12/08/2026
ဓနသိဒ္ဓိဂါထာ ခေါ် ဂုဏ်တော် (၁၃) ပါးဘုရားရှိခိုးနှင့် ဘဝနေနည်း အနုပညာ 🌸
နေ့စဉ် မနက်၊ ည ဘုရားစင်ရှေ့မှာ ဒီဂါထာတော်ကို ရွတ်ဖတ်ပူဇော်တဲ့အခါ ပါးစပ်က အလွတ်ရွတ်ရုံသက်သက်မဟုတ်ဘဲ ဂုဏ်တော်တစ်ခုချင်းစီရဲ့ အဓိပ္ပာယ်ကို နှလုံးသွင်းပြီး အမြင့်မြတ်ဆုံးဖြစ်တဲ့ ဗုဒ္ဓါနုဿတိဘာဝနာ ပွားများနိုင်ပါတယ်။ ဒါဆိုရင် သာမန်ရွတ်တာထက် ပိုပြီး အစွမ်းထက် အကျိုးကြီးမားမှာ အသေအချာပါပဲ။
ဓနသိဒ္ဓိဂါထာတော်ရဲ့ အနက်အဓိပ္ပာယ်အကျဉ်းကို အရင် ဆင်ခြင်ကြည့်ကြရအောင်ပါ 🙏🍀🙏
အရဟံ ဗဟိအန္တဇယံ
သုဂတံ အ မိတံ ဝိရဇံ လ လိတံ
အ တုလံ စရဏံ တိဘဝူပသမံ
ယမကံ သုခ-ဒံ သရဏံ ပဏာမာမိ ဇိနံ
ဧတေန သစ္စဝဇ္ဇေန ဟောတုမေဇယ မင်္ဂလံ…
(မြန်မာပြန်)
၁။ အရဟံ – ပူဇော် အထူး ကို ခံယူတော် မူထိုက်သော မြတ်စွာဘုရား ကို ပဏာမာမိ-ရှိခိုးပါ၏။
၂။ ဗဟိ-အန္တ-ဇယ – အတွင်း-အပ ရန်ကို အောင်တော် မူသော မြတ်စွာဘုရား ကို ပဏာမာမိ-ရှိခိုးပါ၏။
၃။ သုဂတံ – ကောင်းသော စကားကို ဟောပြော တတ်သော မြတ်စွာဘုရား ကို ပဏာမာမိ-ရှိခိုးပါ၏။
၄။ အမိတံ – မနှိုင်းယှဉ်နိုင်သည့် တန်ခိုး ဗျာဋိဟာ ရှိသော မြတ်စွာဘုရား ကို ပဏာမာမိ-ရှိခိုးပါ၏။
၅။ ဝိရဇံ – ကိလေသာမြူ ကင်းတော် မူသော မြတ်စွာဘုရား ကို ပဏာမာမိ-ရှိခိုးပါ၏။
၆။ လလိတံ – တင့်တယ် သပ္ပါယ်တော် မူသော မြတ်စွာဘုရား ကို ပဏာမာမိ-ရှိခိုးပါ၏။
၇။ အတုလံ – အတု မရှိသော မြတ်စွာဘုရား ကို ပဏာမာမိ-ရှိခိုးပါ၏။
၈။ စရဏံ – အကျင့် စရဏနှင့် ပြည့်စုံတော် မူသော မြတ်စွာဘုရား ကို ပဏာမာမိ-ရှိခိုးပါ၏။
၉။ တိ-ဘဝူပ-သမံ – ဘုံသုံးပါး ၌ ကိလေသာငြိမ်းအေးသော မြတ်စွာဘုရား ကို ပဏာမာမိ-ရှိခိုးပါ၏။
၁၀။ ယမကံ – ရေမီး အစုံအစုံ တန်ခိုး ဗျာဋိဟာနှင့် ပြည့်စုံသော မြတ်စွာဘုရား ကို ပဏာမာမိ-ရှိခိုးပါ၏။
၁၁။ သုခဒံ – ချမ်းသာ ကို ပေးစွမ်းနိုင်သော မြတ်စွာဘုရား ကို ပဏာမာမိ-ရှိခိုးပါ၏။
၁၂။ သရဏံ – ကိုးကွယ် အားထားရာဖြစ်သော မြတ်စွာဘုရား ကို ပဏာမာမိ-ရှိခိုးပါ၏။
၁၃။ ဇိနံ – မာန်ငါးပါး ကိုအောင်မြင်သော မြတ်စွာဘုရား ကို ပဏာမာမိ-ရှိခိုးပါ၏။
🙏🙏🙏
မြတ်စွာဘုရားရှင်ရဲ့ ဂုဏ်တော်တွေဟာ ကိုးကွယ်ယုံကြည်မှု သက်သက်အတွက်တင်မကဘဲ ဦးဇင်းတို့ရဲ့ နေ့စဉ်ဘဝမှာ လက်တွေ့အသုံးချနိုင်တဲ့ အကောင်းဆုံးသော "ဘဝနေနည်း အနုပညာ" တွေပဲ ဖြစ်ပါတယ်။
