04/12/2021
Big Data နှင့် မှော်ဝင်စမတ်ဖုန်းများ
📲 သင်ကိုင်နေတဲ့ စမတ်ဖုန်းက သင့်အကြောင်း အသေးစိတ်ကို သင့်ထက်ပိုသိနေတယ်ဆိုတာ သင်သိပါသလား❓
✅ အခြေခံအကျဆုံး မေးခွန်းလေးတစ်ခုနဲ့ ကျွန်တော်တို့ စကြည့်ရအောင်။
👤လူတစ်ယောက်အကြောင်းကို သိဖို့ ဘာတွေလိုအပ်သလဲ❓
🗒 နာမည်၊ အသက်၊ မွေးနေ့၊ မှတ်ပုံတင်နံပါတ်၊ အလုပ်အကိုင်၊ အရပ်အမောင်း၊ ကိုယ်အလေးချိန်၊ သွေးအုပ်စု၊ မိဘအမည်၊ နေရပ်လိပ်စာ — ဒီအခြေခံအချက်တွေလောက်ကို ဖြေနိုင်တယ်ဆိုရင်ပဲ လူတစ်ယောက်အကြောင်းကို သိပြီလို့ ပြောလို့ရနေပါပြီ။
📝 ဒီ့ထက်ပို အသေးစိတ်ရရင် သူကြိုက်တတ်တဲ့ စာအုပ်၊ သီချင်း၊ ရုပ်ရှင်၊ ကြိုက်တတ်တဲ့ အဝတ်အစား၊ အစားအသောက်၊ အားပေးတဲ့ ဘောလုံးအသင်း၊ ထောက်ခံတဲ့ နိုင်ငံရေးပါတီ၊ ဘဝနဲ့၊ အလုပ်အကိုင်နဲ့ ပတ်သက်တဲ့ ခံယူချက်သဘောထား၊ ဘာသာရေးနဲ့ ပတ်သက်တဲ့ သဘောထားအမြင်၊ ပေါင်းသင်းဆက်ဆံရေး စတာတွေအထိ သိရရင်တော့ အဲဒီလူအကြောင်းကို သင်ကောင်းကောင်းသိပါတယ်လို့ ရဲရဲကြီး အာမခံနိုင်ပါပြီ။
❌လူတစ်ယောက်က နောက်လူတစ်ယောက်အကြောင်းကို သိဖို့ အထက်ပါအချက်တွေ သိရုံနဲ့ လုံလောက်ပြီလို့ ဆိုလို့ရပေမယ့် ကျွန်တော်တို့ ကိုင်နေတဲ့ စမတ်ဖုန်းတွေအတွက်၊ စမတ်ဖုန်းထဲက လူမှုကွန်ယက်တွေ (Facebook, Instagram, Twitter, Youtube..etc) အတွက်တော့ ဒီလောက်နဲ့ လုံးဝမလုံလောက်သေးပါဘူး။[၁]
1️⃣မနေ့က ခင်ဗျားလမ်းလျှောက်တာ စုစုပေါင်း ခြေလှမ်းဘယ်နှစ်လှမ်းရှိခဲ့သလဲ? ခင်ဗျားလမ်းလျှောက်တဲ့ အမြန်နှုန်းကရော တစ်နာရီကို ဘယ်နှစ်မိုင်နှုန်း ရှိလဲ?
2️⃣ဒီနေ့မနက်က ခင်ဗျား အပြေးလေ့ကျင့်တုန်း သွေးခုန်နှုန်း ဘယ်လောက်ရှိခဲ့သလဲ?
3️⃣ပြီးခဲ့တဲ့ တစ်ပတ်ကျော်က Facebook ပေါ်က ပို့စ်တစ်ခုနဲ့ ပတ်သက်ပြီး ခင်ဗျားဒေါသထွက်ခဲ့ရတာရော မှတ်မိသေးလား?
