29/03/2026
😘
យុទ្ធសាស្ត្រទីផ្សារ "Rule of 7"
ហេតុអ្វីបានជាអតិថិជនត្រូវឃើញយើង "ច្រើនដង" ទើបសម្រេចចិត្តទិញ?
(យុទ្ធសាស្ត្រនេះខ្មែរយើងកម្រមានអ្នកដឹង តែថ្ងៃនេះអេតមីន "សុវត្ថន៍" លើកយកមកនិយាយនៅក្នុងអត្ថបទនេះសង្ខេបៗ ហើយអស់លោកអ្នកដែលចង់សិក្សាបន្ថែម... ក៏ស្វែងរកសិក្សាបន្ថែមទៀតចុះ....)
៙ យុទ្ធសាស្ត្រទីផ្សារ "Rule of 7" ឫសគល់នៃទីផ្សារ និងសិល្បៈនៃការបង្កើតឥទ្ធិពលលើការសម្រេចចិត្ត
យុទ្ធសាស្ត្រ Rule of 7 គឺជាគោលការណ៍គ្រឹះដែលចែងថា អតិថិជនម្នាក់ត្រូវតែទទួលបានសារ ឬឃើញម៉ាកយីហោរបស់អ្នកយ៉ាងហោចណាស់ ៧ ដង មុននឹងពួកគេសម្រេចចិត្តទិញផលិតផល ឬសេវាកម្ម។
យុទ្ធសាស្ត្រ Rule of 7 មានប្រភពដើមតាំងពីទសវត្សរ៍ឆ្នាំ ១៩៣០ មកម៉្លេះ...
អ្នកជំនាញទីផ្សារក្នុងស្ទូឌីយោភាពយន្តហូលីវូដនាពេលនោះ បានកត់សម្គាល់ឃើញថា មនុស្សម្នាក់ត្រូវការឃើញរូបភាពផ្សព្វផ្សាយភាពយន្ត (Posters) ឬឮការផ្សាយតាមវិទ្យុប្រហែល ៧ ដង ទើបពួកគេសម្រេចចិត្តទិញសំបុត្រចូលមើលក្នុងរោង។
ក្រោយមក គោលការណ៍នេះត្រូវបានសិក្សា និងពង្រឹងបន្ថែមដោយអ្នកជំនាញទីផ្សារល្បីៗជាច្រើន ជាពិសេសលោក Dr. Jeffrey Lant ដែលបានសរសេរក្នុងសៀវភៅរបស់លោកថា ដើម្បីទទួលបានការចាប់អារម្មណ៍ពិតប្រាកដ អ្នកត្រូវតែទាក់ទងអតិថិជនដដែលៗក្នុងរយៈពេលខ្លី។
អតិថិជនភាគច្រើនត្រូវតែ "ជួបយើង" ឬ "ឃើញយើង" ដដែលៗយ៉ាងហោចណាស់ ៧ ដងឡើងទៅ ទើបពួកគេចាប់ផ្ដើមបើកចិត្ត និងត្រៀមខ្លួនសម្រេចចិត្តទិញ។
ស្ដាប់ទៅហាក់ដូចជាច្រើនមែនទេ? ប៉ុន្តែបើគិតក្នុងជ្រុងរបស់អតិថិជនវិញ វាពិតជាសមហេតុផលណាស់ ព្រោះសព្វថ្ងៃនេះព័ត៌មានមានច្រើនលើសលប់ ហើយម៉ាកយីហោផ្សេងៗប្រកួតប្រជែងគ្នាពេញលើ Feed ហ្វេសប៊ុក គ្រប់គ្នាសុទ្ធតែត្រូវការ "ភាពជឿជាក់" មុននឹងសម្រេចចិត្តចំណាយលុយ។
"ការលក់ មិនមែនជាការបញ្ចប់ក្នុងពេលតែមួយនោះទេ ប៉ុន្តែវាគឺជាការបង្កើតភាពស្និទ្ធស្នាលជាបន្តបន្ទាប់"
៙ ហេតុអ្វីត្រូវតែលេខ ៧?
មូលហេតុដែលការឃើញម្ដងមិនគ្រប់គ្រាន់ គឺដោយសារខួរក្បាលមនុស្សមានរបាំងការពារ ប្រឆាំងនឹងការផ្សាយពាណិជ្ជកម្ម...
- ដងទី ១-២ (ការដឹង) : អតិថិជនគ្រាន់តែដឹងថាមានវត្តមានអ្នក ប៉ុន្តែពួកគេមិនទាន់ទុកចិត្តឡើយ។
- ដងទី ៣-៤ (ការចងចាំ) : ឈ្មោះម៉ាករបស់អ្នកចាប់ផ្ដើមរត់ចូលក្នុងខួរក្បាលគេ ពួកគេចាប់ផ្ដើមមានអារម្មណ៍ថា "ហាក់ដូចជាធ្លាប់ស្គាល់"។
- ដងទី ៥-៧ (ការជឿជាក់ និងសកម្មភាព) : នៅពេលឃើញអ្នកបង្ហាញខ្លួនដោយភាពទៀងទាត់ ញឹកញាប់ៗ វានឹងបង្កើតនូវអារម្មណ៍ថា "អាជីវកម្មនេះមានស្ថេរភាព" ហើយរបាំងការពារផ្លូវចិត្តនឹងធ្លាក់ចុះ ជំនួសមកវិញនូវការចង់សាកល្បង។
ឧទាហរណ៍ឱ្យកាន់តែយល់...
