28/06/2017
વાનાક્રાઇના આતંકના મહિના બાદ નવા 'પેટવ્રેપ' રેનસમવેયરે વિશ્વના અનેક દેશોને માઠી અસર પહોંચાડી છે. જેમાં ભારત અને યુરોપ પણ સામેલ છે. ગઇકાલે યુકે, રૂસ, ફ્રાન્સ, સ્પેનમાં તેણે કન્ઝયુમર, શીપીંગ, નાગરિક ઉડ્ડયન, ઓઇલ એન્ડ ગેસ કંપનીઓ ઉપર હુમલો કર્યો હતો. પીટરેપને પેટીયા નામના જુના રેનસમવેયરનું એડવાન્સ વર્ઝન માનવામાં આવી રહ્યુ છે. પેટીયાએ ર૦ ટોચની કંપનીઓની કોમ્પ્યુટર સ્ક્રીન લોક કરી દીધી હતી અને જેને અનલોક કરવા માટે ૩૦૦ ડોલરની ડિમાન્ડ કરવામાં આવી હતી. આ રેનસમવેયરે મોનડેલ્જ, મર્ક અને મેર્સ જેવાને ખાસ કરીને નિશાના ઉપર લીધા હતા. એન્ટી વાયરસ સોફટવેર સપ્લાય કરનાર કંપની એવીરાએ આની પુષ્ટી કરી છે.
બ્રિટન અને યુરોપમાં ફરી એક વખત સાઇબર એટેક થયો છે. નિષ્ણાંતોએ તેને નવા પ્રકારનો વાયરસ ગણાવ્યો છે. યુક્રેનના વડાપ્રધાને કહ્યુ છે કે આવો સાઇબર એટેક પહેલા કદી નથી જોયો. તેમણે કહ્યુ હતુ કે, સરકારી કોમ્પ્યુટર નેટવર્ક ડાઉન થઇ ગયુ હતુ. આ રેનસમવેયર એટેકથી વિશ્વની સૌથી મોટી બ્રિટીશ એડવર્ટાઇઝીંગ ફર્મ અને રશિયન ઓઇલ કંપનીઓને અસર પહોંચાડી છે. લંડનની ડબલ્યુપીપી એડ એજન્સીએ સાઇબર એટેકની ફરિયાદ કરી છે. કંપનીએ કહ્યુ છે કે સ્ટાફના કોમ્પ્યુટર બંધ થઇ ગયા છે અને વાઇફાઇ કામ કરતુ નહોતુ. બ્રિટનના કેર્નોબાયરમાં રેડીએશન મોનીટર કરનાર સિસ્ટમ ઉપર પણ સાઇબર એટેક થયો હતો.
યુરોપના અનેક દેશો અને અમેરિકાના અનેક સર્વરોને તેણે ચપેટમાં લઇ લીધો છે. રૂસમાં સૌથી મોટી ઓઇલ કંપની રોસનેફટ તેની શિકાર બની છે તો યુક્રેનમાં સરકારી મંત્રાલયો, વિજળી કંપનીઓ અને બેંકના કોમ્પ્યુટરો ઠપ્પ થઇ ગયા હતા. ભારતના સૌથી મોટા કન્ટેનર પોર્ટ જેએનપીટી પણ સાઇબર હુમલાનો શિકાર બન્યુ છે. સિસ્ટમ ડાઉન હોવાથી સંચાલન ઠપ્પ થઇ ગયુ હતુ.
યુક્રેનમાં સેન્ટ્રલ બેંક, સરકારી વિજળી વિતરણ કંપનીઓ, વિમાન કંપનીઓ અને બે ડાક સેવાઓને અસર થઇ હતી. કીવની મેટ્રોમાં પેમેન્ટ કાર્ડ કરતુ બંધ થઇ ગયુ હતુ. જયારે અનેક પેટ્રોલ પંપ ઉપર કામકાજ અટકાવી દેવુ પડયુ હતુ. સુરક્ષા નિષ્ણાંતોના કહેવા મુજબ ગયા મહિને થયેલા વાનાક્રાઇ રેનસેમવેયર જેવો હુમલો છે. આ વાયરસ બહુ ઝડપથી ફેલાઇ છે અને તેના માટે કોઇ વ્યકિતની પણ જરૂર રહેતી નથી. આ વાયરસ રેનસેમવેયરથી વધુ ખતરનાક હોવાનું કહેવાય છે કારણ કે આ વાયરસથી યુક્રેનની બેન્કીંગ સિસ્ટમ ઠપ્પ થઇ ગઇ છે. ફ્રાન્સમાં પણ આવો હુમલો થયાનુ બહાર આવ્યુ છે.
