08/10/2026
សេចក្ដីប្រកាសព័ត៌មាន និងបំភ្លឺជាបន្ទាន់announcement / 警惕诈骗 官方声明
(ស្ដីពី៖ ករណីជនខិលខូចលួចយកវីដេអូរូបភាពបុគ្គលិក ANT Mobile ទៅផ្សព្វផ្សាយបោកប្រាស់សាធារណជន)
គណៈគ្រប់គ្រងហាងលក់ និងចែកចាយទូរស័ព្ទដៃ ANT Mobile សូមគោរពជម្រាបជូនដំណឹង និងធ្វើការបំភ្លឺជាបន្ទាន់ដល់អតិថិជន និងសាធារណជនទាំងអស់ឱ្យបានជ្រាបថា៖
ថ្មីៗនេះ យើងខ្ញុំបានរកឃើញថា មានជនអនាមិក និងក្រុមជនខិលខូចមួយចំនួន បានធ្វើសកម្មភាពទុច្ចរិត ដោយបានលួចទាញយក (Download) រាល់វីដេអូផ្សព្វផ្សាយដែលមានវត្តមាន និងផ្ទៃមុខបុគ្គលិករបស់ ANT Mobile ទៅបង្ហោះបន្តលើគណនី/ទំព័រ Facebook ឬ TikTok ក្លែងក្លាយ ដោយដាក់លក់ទូរស័ព្ទក្នុងតម្លៃថោកខុសពីការពិត (តម្លៃមិនសមរម្យ) ក្នុងគោលបំណងទុច្ចរិតបោកប្រាស់យកប្រាក់កក់ពីបងប្អូនប្រជាពលរដ្ឋមួយចំនួន ដែលធ្វើឱ្យមានការភ័ន្តច្រឡំ និងខាតបង់ជាបន្តបន្ទាប់។
ដើម្បីការពារសុវត្ថិភាព និងផលប្រយោជន៍របស់អតិថិជន ក៏ដូចជាកិត្តិយសរបស់បុគ្គលិក និងអាជីវកម្ម ANT Mobile សូមធ្វើការបញ្ជាក់យ៉ាងម៉ឺងម៉ាត់ដូចខាងក្រោម៖
១. គ្មានការលក់ក្នុងតម្លៃថោកខុសប្រក្រតីឡើយ៖
រាល់ការដាក់លក់ទូរស័ព្ទ iPhone ក្នុងតម្លៃទាបជ្រុលខុសពីទីផ្សារ ឬការតម្រូវឱ្យវេរប្រាក់កក់មុនតាមរយៈគណនីឯកជនដែលគ្មានប្រភពច្បាស់លាស់ គឺជា «អំពើបោកប្រាស់សុទ្ធសាធ»។ សូមបងប្អូនមេត្តាប្រុងប្រយ័ត្នខ្ពស់ និងកុំវេរប្រាក់ឱ្យសោះ។
២. ការលួចប្រើរូបភាពបុគ្គលិកខុសច្បាប់៖
វីដេអូដែលមានផ្ទៃមុខបុគ្គលិក ANT Mobile ត្រូវបានក្រុមជនខិលខូចលួចយកទៅប្រើប្រាស់ដោយគ្មានការអនុញ្ញាត។ ANT Mobile មិនមានការពាក់ព័ន្ធ និងមិនទទួលខុសត្រូវចំពោះរាល់ប្រតិបត្តិការទិញ-លក់ ឬការខាតបង់ដែលកើតចេញពីទំព័រ/គណនីក្លែងក្លាយទាំងនោះឡើយ។
៣. វិធានការផ្លូវច្បាប់៖
បច្ចុប្បន្ន ក្រុមការងារយើងខ្ញុំកំពុងប្រមូលភស្តុតាង និងរៀបចំឯកសារ ដើម្បីដាក់ពាក្យបណ្ដឹងទៅកាន់អាជ្ញាធរមានសមត្ថកិច្ច និងនាយកដ្ឋានប្រឆាំងបទល្មើសបច្ចេកវិទ្យា ដើម្បីចាត់វិធានការតាមផ្លូវច្បាប់ជាធរមានចំពោះជនខិលខូចទាំងនោះ។
៤. បណ្ដាញទំនាក់ទំនង និងទីតាំងស្របច្បាប់ផ្លូវការ៖
ដើម្បីចៀសវាងការចាញ់បោកជនខិលខូច សូមអតិថិជនធ្វើការទាក់ទងមកកាន់បណ្ដាញសង្គមផ្លូវការរបស់ ANT Mobile ឬអញ្ជើញមកកាន់ទីតាំងជាក់ស្ដែងទាំង ២ សាខាផ្ទាល់៖
សាខាទី ១៖ ផ្សារស្ទឹងមានជ័យថ្មី
សាខាទី ២៖ ពោធិ៍ចិនតុង (លើផ្លូវធំ 113K ចុះពីស្តុបទី២ ស្ពានអាកាសចោមចៅ ទល់មុខផ្សារទំនើប ជីប ម៉ុង និងផ្លូវទៅផ្សារព្រៃទា / មុខព្រលានចាស់)
ANT Mobile សូមអំពាវនាវដល់បងប្អូនប្រជាពលរដ្ឋទាំងអស់ មេត្តាបង្កើនការប្រុងប្រយ័ត្ន ពិនិត្យប្រភពទំព័រឱ្យបានច្បាស់លាស់មុននឹងធ្វើប្រតិបត្តិការ និងសូមជួយរាយការណ៍ (Report) ឬផ្ញើគណនីក្លែងក្លាយទាំងនោះមកកាន់ផេកផ្លូវការរបស់យើងខ្ញុំ។
សូមអរគុណចំពោះការយោគយល់ និងការបន្តគាំទ្រ!
ធ្វើនៅ រាជធានីភ្នំពេញ, ថ្ងៃទី08 ខែ10ឆ្នាំ2026
គណៈគ្រប់គ្រង និងបុគ្គលិក ANT Mobile
