تعلم برنامج الاكسس 2007, النجف, Najaf (2026)

06/02/2014

اعتذر من كل المتابعين على عدم اكمال الدورة وذلك لانشغالي بالدراسة الجامعية .. وان شاء الله نستمر بعد الامتحانات النهائية.. فاتمنى قبول اعتذاري.. لكم جزيل الشكر والتقدير..

06/02/2014

اعتذر من كل المتابعين على عدم اكمال الدورة وذلك لانشغالي بالدراسة الجامعية .. وان شاء الله نستمر بعد الامتحانات النهائية.. فاتمنى قبول اعتذاري.. لكم جزيل الشكر والتقدير..

06/09/2013

الفصل الثاني : الدرس التاسع

بسم الله الرحمن الرحيم

http://www.gulfup.com/?HFm0hB

05/09/2013

الفصل الثاني : الدرس الثامن

بسم الله الرحمن الرحيم

ان شاء الله اليوم راح نشرح عن ( خصائص الحقل)

نتابع الفيديو...

---------------------------------------------------------------------

رابط الفيديو :
http://www.youtube.com/watch?v=HvYwBd04UNI

للانترنت الضعيف تحميل الفيديو من :
http://www.gulfup.com/?48Rihx

لتحميل البرنامج :
http://www.gulfup.com/?xhKJqq
---------------

--------------------------

نسيت اشرح عن خاصية التنسيق بالفيديو...

1- خاصية التنسيق لنوع البيانات = رقم:
هو اظهار شكل البيانات بترتيب معين ...

مثلا .. اني عندي رقم ( 564332) اذا اختاريت
تنسيق من نوع /
أ- (رقم عام) : يبقي الرقم على حاله بدون تغيير بشكل البيانات...
ب- (عملة) : يخلي فارزة لكل 3 ارقام .. ويضيف رمز العملة .. مثل ( 3.254 د.ع)
ج- (ثابت) : خانتين بعد الفارزة على اليمين ... يعني بالمئة ...
-------------

2- خاصية التنسيق لنوع البيانات = تاريخ/وقت:
ترتيب شكل ظهور البيانات من نوع تاريخ ووقت ... جرب وشوف
-------------------------

انتهى الدرس ...

23/08/2013

الفصل الثاني: الدرس السابع

بسم الله الرحمن الرحيم

شرح بسيط عن شاشة تصميم الجدول ...

الحمد لله الدرس السابق اتعلمنه شلون نخطط للبرنامج اللي نريده وشلون نسوي جدول وندخل البيانات بيه...

اليوم ان شاء الله ... راح نشرح شوية عن شاشة تصميم الجدول ...

خلونه نتابع الفيديو ....
-----------------------------------
http://www.youtube.com/watch?v=BNd3GvSjTeo

------------------------
للاصحاب اللي عندهم الانترنت ضعيف ... جرب تنزل هذا الملف..
http://www.gulfup.com/?bqE394

بعد ما شفنه الفيديو ... نريد منكم فهم الموضوع بشكل جيد ... علمود الدروس الجاية متصير علينه صعبة ... وان شاء الله كل الدروس سهلة ..
بس شوية يرادله تفكير وتركيز ...

انتهى ....

14/08/2013

الفصل الثاني - الدرس 6
بسم الله الرحمن الرحيم

التخطيط لبرنامج بيانات الموظف وصرف رواتب + طريقة انشاء جدول + انواع البيانات .....

اليوم ان شاء الله راح انطبق اول برنامج بالاكسس...
راح انسوي جدول وندخل البيانات والمعلومات بيهه..

قبل لا اطبق البرنامج ... لازم اخطط للبرنامج على الورق .. مثل ما قلنا سابقا ( التخطيط)..
مثلا ... اني اريد اسوي برنامج للموظفين وبنفس الوقت يصرف راتب للموظفين ... فاذا اريد اخطط لازم اخلي ورقة وقلم واسجل :
اولا- احتاج جدول بيه بيانات الموظف ( يعني معلومات عن الموظف) وهي:
1- رقم الموظف. ملاحظة( الرقم خاص لكل موظف وما لازم يتكرر ... وكون ما يبقى فارغ )
2- اسم الموظف الثلاثي. ملاحظة ( لازم نكتب الاسم الثلاثي وميصير نكتب الاسم الثنائي فقط لو الاسم الرباعي , علمود البرنامج يمنع تكرار الاسم )... وبعد ملاحظة ( اذا نريد نكتب اسم (عبد الرحمن) فلازم ما نخلي فراغ بين (عبد ) و (الرحمن) يعني يصير هيجي (عبدالرحمن) )
3- المواليد.
4- التحصيل الدراسي.
5- المحافظة.
6- العنوان.
7- الموبايل.
8- الوظيفة.
9- مقدار الراتب.
10- ملاحظات.

