31/05/2026
2026 ကတော့ PC User တွေအတွက် တကယ့်ကို ကံဆိုးတဲ့နှစ်လို့ပဲ ပြောရမှာပါပဲ 🥲
ပထမဆုံး RAM တွေ ဈေးတက်တယ်၊ ပြီးတော့ GPU နဲ့ SSD တွေပါ လိုက်တက်တယ်၊ အခုနောက်ဆုံးတော့ မထင်မှတ်ထားတဲ့ HDD (Hard Disk) တွေပါ ဝုန်းခနဲ ဈေးတက်ကုန်ပါပြီခင်ဗျာ။
❓ ဘာလို့ HDD တွေပါ ဈေးတက်ကုန်တာလဲ?
အဓိကတရားခံကတော့ "AI Gold Rush" ကြောင့်ပါပဲ။ ChatGPT လိုမျိုး AI မော်ဒယ်တွေကို လေ့ကျင့်ပေးဖို့ (AI Training Dataset) အတွက် အတိုင်းအဆမရှိ ကြီးမားလှတဲ့ ဒေတာပမာဏကြီးတွေကို သိုလှောင်ဖို့ လိုအပ်လာပါတယ်။
ဒါကြောင့် Microsoft, Google, Amazon စတဲ့ Cloud Service ကုမ္ပဏီကြီးတွေဟာ သိုလှောင်မှု ပမာဏ အလွန်ကြီးမားတဲ့ Enterprise HDD ကြီးတွေကို အလုံးအရင်းနဲ့ သိမ်းကျုံး ဝယ်ယူနေကြတာ ဖြစ်ပါတယ်။
အဲဒီလို Big Tech ကုမ္ပဏီကြီးတွေက HDD စက်ရုံတွေရဲ့ ထုတ်လုပ်မှုလိုင်း (Production Capacity) တစ်ခုလုံးကို ကြိုတင်စရံပေးပြီး အကုန်ဝယ်ပစ်လိုက်တဲ့အတွက် သာမန် Consumer ဈေးကွက်ဖြစ်တဲ့ (PC သုံး၊ NAS သုံး သို့မဟုတ် Surveillance CCTV သုံး) တွေအတွက် HDD တွေ အပြင်းအထန် ပြတ်လပ်ပြီး ဈေးနှုန်းတွေ ကမောက်ကမ တက်ကုန်တာ ဖြစ်ပါတယ်ခင်ဗျာ။
⚠️ ၂၀၂၆ တစ်နှစ်လုံးစာ "Sold Out" ဖြစ်သွားပြီလား?
ဟုတ်ပါတယ် လက်ရှိအချိန်မှာ ကမ္ဘာ့အကြီးဆုံး HDD ထုတ်လုပ်သူတွေဖြစ်တဲ့ Western Digital နဲ့ Seagate တို့ဟာ သူတို့ရဲ့ ၂၀၂၆ တစ်နှစ်လုံးစာ HDD ထုတ်လုပ်မှုပမာဏ အားလုံးကို ကုမ္ပဏီကြီးတွေဆီ Contract နဲ့ အကုန်လုံး ကြိုတင်ရောင်းချပြီး (Sold Out) သွားပါပြီ။ တချို့ မော်ဒယ်တွေဆိုရင် ၂၀၂၇၊ ၂၀၂၈ ထိတောင် Order တွေ ကြိုတင် ပိတ်သွားတဲ့အထိ ဆိုးရွားနေပါတယ်။
💡 PC Build မိတ်ဆွေများအတွက် အကြံပြုချက်
တကယ်လို့ မိတ်ဆွေအနေနဲ့ ကိုယ့်ရဲ့ PC Build အတွက်ဖြစ်ဖြစ်၊ Gaming အတွက်ဖြစ်ဖြစ် သို့မဟုတ် ဒေတာအရန်သိမ်းဖို့ (Backup) အတွက် HDD ထပ်ဝယ်ဖို့ အစီအစဉ် ရှိတယ်ဆိုရင်တော့... "ဈေးကျမှာကို လုံးဝ စောင့်မနေပါနဲ့တော့" လို့ပဲ အကြံပြုပါရစေ။
စက်ရုံတွေရဲ့ Supply က ၂၀၂၆-၂၀၂၇ အထိ ကြိုတင် ရောင်းထွက်ထားပြီးသား ဖြစ်လို့ လာမယ့် လပိုင်းတွေမှာ ဈေးက ပိုတက်ဖို့ပဲ ရှိပါတော့တယ်။ လိုအပ်ရင် အခုကတည်းကပဲ လက်ဦးအောင် ဝယ်ထားတာ ပိုစိတ်ချရပါတယ်ခင်ဗျာ။