13/03/2026
မြတ်စွာဘုရားကဟောတယ်“သစိတ္တ ပရိယောဒပနံ” ကိုယ့်စိတ်ကလေးကို ဖြူစင်အောင်ထားတဲ့။
စိတ်ဖြူစင်တယ် ဆိုတာညစ်နွမ်းတဲ့စိတ်တွေမရှိသင့်ဘူး။ညစ်နွမ်းတဲ့ စိတ်ဆိုတာ ဘာတုန်း
လောဘဆိုတဲ့ အညစ်အကြေး၊ဒေါသဆိုတဲ့ အညစ် အကြေး၊မောဟဆိုတဲ့ အညစ်အကြေး၊မာန်မာနဆိုတဲ့ အညစ်အကြေး၊ ဣသာဆိုတဲ့ အညစ်အကြေး၊ မစ္ဆရိယဆိုတဲ့ အညစ်အကြေး၊ အဲဒီတရားတွေ စိတ်ထဲမှာ ပေါ်လာပြီဆိုရင် စိတ်ဟာ ညစ်နွမ်းသွားတယ်လို့ ခေါ်တယ်။
အဲဒီညစ်နွမ်းသွားတဲ့ စိတ်ကို ဖြူစင်အောင် လုပ်ရမယ်။(စိတ်ဆိုတာ သဘာဝအားဖြင့် ဖြူစင်နေတာဖြစ်လို့ညစ်နွမ်းသွားတဲ့စိတ်ကိုပြန်ဖြူအောင်လုပ်လို့ရတယ်)
ဆိုပါစို့ အဝတ်ဟာ နဂိုကတည်းက အမဲရောင် ဆိုးထားတဲ့ အဝတ်၊အဲဒီ အမဲရောင်၊ အနက်ရောင် ဆိုးထားတဲ့ အဝတ်ကိုဖြူအောင် လုပ်ပါလို့ဆိုလို့၊ဖြစ်နိုင် ပါ့မလား?မဖြစ်နိုင်ဘူး။စိတ်က နဂိုကအဖြူရောင်၊အဲဒီ အဖြူပေါ်မှာတခြား အရောင်တွေကြောင့်ညစ်နွမ်းလာတယ်။
မဖြူစင်ဘူးဆိုရင်နောက်မှပေါ်လာတဲ့ အရောင်တွေကို အရောင်ချွတ်ဆေး၊ဆပ်ပြာစသည်ဖြင့် ဖွတ်လျှော်လိုက်မယ် ဆိုရင်နောက်မှပေါ်လာတဲ့ အရောင်တွေဟာ ကျွတ်သွားပြီးတော့ ပကတိ အရောင်ဖြစ်တဲ့ဖြူစင်မှုကိုရတယ်။
မြတ်စွာဘုရားက စိတ်ဟာ ပင်ကိုယ်က အနက်မဟုတ် ဘူး၊ပင်ကိုယ်သဘာဝအားဖြင့် ဖြူစင် တယ်။
“ပဘဿရမိဒံ ဘိက္ခဝေ စိတ္တ”တဲ့။စိတ် ဆိုတာသန့်ပြန့် ဖြူစင်နေတဲ့ သဘာဝတရားတဲ့ဘာဖြစ်လို့လဲဆိုရင် သူက အာရုံကို သိရုံသိတာ။စိတ်ရဲ့သဘာဝက အာရုံကို သိရုံပဲသိတယ်။
တွယ်တာမှုဆိုတာ မဖြစ်ဘူး။မုန်းတီးမှုဆိုတာလည်း မဖြစ်ဘူး။သိရုံမျှ သက်သက်သာ သိတာဆိုတော့ဖြူစင်တယ်။
အဲဒီသဘာဝအားဖြင့်ဖြူစင်နေတဲ့စိတ်ကလေးဟာ “တဉ္စ ခေါ အာဂန္တုကေဟိ ဥပက္ကိလေသေဟိဥပတ္တိ လိ”၊ အခိုက်အတန့် ဖြစ်ပေါ်လာတဲ့လောဘ ကြောင့် စိတ်ကလေးဟာ ညစ်နွမ်း သွားရတယ်။ဒေါသကြောင့် စိတ်ကလေးဟာ ညစ်နွမ်း သွားရတယ်။