ثانيا- احتاج جدول اخزن بيه بيانات استلام الراتب ( واربطه ويه جدول بيانات الموظف عن طريق _ رقم الموظف _) فاحتاج حقول وهي:
1- المعرف ( المعرف هو رقم خاص لكل سجل ( صف ) )
2- رقم الموظف ( نحتاج رقم الموظف علمود السجل ينربط ويه رقم الموظف بجدول بيانات الموظف )
3- مقدار الراتب.
4- الشهر + السنة
5- تاريخ الاستلام.
--------------
هسه نريد منك متابعة الفيديو على الرابط ... شرح شلون ننشئ جدول

http://www.youtube.com/watch?feature=player_detailpage&v=XG3AtF1FO-E

اذا كان الانترنت عندك ضعيف جرب تنزل الفيديو من هذا الرابط:

http://www.gulfup.com/?a3T68Z

-------------------------
بعد ما كملنه من الفيديو ... نجي نتعرف على ( انواع البيانات)
تنقسم البيانات الى عدة اقسام ... اكو بيانات نصية ( نص) مثلا ( محمد ) واكو بيانات رقمية (رقم) مثل ( 5241) وغيرها من البيانات (تاريخ ) و ( وقت ) .... وانواع البيانات الموجودة في الاكسس هي :

1- نص : هي عبارة عن بيانات حرفية ورقمية واشارة ... وتكدر تخزن بيهه = 255 حرف ( يعني ميخزن اكثر من 255 حرف ... )
2- رقم : وهو عبارة عن بيانات رقمية ... تستخدم في حالات الجمع والطرح والضرب والقسمة وغيرها من العمليات الحسابية والدوال المثلثية ... وهي هم تنقسم الى انواع ( طويل , مزدوج , مفرد , .....)
3- مذكرة : هو نفس نوع البيانات ( نص) بس الفرق هو ان ( مذكرة ) يكون عدد الحروف اللي تخزنها اكثر من 65000 حرف ( يعني تكدر تكتب جريدة كاملة بيهه)
4- تاريخ / وقت : تخزن قيم تاريخ ووقت ... مثل تاريخ اليوم او الوقت ... وتكدر تختار الصيغة اللي تريدهه .. مثل ( 14/8/2013 او 14-8-2013 او 14 اب 2013) وكذلك بالنسبة للوقت
5- عملة : هي عبارة عن بيانات نقدية ... يعني نفس نوع البيانات ( رقم) بس يضيف بجانب الرقم اختصار للعملة المحلية مثل ( د.ع 65.000) يعني 65000 دينار عراقي..
6- ترقيم تلقائي: عبارة عن بيانات رقمية فردية ( يعني ميتكرر في العمود ) ... وهي تسلسلية اي يزداد مقدار رقم واحد مع كل سجل جديد.
7- نعم/لا: عبارة عن بيانات منطقية ... يعني يتخزن (نعم ) و (لا) فقط او ( 0 ) او (1) والفائدة هو استخدامها في الاوامر الشرطية ... مثلا نكتب كود ( اذا كان الحقل= 1 , اذاً اصرف الراتب)
8- كائن OLE : عبارة عن خزن ملفات مثل ( Word او Excel او صورة )
9- ارتباط تشعبي: تستخدم بيانات نصية او رقمية .. هدفها انشاء مسار الملفات على الحاسبة او مواقع انترنت ...
10- المرفقات: هو ارفاق ملف صورة او صوت او فيديو او اي ملف داخل القاعدة ( وهذا الشي مننصح بيه لان يزيد من حجم القاعدة ) والاكسس ما يتحمل حجم اكثر من 2 جيجا ... مثل ( خزن صورة موظف داخل القاعدة ) واذا خزنه صورة اكثر من 20000 موظف وكل صورة حجمها 210 كيلو بايت يعني راح تصير حجم القاعدة تقريبا اكثر من 4 جيجا و200 ميجا .. وهذا الحجم راح تخلي القاعدة تعمل ببطء ..

انتهى...

