مطوري قواعد البيانات الليبين SQL Server, Oracle

  • Home
  • Libya
  • Tripoli
  • مطوري قواعد البيانات الليبين SQL Server, Oracle

مطوري قواعد البيانات الليبين SQL Server, Oracle بعون الله نشر مواضيع تهتم بجودة قواعد البيانات في الأنظمة الرقميه الليبيه والعربيه

السلام عليكم .. بوست لكسر الروتين .. واتمني من الكل يشارك ( الى يشتغلو على قواعد البيانات ) .. المثال موضح بالصورة .. وت...
28/07/2024

السلام عليكم .. بوست لكسر الروتين .. واتمني من الكل يشارك ( الى يشتغلو على قواعد البيانات ) ..

المثال موضح بالصورة .. وتقدرو تجربوه اذا عندكم نسخة Sql Server 2016
فما فوق .. ونفس المثال يمشى فى نسخ قديمة لاكن شوي تعديل فى جملة حذف الجداول ..

عموما .. وانا واقف على التعليمة الثالثة .. نبي نقري البيانات الى تخزت فى الجدول الاول والثاني ..

المغزي من السؤال .. هو معرفة شن يصير اثناء الترانزاكشن .. وهذه لازم كل شخص يعرفها باش يعرف يتبع سير بياناته ووين الاخطاء تصير ..

نفس النمط يشتغل على معظم أو كل انواع قواعد البيانات العلائقية .. البوست قراي سيكوال . اوراكل . ماي اس كيو ال .. وغيرهم



03/07/2024

هل البوست هذا باين للمشتركين الى عندي ؟

نزلت بوست قبل كم يوم على بعض المصطلحات الى لازم تعرفها على نهج قواعد البيانات ...الجدول الى من غير قيود ومن غير مفاتيح ....
18/04/2024

نزلت بوست قبل كم يوم على بعض المصطلحات الى لازم تعرفها على نهج قواعد البيانات ...

