Uralungal Labour Contract Cooperative Society Ltd.

30/08/2026

മലയാള മനോരമ ഇന്നു പ്രസിദ്ധീകരിച്ച 'ഇനിയുമെത്ര ജീവൻ' എന്ന വാർത്തയിലെ ഊരാളുങ്കൽ സൊസൈറ്റിക്ക് എതിരായുള്ള ആരോപണം ശരിയല്ല. അപകടമുണ്ടായ ഭാഗത്തെ നിർമ്മാണം ഊരാളുങ്കൽ സൊസൈറ്റിയല്ല നടത്തുന്നത്. സർക്കാർ കരാർ നല്കിയ മറ്റേതോ കമ്പനിയാണ്. സൊസൈറ്റിയുടെ ഏതെങ്കിലും പ്രൊജക്ടിൻ്റെ പ്രദേശത്തല്ല വാർത്തയിൽ പറയുന്ന അപകടം. സൊസൈറ്റിയുടെ എല്ലാ പ്രൊജക്ട് പ്രദേശങ്ങളിലും ശാസ്ത്രീയമായ സുരക്ഷാ മാനദണ്ഡങ്ങൾ കർക്കശമായി പാലിച്ചാണു പ്രവൃത്തികൾ ചെയ്യാറ്.

ഇത്തരം ആരോപണങ്ങൾ വാർത്തയായി നല്കുന്നതിനു മുമ്പ് സൊസൈറ്റിയോട് വസ്തുത ആരായാൻ തയ്യാറാകണമെന്നാണ് മാദ്ധ്യമങ്ങളോടുള്ള വിനീതാഭ്യർത്ഥന.

-- ഊരാളുങ്കൽ ലേബർ കോൺട്രാക്ട് കോഓപ്പറേറ്റീവ് സൊസൈറ്റി.

27/08/2026

ആഫ്രിക്കൻ യുവാക്കൾക്കു പരിശീലകനായി ഊരാളുങ്കൽ പ്രതിനിധി

സാംബിയയിലെ ലുസാക്കയിൽ നടന്ന മൂന്നുദിവസത്തെ അന്താരാഷ്ട്ര സഹകരണകോൺഫറൻസിൽ വിശിഷ്ടപ്രസംഗകനും മെന്ററുമായി ഊരാളുങ്കൽ പ്രതിനിധി. ഊരാളുങ്കൽ ലേബർ കോൺട്രാക്ട് കോ-ഓപ്പറേറ്റീവ് സൊസൈറ്റി (യുഎൽസിസിഎസ്) ചീഫ് പ്രൊജക്റ്റ് കോർഡിനേറ്റർ ടി. കെ. കിഷോർ കുമാറാണ് ആഫ്രിക്കയിലുടനീളമുള്ള സഹകരണനേതാക്കൾ, നയരൂപകർത്താക്കൾ, ഗവേഷകർ, വികസനപങ്കാളികൾ, യുവസഹകരണസംരംഭകർ എന്നിവർ ഒത്തുചേർന്ന സമ്മേളനത്തിൽ പരിശീലകനായത്. ഇന്റർനാഷണൽ കോ-ഓപ്പറേറ്റീവ് അലയൻസിന്റെ (ഐസിഎ) ഗ്ലോബൽ കോ-ഓപ്പറേറ്റീവ് കൾച്ചർ ആൻഡ് ഹെറിറ്റേജ് വർക്കിംഗ് ഗ്രൂപ്പ് അംഗവും ഐസിഎ ഏഷ്യ-പസഫിക് കാർഷിക-പരിസ്ഥിതി കമ്മിറ്റി വൈസ് ചെയർപേഴ്സണുമാണു കിഷോർ കുമാർ.

കോ-ഓപ്പറേഷൻ ആഫ്രിക്കയും ഇന്റർനാഷണൽ കോ-ഓപ്പറേറ്റീവ് അലയൻസ്-ആഫ്രിക്കയും (ഐസിഎ-ആഫ്രിക്ക) സംയുക്തമായാണ് 2026 ഓഗസ്റ്റ് 24 മുതൽ 26 വരെ നടന്ന ‘ഇന്റർനാഷണൽ കോൺഫറൻസ് ഓൺ വർക്കർ കോ-ഓപ്പറേറ്റീവ്സ് ആൻഡ് ഡീസെന്റ് യൂത്ത് എംപ്ലോയ്മെന്റ് ഇൻ ആഫ്രിക്ക’ എന്ന സമ്മേളനം സംഘടിപ്പിച്ചത്.
മാന്യമായ തൊഴിലവസരങ്ങൾ സൃഷ്ടിക്കുന്നതിലും സംരംഭകത്വം വളർത്തുന്നതിലും എല്ലാവരെയും ഉൾക്കൊള്ളുന്ന സുസ്ഥിരസാമ്പത്തികവികസനം പ്രോത്സാഹിപ്പിക്കുന്നതിലും തൊഴിലാളിസഹകരണസംഘങ്ങൾ വഹിക്കുന്ന സുപ്രധാനപങ്കാണ് സമ്മേളനം പ്രധാനമായും ചർച്ച ചെയ്തത്.