10/08/2013

الفصل الثاني - الدرس 5
بسم الله الرحمن الرحيم

اليوم الشرح راح يكون عن برنامج الاكسس ومعرفة محتوياته..

توضيح الارقام في الصورة ... الصورة توضح شلون نسوي قاعدة بيانات جديدة ...
1- ننقر على اي مكان فارغ بزر الماوس الايمن ...
2- نختار جديد
3- قاعدة بيانات Microsoft Access 2007
4- نقوم باعادة تسمية القاعدة الى ( بيانات الموظفين)
5- القاعدة بعد التسمية وبعد ذلك نقوم بفتح القاعدة

هسه نرجع للدرس ..

الاكسس يحتوي على 5 عناصر اساسية ومهمة في عمل البرنامج وهي:
1- الجداول (Tables)
2- النماذج (Forms) ( الشرح التفصيلي في الفصل الثالث ان شاء الله)
3- الاستعلامات (Queries) ( الشرح التفصيلي في الفصل الرابع ان شاء الله)
4- التقارير (Reports) ( الشرح التفصيلي في الفصل الخامس ان شاء الله)
5- ماكرو + الوحدات النمطية ( الشرح التفصيلي في الفصل السادس ان شاء الله)

س/ زين ... اريد شرح مبسط ...

ج/ تدلل هسه راح اشرحلك ...
نجي للنقطة الاولى :
1- ( الجداول/Tables ) / الجدول هو الملف الاساسي اللي يتم تخزين البيانات بيهه... يعني لب البرنامج ... اذا ما عنده جدول بالقاعدة فهذا ميعتبروه قاعدة بيانات... والجدول مكون من صفوف واعمدة ... كل صف يمثل بيانات شخص ... وكل تقاطع صف وعمود يسموه ( خلية).... يعني متكدر تسوي برنامج مال حسابات او اي برنامج بدون الجداول ...
وطريقة انشاء الجداول سهلة كلش .... ان شاء الله الدرس القادم راح نشرح بالتفصيل عن الجداول ...

2- (النماذج / Forms) / النموذج هو يعرض البيانات على واجهة مرتبة (حسب ترتيب المبرمج) ....

س/ زين النموذج مين يجيب البيانات؟؟؟...

ج/ سؤال لطيف ..... باختصار : النموذج يجيب البيانات من الجداول او الاستعلامات.... يعني من نصمم النموذج , نربط النموذج بالجدول (بالفصل الثالث ان شاء الله نشرحهه بالتفصيل) شوف هسه ... اذا ما عندنه الجداول ... فما كو فائدة من النموذج.
ويعرض السجلات الموجودة في الجدول سجل سجل يعني يعرض سجل واحد فقط ...
السجل هو نفس الصف بالجدول ...

3- الاستعلامات (Queries)/ الاستعلامات من اسمه واضح ... يعني تسوي تصفية لمجموعة بيانات ... وهو هم يجيب البيانات من الجداول ....
س/ ما افتهمت؟
ج/ مثلا ... اني عندي جدول بيه بيانات الموظفين (2500 موظف) ... واريد اطلع الموظفين اللي صارلهم بالخدمة عشر سنوات ... اهنا راح اسوي استعلام ... وهذا الاستعلام راح يبحث عن اسماء الموظفين اللي تجاوزت الخدمة مالتهم عشر سنوات وراح يعرض البيانات على شكل جدول ...
كأنما راح يسوي جدول مؤقت مفلتر...

4- التقارير (Reports)/ التقارير تفيدنا بالطباعة ... وهو هم يجيب البيانات من الجداول او الاستعلام...
س/ شلون يفيدنا بالطباعة...
ج/ يعني نكدر نصمم التقرير على شكل اللي نريده ... ونربطه بالجدول او بالاستعلام ... علمود ياخذ البيانات ويطبعهن بشكل مرتب..

5- ماكرو + الوحدات النمطية /

الماكرو/ هي مجموعة من الاوامر محفوظة في ملف ( طبعا المبرمج يخلي الاوامر ويحفظهن) ويتم استدعاء الماكرو (الملف) بالنموذج او التقرير ...

الوحدات النمطية / هي مجموعة اوامر تكتب بلغة (VBA) في محرر الفيجول بيسك وهي سهلة وراح نتعرف على كم امر في الفصل السادس ان شاء الله...