ថ្ងៃទី ១ អតិថិជនឃើញផុសយើង គាត់ប្រហែលជាគ្រាន់តែអូសរំលង។
ថ្ងៃទី ២ គាត់អាចនឹងចុច Like។
ថ្ងៃទី ៣ ចាប់ផ្ដើមសាកល្បង Share ទៅឱ្យមិត្តភក្តិ។
ថ្ងៃទី ៤ ចុចចូលមើលព័ត៌មានលម្អិតបន្ថែម។
ហើយបន្ទាប់ពីឃើញចុះឡើងៗដដែលៗ គាត់នឹងចាប់ផ្ដើមមានទំនុកចិត្ត ហើយចុងក្រោយក៏សម្រេចចិត្តទិញ។
ដូច្នេះ ការងាររបស់ម្ចាស់អាជីវកម្មគឺត្រូវរកវិធី "បង្ហាញខ្លួន" ឱ្យបានញឹកញាប់គ្រប់គ្រាន់ ប៉ុន្តែមិនត្រូវឱ្យរំខានដល់គេឡើយ។ ជាឧទាហរណ៍ យើងគួរផ្លាស់ប្តូរមាតិកា ដូចជា... ការនិទានរឿងរ៉ាវ, សកម្មភាពនៅពីក្រោយការផលិត, ការ Review ពីអតិថិជន, ការផ្ដល់ដំបូន្មានតូចៗ រហូតដល់ការផ្ដល់ប្រូម៉ូសិន ជំនួសឱ្យការចំណាយកម្លាំង និងថវិកាទាំងអស់ទៅលើការផ្សាយពាណិជ្ជកម្មលក់តែមួយមុខគត់។
៙ យុទ្ធសាស្ត្រ "បង្ហាញខ្លួនឱ្យញឹក ប៉ុន្តែមិនរំខាន"
ដើម្បីឱ្យ Rule of 7 ប្រកបដោយប្រសិទ្ធភាពក្នុងសម័យឌីជីថល អ្នកត្រូវប្រើរូបមន្តមាតិកាចម្រុះ ដើម្បីកុំឱ្យអតិថិជនមានអារម្មណ៍ធុញទ្រាន់...
១) ការអប់រំ : ចែករំលែកចំណេះដឹងទាក់ទងនឹងបញ្ហារបស់អតិថិជន។
២) ការកម្សាន្ត : បង្កើតមាតិកាដែលធ្វើឱ្យគេមានអារម្មណ៍ល្អ ឬសប្បាយជាមួយម៉ាកយីហោរបស់អ្នក។
៣) ភាពជឿជាក់ : បង្ហាញវិញ្ញាបនបត្រ ឬបទពិសោធន៍ដែលអ្នកមាន។
៤) សក្ខីកម្ម : បង្ហាញ Review ឬលទ្ធផលពីអតិថិជនមុនៗ។
៥) ពីក្រោយឆាក : បង្ហាញភាពស្មោះត្រង់នៃដំណើរការការងាររបស់អ្នក។
៦) ការប្រៀបធៀប : បង្ហាញពីចំណុចពិសេសដែលអ្នកមានតែម្នាក់ឯង។
៧) ការជំរុញ : ការផ្ដល់ជូនពិសេសដើម្បីឱ្យពួកគេសម្រេចចិត្តភ្លាមៗ។
Rule of 7 មិនមែនជាច្បាប់ស្លាប់ក្រៀមដែលត្រូវតែចំនួន ៧ ដងជានិច្ចនោះទេ ប៉ុន្តែវាគឺជាការរំលឹកស្មារតីថា "ភាពទៀងទាត់ និងបន្តបន្ទាប់ សំខាន់ជាងភាពលេចធ្លោខ្លាំងតែមួយដង" រាល់ពេលដែលយើងបង្ហាញខ្លួនឱ្យអតិថិជនឃើញ គឺវាដូចជាការសន្សំពិន្ទុនៃភាពជឿជាក់ បន្តិចម្ដងៗរហូតដល់គ្រប់ចំនួន។
ថ្ងៃនេះ បើមានអ្នកណាទើបតែចាប់ផ្ដើម កុំអាលអាបង់ចិត្ត ឬបាក់ទឹកចិត្តដែលផុសដំបូងលក់មិនទាន់បាន។
ត្រូវចងចាំថា... អតិថិជនត្រូវឃើញយើងច្រើនដង ទើបពួកគេត្រៀមខ្លួនទិញ... ភាពទៀងទាត់នឹងប្តូរពី "ភាពមិនស្គាល់" ឱ្យទៅជា "ភាពស្និទ្ធស្នាល" ហើយចុងក្រោយគឺការទិញម្ដងហើយម្ដងទៀតប្រកបដោយនិរន្តរភាព។
_____សុវត្ថន៍-Sovathn
#សុវត្ថន៍_Sovathn #ទីផ្សារកម្ពុជា #លក់ដូរ #យុទ្ធសាស្ត្រទីផ្សារ #យុទ្ធសាស្ត្រទីផ្សារRuleof7 #អតិថិជន #ផលិតផល #សេវាកម្ម