ဂုဏ်တော် (၁၃) ပါးကနေ ပေးစွမ်းတဲ့ ဘဝသင်ခန်းစာတွေကို ဒီလို ဆင်ခြင်ကြည့်နိုင်ပါတယ်-
၁။ အရဟံ (ရိုးသားရဲရင့်ခြင်းအနုပညာ) ဆိတ်ကွယ်ရာမှာတောင် မကောင်းမှုကို မလုပ်တဲ့ မြတ်စွာဘုရားရှင်လိုပဲ၊ ဦးဇင်းတို့လည်း ကိုယ့်လိပ်ပြာကိုယ်လုံတဲ့ ဘဝမျိုး တည်ဆောက်ရပါမယ်။ လူတကာရှေ့မှာ ဟန်ဆောင်ကောင်းရုံမဟုတ်ဘဲ တစ်ယောက်တည်းရှိနေချိန်မှာတောင် စိတ်သန့်ရှင်းအောင် နေထိုင်ခြင်းဟာ လူသားတစ်ယောက်ရဲ့ အမြင့်မားဆုံး တန်ဖိုးပါပဲ။
၂။ ဗဟိ-အန္တ-ဇယ နှင့် ၁၃။ ဇိနံ (မိမိကိုယ်ကို အောင်နိုင်ခြင်း အနုပညာ)
လောကမှာ ပြင်ပရန်သူတွေကို အောင်နိုင်ဖို့ထက် ကိုယ့်စိတ်တွင်းက လောဘ၊ ဒေါသ၊ မောဟ၊ မာန ဆိုတဲ့ ကိလေသာရန်သူတွေကို အောင်နိုင်ဖို့က ပိုခက်ပါတယ်။ ပြင်ပအခက်အခဲတွေကို အပြစ်တင်နေမယ့်အစား မိမိစိတ်ကို နိုင်အောင် အရင်ထိန်းချုပ်နိုင်ခြင်းဟာ အကြီးမြတ်ဆုံးသော အောင်ပွဲ (ဇယ) ဖြစ်ပါတယ်။
၃။ သုဂတံ (အပြောအဆိုတတ်ခြင်း အနုပညာ)
ကောင်းသောစကား၊ မှန်ကန်သောစကား၊ အကျိုးရှိသောစကားကိုသာ ဆိုတော်မူတဲ့ ဘုရားရှင်ရဲ့ လမ်းစဉ်အတိုင်း
မိမိရဲ့ နှုတ်ထွက်စကားဟာ မေတ္တာနဲ့ယှဉ်သောစကား၊
ကောင်းစကား မှန်ကန်အကျိုးရှိသောစကား၊ သူတစ်ပါးအတွက် ခွန်အားဖြစ်စေရပါမယ်။ ဒေါသနဲ့ပြောတဲ့ စကားတစ်ခွန်းက သူတစ်ပါးကို နာကျင်စေသလို၊ မေတ္တာပါတဲ့ စကားတစ်ခွန်းက ဘဝတစ်ခုလုံးကို ပြောင်းလဲစေနိုင်ပါတယ်။
၄။ အမိတံ နှင့် ၇။ အတုလံ (မိမိတန်ဖိုးကို သိမြင်ခြင်း အနုပညာ)
လူတိုင်းမှာ အတိုင်းအဆမရှိတဲ့ စွမ်းရည် (Potential) တွေ ရှိကြပါတယ်။ သူတစ်ပါးနဲ့ ကိုယ့်ကိုယ်ကိုယ် နှိုင်းယှဉ်ပြီး စိတ်ဓာတ်ကျနေမယ့်အစား "ငါ့မှာလည်း ကိုယ်ပိုင်အရည်အသွေးတွေ ရှိတယ်" လို့ ယုံကြည်ပြီး ကိုယ့်ဘဝကို အကောင်းဆုံးဖြစ်အောင် တည်ဆောက်ရပါမယ်။
၅။ ဝိရဇံ နှင့် ၉။ တိ-ဘဝူပ-သမံ (စိတ်ကို ငြိမ်းအေးစေခြင်း အနုပညာ)
လောကဓံ လှိုင်းတံပိုးတွေ ဘယ်လောက်ပဲ ထန်နေပါစေ၊ မိမိရဲ့ အတွင်းစိတ်ကို ကိလေသာမြူတွေ မကပ်အောင်၊ ပူလောင်မှုတွေ ငြိမ်းအေးအောင် သတိတရားနဲ့ စောင့်ရှောက်ရပါမယ်။ စိတ်အေးချမ်းမှုဆိုတာ အပြင်ဘက်က ရှာရတာမဟုတ်ဘဲ ကိုယ့်စိတ်ထဲမှာပဲ ဖန်တီးယူရတာပါ။
၆။ လလိတံ (ကျက်သရေရှိစွာ နေထိုင်ခြင်း အနုပညာ)
