29/04/2026
ករណីគួរឱ្យភ្ញាក់ផ្អើលមួយបានកើតឡើង ដោយយុវតីម្នាក់បានរៀបចំអន្ទាក់ស៊ីដាច់ទ្រព្យសម្បត្តិមិត្តភក្តិដែលទើបនឹងស្គាល់គ្នា។ យោងតាមប្រភពព័ត៌មាន យុវតីសង្ស័យបានបបួលជនរងគ្រោះ (ជាយុវជនភេទទី៣) ដែលទើបស្គាល់គ្នាបានត្រឹមតែ ១អាទិត្យ មកផឹកស៊ីតែពីរនាក់ រួចក្រោយមកក៏បានហៅប្រុសស្នេហ៍របស់ខ្លួនមកចូលរួមផឹកថែមទៀត។ ជនសង្ស័យទាំងពីរនាក់បានរួមគំនិតគ្នាបញ្ច្រកស្រាជនរងគ្រោះយ៉ាងខ្លាំង រហូតដល់ថ្នាក់ស្រវឹងសន្លប់បាត់ស្មារតីនៅក្នុងបន្ទប់ទឹក។ ឃើញឱកាសល្អ ជនសង្ស័យក៏បានប្រមូលយកកាបូប ទូរស័ព្ទ និងម៉ូតូរបស់ជនរងគ្រោះ ជិះគេចខ្លួនទៅសម្ងំដេកជាមួយគ្នានៅឯផ្ទះសំណាក់មួយកន្លែងក្នុងសង្កាត់ស្ទឹងមានជ័យ។
ក្រោយពេលដឹងខ្លួន ជនរងគ្រោះបានប្រញាប់ទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលទន្លេបាសាក់ភ្លាមៗ។ ដោយសារតែម៉ូតូជនរងគ្រោះមានបំពាក់ប្រព័ន្ធតាមដាន GPS កម្លាំងសមត្ថកិច្ចបានធ្វើការស្រាវជ្រាវយ៉ាងយកចិត្តទុកដាក់ និងឈានដល់ការចុះបុកចូលដល់ក្នុងបន្ទប់ផ្ទះសំណាក់ ឃាត់ខ្លួនជនសង្ស័យទាំង២នាក់បានយ៉ាងទាន់ហន់តែម្ដង ក្នុងខណៈពេលដែលពួកគេកំពុងតែដេកលង់លក់។ #ព័ត៌មានថ្មីៗ
