ဒီ ပါလာပြီးသား On Board GPU နဲ့တင် တော်တော်တော့ အလုပ်ဖြစ်နေပါပြီ။ သာမန် စာရိုက်တာတို့၊ 2D Auto Cad လောက်ဆွဲတာတို့၊ 1080p HD ရုပ်ရှင်လောက်ကြည့်တာတို့၊ Dota 2 ကို Graphic အနိမ့်ဆုံး လျှော့ပြီးဆော့တာတို့ လောက်ပေါ့။

ဘယ်လို အခြေအနေဆိုရင် ဝယ်သုံးသင့်ပြီလည်း ဆိုတာကို ပြောရရင် ကိုယ်က Graphic အကြမ်းစားကြီးနဲ့ Game တွေဆော့ချင်ပြီ၊ Programmer ၊ Multi Tasker ကြီးဖြစ်နေပြီ၊ Monitor တွေကို Extend လုပ်ဖို့ လိုလာပြီ၊ 3D တွေ၊ AR တွေ ဖန်တီးချင်လာပြီ ဆိုရင်တော့ ဝယ်ရပါမယ်။ On Board နဲ့ အလုပ်မဖြစ်တော့ပါဘူး။ On-Board က အဲ့လောက် မထောက်ပံ့နိုင်ပါဘူး။

👇အဲ့ဒါဆိုလည်း ဝယ်သုံးရမယ့် အနေအထားလေးတွေပြောပြပါ ဆိုရင်👇

- စာစီစာရိုက် သီးသန့် - အကောင်းဆုံး Mother Board On-Board Display Card(VGA Support)

- Photo Editing၊ သာမန် 2D၊ 3D ဂိမ်းတွေပါဆော့မယ် − အနည်းဆုံး Intel HD Graphics (VGA, HDMI Support) 📈 အကောင်းဆုံး NVDIA Geforce 630 , AMD Radeon R7 240 (VGA, DVI, HDMI Support)

- Video Editing၊ Engineering Softwares၊ နောက်ဆုံးပေါ် 3D Games တွေဆော့မယ် − အနည်းဆုံး NVDIA Geforce GT 710+ Series(AMD Equivalent)(VGA, DVI, HDMI Supports) 📈 အကောင်းဆုံး NVDIA Geforce GTX Series(AMD Equivalent)(VGA, DVI, HDMI Supports) and Above

⚠️ဘာကိုသတိပြုဝယ်ရမလဲ⚠️

− လက်ခံတဲ့ Slot ရှိဖို့လိုပါမယ်။
− Monitor Extend လုပ်ဖို့လိုရင် Display Port များများ ထောက်ပံ့တာကို ရွေးရပါမယ်။

02/02/2022

CPU

Central Processing Unit လို့လဲခေါ်တယ်။ Processor လို့လည်းခေါ်တယ်။ ကွန်ပျူတာရဲ့ ဦးနှောက်လို့လဲခေါ်တယ်။

ဟုတ်ပြီ အဲ့ကောင်ဘာကောင်လဲ

ဒီကောင်ရှိလို့သာ ခင်ဗျား Computer ဆိုတာကို ခိုင်းစားလို့ရနေတာ။ သူက RAM လောက် အရေးပါလား။ အဲ့လိုယှဥ်ပြီးပြောရမယ်ဆိုရင် သူက ခွဲစိတ်ဆရာဝန်။ RAM က ခွဲစိတ်တဲ့နေရာမှာ လိုအပ်တဲ့ ပစ္စည်းတွေကို တင်ထားတဲ့ ဗန်း။ လူနာက Program။ ပစ္စည်းတွေကို တင်မယ့် ဗန်းမရှိခဲ့ရင် ပစ္စည်းတွေ စုပြုံထားတဲ့ ဗီဒိုကြီးထဲကနေ ခွဲစိတ်ဆရာဝန်က သွားသွားထုတ်ရမယ်။ ဆရာဝန်မရှိခဲ့ရင်တော့ အဲ့လူနာက ဒီတိုင်းဂန့်သွားမယ်။ အဲ့တော့ သူ့နေရာနဲ့သူ အကုန်အရေးပါပါတယ်။ အဲ့လိုသဘောမျိုးကို မြင်ပြီဆိုရင် CPU ဟာ Computer ပေါ်မှာ ဘယ်လိုအလုပ်လုပ်လဲပြောပြပါမယ်။