الجدول الى من غير قيود ومن غير مفاتيح . يسمي Heap Table وليس Entity و لا Object .
مصطلح Entity هو مصطلح تعليمي نوعا ما . او عند رسم او تخطيط لقاعدة البيانات الى تريد انشاءها .. مثلا عند رسم او تكوين Erd تستطيع تسمية جدول بانه Entity . ( يجوز ) ..
بالنسبة ل Object . اى شى موجود ككيان يسمي Obejct . مصطلح فضفاض نوعا ما .
ماهو المفتاح الرئيسي . هو مفتاح لايتكرر فى الجدول باختصار . لا يقبل ان يكون فارغا .. ولا يتكرر . هادم شرطين .
مثال بسيط . الرقم الوطني للمواطن الليبي لا يتكرر . هو مفتاح رئيسي .
المفتاح الفرعي : يستخدم كمؤشر لبيان فى جدول اخر . واستخدامه لعدم تكرار البيانات النصية فى اكثر من جدول . وما يسمي ب Data redundancy.
المفتاح الرئيسي او Primay Key . يجب ان يكون مفهرس اما ان يكون Clustered او NonClustered.
الفرق بين Clustered و NonClustered .
نعطو مثال
Create Table Emp (ID Int Not Null, Name Nvarchar(50) Not Null)
جدول الموظف الان يطلق عليه Heap Table .
الهيب هو جدول ما فيشي تريب نهائيا . نقصد لما يخزن فى البيانات .
كيف ما تعطيه انت من مدخلات يستفها وراء بعض او مترابطة مع بعض .
وتوا نحكو القدام كيف قواعد البيانات تتعامل مع الصفحات وتربط فيهم مع بعض بطريقة تسمي Doubly Linked List . اكيد مارة عليكم مصطلح مشابه ليه فى مادة تركيب او تراكيب البيانات .
عرفنا الهيب وعلاش اسمه هيب.
نرجعو للجدول الى كوناه الى هو الهيب . توا حتفهمو معني المفتاح الرئيسي والمفهرس ان شاء الله وهو شي مهم جدا للناس الى كيف بادية حياتها فى عالم البيانات . ( الفرق بين الكلاستر والنان كلاستر . مزال ما وصلناش فيه . التسلسل مهم لفهم الفرق ) .
كونه الجدول واموره عشره على عشرة . توا نكونو فهرس .
Create Clustered Index [CI_Emp_ID] ON dbo.Emp (ID);
الجمله هادى تكونلك فهرس . خلينا فى الجمله شن معاناها تفصيليلا
Create كونلي
Clustered فهرس رئيسي ( والفهرس الرئيسي معناه حولي الهيب تابل الى شجرة ثنائية البحث ) الى هيا خديتوها فى مادة تراكيب البيانات
Binary Tree Structure or B-Tree
حنفهمكم بعون الله الشجرة شن هيا وكيف تشتغل .. نقولو يالله .
Create Clustered Index [CI_Emp_ID]
[CI_Emp_ID]
فى عالم التسميات المنطقية للجداول والحقول والبرمجة ووو فى منهج ماشيين عليه البشر يقولوله Naming Convention .
CI اختصار الى Clustered Index
Emp اسم الجدول الى حتبني عليه الفهرس
ID اسم الحقل الى حيكون مفتاح الفهرس او الدليل
Create Clusterd Index [CI_Emp_ID] ON dbo.Emp (ID)
ON dbo.Emp (ID) هادى معناها ابني الفهرس على جدول الموظف فى حقل الاي دي .
😌دهشت.
توا جدول الهيب تحول الى شجرة ثانئية .. الجدول نفسه سواء هيب او مفهرس . تخايلوه كتاب الهواتف الى كانو يعطو فيه البريد زمان . صفحة معبية وراها صفحة معبية وراها صفحة فاها بيانات تختلف او متكررة ومعبية . بياناتك فى الداتا بيز هيا صفحات Pages وكل صفحة حجمها 8KB بالكيلو بايت .
فى شخص سالني قالى السكيما مليحة والا مش مليحة فى اداء قواعد البيانات . قلتله زايد ناقص . ( خوي علي السبب هنا . كل صفحة لما تتخزن فى ملف الداتا mdf او غيره من قواعد البيانات الاخري .
فى اس كي ال تسمي Page اصغر وحدة تخزين . اوراكل اسمها Block.
الصفحة ( مكونة من ثلاثة اقسام اعتبروه حوش على ثلاثه ادوار . الدور الاول يسمي Head . ( تخزين فى رقم ملف قاعدة البيانات ورقم الجدول فقط . لا سكيما ولا هم يحزنون الداخل .. هذا علاش قلتلك السكيما هيا حبيلة وخلاص لاكن المالك واحد وهو الانستانس متاعك ..