സമ്മേളനത്തിലും എസിഇ പ്രോഗ്രാമിലുമുള്ള കിഷോർ കുമാറിന്റെ പങ്കാളിത്തം ഇന്ത്യയിലെയും ആഫ്രിക്കയിലെയും സഹകരണപ്രസ്ഥാനങ്ങൾ തമ്മിലുള്ള അന്തർദേശീയസഹകരണവും വിജ്ഞാനവിനിമയവും കൂടുതൽ ശക്തിപ്പെടുത്താൻ വഴിതുറന്നു. തൊഴിലവസരങ്ങൾ സൃഷ്ടിക്കുന്നതിലും സംരംഭകവികസനത്തിലും സാമ്പത്തികവളർച്ചയിലും തൊഴിലാളിസഹകരണസംഘങ്ങൾക്ക് എങ്ങനെ സംഭാവന നൽകാൻ കഴിയുമെന്നതിന്റെ ഉദാഹരണമായി യുഎൽസിസിഎസിന്റെ അനുഭവങ്ങൾ അദ്ദേഹം ഉയർത്തിക്കാട്ടി.

‘ആഫ്രിക്കനും ആഗോളവുമായ തൊഴിലാളിസഹകരണസംഘങ്ങളും തൊഴിലവസരസൃഷ്ടിയും - ഉദാഹരണങ്ങൾ’ എന്ന വിഷയം കിഷോർ കുമാർ അവതരിപ്പിച്ചു. തൊഴിലാളികളുടെ ഉടമസ്ഥതയിലുള്ള സഹകരണസ്ഥാപനം എന്ന നിലയിലുള്ള യുഎൽസിസിഎസിന്റെ അനുഭവങ്ങളും വളർച്ചയും അദ്ദേഹം പങ്കുവെച്ചു. കൂട്ടായ ഉടമസ്ഥാവകാശം, സംരംഭകത്വം, നൂതനാശയങ്ങൾ, എല്ലാവരെയും ഉൾക്കൊള്ളുന്ന സാമ്പത്തികപങ്കാളിത്തം എന്നിവ പ്രോത്സാഹിപ്പിക്കുന്നതിനൊപ്പം സുസ്ഥിരമായ തൊഴിലവസരങ്ങൾ സൃഷ്ടിക്കാൻ സഹകരണസംരംഭങ്ങൾക്ക് എങ്ങനെ കഴിയുമെന്ന് അദ്ദേഹം വിശദീകരിച്ചു.

ആഫ്രിക്ക കോ-ഓപ്പറേറ്റീവ് ഓന്ത്രപ്രണർഷിപ്പ് (എസിഇ) പ്രോഗ്രാമിന്റെ ഭാഗമായി, യുവ ആഫ്രിക്കൻ സഹകരണ അംബാസഡർമാരുമായും കിഷോർ കുമാർ സംവദിച്ചു. അവർക്ക് മാർഗ്ഗനിർദ്ദേശങ്ങളും നൽകി. സഹകരണപ്രസ്ഥാനത്തിൽ യുവാക്കളുടെ അർത്ഥവത്തായ പങ്കാളിത്തം ഉറപ്പാക്കുന്നതിലാണ് അദ്ദേഹം മുഖ്യമായി ഊന്നിയത്. യുവാക്കളെ സഹകരണസംഘങ്ങളുടെ ഗുണഭോക്താക്കളായി മാത്രം കാണാതെ, സജീവസംരംഭകരും അംഗങ്ങളും നൂതനാശയങ്ങൾ വികസിപ്പിക്കുന്നവരും തീരുമാനങ്ങളെടുക്കുന്നവരും പ്രസ്ഥാനത്തിന്റെ ഭാവിനേതാക്കളുമായി കാണണമെന്ന് അദ്ദേഹം പറഞ്ഞു.

ദക്ഷിണാഫ്രിക്കയിൽ ഉൾപ്പെടെ ആഫ്രിക്കയിലുടനീളം വളർന്നുവരുന്ന യുവജനതൊഴിലില്ലായ്മയെക്കുറിച്ച് സംസാരിച്ച കിഷോർ കുമാർ, യുവാക്കൾക്ക് മാന്യമായ തൊഴിൽ, കൂട്ടായ ഉടമസ്ഥാവകാശം, സംരംഭകത്വം, അർത്ഥവത്തായ സാമ്പത്തികപങ്കാളിത്തം എന്നിവയ്ക്കുള്ള അവസരങ്ങൾ നൽകാൻ സഹകരണ സംഘങ്ങൾക്കുള്ള കഴിവു വിവരിച്ചു. യുവാക്കളുടെ നേതൃത്വത്തിലുള്ള സഹകരണസംഘങ്ങൾ, സഹകരണവിദ്യാഭ്യാസം, സംരംഭകത്വം, നൂതനാശയങ്ങൾ, നേതൃത്വവികസനം എന്നിവയിൽ കൂടുതൽ നിക്ഷേപം നടത്തണമെന്ന് അദ്ദേഹം ആഹ്വാനം ചെയ്തു. സഹകരണപ്രസ്ഥാനത്തിന്റെ ഭാവിയിൽ യുവാക്കളെ കേന്ദ്രസ്ഥാനത്തു നിർത്തേണ്ടതിന്റെ ആവശ്യകതയും അദ്ദേഹം ഊന്നിപ്പറഞ്ഞു.