သူအလုပ်လုပ်တဲ့ ပုံစံမပြောသေးခင် CPU မှာပါတဲ့ Cache Memory အကြောင်းလေး နည်းနည်းပြောပြမယ်။ အဲ့တာလေးက RAM နဲ့တူတယ်။ RAM လောက်တော့ သိမ်းဆည်းနိုင်တဲ့နေရာ မများဘူး။ ဒါပေမယ့် RAM ထက် အလုပ်လုပ်တာ ပိုမြန်တယ်။ RAM ရှိရဲ့သားနဲ့ ဘာလို့ သူ့ကို ထပ်ထည့်ထားလဲဆိုတော့ RAM ပေါ်က မ လာတဲ့ တစ်ချို့ Data တွေ၊ ခိုင်းစေချက်တွေကို မြန်မြန်ဆန်ဆန် လုပ်လို့ရအောင် CPU နဲ့အနီးဆုံးနေရာမှာ ခဏသိမ်းထားဖို့။ အဲ့ကြမှ ကွန်ပျူတာက ပိုမြန်လာမှာပေါ့။ ခုနက ခွဲစိတ်ခန်းဥပမာအတိုင်း ဆက်ပြောရရင် (CPU)ဆရာဝန်က (RAM)ဗန်းပေါ်မှာရှိတဲ့ (Data)ပစ္စည်းတွေကို သွားယူနေမယ့်အစား သူ့ (Cache Memory)အိတ်ကပ်ထဲ နိုင်သလောက်လေးထည့်ထားလိုက်ရင် ပိုမြန်မြန်ထုတ်သုံးလို့ လွယ်မှာပေါ့။ အဲ့လိုသဘောပဲ။ အဲ့အတွက်ကြောင့် CPU တွေမှာလဲ Cache Memory များရင် ကွန်ပျူတာက အလုပ်လုပ်တာ ပိုမြန်ပါတယ်။ ဒါကတော့ CPU မှာပါတဲ့ Cache Memory အကြောင်းလေး။

ဒါဆိုရင် CPU အလုပ်လုပ်ပုံကို ဆက်ကြည့်ကြည့်မယ်။ တစ်ကယ်တော့ CPU က User က ဘာလုပ်လိုက်ပါဆိုပြီး ခိုင်းလိုက်တဲ့ အချိန်ကြမှသာ အလုပ်ထလုပ်တာပါ။ Photoshop မှာ မျဥ်းတစ်ကြောင်းစဆွဲရင် CPU ကမျဥ်းပေါ်လာအောင် ဖန်တီးပေးလိုက်ပါတယ်။ ပြီးသွားရင် သောက်ကျင့်ယုတ်ပြီး ပေါ်လာတဲ့ မျဥ်းကြောင်းကို RAM ပေါ်သွားတင်လိုက်တယ်။ အမယ် ပြီးတော့ သူက အေးဆေးပြန်နေနေတာ။ RAM ကတော့ Program တွေ မပိတ်မချင်း Data တွေကို ပိုက်ပြီးတော့ နေနေရတာပေါ့။

အရမ်းသွက်တဲ့ Processor တွေကတော့ ဆွဲလိုက်တဲ့ မျဥ်းကြောင်းကို အမြန်ဆုံးပေါ်အောင် လုပ်ပေးနိုင်တယ်။ Format Factory လို ဆော့ဝဲလ် မျိုးတွေဆိုရင်တော့ CPU က Format ပြောင်းပေးတဲ့ အလုပ်ကို လုပ်ပေးနေတယ်။ ပိုမြန်တဲ့ Processor ဆိုရင် မြန်မြန်ပိုပြီးတယ်။ နှေးရင်နှေးတယ်ပေါ့။ CPU တစ်ခု မြန်တယ် နှေးတယ်ဆိုတာကို ဘယ်လို တိုင်းတာလဲဆိုတော့ Hz(Cycle Per Second) ရယ် Cores/Thread တွေရယ်နဲ့ တိုင်းတာကြပါတယ်။ အကြမ်းဖျဉ်းကြည့်မယ်ဆိုရင် အဲ့တာတွေ ပိုများတော့ ပိုကောင်းပါတယ်။ ဒါပါပဲ။