نرجعو للهيب . والبيانات .. وكان تهتو انا اسف جدا .
عرفنا ان البيانات فى الجدول باى شكل كان هو عبارة على صفحات زي ملف الهواتف او دليل الهواتف .
الكتاب هذا دليل الهواتف يسمي فى عالم قواعد البيانات Leaf Level يعني مستوي الغصن وين ما تنبت الثمرة .. والثمرة هنا هيا البيانات متاعنا .
يعني الهيب لما نخزنو فيه بيانات حتي لو مش مرتبه عنده Leaf Level الى هو كتاب دليل الهواتف او البيانات ..
لما كونا الاندكس على الهيب قلنا حكون شجرة ثنائية Bi-Tree
الباي تري . اعتبرو الصفحات الاولى من كتاب دليل الهواتف .
الى لما كنا ندورو على اسم ورقم شخص . نلقو مختصر ويعطينا اما صفحة الهاتف الى نبوه ومنو مالك الرقم ووين يسكن ..
فهرس الكتاب هو فى عالم قواعد البيانات Bi-Tree
ووظيفة الاندكس هو تسريع البحث او الوصول الى Leafe Level باقل التكاليف ... والتكاليف هنا هيا القرائة من القرص الصلب او الذاكرة والمعالج .. وهذا موضوع متقدم .. وان شاء الله نعطيه لو اراد الله ذلك.
تقريبا نقدر نقول انى وصلتلكم معني الهيب . والفهرس . والشجرة الثنائية . وبياناتك الى فى الليف لافل .. واعطينا مثال بكتاب دليل الهواتف باش ترسمو مخطط فى عقولكم ومعاش تنسو الخريطة بعون الله تعالى .
بيجيني شخص بيقولى انت كونت Clustered Index على جدول الموظف على حقل الاي دي .. وخيرك ما كونتش برايمي كي ..
بنقولك عادى كون قيد برايمري كي وحطه على الحقل
Alter Table dbo.Emp Add Constraint [PK_ID] Primary Key (ID);
الفرق بين الفهرس والمفتاح الرئيسي .. ان الفهرس شى موجود داخليا او فيزيكل .. اما القيد هو عبارة عن شرط قبل ما تخزن البيان . يقوله هل هيا متكررة كان نعم . يرفض ادخالها وتفشل عميلة الادخال .. عدا ذلك تنقبل وتكون قيمة لا تتكرر زي ما قلنا الرقم الوطني ..
نجو للفرق بين Clustered Index
الى هو مفهوم عندنا
Non Clustered Index .
نفترضو ان الجدول متاعنا اطور واصبح يحتوي على : رقم الموظف . عمره . اسمه . مكان السكن . اسم الوالدة . الوظيفة .... الخ .
وجيت كونت فهرس على الاسم . لان التقارير المطلوبة مني بالاسماء هلبا والموظفين مش حافظين االارقام الوظيفية متع العمال . نقولولهم اوكي
Create NonClusterd Index [NCI_Emp_Name) ON dbo.Emp(Name);
نفس جملة تكوين الفهرس الكلاستر .. غر هادى نان كلاستر .
الكلاستر قلنا يحول الهيب الى شجرة .. تحويل فعلي ..
نان كلاستر اندكس يكون شجرة نسخة ثانية .. من غير الباي تري الاولي متع الفهرس الرئيسي . ويخزن فاها الاسامي بالترتيب .
الثاني هو عبارة على نسخة مصغرة من الاول . الفرق بسيط .. ركزو كويس .
تفكرتو لما قلتلكم على Leafe Level وين ما مخزنه بيانات الجدول ..
الفهرس النان كلاستر .. عنده ليف لافل .. لاكن مفيهاش بيانات الجدول ..
فاها بيان الحقل فقط ( الى هو Name ( + مؤشر او عنوان رقمي يؤشر على مكان وجود السجل المطلوب فى Leafe Level الى موجودة فى الفهرس الرئيسي ..
نبي انوه على شى ضرورى ومفروض انا بديت بديه هو .. لاكن .. نذكره هنا .. اصغر جزء تخزيني للبيانات فى Sql Server يسمي Page .. حكيت علاها شوي فوق .. حجمها 8 كيلو بايت .. لاكن المحرك مش كل ما يحتاج Page يكونها ويضيفها .. فى شى ثاني هو الى ينضاف عند الحاجه وهو وحدة قياس لوجيكل وليست فيزكل تقريبا تسمي Extent هيا عبارة عن حاويه فاها بيجز .. حجمها = 8 صفحات = 8 * 8KB .. الى هو 64 KB.
اوراكل عندهم شى اسمه Block .. وليس Page