အတွင်းစိတ်ထား ဖြူစင်အေးချမ်းတဲ့အခါ အပြင်ပန်း အမူအရာ၊ အပြောအဆိုတွေကပါ အလိုလို သိမ်မွေ့တင့်တယ်လာပါတယ်။ ဒါဟာ မိတ်ကပ်တွေ၊ အဝတ်အစားတွေကြောင့် ရလာတဲ့ အလှမဟုတ်ဘဲ ဓမ္မကြောင့် ဖြစ်တည်လာတဲ့ စစ်မှန်သော ကျက်သရေမင်္ဂလာပဲ ဖြစ်ပါတယ်။
၈။ စရဏံ (အပြောနှင့်အလုပ် ညီညွတ်ခြင်း အနုပညာ)
အသိပညာ ဘယ်လောက်ပဲရှိရှိ လက်တွေ့အသုံးမချရင် အလကားပါပဲ။ ဘုရားရှင်ဟာ ဝိဇ္ဇာ (အသိဉာဏ်) နဲ့တင် ပြည့်စုံတာမဟုတ်ဘဲ စရဏ (အကျင့်) နဲ့ပါ ပြည့်စုံတော်မူပါတယ်။ ဦးဇင်းတို့လည်း သိထားတဲ့ တရားတွေကို နေ့စဉ်ဘဝမှာ လက်တွေ့ကျင့်သုံးဖို့ လိုအပ်ပါတယ်။ အသိ အကျင့် ဘက်စုံမြင့်ပါစေ။
၁၀။ ယမကံ (ဟန်ချက်ညီခြင်း အနုပညာ)
ရေနဲ့မီးဆိုတာ ဆန့်ကျင်ဘက်ဖြစ်ပေမယ့် ဘုရားရှင်ကတော့ အစုံစုံသော တန်ခိုးပြာဋိဟာတွေကို ဟန်ချက်ညီညီ ပြသနိုင်ခဲ့ပါတယ်။ လောကီဘဝမှာလည်း အလုပ်နဲ့ မိသားစု၊ ရုပ်ပိုင်းဆိုင်ရာနဲ့ စိတ်ပိုင်းဆိုင်ရာ၊ လိုက်လျောမှုနဲ့ တင်းကျပ်မှု စတဲ့ ဆန့်ကျင်ဘက် အရာတွေကို မျှတအောင် Balance လုပ်ပြီး နေထိုင်တတ်ဖို့ အရေးကြီးပါတယ်။
၁၁။ သုခဒံ နှင့် ၁၂။ သရဏံ (အများအကျိုး ဆောင်ရွက်ခြင်း အနုပညာ)
ကိုယ့်တစ်ယောက်တည်း ကောင်းစားဖို့လောက်ပဲ မတွေးဘဲ မိသားစု၊ ပတ်ဝန်းကျင်နဲ့ လောကကြီးအတွက် ချမ်းသာသုခကို ပေးစွမ်းနိုင်သူ (သုခဒံ)၊ သူတစ်ပါး အခက်အခဲရောက်ချိန်မှာ ယုံကြည်အားထားရတဲ့ အရိပ်အာဝါသ (သရဏံ) ဖြစ်အောင် နေထိုင်ခြင်းဟာ အဓိပ္ပာယ်အရှိဆုံး ဘဝနေနည်းပါပဲ။
မြတ်စွာဘုရားရှင်ကို အမှန်တကယ် ပူဇော်ခြင်းဆိုတာ ဂါထာတွေကို ရွတ်ဖတ်ရုံသက်သက် မဟုတ်ဘဲ၊ အဲဒီ ဂုဏ်တော်တွေထဲက အရည်အသွေးတွေကို မိမိဘဝထဲမှာ အသက်ဝင်လာအောင် ကျင့်သုံးနေထိုင်ခြင်းပဲ ဖြစ်ပါတယ်။ ဒါဟာ အကောင်းဆုံးသော ဗုဒ္ဓါနုဿတိဘာဝနာ ဖြစ်သလို၊ အမြင့်မြတ်ဆုံးသော "ဘဝနေနည်း အနုပညာ" လည်း ဖြစ်ပါတယ်။
ဧတေန သစ္စဝဇ္ဇေန ဟောတုမေဇယ မင်္ဂလံ။
(ဤမှန်ကန်သော သစ္စာစကားကြောင့် ဓမ္မမိတ်ဆွေအပေါင်း အောင်မြင်ခြင်း မင်္ဂလာအဖြာဖြာ ပြည့်စုံကြပါစေ။) 🙏🙏🙏
ဒါကို သိပြီးရွတ်ရင် အဆပေါင်းများစွာ ပို အစွမ်းထက်လာပါလိမ့်မယ်။ မယုံပါနဲ့ဦး။ လက်တွေ့ကျင့်ပြီး ထူးခြားမှ ကျေးဇူးတင်ပါ။
#အရှင်ဉာဏဝရ (ပါရမီ)
#ဘဝနေနည်းအနုပညာ
#ဗုဒ္ဓါနုဿတိ
#ဘုရားရှိခိုးများမှဘဝနေနည်းအနုပညာ