സഹകരണസംഘങ്ങളിലൂടെ യുവാക്കളെ ശാക്തീകരിക്കുന്നത് കേവലം തൊഴിലവസരങ്ങൾ സൃഷ്ടിക്കുന്നതിനുവേണ്ടി മാത്രമല്ല; കൂടുതൽ ഉൾക്കൊള്ളുന്നതും സുസ്ഥിരവുമായ സമ്പദ്‌വ്യവസ്ഥയെ രൂപപ്പെടുത്താൻ കഴിയുന്ന സംരംഭകരെയും ഉടമകളെയും നേതാക്കളെയും സൃഷ്ടിക്കുന്നതിനുകൂടിയാണെന്ന് കിഷോർ കുമാർ പറഞ്ഞു. തൊഴിൽ, സംരംഭകവികസനം, സാമ്പത്തികശാക്തീകരണം എന്നിവയ്ക്കുള്ള പ്രായോഗികമാർഗ്ഗമായി സഹകരണസംരംഭകത്വത്തെ പ്രയോജനപ്പെടുത്താൻ മെന്ററിംഗ് സെഷനുകൾ പങ്കാളികൾക്കു വളരെ പ്രയോജനമായെന്നു സമ്മേളനം വിലയിരുത്തി.
മികച്ച സഹകരണ സംരംഭങ്ങൾ കെട്ടിപ്പടുക്കുന്നതിനും ആഫ്രിക്കയിലെ യുവതലമുറയ്ക്ക് പുതിയ അവസരങ്ങൾ സൃഷ്ടിക്കുന്നതിനും ദക്ഷിണ-ദക്ഷിണ സഹകരണത്തിന്റെയും പരസ്പര പഠനത്തിന്റെയും പ്രാധാന്യം ഈ ഇടപെടൽ കൂടുതൽ ഉറപ്പിച്ചു.

25/08/2026

സന്തോഷം പങ്കുവെക്കുമ്പോൾ അത് വർദ്ധിക്കുന്നു എന്നതാണ് ഓരോ ഓണക്കാലവും നമ്മെ ഓർമ്മിപ്പിക്കുന്നത്. ഒന്നിച്ചാഘോഷിക്കാം, മലയാളത്തിന്റെ മണവും, തിരുവോണത്തിന്റെ മധുരവും! ഏവർക്കും ഓണാശംസകൾ! 🏵️

Onam reminds us that happiness becomes greater when it is shared. May we come together, celebrate together & spread the spirit of Onam wherever we go. Happy Onam! 🏵️

15/08/2026

നാനാത്വത്തിൽ ഏകത്വത്തിന്റെ ചരിത്രവും പുതിയ ഭാരതത്തിന്റെ പ്രതീക്ഷകളും നിറഞ്ഞ സ്വാതന്ത്ര്യദിനം! ഏവർക്കും സ്വാതന്ത്ര്യദിനാശംസകൾ! 🇮🇳
Beyond our differences, we share a country, a history & a hope for tomorrow. This Independence Day, celebrating the spirit of togetherness that makes India feel like home. 🇮🇳

12/08/2026

ഒപ്പം നിന്നവർക്കെല്ലാം ഹൃദയം നിറഞ്ഞ നന്ദി: യു‌എൽസിസി‌എസ്

ഞങ്ങളെയെല്ലാം തീരാദുഃഖത്തിലാക്കി പ്രിയപ്പെട്ട യു‌എൽസിസി‌എസ് ചെയർമാൻ ശ്രീ. രമേശൻ പാലേരി വിടപറഞ്ഞു. ആ ദീർഘദർശിയുടെ വേർപാട് യു‌എൽസിസി‌എസ് കുടുംബത്തിനു മാത്രമല്ല, കേരളീയ പൊതുസമൂഹത്തിനും സഹകരണപ്രസ്ഥാനങ്ങൾക്കും നികത്താനാവാത്ത വലിയ നഷ്ടമാണ്. അദ്ദേഹത്തിന്റെ ഓർമ്മകൾക്കു മുന്നിൽ പ്രണാമം അർപ്പിച്ചുകൊണ്ട്, ഞങ്ങളുടെ ദുഃഖത്തിൽ പങ്കുചേർന്ന ഏവരെയും സ്നേഹത്തോടെ സ്മരിക്കട്ടെ!