معلومة اليوم من Sql Server ..عندك جداول تبي اتبع الحركة عليهم . الاضافات والتعديلات والحذف تبيه هو يقعد كنوع من الحماية ...
18/04/2024

معلومة اليوم من Sql Server ..

عندك جداول تبي اتبع الحركة عليهم . الاضافات والتعديلات والحذف تبيه هو يقعد كنوع من الحماية لاي جدول .. ماكيروزفت موفرة عليك الشغل هذا كله . شى اسمه Change Data Capture او لاقط التغيرات ..
مش حنذكر التعليمات لاكن نحكيلك شن صاير .
تدخل للبرنامج وتقوله نبي نفعل خدمة CDC على الداتا بيز الى اسمها كدا كدا ..
بعد ما تتفعل الخدمة .. تمشى تفعل الخدمة للجدول الى انت تبي تراجع التغييرات الى صايره عليه ..
ومن بعدها يبدا البروكر المسؤول على CDC بشغله .. حيكونلك جدول تاني فيه حقول نفس الى موجودة فى جدولك .. ويضيف عليهم بعض البيانات الاخري ..
مثلا حيقولك الحقل هذا تمت عليه عملية اضافة .. وكان قبل الاضافه هكي واصبح هكي .. او التعديل او الحذف ..
الشى الوحيد مش حيقولك من هو المستخدم الى قام بالتعديلات ... ( وهنا اقصد مستخدم قواعد البيانات وليس مستخدم النظام متاعك .. ) .. ويمكن معالجتها لو عندك اكثر من اكاونت على السيرفر ..
وفر على روحك الشغل وخلي الهنود يخدمو خدمتهم 😁 .. وزي ما واضح فى الصورة .. هما يقرو فى الحركات الى موجودة فى log ويترجموهلك فى الجدول زي ما انت تبي ..
يلا يا وحش 😀 كسر الدنيا



السلام عليكم ... سؤال اليوم فى قواعد البيانات .انت مبرمج او مهندس برمجيات او مسؤول على نظام فى اى مؤسسة حكومية او خاصة ...
18/04/2024

السلام عليكم ... سؤال اليوم فى قواعد البيانات .

انت مبرمج او مهندس برمجيات او مسؤول على نظام فى اى مؤسسة حكومية او خاصة او اى جهة اخري ..
نظامك الى انت مشرف عليه او خادمه .. هو نظام مالى وتقوم بعملية باك اب او نسخ احتياطي لقاعدة البيانات ... سواء نسخ كلي او جزءي .. انت ونظامك ..
كيف تتأكد من ان النسخ الاحتياطي الى انت ادير فيه لقاعدة البيانات ..
سليم . وباش نعقد الموضوع اكثر ( لانى ما نبيش تعليقات يقولي انا كل يوم ندير فى باك اب ... نقولو ان الداتا بيز حجمها 150 قيقا ) ..
وكل يوم تقوم بعملية نسخ معين حسب ما ذكرت انا فى بوست سابق موجود على الرابط هذا
https://www.facebook.com/permalink.php?story_fbid=pfbid02PSUEufLKS3QPi2yFYRZeP98d16mLPEvhv9eEagAss6XcaNWCSAyuqgVyGYEC1nWjl&id=61556622705956

شن هيا الاستراتيجية الى انت اتبع فاها باش تضمن ان امور شغلك تحت المراقبة والجودة كويسة ..
الى يبي يكتب تجربته .. يتفضل يعلق



لسلام عليكم .. نتكلمو على موضوع الباك اب بصورة بسيطة توصل للجميع بعون الله تعالى . وحنتكلم على Sql Server .على بركة الله...
18/04/2024