ပြန်အနှစ်ချုပ်ရရင် Program တစ်ခုခုအလုပ်လုပ်နေရတဲ့ အချိန်တွေမှာ Processor ကို အဓိကအသုံးပြုပါတယ်။ User က Video Edit ပြင်နေရင်းနဲ့ ဒီတိုင်းထားခဲ့ပြီး ထမင်းသွားစားရင် Processor ကလည်းအလုပ်မလုပ်တော့ဘူး။ RAM ကတော့ အဲ့ဒီ Video Data တွေကို ထမ်းတင်ထားရတာပေါ့နော်။ အဲ့ Video ကို Export လုပ်ပြီဆိုတော့မှ CPU က အလုပ်ပိုလုပ်ရတာ။

ဒါပေမယ့် Core i7 ကြီးသုံးထားပြီး RAM 4GB နဲ့ဆိုလည်း မဖြစ်သေးပါဘူး။ ဗန်းပေါ်မှာ တင်စရာ နေရာမရှိတော့ရင် Operation ကြီးရပ်သွားမှာပေါ့။ ဗန်းကတော့ နေရာအများကြီး ရှိလေလေ ပိုကောင်းလေပေါ့ဗျာ။ Pentium နဲ့ RAM 8GB လောက်ဆိုလည်း အလုပ်ပိုလုပ်နိုင်ပါတယ် ဆိုတဲ့ သဘောမျိုးပါ။

👇ကဲ အဲ့ဒါဆိုရင် CPU ကို ဘယ်လောက် သုံးသင့်သလဲ ဆိုတာကို အကြံပြုချက်လေးတွေပေးမယ်👇

Processor Brand တွေထဲက Intel Brand ကိုပဲ ညွှန်းပေးလိုက်ပါတယ်။ တစ်ခြား Brand တွေကို လိုချင်တယ်ဆိုရင် တူညီတဲ့ Core/Clock Speed တွေနဲ့ ယှဥ်ပြီး ဝယ်သုံးလို့ရပါတယ်။

- စာစီစာရိုက် သီးသန့် - အကောင်းဆုံး Intel Pentium(2 Cores/ 1.0-3.7 GHz)

- Photo Editing၊ သာမန် 2D၊ 3D ဂိမ်းတွေပါဆော့မယ် − အနည်းဆုံး Intel core 2 Duo(2 Cores/ 1.0 - 3.7 GHz) 📈 အကောင်းဆုံး Intel core i3(2-4 Cores/ 1.0 - 2.5 GHz)

- Video Editing၊ Engineering Softwares၊ နောက်ဆုံးပေါ် 3D Games တွေဆော့မယ် − အနည်းဆုံး Intel core i3(4 Cores/ 2.5 - 4.2 GHz) 📈 အကောင်းဆုံး Intel core i5(2-6 Cores/ 1.0 - 3.8 GHz), core i7, Core i9

⚠️ဘာကိုသတိပြုဝယ်ရမလဲ⚠️

− ကိုယ့်မှာရှိတဲ့ Mother Board နဲ့ကိုက်မကိုက် သတိထားရပါမယ်။

02/02/2022

RAM

Random Access Memory ဆိုပြီး အရှည်ခေါ်ပါတယ်။

သူကဘာလည်း

Program တစ်ခု စပြီးပွင့်တာနဲ့ RAM ပေါ် အရင်တင်တာပါ။ အဲ့ဒီ Program ကိုအသုံးပြုနေသမျှ Data တွေကို RAM ပေါ်တင်ထားတာပါ။ Video ဖွင့်လိုက်လည်း RAM ပေါ်တင်လိုက်ပါတယ်။ Progressive Data (ဆင့်ပွားအချက်အလက်) များတဲ့ ဆော့ဝဲလ်တွေ သုံးမယ်။ ဘယ်လိုမျိုးလည်းဆိုတော့ Auto Cad၊ Photoshop၊ Video Editing၊ Browser စတဲ့ Software မျိုးတွေပေါ့။ Photoshop မှာ မျဉ်းတစ်ကြောင်းစဆွဲပြီ ဆိုတာနဲ့ RAM ပေါ်ကို စတင်ပါပြီ။ ကိုယ့်ရဲ့ပုံက ကြီးလာလေလေ RAM ပေါ်သိမ်းရတဲ့ Data များလာလေလေပါပဲ။ အဲ့လိုပါပဲ Browser မှာ Facebook ကို သုံးရင်း အောက်ကို ဆွဲရင်း ဆွဲရင်းနဲ့ RAM ပေါ်မှာ Data တွေ များလာပါလိမ့်မယ်။ အဲ့လိုဖြစ်ရင် Browser မှာ မလိုတဲ့ Tab တွေပိတ်လိုက်တာတို့၊ Refresh လုပ်လိုက်တာတို့ ပြန်လုပ်ပေးရပါတယ်။