വിവരമറിഞ്ഞ് അന്ത്യോപചാരം അർപ്പിക്കാനും ബന്ധുക്കളെയും സഹപ്രവർത്തകരെയും ആശ്വസിപ്പിക്കാനും എത്തിച്ചേർന്ന മുൻ മുഖ്യമന്ത്രിയും പ്രതിപക്ഷനേതാവുമായ ശ്രീ. പിണറായി വിജയൻ, മന്ത്രിമാരായ ശ്രീ. പി. കെ. കുഞ്ഞാലിക്കുട്ടി, ശ്രീ. സണ്ണി ജോസഫ്, ശ്രീ. പി. കെ. ബഷീർ, ശ്രീ. ടി. സിദ്ദിഖ്, ശ്രീ. ഷാഫി പറമ്പിൽ എംപി, ശ്രീ എം. കെ. രാഘവൻ എംപി, മുൻ കേന്ദ്രസഹമന്ത്രി മുല്ലപ്പള്ളി രാമചന്ദ്രൻ, മുൻസംസ്ഥാനമന്ത്രിമാരായ സിപിഐ(എം) സെക്രട്ടറി ശ്രീ. എം. വി. ഗോവിന്ദൻ, സിപിഐ സെക്രട്ടറി ശ്രീ. ബിനോയ് വിശ്വം, ശ്രീ. ഇ. പി. ജയരാജൻ, ശ്രീ. എ. കെ. ബാലൻ, ഡോ. ടി. എം. തോമസ് ഐസക്ക്, എൽഡിഎഫ് കൺവീനർ ശ്രീ. ടി. പി. രാമകൃഷ്ണൻ, ഡോ. എം. കെ. മുനീർ, അഡ്വ. പി. എ. മുഹമ്മദ് റിയാസ് എംഎൽഎ, ശ്രീ. പി. കെ. കെ. ബാവ, ശ്രീ. എ. കെ. ശശീന്ദ്രൻ, ശ്രീ. കടന്നപ്പള്ളി രാമചന്ദ്രൻ, ശ്രീ. അഹമ്മദ്‌ ദേവർ കോവിൽ, മുൻ സ്പീക്കർ ശ്രീ. എ. എൻ. ഷംസീർ, മുസ്ലിം ലീഗ് അദ്ധ്യക്ഷൻ ശ്രീ പാണക്കാട് സാദിക്ക് അലി ശിഹാബ് തങ്ങൾ, ആർഎംപി സംസ്ഥാന സെക്രട്ടറി ശ്രീ. എൻ. വേണു, ബിജെപി സംസ്ഥാന സെക്രട്ടറി അഡ്വ. കെ. പി പ്രകാശ് ബാബു, മുൻ രാജ്യസഭാ മെമ്പറും ‘മാതൃഭൂമി’ മാനേജിങ് ഡയറക്ടറും ആർജെഡി സംസ്ഥാനാദ്ധ്യക്ഷനുമായ ശ്രീ. എം. വി. ശ്രേയാംസ് കുമാർ എന്നിവർ ആദരാഞ്ജലികൾ അർപ്പിച്ചു.

കോഴിക്കോട് മേയർ ശ്രീ. ഒ. സദാശിവൻ, എം എൽ എമാരായ ശ്രീമതി. കെ. കെ. രമ, ശ്രീ. പാറയ്ക്കൽ അബ്ദുള്ള, ശ്രീ. കെ. പ്രവീൺ കുമാർ (ഡിസിസി പ്രസിഡന്റ്), ശ്രീ. കെ. എം. അഭിജിത്, ശ്രീ. എം. എ. റസാഖ് മാസ്റ്റർ, ശ്രീ. കാരായി രാജൻ, ശ്രീ. പി. കെ. പ്രവീൺ, വനിതാക്കമ്മിഷൻ അദ്ധ്യക്ഷ ശ്രീമതി. പി. സതീദേവി, ശ്രീ കെ. കെ. രാഗേഷ്, മുൻ എംഎൽഎമാരായ ശ്രീ. എ. പ്രദീപ് കുമാർ, ശ്രീ. തോട്ടത്തിൽ രവീന്ദ്രൻ, ശ്രീ. കെ. പി. കുഞ്ഞമ്മദുകുട്ടി, ഇ. കെ. വിജയൻ, ശ്രീ. ജോർജ് എം. തോമസ്, ശ്രീ. പി. ടി. എ. റഹീം, ശ്രീ. ലിന്റോ ജോസഫ്, ശ്രീ. പി. ജയരാജൻ, സിപിഐ അസിസ്റ്റന്റ് സെക്രട്ടറി ശ്രീ. സത്യൻ മൊകേരി, കേരള ബാങ്ക് പ്രസിഡന്റ് ശ്രീ. പി. മോഹനൻ മാസ്റ്റർ, കേരള ബാങ്ക് വൈസ് പ്രസിഡന്റ് ശ്രീ. ടി. വി. രാജേഷ്, ലേബർ ഫെഡ് ചെയർമാൻ ശ്രീ. എ. സി. മാത്യു, വടകര ബ്ലോക്ക് പഞ്ചായത്ത് പ്രസിഡന്റ് ശ്രീ. കോട്ടയിൽ രാധാകൃഷ്ണൻ, ആർജെഡി നേതാവ് ശ്രീ. മനയത്ത് ചന്ദ്രൻ, സിപിഐ സംസ്ഥാന എക്സിക്യൂട്ടീവ് അംഗങ്ങളായ അഡ്വ. പി. വസന്തം, ശ്രീ. സി. എൻ. ചന്ദ്രൻ, സിപിഐ(എം) കോഴിക്കോട് ജില്ലാസെക്രട്ടറി ശ്രീ. എം. മെഹബൂബ്, സിപിഐ ജില്ലാസെക്രട്ടറി അഡ്വ. പി. ഗവാസ്, ബിജെപി ജില്ലാ സെക്രട്ടറി അഡ്വ. കെ. ദിലീപ് കുമാർ, അഡ്വ. വി. കെ. സജീവൻ, ശ്രീ. ടി. പി. ജയചന്ദ്രൻ മാസ്റ്റർ, എൽഡിഎഫ് ജില്ലാ കൺവീനർ ശ്രീ. മുക്കം മുഹമ്മദ്, ആർജെഡി ജില്ലാ പ്രസിഡന്റ് ശ്രീ. എം. കെ. ഭാസ്കരൻ, എൻസിപി നേതാവ് ശ്രീ. പി. എം. സുരേഷ്ബാബു, സിപിഐ സംസ്ഥാന കൗൺസിൽ അംഗം ശ്രീ. കെ. കെ. ബാലൻ എന്നിവരുൾപ്പെടെ ജനപ്രതിനിധികളും രാഷ്ട്രീയനേതാക്കളും അന്ത്യോപചാരം അർപ്പിക്കാനെത്തി.