لسلام عليكم .. نتكلمو على موضوع الباك اب بصورة بسيطة توصل للجميع بعون الله تعالى . وحنتكلم على Sql Server .
على بركة الله .. قبل ما نتكلمو على الباك اب .. لازم نفكرو فى ما يعرف ب Disaster Recovery او بالتعافى من المخاطر .. هكي المنطق السليم ..
لما تمشى لاى جهة وتتعاقد معاهم لتركيب نظام .. والنظام حساس شوية فيه اموال او بيانات امنية او ما شابه .. من الافضل توقع اتفاق بينك وبينهم .. يسمي Service Level Agreement او باختصار SLA ..
حتي لو كانت الجهة ليبيه .. وانت ليبي .. قوللهم هذا اجراء وقائي قانوني متعارف عليه فى حالة حدوث الكوارث ..
الاتفاق ينص على اهم شيئين رئيسيين .. وهما
Downtime (كم الوقت الى حيوقف فيه النظام لو تعطل)
Data Loss (كم دقيقة عمل يمكن نخسرها اذا صار عطل فى قاعدة البيانات)
فى بعض التعليقات قالت Zero Data Loss .. مافيش فقدان للبيانات . المعلومة هذه حنوضحوها بعون الله ..
فى مايكروسوفت او اوراكل او غيرهم .. عندك ثلاث انواع او خيارات خاصات بنوع الباك اب متاعك .. المسميات تختلف طبعا من شركة لاخري لاكن المفهوم واحد . هادم مسميات مايكروسوفت فى Sql Server
Simple Recovery Model
Full Recovery Model
Bulk-logged Recovery
قبل ما نطرقو شن هم االانواع الثلاثة .. نتكلم شوي على طرق الباك اب .. فى التعليقات للبوست الى فات كلها تقولي دير سيرفر تاني باش تحمي بياناتك ... كلام جميل .. لاكن الزبون ما عندناش الا سيرفر واحد .. وحجم قاعدة البيانات 35 قيقا ... وانا ذكرت منبوش ناخدو وقت هلبا يوميا باش ناخدو باك اب ل 35 قيقا يوميا .. لسببين .. اولهم تبي سعة تخزينية كبيرة .. تاني شى .. يمكن توقفه على شغله .. والموضوع حساس لان النظام مالى ..
انواع الباك اب .. المهمات هما
Full backup
Differential backup
Transaction log backup
Tail-log backup
النوع الاول : ياخد فى كامل الداتا بيز ويستنسخ منها ملف وامتداده الافتراضى هو .Bak
النوع الثاني : اخر تغييرات صارت من بعد اخر ما خديت النوع الاول ولهدا نوعه جاي من كلمة Differ يختلف او المختلف ..
النوع الثالث : ياخد اتجاهين .. البيانات الى تغيرت جديدة بعد ما طبقت النوع الاول .. او البيانات الجديدة بعد ما اخديت او طبقت النوع الثاني .. وهدا هو الى يخدم بيه نظام Replica و Mirror الى تستنتخ فى قاعدة البيانات على سيرفر اخر او نفس السيرفر ..
النوع الرابع : مسميه اخر العنقود .. وهو بيكون ( نسبة فقدان البيانات ) .. مرات اديرله عملية جراحية بعد الكارثة ويطلع سليم .. ومرات يطلع مشوه وتخسر بياناتك من بعد اخر عملية للنوع الثالث ..
الكلام عارفه غامض شوي وخصوصا للناس الى معندهاش وقت كبير فى البرمجة والمنظومات والعالم هدا ...
نحاول نوضح بالعامية .. نفرض انا عندي داتا بيز حجمها 35 قيقا ... بندير خطة تكون مرنة ليا انا ولصاحب العمل ..
