21/11/2025
Кога ќе постигнете посакувано ниво во средината во која делувате - кога вашата компанија, мисија, визија и цели ќе се издигнат до точка каде што вашиот бренд е препознатлив во регионот, во Македонија и пошироко - тогаш доаѓа моментот да се свртите кон заедницата. Да возвратите таму каде што сте пораснале, преку поддршка на областите што се значајни за развојот на секоја средина: култура, спорт и образование.
Ние, како компанија, со гордост можеме да кажеме дека во изминатите 25 години успеавме да ја оствариме визијата и мисијата што нашиот основач Владимир Христовски ја постави уште на почетокот, кога со минимален тим, многу труд и уште повеќе верба, работеше на тоа.
Денес „Графо Пром“ е компанија која го зголеми бројот на вработени, процеси, услуги, клиенти како и квалитетот на својата работа. Стигнавме до бренд препознатлив не само во Битола и Македонија, туку и во меѓународни рамки, со десетици успешно реализирани проекти за клиенти од земји што се сметаат за основачи на високите стандарди во современото печатење.
Токму поради таквите успеси, најприродно е да се свртиме кон местото од кое потекнуваме и заедницата во која се формиравме. Тоа најдобро го направивме со нашата најнова значајна донација: целосно брендирање и разубавување на спортскиот стадион „Петар Милошевски“ во Битола.
Кога игра Македонија и ги брани боите на нашето знаме пред битолска и македонска публика, нашата желба беше стадионот да изгледа достоинствено, модерно и инспиративно. Тоа е вредност што ќе остане за генерациите што доаѓаат.
Но тука нашата поддршка не запира. Во спортот веќе долги години сме поддржувач и спонзор на најрепрезентативните битолски клубови: РК Еурофарм Пелистер, ФК Пелистер Битола, КК Пелистер Битола, ОК Пелистер Волеј и многу помали и младински клубови кои се дел од спортскиот развој на градот.
Во културата континуирано поддржуваме манифестации, институции, издавачки проекти и важни културни настани што го одржуваат жив духот на Битола.
Во образованието исто така активно придонесуваме, односно поддржуваме иницијативи на граѓани и доделуваме стипендии за најдобрите студенти на Графичкиот факултет при Техничкиот факултет во Битола.
Се надеваме дека во иднина ќе можеме да се пофалиме со уште поголеми донации и уште посилни дела, затоа што Битола тоа го заслужува.
Битола знае да цени, да препознае и да врати со уште поголема вера од даденото.
Растењето не е растење ако не е заедничко.
Ну Универзитетска Библиотека - Св. Климент Охридски
OK Pelister Volej
FK Pelister Stadium