മേഘാലയ ചീഫ് സെക്രട്ടറി ഡോ. ഷകീൽ പി. അഹമ്മദ്, മുൻ ചീഫ് സെക്രട്ടറി ഡോ. വി. വേണു, കേരള ഡിജിറ്റൽ യൂണിവേഴ്സിറ്റി വൈസ് ചാൻസിലർ ഡോ. സജി ഗോപിനാഥ്, ഡോ. സന്തോഷ് ബാബു ഐ‌എ‌എസ് (റിട്ട.) എന്നിവരും ആദരവ് അർപ്പിച്ചു.

അന്താരാഷ്ട്രതലത്തിൽ ഇന്റർനാഷണൽ കോ-ഓപ്പറേറ്റീവ് അലയൻസ് ഏഷ്യ ആൻഡ് പസഫിക് (ICA-AP) റീജിണൽ ഡയറക്ടർ ശ്രീ. ബാലസുബ്രഹ്മണ്യൻ അയ്യരുടെ നേതൃത്വത്തിൽ ഒരു സംഘം സൊസൈറ്റിയിലും പരേതന്റെ വസതിയിലും സന്ദർശനം നടത്തി. ഐ‌സി‌എ, സിസിഒപിഎ (CICOPA), നാഷണൽ കോ-ഓപ്പറേറ്റീവ് യൂണിയൻ ഓഫ് ഇന്ത്യ (NCUI) തുടങ്ങിയ പ്രമുഖ സഹകരണപ്രസ്ഥാനങ്ങളും അനുശോചനം അറിയിക്കുകയുണ്ടായി.

സാഹിത്യ-സാംസ്കാരിക-വ്യവസായ രംഗങ്ങളിൽനിന്ന് ശ്രീ. എം. മുകുന്ദൻ, ചലച്ചിത്രനടി ശ്രീമതി. രേവതി, ശ്രീമതി. കെ. അജിത, പ്രൊഫ. ടി. പി. കുഞ്ഞിക്കണ്ണൻ, ഇൻഡ്യൻ ബ്രോഡ്‌കാസ്റ്റിങ്ങ് ഫൗണ്ടേഷൻ (ഐ‌ബി‌എഫ്) പ്രസിഡന്റ് ശ്രീ. കെ. മാധവൻ, മാതൃഭൂമി ചെയർമാൻ ശ്രീ. പി. വി. ചന്ദ്രൻ, ദേശാഭിമാനി ചീഫ് എഡിറ്റർ ശ്രീ. പുത്തലത്ത് ദിനേശൻ, എംവി‌ആർ ക്യാൻസർ സെന്റർ ചെയർമാൻ ശ്രീ. സി. എൻ. വിജയകൃഷ്ണൻ, ശ്രീ. വി. കുമാരൻ മാസ്റ്റർ, ശ്രീ. പ്രീതാനന്ദൻ (ആത്മവിദ്യാസംഘം), ചലച്ചിത്രസംവിധായകനും നടനുമായ ശ്രീ. ശങ്കർ രാമകൃഷ്ണൻ, പ്രമുഖ വ്യവസായികളായ ശ്രീ. ഗോകുലം ഗോപാലൻ, മലബാർ ഗോൾഡ് ഉടമ ശ്രീ. എം. പി. അഹമ്മദ്, വടകര കോ-ഓപ്പറേറ്റീവ് ഹോസ്പിറ്റൽ പ്രസിഡന്റ് ശ്രീ. ആർ. ഗോപാലൻ, നാഷണൽ ഹോസ്പിറ്റൽ എംഡി ഡോ. കെ. മൊയ്തു, പി‌എം‌കെ കൺസ്ട്രക്‌ഷൻ ഉടമ ശ്രീ. കേളുക്കുട്ടി, ജി‌ആർ ഇൻഫ്രാ സി‌എംഡി ശ്രീ. അജേന്ദ്ര കുമാർ അഗർവാൾ, ഇൻഡസ് ഇൻഫ്രാ സിഇഒ അമിത് കുമാർ സിംഗ് എന്നിവരും ആദരാഞ്ജലികൾ രേഖപ്പെടുത്തി.

ശ്രീ. രമേശൻ പാലേരിയുടെ വിവിധ ചികിത്സാഘട്ടങ്ങളിലായി മികച്ച പരിചരണം നൽകിയ മാക്സ് സൂപ്പർ സ്പെഷ്യലിറ്റി ഹോസ്‌പിറ്റൽ, ഡൽഹി, ജി പി എൽ ആയുർവേദ ട്രസ്റ്റ്, ഒറ്റപ്പാലം, കോഴിക്കോട് ഡിസ്ട്രിക്ട് കോ-ഓപ്പറേറ്റീവ് ഹോസ്പിറ്റൽ, ബേബി മെമ്മോറിയൽ ഹോസ്‌പിറ്റൽ, ആസ്റ്റർ മിംസ് ഹോസ്പിറ്റൽ, കോഴിക്കോട്, കോയമ്പത്തൂരിലെ കുമരൻ മെഡിക്കൽ സെന്റർ, എൻഎ ഹോസ്പിറ്റൽ ഉൾപ്പെടെയുള്ള സ്ഥാപനങ്ങളിലെ വൈദ്യസംഘത്തിനും ഞങ്ങൾ നന്ദി അറിയിക്കുന്നു.