08/08/2013

نهاية الفصل الاول - الدرس 4

بسم الله الرحمن الرحيم

الحمد لله والشكر خلصنا من الفصل الاول وكان بسيط جدا

علمود ننتقل الى الفصل الثاني لازم نكون نعرف :

1- معنى قواعد البيانات
2- معنى البيانات
3- معنى المعلومات
4- الفائدة من قواعد البيانات
5- احجام قواعد البيانات
6- الاكسس ( ابسط برنامج لادارة قواعد البيانات)
7- التخطيط قبل انشاء قاعدة البيانات.

اذا واحد فاهم النقاط السبعة خلي يحضر روحه وننتقل الى الفصل الثاني ...

الدروس القادمة راح تكون عن شرح برنامج الاكسس وانشاء قاعدة بيانات بسيطة ....

انتهى ...

06/08/2013

الفصل الاول - الدرس 3

ج/ السلام عليكم
س/ وعليكم السلام
ج/ اليوم نكمل دورتنا وهذا الدرس متعلق ( فائدة قواعد البيانات ) و ( التخطيط)
س/ جيد .... شنو الفائدة من قواعد البيانات؟؟؟
ج/ فوائدها كلش هواي :
1- تخزين جميع البيانات في ملف واحد وبتصانيف متنوعة .....
2- مشاركة البيانات...
3- السرية الكاملة للبيانات..
4- عدم تكرار البيانات...
5- توفير الوقت والدقة في المعالجة...

س/ اشرح انطيني امثلة ... كلشي ما افتهمت ..
ج/ نجي للنقطة :
1- يعني (تخزين جميع البيانات في ملف واحد) هسه اذا تروح لدائرة الجنسية ... راح تلكه مقسمين السجلات على شكل مناطق ( المنطقة الاولى . الثانية ... التاسعة, ...) يعني اذا اسمك بالمنطقة التاسعة وتريد تبدل الجنسية لازم تراجع المنطقة التاسعة وميصير تراجع غير منطقة لان اسمك غير موجود الا بالمنطقة التاسعة ... زين هاي الخطة تنظم عملهم... بس اكو مشكلة ...
س/ شنو هي المشكلة؟
ج/ اذا تريد تبدل الجنسية ... تلكه السره على المنطقة التاسعة واصل للباب الجنسية ... وتباوع على المنطقة 14 ما كو عليه بس اثنين ...يعني المشكلة بالازدحام على المنطقة ... هاي مشكلة لو مو مشكلة ...
س/ اي مشكلة ... زين شنو الحل ؟
ج/ احنه لو نفكر شويه ونحول كل السجلات (سجلات المناطق ) على الحاسبة المركزية... وبعدين نخلي لكل منطقة حاسبة ونربطه بالحاسبة المركزية عن طريق الشبكة ( بالفصل الاخير نشرحهه ان شاء الله) ... ونلغي ارقام المناطق ... يعني المناطق تصير بس للمراجعة لاي واحد ... علمود اللي يريد يبدل الجنسية يراجع لاي منطقة يلكه اسمه ويكمل معاملته بكل سهولة ...

2- يعني السجلات مخزنة على الحاسبة المركزية.. وتشارك السجلات ويه بقية الحاسبات (يعني بقية الحاسبات مابيه السجلات ... بس هي تاخذ السجلات من الحاسبة المركزية ... )
3- يعني القاعدة بيه (اسم وكلمة السر) محد يكدر يدخل للقاعدة ويحذف البيانات.
4- يعني اذا عنده بالدائرة ( 2500موظف) مسجلين اسماؤهم ببرنامج (الحسابات) ... مثلا اكو موظف اسمه ( محمد نادر علي)... اجه موظف الحسابات راد يدخل اسم ( محمد نادر علي) مرة ثانية (علمود يخمط فلوسه ...خخخخخخ) فالقاعدة ماراح يسجل اسمه ... ليش ... لانه يمنع التكرار ... لان البرنامج يكول هذا الاسم موجود عندي وما اكدر اسجله مرة ثانية.. فهذا الشي يفيدنه علمود ما يتكرر الاسماء وتصير اسماء وهمية..
5- مثال :
اذا تريد تروح بالمستشفى القديم .. يم السجلات مالت الولادات ... وتريد تطلع مواليد شخص ... شوف اش راح يصير ...
تلكه القسم متروس سجلات ورقية للسنوات القديمة . . يعني كل سجل مصنف حسب السنوات.. فاول سؤال راح يسالك الموظف ... يكلك باي سنة هو مولود ؟؟؟
زين انته متدري شوكت انولد.. ...فهنا الموظف راح يدور بالسجلات كلهن اسم اسم ... بس اهنا اكو مشكلة؟
س/ شنو المشكلة؟
ج/ البحث راح يطول ايام هواي .. احتمال اسبوع يالله يكمل..
س/ شنو الفرق بين البحث بالسجلات على الورق وبالسجلات على الحاسبة؟
ج/ خلينه نفرض ان السجلات مالت الولادات موجودة على الحاسبة ... شوف اش راح يصير ....
راح يسالك الموظف عن الاسم ( مو مثل صاحبنه القديم اللي يسالك عن السنة اللي انولد بيه) ... راح تنطيه الاسم ... هو راح يبحث بالقاعدة عن طريق الاسم ... بثواني راح يطلع بيانات الاسم ... وينطيك مواليد الشخص...
الفرق اهنا هو بالوقت ... يعني السجلات القديمة تستغرق اسبوع ... والسجلات على الحاسبة تستغرق ثواني ... اهنا اكو فرق لو لا؟
س/ اي والله اكو فرق هواي ... يعني الشخص ميتأخر غير ثواني .... وهذا الشي اذا طبقناه على دوائر الدولة فراح يسوي فرق كلش هواي .. يعني المعاملة راح تكمل بنص ساعة فقط ... مو ثلاثة ايام تركض بالمعاملة..