3️⃣ခင်ဗျား ဖုန်းထဲမှာ ထည့်ထားတဲ့ App ပေါင်း ရာဂဏန်းကျော်ထဲက ခင်ဗျားအများဆုံး သုံးဖြစ်တဲ့ App ၁၀ ခုကို အစဥ်လိုက်ခင်ဗျား သိလား?
4️⃣ဘယ် App ကို တစ်ခါသုံးရင် အချိန်ဘယ်လောက် ကြာကြာသုံးဖြစ်တယ်ဆိုတာရော သတိထားမိလား?
5️⃣တစ်ပတ်အတွင်း၊ တစ်လအတွင်း Facebook ပေါ်မှာ ရေးခဲ့တဲ့ Status နဲ့ Comment တွေ၊ Share လုပ်ခဲ့တဲ့ ပို့စ်တွေ၊ ပေးခဲ့တဲ့ Love, Care, Angry, Sad, Wow, Haha - Reaction တွေ အရေအတွက်ကရော ဘယ်လောက်များလဲ?
6️⃣ခင်ဗျား နေတဲ့ နေရာရဲ့ နေ့စဥ်ပြောင်းလဲနေတဲ့ နေဝင်နေထွက်၊ အလင်းအမှောင်၊ အပူအအေးနဲ့ စိုထိုင်းဆပမာဏတွေ ထူးခြားချက်တွေကိုရော သတိပြုမိရဲ့လား?
7️⃣ပို့ဖြစ်တဲ့ မက်ဆေ့ချ်နဲ့ အီးမေးလ်တွေ၊ တစ်လအတွင်း အများဆုံးကြည့်ဖြစ်တဲ့ ဗီဒီယိုအရေအတွက်နဲ့ အများဆုံးနားထောင်ဖြစ်တဲ့ သီချင်းတွေကိုရော မှတ်မိရဲ့လား?
8️⃣ခင်ဗျား ရောက်တတ်တဲ့နေရာတွေ၊ သွားလေ့ရှိတဲ့ လမ်းကြောင်း၊ ဝယ်လေ့ရှိတဲ့ စျေးဆိုင်နဲ့ ရိုက်လေ့ရှိတဲ့ ဓာတ်ပုံတွေကိုရော သတိထားမိရဲ့လား?
9️⃣နောက်ဆုံး ခင်ဗျားကိုင်တဲ့ ဖုန်းကို တစ်နေ့အတွင်း ဒေါင်လိုက်ဘယ်နှစ်ခါကိုင်ပြီး အလျားလိုက်ဘယ်နှစ်ခါ ကိုင်သုံးဖြစ်တယ်ဆိုတာမျိုးကိုရော သတိထားမိတာ ရှိလား?
👀အဲဒီလို မေးခွန်းတွေကိုတော့ ကျွန်တော်တို့ ရုတ်တရက်ဖြေနိုင်ဖို့ မလွယ်ပါဘူး။ ဖြေနိုင်ဖို့ အတွက်ဆိုရင်လည်း လူတစ်ယောက်ယောက်က နောက်လူတစ်ယောက်ယောက်ကို မိုးလင်းကမိုးချုပ်၊ သူအိပ်ပျော်ပြီး နောက်နေ့ ပြန်နိုးတဲ့အထိ ၂၄ နာရီနဲ့ ၇ ရက်ပတ်လုံး၊ နာရီ၊ စက္ကန့်မလပ် မျက်လုံးဒေါက်ထောက်စောင့်ကြည့်နိုင်မှပဲ ရမှာပါ။
📲 ခေတ်ပေါ်စမတ်ဖုန်းတစ်လုံးမှာ မိုက်ခရိုဖုန်း၊ စပီကာ၊ ကင်မရာနှင့် Touch Sensor အစပြုတဲ့ အခြေခံ အာရုံခံ Sensor ၄ မျိုးက စလို့ Bluetooth, GPS, Gyroscope, Accelerometer, Magnetometer, Temperature, Pressure, CMOS, Proximity, Ambient, Light, Finger Print, Face Recognition နှင့် Humidity Sensor တွေအထိ အာရုံခံပစ္စည်း အမျိုး ၂၀ ခန့်ပါရှိနိုင်ပါတယ်။ [၂]
