29/07/2026
"ဝါဆိုလပြည့်နေ့ (ဓမ္မစက်အခါတော်နေ့) "
ဝါဆိုပြည့်နေ့သည်ဗုဒ္ဓဘာသာဝင်တို့၏ နေ့ထူးနေ့မြတ်ကြီးများအနက် အရေးပါသော နေ့တစ်နေ့ ဖြစ်ပါသည်။ ဝါဆိုလပြည့်နေ့သည် မြတ်စွာဘုရားရှင်နှင့် ပတ်သက်သည့် ထူးခြားသော အဖြစ်အပျက်ကြီးများစွာ ဖြစ်ပေါ်ခဲ့သည့် နေ့မြတ်ဖြစ်သောကြောင့် "သန္ဓေ၊ တောထွက်၊ ဓမ္မစက်၊ တစ်ရက် ဝါဆိုလ" ဟု မှတ်သားလေ့ရှိကြသည်။သန္ဓေယူသောနေ့ ၊တောထွက်တော်မူသောနေ ၊ဓမ္မစကြာတရားဦး ဟောကြားသောနေ့၊ တန်ခိုးပြတော်မူသောနေ့တို့သည်ဝါဆိုလပြည့်နေ့တွင်ဖြစ်သည်။"ဓမ္မစက်အခါတော်နေ့" ဟု ခေါ်ဆိုရခြင်းမှာမြတ်စွာဘုရားရှင်သည် ပဉ္စဝဂ္ဂီ ၅ ဦးတို့အား မဇ္ဈိမပဋိပဒါ (အလယ်အလတ်လမ်းစဉ်) နှင့် အရိယာအမှန်တရား (၄) ပါးတို့ကို ဖော်ထုတ်ပြသသည့် ဓမ္မစကြာတရားတော်ကို စတင်ဟောကြားခဲ့သောကြောင့် ဤနေ့ကို ဓမ္မစက်အခါတော်နေ့ ဟု အထူးသတ်မှတ်ပူဇော်ကြသည်။
ထို့ပြင် တရားတော်ကို ကြားနာအပြီးတွင် အရှင်ကောဏ္ဍည မထေရ်သည် သောတာပန် ပထမဆုံး ဖြစ်တော်မူခဲ့ပြီး သံဃာရတနာ စတင်ပေါ်ပေါက်ခဲ့သဖြင့် ရတနာသုံးပါးစလုံး စုံလင်စွာ ပေါ်ထွန်းခဲ့သည့်နေ့ လည်း ဖြစ်ပါသည်။ ရဟန်းသံဃာတော်များ ဝါတွင်းသုံးလပတ်လုံး ဝါဆိုဝါကပ်တော်မူကြတော့မည် ဖြစ်သဖြင့် ရဟန်းသံဃာများ သပိတ်၊ သင်္ကန်း၊ အစားအသောက် လိုလေသေးမရှိစေရန် ဝါဆိုသင်္ကန်း နှင့် ဝါဆိုပန်း များကို ဆက်ကပ်လှူဒါန်းကြသည်။ဓမ္မစကြာတရားတော် ရွတ်ဖတ်ခြင်း: ဘုရားကျောင်းကန်များတွင် ဓမ္မစကြာသုတ်ကို သံပြိုင်ညီညာ ရွတ်ဖတ်ပူဇော်ကြသည်။ဥပုသ်သီလ ဆောက်တည်ခြင်း: မေတ္တာသုတ်၊ ပဋ္ဌာန်း စသည့် တရားတော်များကို နာယူခြင်း၊ ဥပုသ်သီလ ဆောက်တည်ခြင်းတို့ဖြင့် ကုသိုလ်ယူကြသည်။
ဝါဆိုလပြည့်နေ့သည် ဗုဒ္ဓဘာသာဝင်တို့အတွက် တရားဓမ္မ၏ အနှစ်သာရကို ပြန်လည်အောက်မေ့ဖွယ်ရာ အလွန်မင်္ဂလာရှိသော နေ့မြတ်တစ်နေ့ ဖြစ်ပါသည်။
