03/12/2024
#ပြည်တွင်းသတင်း
◾️ ပျောက်ဆုံးသီလရှင်အား တွေ့ရှိသူကို သိန်း ၅၀ ကျေးဇူးဆပ်မည်
ရန်ကုန်တိုင်း၊ ထန်းတပင်မြို့နယ်ရှိ အေးရိပ်မြိုင်စာသင်တိုက်မှ ပျောက်ဆုံးနေသည့် အသက်(၁၁) နှစ်အရွယ် သီလရှင်ဆရာလေးကို တွေ့ရှိအကြောင်းကြားသူအား ငွေကျပ်သိန်း ၅၀ ဖြင့် ကျေးဇူးဆပ်မည်ဖြစ်ကြောင်း မိသားစုဝင်များနှင့် အေးရိပ်မြိုင်စာသင်တိုက်က အသိပေးကြေညာထားသည်။
ပျောက်ဆုံးနေသည့် ဆရာလေး၏ဘွဲ့အမည်မှာ ရူပသိင်္ဂီဖြစ်ပြီး လူအမည်မှာ လရိပ်ဖြူဖြစ်ကြောင်း၊ တနင်္သာရီတိုင်း ထားဝယ်မြို့မှ ရန်ကုန်တိုင်း ထန်းတပင်မြို့နယ်ရှိ အေးရိပ်မြိုင်စာသင်တိုက်သို့ ၂၀၂၃ ခုနှစ်ကရောက်ရှိပြီး ပညာသင်ကြားနေသူဖြစ်ကြောင်း၊ ယနေ့(ဒီဇင်ဘာ ၃ ရက်) အထိ ရှာမတွေ့သေးဘဲ ပျောက်ဆုံးနေသည်မှာ ရက်သတ္တပတ်နှစ်ပတ်ကျော်ရှိပြီဖြစ်ကြောင်းသိရသည်။
ပြီးခဲ့သည့် နိုဝင်ဘာ ၁၅ ရက်(တန်ဆောင်မုန်းလပြည့်နေ့)တွင် လှိုင်မြို့နယ်ရှိ သီရိမင်္ဂလာစျေးသစ်သို့ အသက် (၁၂) နှစ်နှင့် အသက်(၈) နှစ်အရွယ်ရှိ ဆရာလေးနှစ်ပါးနှင့်အတူ ဆွမ်းခံကြွရာမှ ညနေ ၄ နာရီခန့်တွင် အသားဖြူဖြူ၊ ဆံပင်ရွှေအိုရောင်ဆိုးထားသည့် အမျိုးသမီးတစ်ဦးက အိမ်စီးကား အဖြူရောင်(နံပါတ်မမှတ်မိ)ဖြင့် ဆရာလေး ရူပါသိင်္ဂီအားခေါ်ဆောင်သွားခဲ့ပြီးနောက် ပျောက်ဆုံးနေခြင်းဖြစ်ကြောင်း အေးရိပ်မြိုင်စာသင်တိုက်မှ သီလရှင်ဆရာလေးတစ်ပါးက စံတော်ချိန်ဒစ်ဂျစ်တယ်သို့ မိန့်သည်။
“အခုထိမတွေ့သေးပါဘူး။ ဘာမှထပ်မထူးသေးဘူး။ သူတို့သွားတတ်တဲ့နေရာတွေက CCTV တွေကို မနက်ဖြန်လိုက်ကြည့်ဖို့ရှိပါတယ်။ ပျောက်တုန်းက အတူပါသွားပြီး ပြန်တွေ့တဲ့ကလေး (ဆရာလေး တစ်ပါး) ကိုခေါ်ထားတယ်။ လိုက်ပြခိုင်းပြီး CCTV မှတ်တမ်းလိုက်ယူမလို့ပါ” ဟု အဆိုပါ ဆရာလေးကမိန့်သည်။
လက်ရှိတွင် ဆရာလေး ရူပသိင်္ဂီပျောက်ဆုံးနေမှုနှင့်ပတ်သက်ပြီး လှိုင်မြို့နယ်ရှိ ပိတောက်ချောင်းရဲစခန်းနှင့် ကမာရွတ်မြို့နယ် ရဲစခန်းတို့တွင် အမှုဖွင့်တိုင်ကြားထားကြောင်းသိရသည်။
သတင်း - အင်ကြင်း/စံတော်ချိန်ဒစ်ဂျစ်တယ်
ဓာတ်ပုံ - အရှင်ပညာစာရ