🔬ကျွန်တော်တို့ ကိုင်နေကြတဲ့ စမတ်ဖုန်းထဲမှာပါတဲ့ အာရုံခံ Sensor အမျိုး ၂၀ ကျော်နဲ့ ၂၄ နာရီနဲ့ ၇ ရက်ပတ်လုံးစောင့်ကြည့်ပြီး ကျွန်တော်တို့ အကြောင်းအသေးစိတ်ကို ကျွန်တော်တို့ကိုယ်တိုင်ထက် ကျွန်တော်တို့ စမတ်ဖုန်းတွေက သိရှိနေကြပါပြီ။ [၃]
📍ကျွန်တော်တို့ ရဲ့ တည်နေရာတွေ၊ အိုင်ဒီကဒ်၊ ဘဏ်ကဒ်နဲ့ ပါတ်စဝါ့ဒ်တွေ၊ ကျွန်တော်တို့ ပို့သမျှ အီးမေးလ်နဲ့ မက်ဆေ့ချ်တွေအပြင် ကျွန်တော်တို့ သွေးခုန်နှုန်းကအစ ကျွန်တော်တို့ စမတ်ဖုန်း၊ စမတ်နာရီတွေက သိနေကြတဲ့အပြင် ကျွန်တော်တို့ ဘယ်အချိန်မှာ ပျော်ပြီး ဘယ်အချိန် ဝမ်းနည်းတတ်သလဲ၊ ဘာကိုမြင်ရင် ဝမ်းသာပြီး ဘာကိုကြားရင် ဒေါသထွက်တတ်သလဲ ဆိုတဲ့ ကျွန်တော်တို့ စိတ်ခံစားမှု (Emotion) တွေအထိပါ စမတ်ဖုန်းထဲက Social Network တွေက သိရှိနေကြပြီဖြစ်ပါတယ်။ [၄]
📲 တန်ဖိုးကြီးတဲ့ စမတ်ဖုန်း၊ နောက်ဆုံးပေါ်ဖုန်း ဖြစ်လေလေ အာရုံခံ Sensor အရေအတွက်များများ ပါလေလေ၊ ကျွန်တော်တို့ အကြောင်း အသေးစိတ်ကို အဲဒီစမတ်ဖုန်းက ပိုမိုထောက်လှမ်းသိရှိနိုင်လေလေဖြစ်ပါတယ်။
🎯အဲဒီလိုနည်းနဲ့ ထောက်လှမ်းစုဆောင်း ရရှိသွားတဲ့ ဒေတာတွေ၊ အချက်အလက်တွေကို Big Data (သို့မဟုတ်) Business Intelligence လို့ ခေါ်ပါတယ်။
✅ Big Data တွေကို ဘယ်သူတွေက စုဆောင်းနေကြတာလဲ❓
✅ စုဆောင်းပြီးတဲ့ Big Data တွေကို ဘယ်လိုနေရာတွေမှာ အသုံးချနေကြသလဲ❓
✅ Big Data တွေရဲ့ ကာလပေါက်စျေး ဘယ်လောက်ရှိသလဲ❓
📌 နောက်ဆောင်းပါးတစ်ပုဒ်မှာ အဲဒီမေးခွန်းတွေကို ဖြေကြည့်ကြရအောင်ပါ။
ကျေးဇူးတင်ပါတယ်ခင်ဗျာ။
အနန္တကျော်
၄.၁၂.၂၀၂၁
စနေနေ့ (၁၄၁၇)
Ref;
[၁] https://www.ncbi.nlm.nih.gov/pmc/articles/PMC6539461/
[၂] https://gizmodo.com/all-the-sensors-in-your-smartphone-and-how-they-work-1797121002
[၃] https://www.theatlantic.com/technology/archive/2011/04/what-does-your-phone-know-about-you-more-than-you-think/237786/
[၄] https://www.rd.com/list/things-smartphone-knows-about-you/
