04/02/2022
စု တု ပြု ပါ အင်္ဂလိပ်စာ
ကျွန်တော်အရင် post တွေမှာ ခဏခဏရေးခဲ့ အကြံပြုခဲ့ပါတယ်။ အင်္ဂလိပ်စာကို အရေးရော အပြောပါ fluent ဖြစ်ချင်သူဟာ "စု" ရပါမယ်။ collect လုပ်ပါ။
📍စု collect; gather
ဘာကို "စု" ရမှာလဲ..... မှတ်စု စာအုပ်ထဲမှာ စာဖတ်ရင်းနဲ့တွေ့ရတဲ့ စကားလုံးအသစ်တွေ၊ အသုံးအနှုန်းအသစ်တွေ၊ ပြန်ပြီးသုံးလို့ရမယ့် လှပတဲ့ အသုံးဝင်မယ့် ဝါကျတွေ sentence pattern တွေ ကို အဲဒီမှတ်စု စာအုပ်ထဲ ကူးရေး၊ ထပ်ခါထပ်ခါပြန်ဖတ်ပေးသင့်ပါတယ်။
📍တု emulate; mimic
"တု" ဆိုတာက အဲဒီလိုမျိုး ဝါကျလေးတွေကို ကိုယ်တိုင်ပြန်ပြီး တုပ ရေးကြည့် ပြောကြည့်တာ။
📍ပြု produce; do it by yourself
"ပြု" ကတော့ လေ့လာတာအရှိန်ရလာတာနဲ့အမျှ ကိုယ်တိုင်လည်း တီထွင်ရေးကြည့် ပြောကြည့် တွေးကြည့်ဖို့ပါ။
စု တု ပြု ဟာ ရှေးရိုးဆန်သော်လည်း အထိရောက်ဆုံးသော language learning approach တစ်ခုဖြစ်ပါတယ်။ ကိုယ်တိုင်အပင်ပမ်းခံလုပ်မှ တကယ်တတ်မြောက်မှာဖြစ်တယ်။ English is easy to learn, but hard to master. လို့ပြောကြတာ ကြားဖူးကြမှာပါ။ Most of the learned people are self-made people. ဆိုတာလည်း သတိချပ်စေချင်တယ်။ self-made တဲ့။ ကိုယ်တိုင်လုပ်မှ ကြိုးစားမှ တကယ်ခရီးရောက်မှာပါ။
ဘာကြောင့် ဒီလို လေကြောရှည်နေရတာလဲ....
notes တွေကူးရေး။ အလွတ်မှတ်မိအောင် ပြန်ပြန်ဖတ်။ imagination ကိုသုံး။ ဒါလေးဆိုရင်တော့ ဒီလို situation မှာ ဘယ်လိုသုံးလို့ ရေးလို့ ပြောလို့ရနိုင်တယ်ဆိုတာ စိတ်ကူးကြည့်။ အသံထွက်ပြီး လေ့ကျင့်။ လက်ကလည်းချရေးကြည့်။ language ကိုအသုံးချဖို့ opportunities ကိုလည်းရှာပါ။ shyness ဟာ ဘာသာစကားလေ့လာရာမှာ မရှိသင့်။ တခြားမဟုတ်တာလုပ်ရမှာသာရှက်၊ English လိုပြောဖို့တော့ အရှက်နဲပါစေ။ စိတ်ထက်သန်မှု နဲ့ ဘာသာစကားကို မြတ်နှိုးမှု လည်းရှိမယ်၊ ဆရာကောင်းသမားကောင်းရဲ့ လမ်းညွှန်မှုရမယ်၊ ကိုယ်ကလည်း အချိန်ပေးပြီး ပုံမှန်လည်း လေ့လာနေမယ်ဆိုရင် native speaker တစ်ယောက်လို တချိန်မှာဖြစ်လာစေရမယ် လို့ပြောရဲပါတယ်။
ကဲ "စု တု ပြု" idea လေး နဲ့ အောက်မှာ တင်ပြပေးထားတွေကို လေ့လာကြပါစို့။
1.***I have been longing to ask you about that girl.