എത്തിച്ചേർന്ന എല്ലാ ജനപ്രതിനിധികൾക്കും വിവിധ തലത്തിലുള്ള തദ്ദേശസ്വയംഭരണ സ്ഥാപനങ്ങളിലെ തിരഞ്ഞെടുക്കപ്പെട്ട ജനപ്രതിനിധികൾക്കും മാദ്ധ്യമസ്ഥാപന മേധാവികൾക്കും മാദ്ധ്യമപ്രവർത്തകർക്കും വിവിധ രാഷ്ട്രീയപ്പാർട്ടിനേതാക്കൾക്കും കലാ സാംസ്ക്കാരിക-സാമൂഹിക പ്രവർത്തകർക്കും തൊഴിലാളികൾക്കും സമൂഹത്തിന്റെ നാനാതുറകളിലുള്ള എല്ലാവർക്കും ഹൃദയം നിറഞ്ഞ നന്ദിയും സ്നേഹവും രേഖപ്പെടുത്തുന്നു.

വേർപാടിന്റെ 16-ാം ദിവസവും സൊസൈറ്റിയുടെ ഓഫീസിലേക്കും പാലേരിവീട്ടിലേക്കും ആശ്വാസവചനങ്ങളുമായി ഉറ്റവരുടെ നിലയ്ക്കാത്ത സന്ദർശനങ്ങളാണ്. എല്ലാവരുടെയും പേരുപറഞ്ഞു നന്ദി പറയണമെന്നുണ്ട്. അതുപക്ഷെ, സാദ്ധ്യമല്ലല്ലോ. അതുകൊണ്ട്, എല്ലാവരോടുമുള്ള നന്ദിയും കടപ്പാടും ഞങ്ങൾ എന്നും മനസിൽ സൂക്ഷിക്കും.

യുഎൽസിസിഎസിനെ പുതിയ ഉയരങ്ങളിലേക്കു നയിക്കുകയും പതിനായിരക്കണക്കിനു കുടുംബങ്ങൾക്ക് ഉപജീവനമാർഗ്ഗം ഉറപ്പാക്കുകയും ചെയ്ത ശേഷമാണ് പ്രിയങ്കരനായ ശ്രീ. രമേശൻ പാലേരി വിടവാങ്ങിയത്. പ്രസ്ഥാനത്തിന്റെ വൈവിധ്യവൽക്കരണത്തിലും ആധുനികീകരണത്തിലും നിർണ്ണായകപങ്കുവഹിച്ച അദ്ദേഹം, 5,000 കോടി രൂപയുടെ ആസ്തിയും 2,000 കോടിയോളം രൂപയുടെ വരുമാനവും 18,000 തൊഴിലാളികളും ഉള്ള പ്രസ്ഥാനമായി യു‌എൽസിസി‌എസിനെ വളർത്തിയെടുത്താണു വിട പറഞ്ഞത്.

01/08/2026

രമേശൻ പാലേരിയുടെ സ്വപ്ന സാക്ഷാത്കാരത്തിനു പ്രതിജ്ഞയെടുത്ത് യുഎൽസിസിഎസ് തൊഴിലാളികളും ജീവനക്കാരും

അനുശോചനയോഗത്തിൽ വികാരാധീനരായി സഹപ്രവർത്തകർ

പ്രിയങ്കരനായിരുന്ന ചെയർമാൻ്റെ വിയോഗത്തിൽ അനുശോചിക്കാൻ ഊരാളുങ്കൽ ലേബർ കോൺട്രാക്റ്റ് കോ-ഓപ്പറേറ്റീവ് സൊസൈറ്റിയിലെ തൊഴിലാളികളും ജീവനക്കാരും ചേർന്ന യോഗം വികാരതീവ്രമായ രംഗങ്ങൾക്കു വേദിയായി. കണ്ണീരും ഗദ്ഗദവും വാക്കുകളെ മുറിച്ചു. പലരും സംസാരം മുഴുമിക്കാനാവാതെ വേദിയിൽനിന്നിറങ്ങി.

ചെയർമാൻ ഏല്പിച്ചുപോയ സ്വപ്നങ്ങളും സങ്കൽപ്പങ്ങളും അവയുടെ എല്ലാ പൂർണ്ണതയോടും എത്രയും വേഗം സാക്ഷാത്കരിക്കുമെന്ന പ്രതിജ്ഞയായിരുന്നു അനുശോചനം അർപ്പിച്ചവരുടെയെല്ലാം വാക്കുകളിൽ മുഴങ്ങിയത്.

വൈസ് ചെയർമാൻ എം. എം. സുരേന്ദ്രൻ്റെ അദ്ധ്യക്ഷതയിൽ സൊസൈറ്റിയാസ്ഥാനത്തു ചേർന്ന യോഗത്തിൽ ഡയറക്ടർ പി. പ്രകാശൻ അനുശോചന പ്രമേയം അവതരിപ്പിച്ചു. ഏറ്റവും മികച്ചതു സൃഷ്ടിക്കാനുള്ള ഉത്ക്കടമായ മോഹം, തുല്യതയ്ക്കു വേണ്ടിയുള്ള സമരം, ചേർത്തുനിർത്തൽ, കൈപിടിച്ചുയർത്തൽ, എല്ലാം സൗമ്യദീപ്തമായ ആ വ്യക്തിത്വത്തിൽ ഉൾച്ചേർന്നിരുന്നു എന്ന് അനുസ്മരിച്ച പ്രമേയം, ആ സ്നേഹവും കരുണയും കരുതലും നാടിന്റെ വികസനത്തിനും ക്ഷേമത്തിനുമായി ഇനിയുമിനിയും ഒട്ടേറെ കാര്യങ്ങൾ ചെയ്യാനുള്ള പ്രേരണയാണെന്നു ചൂണ്ടിക്കാട്ടി.