မာန်မာနတွေ၊ ဣဿာ မစ္ဆရိယတွေကြောင့်အဲဒီအညစ်အကြေးတွေကိုစနစ်တကျသန့်စင်ဆေး ကြော ပစ်လိုက်မယ်ဆိုရင်ပင်ကိုယ်ကအနေအထားအတိုင်း ပြန်ရောက်သွား နိုင်တယ်။ကိုယ့်စိတ်ကလေးကို စင်ကြယ်အောင် လုပ်ရမယ်ဆိုတာ ဒါကိုပြောတာဖြစ်တယ်။
စဉ်းစားကြည့်လေ လူတွေဟာ စိတ်ကြည်နေတဲ့ အချိန် ဒေါသဆိုတာလာမှမလာတာဘဲ။
ဒေါသဆိုတာ အာရုံကြောင့် မိမိရဲ့ နှလုံးသွင်းမှု မှားယွင်း မှုကြောင့်အခိုက်အတန့်ပေါ်လာတဲ့သဘော တရားပဲဖြစ်တယ်။ဒါကို သန့်စင်အောင်ဆေးကြောပစ်ရမှာပေါ့။
ဆေးကြောပစ်လိုက်တဲ့ အခါကျတော့ဒေါသမရှိတဲ့ စိတ်ဟာ တည်ငြိမ်တဲ့ စိတ်၊ဖြူစင်တဲ့စိတ် ပြန်ပြီးတော့ဖြစ်လာတယ်။
ထို့အတူပဲ လောဘဆိုတာ အမြဲဖြစ်နေတာ မဟုတ်ဘူး။အာရုံနဲ့တွေ့လို့လိုချင်မှုတွေ တပ်မက်မှုတွေ လွှမ်းမိုးလာတဲ့အခါတရား နည်းလမ်းကျတဲ့ဆေးနဲ့ ဖြေပေးပြီးတော့သန့်စင် ပေးလိုက်မယ်ဆိုရင် နဂိုငြိမ်းအေး ငြိမ်သက်တဲ့ဖြူစင်တဲ့ စိတ်ကလေးကို ပြန်ပြီးတော့ ရနိုင်တာပေါ့။
လူတွေရဲ့ စိတ်ထဲမှာ အမြဲတမ်း သူများအပေါ်မှာ မနာလိုတဲ့စိတ်တွေ ဖြစ်တာမှမဟုတ်ဘဲ။ ကိုယ်သာရချင်တယ်ဆိုတဲ့စိတ်ဟာလည်းအမြဲတမ်း ဖြစ်တာမှမဟုတ်ဘဲ။
သူများစည်းစိမ်ကို စဉ်းစား လိုက်တဲ့အခါကျမှ မနာလိုစိတ်ဆိုတာ ဝင်လာတာ ဖြစ်တယ်။ကိုယ့်ထက်သာမနာလို၊ကိုယ့်ထက်သာသွား မှာမကျေနပ်တဲ့စိတ်ကလေးကတွေးကြည့်လိုက်မှပေါ်လာတာ။
ကိုယ်ရထားတဲ့ အခွင့်အရေး တစ်ခုကို သူတပါးကို မပေးလိုတဲ့ မစ္ဆရိယ စိတ်ကလေးဟာလည်း မတွေးဘဲနေတဲ့အခါပေါ်တာမှ မဟုတ်ဘဲ၊ တွေးလိုက်တဲ့အခါကျမှပေါ်လာတာ ဖြစ်တယ်။
အဲဒီတော့ အကြောင်းရှိမှ ဝင်လာတဲ့ဒီစိတ်ရဲ့အညစ် အကြေး တွေကိုမှန်ကန်တဲ့ အတွေးတစ်ခုနဲ့ သန့်စင်ဆေးကြောလိုက်မယ်ဆိုရင် ဖြူစင်သွားမယ်တဲ့။
ကျေးဇူးတော်ရှင် ပါမောက္ခချုပ်ဆရာတော်ကြီး
ဒေါက်တာ အရှင်နန္ဒမာလာဘိဝံသ
နေ့စဉ်တရားတော်များ နာယူနိုင်ရန် Follow ထားပကြပါဦး ဓမ္မ မိတ်ဆွေ သူတော်စင်အပေါင်းတို့ခင်ဗျာ🙏
#ပါမောက္ခချုပ်ဆရာတော်ဘုရားကြီး
#ဒေါက်တာအရှင်နန္ဒမာလာဘိဝံသ