بنقول لمحرك قواعد البيانات SQL Server من فضلك ...
كل يوم أحد .. طبقلي النوع الاول من النسخ Full حياخد 35 قيقا نسخ كامل ..
الناس اشتغلت يوم الاثنين ودخلو بيانات بحجم 450 ميقا بايت ... انا خطة الحماية .. تاخد نسخة من التغييرات الى صارت من بعد ما خديت النسخ الكامل يوم الاحد .. يعني يوم الاثنين حيكون النسخ 450 ميقا ..
يوم الثلاثاء.. صارت تعديلات بحجم 100 ميقا .. ناخد نسخ منها .. وهكدا ليوم الاحد الى بعده ...
انا هكي : درت نسخ لقاعدة بياناتي 35 قيقا من غير اى ازعاج لا ليا ولا لصاحب الشغل ..
الامور سليمة نوعا ما لحد الان .. جاني شخص قالي كان وقفت الداتا بيز فى الضهر .. وانت تاخد فى Differential Backup فى نهاية اليوم ...
بنقوله عندي خطة ناخد فى باك اب .. كل ربع ساعة .. وننسخ فى Log Files
Log Files
هو باختصار بياناتك الى تغيرت .. من بعد اخر نسخ كامل درته .. او من بعد اخر Differential او ( نسخ البيانات الى تغيرت ) كامل درته .. يعني حيكون بعد النوع الاول او الثاني .. ( يعني من يوم الاثنين الى يوم السبت الى بعده .. كل ربع ساعة ناخد فى نسخ اتوماتك للبيانات . توقع العمل بالنظام يبدا ساعة 8 صبح . 8 وربع .. اللوق باك اب ياخد اول نسخة وهكدا ) وكلمة او هادى حنوضحها بعون الله ..
لو انا وقفت الداتا بيز يوم الاربعاء الضهر الساعة 2 و 10 دقايق.. كيف نقدر نرجع الداتا تشتغل ..
( انا واخد نسخ كامل يوم الاحد .. الاثنين عندي نسخ بالتغيرات الى صارت يومها . الثلاثاء عندي نسخة بالتغيرات الى صارت يومها .. ومزال بنشوفو شن بيصير فى الاربعاء .. يوم الكارثه ))
الحل يقول .. قول للداتا بيز استرجعي البيانات وهدا ملف النسخة الاخيرة يوم الاحد .. رجعها .. توا مزالت خدمتنا الى خدمناها يوم الاثنين والثلاثاء والاربعاء ..
نقوله عندي Differential باك اب خاص بالاثنين .. ديرله Restore ورجعنا خدمة الاثنين .. وبنقوله عندي نفس الملف لخدمة يوم الثلاثاء .. ورجعناه .. يوم الاربعاء ما عنديش Differntial backup لاكن عندي مجموعة Logs كل تغيرات صارت فى كل ربع ساعة نخزن فاها .. يلا نبدا من ساعة 8 وربع .. رجعلي التغيرات هادى .. والى بعدها لين نوصل للساعة 2 .. خديت فاها Log Backup ...
باهي يا معلم .. 2 وعشرة .. عندي فلوس ومعاملات درتهم ساعة 2 و 7 دقايق .. راحو ؟؟؟ هنا فاها وعلاها ..
فى اخر العنقود .. بنقول لمحرك قواعد البيانات .. دير محاولة وانسخلي بما يعرف ب Tail Log او الديل ... او نهاية اللوق .. بيدير عملية جراحية .. احتمال كبير تنجح .. وياخد اخر التعديلات الى دارها بعد ساعة 2
يمكن يرجع سليم .. واديرله Restore وترجعلك المعاملة الى درتها الساعة 2 و 7 دقايق ..
هنا .. انت تحمي فى بيانات الناس من غير نسخ 35 قيقا يوميا ...وماشى فالتراك السليم الى يخدم بيه العالم كله ..