"ഊരാളുങ്കൽ സൊസൈറ്റിയെ ലോകത്തോളം വളർത്തി മഹാപ്രസ്ഥാനമാക്കി കൈമാറിയാണ് രമേശൻ പാലേരി വിടവാങ്ങിയത്. അത് എക്കാലവും സ്മരിക്കപ്പെടും. ശതാബ്ദിയുടെ അനുഭവക്കരുത്തുമായി അടുത്ത കാൽ നൂറ്റാണ്ട് എങ്ങനെയൊക്കെ മുന്നേറണം എന്ന സുവ്യക്തമായ കാഴ്ചപ്പാടും ‘വിഷൻ ഡോക്യുമെന്റി'ലൂടെ
ആ ക്രാന്തദർശി പകർന്നുതന്നു." പ്രമേയം ചൂണ്ടിക്കാട്ടി.

പുതിയ കാലത്തിനും സാങ്കേതികവിപ്ലവങ്ങൾക്കും അനുസരിച്ചു മുന്നോട്ടു കുതിക്കാനുള്ള ശക്തമായ അടിത്തറയും കാര്യശേഷിയും സ്ഥാപനത്തിൽ വളർത്തിയെടുത്ത രമേശൻ പാലേരി, കരുത്തുറ്റതും സമർത്ഥവും സർഗ്ഗാത്മകവുമായ നേതൃപാടവം പകർന്നുതന്ന ഗുരുകൂടിയാണെന്നു പ്രമേയം അനുസ്മരിച്ചു. "അദ്ദേഹം കാട്ടിത്തന്ന മാതൃകകളിൽനിന്ന്, നമ്മൾ ഉൾക്കൊണ്ട മൂല്യങ്ങൾ മുറുകെപ്പിടിച്ച്, യു‌എൽസിസി‌എസ് വെട്ടിപ്പിടിക്കുന്ന ഉയരങ്ങളായിരിക്കും അദ്ദേഹത്തിനുള്ള ഏറ്റവും ഉചിതമായ സ്മാരകം." പ്രമേയം വിലയിരുത്തി.

യുഎൽസിസിഎസ് മാനേജിംഗ് ഡയറക്ടർ എസ്. ഷാജു സ്വാഗതം ആശംസിച്ച യോഗത്തിൽ സീനിയർ ഡയറക്ടർ വി. കെ. അനന്തൻ, ഡയറക്ടർമാരായ പി. കെ. സുരേഷ് ബാബു, കെ. ടി. രാജൻ, കെ. ടി. കെ. അജി, ടി. ടി. ഷിജിൻ, സി. കെ. ശ്രീജിത്ത്, യുഎൽസിസിഎസ് ഫൗണ്ടേഷൻ ഡയറക്ടർ ഡോ. എം. കെ. ജയരാജ്, യുഎൽ സൈബർ പാർക്ക് സിഒഒ ടി. കെ. കിഷോർ കുമാർ, യുഎൽടിഎസ് സിഇഒ ഹരിശങ്കർ, യുഎൽ റിസർച്ച് ഡയറക്ടർ സന്ദേശ് ഇ പ, സർഗാലയ സിഇഒ ഷാരോൺ വീട്ടിൽ, കേരള ആർട്സ് ആൻഡ് ക്രാഫ്റ്റ്സ് വില്ലേജ് സിഒഒ ടി. യു. ശ്രീപ്രസാദ്, കേരള ആർട്സ് ആൻഡ് ക്രാഫ്റ്റ് വില്ലേജ് ഡെപ്യൂട്ടി ഡയറക്ടർ കെ. രാഘവൻ, മാറ്റർ ലാബ് ജനറൽ മാനേജർ ഫ്രെഡ്ഡി സോമൻ, മനേഷ് ആർ, റേബിൻ, ബൈജു എം, എം. പി. കുമാരൻ, അശോകൻ എ, സുരേഷ് ബാബു കെ. എം., ചന്ദ്രൻ പുതിയാടത്തിൽ, അഭിലാഷ് ശങ്കർ, ഷാബു കെ. പി., രോഹൻ പ്രഭാകർ, രാജീവൻ ടി. പി., ഷൈനു പി., അഭിലാഷ് കെ., സന്ദീപ്, പ്രവീൺകുമാർ, ഹരീന്ദ്രൻ കെ., നിജി സുനീഷ്, ബിജോയ്, അജിത് കുമാർ കെ. ടി. കെ., ബിജേഷ് വി. കെ., ശരത് ലാൽ എം. എന്നിവർ അനുശോചനം അർപ്പിച്ചു സംസാരിച്ചു.

സംഘത്തിലെ മെമ്പർമാർ, നോൺ മെമ്പർമാർ, ഉപസ്ഥാപനങ്ങളിലെ ജീവനക്കാർ, ഓഫിസ് സ്റ്റാഫ്, ടെക്ക്നിക്കൽ ജീവനക്കാർ എന്നിവർ പങ്കെടുത്തു.