နောက်ပြီးတော့ ကိုယ့်ဆီမှာ Storage ဘယ်လောက်ရှိရှိ RAM ပေါ်မှာ အရင်နေတာပါ။ Software တွေသုံးရင်း လေးလာရင် Hard Disk မှာ Data များနေလို့ ဖြစ်တာထက် RAM မလောက်ငှလို့ဆိုပြီးတော့ အကြမ်းဖျဉ်း သတ်မှတ်နိုင်ပါတယ်။ အဲ့တော့ အနှစ်ချုပ်အားဖြင့် RAM ဆိုတာက Software တွေ သုံးတိုင်း အဲ့ဒီ Software တွေရဲ့ လက်ရှိအသုံးပြုနေတဲ့ Data တွေက သူ့ဆီမှာ နေရာယူပါတယ်လို့ပဲ မှတ်ထားလိုက်ပါ။ Software မှာ သုံးနေတဲ့ Data တွေ များလာတာနဲ့ RAM မလောက်ရင် ကွန်ပျူတာကို ဆက်သုံးလို့ အဆင်မပြေနိုင်ပါဘူး။ ဒါပေမယ့် အဲ့ဒီ RAM ပေါ်မှာရှိနေတဲ့ Data တွေကလဲ ကွန်ပျူတာ ပိတ်လိုက်ရင်ပဲ ဖြစ်ဖြစ်၊ Software တွေပိတ်လိုက်ရင်ပဲဖြစ်ဖြစ် RAM ပေါ်က ဖျက်ပစ်လိုက်ပါတယ်။ Hard Disk တွေမှာလိုမျိုး အမြဲတမ်းတော့ နေရာမယူထားဘူး။ ပြီးတော့ မလိုအပ်ပဲ ကွန်ပျူတာမှာ RAM တွေ များနေစရာလဲ မလိုသေးပါဘူး။ စာစီစာရိုက်ကလွဲလို့ ကျန်တာ ဘာမှ မလုပ်တဲ့ ကွန်ပျူတာမှာ RAM 8 GB ကြီး စိုက်ထားစရာမလိုဘူးဆိုတဲ့ သဘောပေါ့။

အခုခေတ် မှာ Laptop ဖြစ်ဖြစ် PC ဖြစ်ဖြစ် အနည်းဆုံး RAM 2GB လောက်ကို ပါလာပါတယ်။ အဲ့တော့ GB များတော့ ဘာဖြစ်လည်း။ GB များတာနဲ့ အမျှ တစ်ချိန်တည်းမှာ Program အများကြီး ဖွင့်ထားနိုင်ပါတယ်။ ဘယ်လောက်ကြီးမားတဲ့ Project ဖြစ်ဖြစ် သက်တောင့်သက်သာ လုပ်နိုင်ပါတယ်။

အဲ့တော့ RAM ပမာဏကို ဘယ်လောက် ထည့်သင့်သလဲ

👇ဒီလိုလေးတွေ အကြံပြုချင်ပါတယ်👇

- စာစီစာရိုက် သီးသန့် -> အနည်းဆုံး 2GB - အကောင်းဆုံး 4GB

- Photo Editing၊ သာမန် 2D၊ 3D ဂိမ်းတွေပါဆော့မယ် -> အနည်းဆုံး 4GB - အကောင်းဆုံး 8GB

- Video Editing၊ Engineering Softwares၊ နောက်ဆုံးပေါ် 3D Games တွေဆော့မယ် -> အနည်းဆုံး 8GB - အကောင်းဆုံး 16,32,64 GB

⚠️ဘာကိုသတိပြုဝယ်ရမလဲ⚠️

- ကိုယ့်မှာရှိတဲ့ Mother Board နဲ့ကိုက်မကိုက်
- ကိုယ့်ဆီမှာ 4GB ရှိလို့ 8GB ထိ ထပ်တိုးချင်ရင်၊ ရှိပြီးသား 4GB ရဲ့ Clock Speed, DDR Version အတိုင်း ဝယ်ရပါမယ်။
- OS(Windows) ကို 64Bit သုံးထားမှ RAM ရဲ့ Size အပြည့်ကို အတိအကျ သုံးနိုင်ပါတယ်။