ج/ اكو فوائد اهواي اله ... راح تشوفهن بالتطبيق...

س/ الفقرة الثانية شنو هيه .... التخطيط ؟؟
ج/ الموضوع كلش مهم وبيه تفاصيل هواي ويعتبر الاساس للقاعدة ... اذا التخطيط غلط راح يطلع البرنامج غلط ... واحنه راح نختصر علمود نسهل على المقابل .... التخطيط هو (المهندس مال البناء ) يعني المفكر ...
س/ اوكف اوكف ... شنو مهندس مال بناء ...شنو مفكر ؟؟؟ هاي شنو عدنه برنامج لو بناء بيت ...
ج/ ههههههههههههه ..... دومك مستعجل .... بابه اصبر شويه .....
البرنامج اللي اريد اسويه .. لازم اعرف كم جدول احتاج للبرنامج ... واعرف شلون اصنف الاعمدة بالجدول .... واعرف وين اخزن البيانات .... وهذا التخطيط يكون على الورق ... لان التخطيط كلش مهم ... وبعدين انشئ البرنامج على اساس التخطيط...
ومن تتعلم تصميم البرامج راح تشوف الفائدة ... فلا تستعجل ..

انتهى...

05/08/2013

الفصل الاول - الدرس 2

س/ شنو هو الاكسس وليش هو بالذات نتعلمه ... لان اكو برامج هواي غير الاكسس!!

ج/ الاكسس: هو احد البرامج المكتبية المقدمة من شركة مايكروسوفت وهو عبارة عن برنامج لادارة (خلي خطين جوه كلمة لادارة ) قواعد البيانات ..

س/ زين الخطين جوه كلمة (لادارة) ليش؟
ج/ لان (Access) هو يدير قواعد البيانات ( يعني اضافة وتحديث وحذف البيانات في قاعدة البيانات)
س/ زين (قواعد البيانات) شنو ؟
ج/ خوش سؤال, قواعد البيانات هو : عبارة عن مجموعة من البيانات والمعلومات عند ترتيبها تعطينا معلومة مفيدة ...
س/ ما افتهمت !!!!
ج/ حتى اني ما افتهمت !!! خخخخخخخخخ... هسه اني افهمك: نجي نعرف :
1- البيانات : عبارة عن كلمة او احرف او ارقام تخزن في القاعدة ... مثل ( محمد, نادر , 1985, طالب هندسة)
2- المعلومات: هي بيانات تم تنظيمها ومعالجتها ليستفاد منها ... مثلا ( الاسم : محمد نادر --- المواليد: 1985 --- الدراسة الاكاديمية: طالب هندسة )
س/ هسه شوية طخت ... يعني البيانات مثل ( محمد , نادر , 1985 , طالب هندسة) كدرت انظمها وارتبها وانطتني معلومة مفيدة مثل ( الاسم : محمد نادر --- المواليد: 1985 --- الدراسة الاكاديمية: طالب هندسة )
ج/ حلو ... بلشنه شوية نفتهم ..
س/ زين هاي قواعد البيانات اكو احجام الها ؟
ج/ اي ... اكو قواعد البيانات كبيرة وصغيرة
الكبيرة : مثل SQL و Oracle
الصغيرة : مثل Fox Pro و Access

واكو هواي مااريدك تدوخ ..