ဒီဝါကျမှာ long အကြောင်းကို ရှင်းပြချင်တယ်။
short story ဝတ္ထုတို long story ဝတ္ထုရှည်
long ဟာ Adjective ဆိုရင် ရှည်သော
long ဟာ Verb ဆိုရင် to feel a strong desire or craving တစ်ခုခုကို လုပ်ချင်စိတ်ပြင်းပြသည်။ craving ချဉ်ခြင်းတက်သလို အရမ်းလုပ်ချင်စိတ်ပေါ်လာတာ။
ဆိုတော့ အပေါ်က ဝါကျမှာ I have been longing to + Verb ပုံစံကိုမှတ်ပါ။
I have been longing to ask you about that girl.
မင်းကို အဲဒီကောင်မလေးအကြောင်း ငါမေးချင်နေခဲ့တာ။
ဒါမျိုးလုပ်ချင်နေတာကြာပြီဆိုတဲ့ situation တွေမှာသုံးပေါ့။
The boarding students have been longing to go back home to see their parents.
ဘော်ဒါတက်နေတဲ့ ကျောင်းသားတွေ အိမ်ပြန်ပြီး မိဘတွေနဲ့ တွေ့ချင်နေကြပြီ။
He has been longing for this kind of spicy Indian curry.
ဒီလို ကုလားဟင်းစပ်စပ်လေးမျိုး သူစားချင်နေတာကြာပြီ။
(ဒီဝါကျမှာတော့ long နောက်မှာ for + Noun သုံးပုံကိုမှတ်ပါ)
longing ကို Noun လိုလည်းသုံးလို့ရတယ်။ craving နဲ့ အတူတူပဲ။
The pregnant woman has a longing/craving for some spicy salad.
ကိုယ်ဝန်သည်ဟာ အသုပ်စုံစပ်စပ်လေးကို ချဉ်ခြင်းတက်နေတယ်။
2. *** He is not as bad as he was painted.
သူဟာ လူတွေပြောသလောက်လည်း မဆိုးလှပါဘူး။
ဒီဝါကျကို နားလည်ဖို့ "The devil is not so black as he is painted." ဆိုတဲ့ မူရင်း စကားပုံလေး သိထားသင့်တယ်။
မင်းတို့တွေပြောနေကြသလောက်လည်း သူဟာမဆိုးပါဘူး လို့ဆိုလိုတယ်။
I don't know why most of the friends speak ill of Ko Ko. He seems like a nice guy once you get to know him. He is not as bad/black as he is/was painted.
သူငယ်ချင်းတွေက ကိုကို မကောင်းကြောင်းဘာကြောင့်ပြောကြသလဲမသိဘူး။ သေသေချာချာပေါင်းကြည့်တော့ မဆိုးပါဘူး။ လူတွေပြောသလောက်လည်း မဆိုးပါဘူးကွာ။
3. *** curl up
အိပ်ယာထဲမှာကွေးနေတာ
I want to curl up with a book.
စာအုပ်ဖတ်ပြီးအိပ်ယာထဲကွေးချင်နေတာ။
curl up ဆိုတာ လှဲနေတာလည်းရတယ်။ ဆိုဖာပေါ်မှာထိုင်နေတာလည်းရတယ်။ ကွေးကွေးလေးတော့ဖြစ်နေရမယ်။
4. *** to set foot in a place
ခြေချဖူးသည်၊ ရောက်ဖူးသည်
Some students have seldom set foot in the library.
တချို့ကျောင်းသားတွေများ စာကြည့်တိုက်ထဲကို ယောင်လို့တောင်ခြေမချဖူးဘူး။
Some students have never set foot in the library.
ဒီလိုလည်းရေးလို့ရပါတယ်။ အတူတူပါ။
5. *** at will= to your heart's content
မင်းစိတ်သဘောကျ၊ စိတ်ကြိုက်၊ ကြိုက်သလောက် သဘောရှိသလောက်
There are so many good books in the library; you can borrow them at will.
စာကြည့်တိုက်မှာ စာအုပ်ကောင်းတွေအများကြီး။ မင်းစိတ်ကြိုက်သာ ငှားပေတော့။
You can do something at will သုံးပုံကိုမှတ်ပါ။
***စု တု ပြု .... အရေးအကြီးဆုံးက ပေးထားတဲ့နမူနာတွေကိုကြည့် အတုယူပြီး ကိုယ်ပိုင်ဝါကျတွေ ပြောဖို့ ရေးဖို့ လေ့ကျင့်ဖို့ဖြစ်တယ်။
#မေတ္တာဖြင့်
#ဒေါက်တာစိုးသန်း