ملاحظة : الناس الى تشتغل فى منظومات .. وتاخد فى Backup .. حط فى بالك ملفات الباك اب مرات انت خديتها وهيا مضروبة .. حنتكلم على موضوع كيف ادير تشك على ملفات الباك اب متاعك سلمية والا Header مضروبة فاها ..
اتمني واتمني واتمني اني قلت كلام فيه فايدة ... ومفهوم .. واسف لو الموضوع مش واضح .. لاكن بعون الله مستعد نعاوده بنسخة انضف وافضل وتكون تقعد كدليل يرجعله اى شخص محتاج الموضوع هدا ..
وانواع الحماية الى فوق Simple و Full و Bulk وكلمة او ..
حنرجعلهم فى وقت تاني ونوصل الى نقدر عليه ..


معلومة فى انظمة قواعد البيانات حتفيد الكل ولو بشكل نسبي ..لنفرض ان عندك جدول .. فى مجموعة اعمدة .. وانت حاب تعرض البيانا...
18/04/2024

معلومة فى انظمة قواعد البيانات حتفيد الكل ولو بشكل نسبي ..
لنفرض ان عندك جدول .. فى مجموعة اعمدة .. وانت حاب تعرض البيانات.
حتلقى جواب من معظم المبرمجين حيقولك
Select EmpID, EmpName From table1
افضل من
Select * From Table1
الكلام صحيح ومعروف عند الاغلبية وافضل فى الاداء لبرنامجك.
لاكن الى مش معروف تقنيا داخل محرك قواعد البيانات
Select * = Select Col1
حنقولك ليش ..
قواعد البيانات هيا بطبيعتها وتعاملها مع البيانات هيا عبارة عن
Row Store Database or Row Oriented Database
شن معني الكلام هذا .
محرك قواعد البيانات لما تقوله اطبعلي اسم الموظف .. هو مش ذكي زي ما انت متصور .. لا .. هو حيمشى يقرالك الصف كله ويرفع نسخة منه للذاكرة .. وفى الذاكرة حيصير فلتر ويعطيك المطلوب .. يعني القرائة من الهاردسك الى الذاكرة هيا قرائة الصف بالكامل .. ولو انك مداير سلكت لجدول به 100 الف موظف وتبي تطبع اساميهم .. حيقراا الجدول بالكامل يرفعه للذاكرة .. ومن بعدها حيعطيك المطلوب ..
النوع هذا من التخزين . هو تخزين صف بجانب صف فى الهارد دسك ..
كلام منطقي نوعا ما .. به كيف يا فلان يقولو انك تطلب
Select EmpName From EmpTable
افضل فى الاداء .. بنقولك حتي الكلام هذا سليم ..
لان حجم بيانات عمود واحد فى الشبكة اقل من نقل حجم جميع الاعمدة ..
النوع الاخر فى طرق تخزين البيانات هو .
Column Store Oriented or Column Store Database
وهذا عكس العملية الاولي .. وهو تخزين بيانات العمود بجانب العمود على الهاردسك ..
واستخدامه فى Datawarehousing وانظمة Snow Flakes وهذا حنتكلمو عليه مرة تانية .. شن معني الداتا وير هاوس وليس يستخدمو فاها وما الفرق بين
OLTP . OLAP
النصيحة العامة ... لما تكتب جملة عرض .. اكتب الاعمدة المطلوبة منك فقط .. حتي لو كانت هلبا .. لانك حتعب الشبكة معاك ونقل البيانات حيكلف برنامجك تاخير فى عرضها على الجهاز العميل ..

18/04/2024

قررت اني حنعطي فوايد للغير على هيئة اسألة ونفتح للافاق للغير ..

1 - ماهو المصطلح العلمي لجدول فى قاعدة البيانات من غير مفاتيح ولا قيود .. يعني جدول لابس هركة ويدهور فى Sql Server حتي فى اوراكل مثلا .. نفس النمط
عندي ... جدول فى قاعدة البيانات اسمه Tab1
2 - درت عليه Index على المفتاح الرئيسي ..
3 - بعدها درت عليه Index ثاني على الاسم ..
السؤال هو : كم Object يعني فى الداتا بيز ..

Address

Tripoli

Telephone

+16477457784

Website

Alerts

Be the first to know and let us send you an email when مطوري قواعد البيانات الليبين SQL Server, Oracle posts news and promotions. Your email address will not be used for any other purpose, and you can unsubscribe at any time.

Shortcuts

Share

Category