س/ زين شكل البيانات وتصميمه بالقاعدة شلون صايرة ... او شلون تتخزن بالقاعدة؟
ج/ قواعد البيانات اللي راح نتعلمه هو يكون على شكل جدول ( اعمدة وصفوف )يعني ( شلون الدفتر مالت اسماء الطلاب بالمدرسة او سجل حضور وانصراف الموظفين بالدوائر او سجل الولادات والوفيات بالمستشفى ... هذني كلهن امثلة على قواعد البيانات ... فاحنه راح نحول من كتابة باليد وعلى الورق الى تسجيل البيانات في الحاسبة)

س/ ليش هو بالذات نتعلمه ... اني اريد اتعلم SQL!!
ج/ الاكسس يعتبر المدخل الى عالم قواعد البيانات لسهولته ... صحيح (SQL) احسن وافضل من الاكسس بس مثل ما قلنه انو الاكسس هو المدخل الى عالم قواعد البيانات يعني اذا افتهمنه الاكسس فما راح يصعب علينه (SQL) ان شاء الله

انتهى ..

05/08/2013

الفصل الاول : الدرس 1

واحد يسأل ؟ شنو الفائدة من تعلم الاكسس؟

نكول

الاكسس برنامج سهل وبيه عدة خيارات تكدر منه تسوي برامج هواي تخدمك في مجال عملك كأن تكون معلم او موظف او تاجر او صاحب محل او شركة ... مثلا

1- احنه طلبة الهندسة تقنيات الحاسوب تفيدنا بالمرحلة الرابعة لان اكو مادة اسمها (access)
2- في المدرسة
برنامج تسجيل اسماء الطلاب ومراحلهم الدراسية
برنامج درجات الطلاب وطباعة النتيجة النهائية للطلبة
برنامج المحاضرات يساعد الاستاذ على تقديم المحاضرات وترتيبها
برنامج حسابات المدرسة

3- في المستشفيات
برنامج تسجيل اسماء المرضى وبياناتهم الشخصية وتشخيص الطبيب والعلاج
برنامج تسجيل اسماء الاطباء والممرضين وترتيب اوقات الدوام والخفر فيما بينهم
برنامج الصيدلية : يتم فيه تسجيل جميع الادوية وعدد التي تم صرفها والتي لم تصرف وعدد الموجود في المخزن

4- تجاري:
برنامج الحسابات يستخدم في المحال التجارية
برنامج المستودع يتم فيه جرد المخزن وكمية المواد الموجودة والمصروفة
برنامج التقسيط : للبيع بالتقسيط

4- في المؤسسات:
برنامج تسجيل اسماء الموظفين وبياناتهم
برنامج اوقات الدوام الموظفين
برنامج الحسابات ورواتب الموظفين والاقساط
برنامج الارشيف : لارشيف الكتب الصادرة والواردة

وغيرها هواي حسب ذكاء المبرمج والذي يستطيع صنع برامج حسب رغبته..

04/08/2013

بسم الله الرحمن الرحيم

الحمد لله رب العالمين والصلاة والسلام على اشرف الخلق محمد وعلى اله الطيبين الطاهرين

قال تعالى ( وَقُل رَّبِّ زِدْنِي عِلْمًا ) وقال تعالى ( وَمَا أُوتِيتُم مِّن الْعِلْمِ إِلاَّ قَلِيلاً )

ببركة الصلاة على محمد وال محمد سوف نبدا هذه الدورة القصيرة عسى الله ان يجعلها في ميزان حسناتنا انه سميع مجيب الدعاء ..

وارجو من الاخوة الاعزاء الدعاء لي ولوالدي ولجميع المؤمنين بظهر الغيب ..

ونرجو ان تكون التعليقات بعيدة عن الشكر والثناء لتسهيل فهم المادة ...

ونعتذر مقدما عن تقصيرنا في اداءنا ...

تعلم برنامج الاكسس 2007

06/02/2014

06/02/2014

06/09/2013

05/09/2013

23/08/2013

14/08/2013

10/08/2013

08/08/2013

06/08/2013

05/08/2013

05/08/2013

04/08/2013

Address

Telephone

Website

Alerts

Shortcuts

Share

Category