30/07/2026

രമേശൻ പാലേരിയുടെ നിര്യാണത്തിൽ പ്രമുഖ അന്താരാഷ്ട്ര-ദേശീയ സഹകരണപ്രസ്ഥാനങ്ങൾ അനുശോചിച്ചു

ഊരാളുങ്കൽ ലേബർ കോൺട്രാക്ട് സഹകരണ സൊസൈറ്റി (ULCCS) ചെയർമാൻ ശ്രീ. രമേശൻ പാലേരിയുടെ (66) നിര്യാണത്തിൽ പ്രമുഖ അന്താരാഷ്ട്ര, ദേശീയ സഹകരണ പ്രസ്ഥാനങ്ങൾ ആഴത്തിലുള്ള ദുഃഖവും ആദരാഞ്ജലികളും രേഖപ്പെടുത്തി.


ഇന്റർനാഷണൽ കോ-ഓപ്പറേറ്റീവ് അലയൻസ് ഏഷ്യ ആൻഡ് പസഫിക് (ICA-AP), ഇന്റർനാഷണൽ ഓർഗനൈസേഷൻ ഓഫ് ഇൻഡസ്ട്രിയൽ ആൻഡ് സർവീസ് കോ-ഓപ്പറേറ്റീവ്സ് (CICOPA), നാഷണൽ കോ-ഓപ്പറേറ്റീവ് യൂണിയൻ ഓഫ് ഇന്ത്യ (NCUI) എന്നീ പ്രമുഖ സംഘടനകൾ അദ്ദേഹത്തിന്റെ ദീർഘവീക്ഷണമുള്ള നേതൃത്വത്തെയും സഹകരണമേഖലയ്ക്കു നൽകിയ വിലമതിക്കാനാവാത്ത സംഭാവനകളെയും അനുസ്മരിച്ച് അനുശോചനസന്ദേശങ്ങൾ പുറപ്പെടുവിച്ചു.



യുഎൽസിസി‌എസിനെ ലോകോത്തരതലത്തിലേക്കു വളർത്തുന്നതിൽ രമേശൻ പാലേരി വഹിച്ച പങ്ക് ഇന്റർനാഷണൽ കോ-ഓപ്പറേറ്റീവ് അലയൻസ് ഏഷ്യ ആൻഡ് പസഫിക് (ICA-AP) അനുസ്മരിച്ചു. വടകരയിലെ ഒരു പ്രാദേശിക നിർമ്മാണത്തൊഴിലാളി സഹകരണസംഘമായിരുന്ന സൊസൈറ്റിയെ അടിസ്ഥാനസൗകര്യവികസനം, വിവരസാങ്കേതികവിദ്യ, വിദ്യാഭ്യാസം, ഭവനനിർമ്മാണം, ആർട്സ് ആൻഡ് ക്രാഫ്റ്റ്സ് വില്ലേജുകൾ ഉൾപ്പെടെയുള്ള സാംസ്കാരികപദ്ധതികൾ എന്നിവയിലേക്ക് വ്യാപിപ്പിച്ചപ്പോഴും അതിന്റെ ഭരണം തൊഴിലാളികളുടെ കൈകളിൽത്തന്നെ ഭദ്രമായി സൂക്ഷിക്കാൻ അദ്ദേഹത്തിനു സാധിച്ചു.



2019-ൽ അദ്ദേഹത്തിന്റെ നേതൃത്വത്തിൽ ഇന്ത്യയിൽനിന്നുള്ള ആദ്യ പ്രൈമറി സഹകരണ സംഘമായി യു‌എൽസിസി‌എസ് ഐസിഎയിൽ അംഗത്വം നേടി. 2023-ൽ ഐ.സി.എ. ഏഷ്യ-പസഫിക്കിന്റെ പ്രഥമ 'കോ-ഓപ്പറേറ്റീവ് എക്സലൻസ് അവാർഡ് ഫോർ എന്റർപ്രൈസിംഗ് കോ-ഓപ്പറേറ്റീവ്' പുരസ്കാരവും ഊരാളുങ്കൽ സൊസൈറ്റിക്കു സമ്മാനിച്ചു. ലാളിത്യവും ഉദാരമനസ്കതയും തൊഴിൽ അന്തസ്സിനോടുള്ള പ്രതിബദ്ധതയും നിറഞ്ഞ അദ്ദേഹത്തിന്റെ വ്യക്തിത്വം എടുത്തുപറഞ്ഞ ഐസിഎ-എപി, പുതിയ സഹകാരികൾക്ക് അദ്ദേഹം എപ്പോഴും വലിയ പ്രോത്സാഹനമായിരുന്നുവെന്നു ചൂണ്ടിക്കാട്ടി.



ബ്രസ്സൽസ് ആസ്ഥാനമായി പ്രവർത്തിക്കുന്ന ഇന്റർനാഷണൽ ഓർഗനൈസേഷൻ ഓഫ് ഇൻഡസ്ട്രിയൽ ആൻഡ് സർവ്വീസ് കോ-ഓപ്പറേറ്റീവ്സ് (CICOPA), രമേശൻ പാലേരിയുടെ കുടുംബത്തിന്റെയും സൊസൈറ്റി അംഗങ്ങളുടെയും ദുഃഖത്തിൽ പങ്കുചേർന്നു. യുഎൽസിസി‌എസിന്റെ വളർച്ചയ്ക്കും ആഗോളതലത്തിലുള്ള അംഗീകാരത്തിനും അദ്ദേഹത്തിന്റെ നേതൃത്വം വലിയ പങ്കുവഹിച്ചുവെന്നും സൊസൈറ്റിയുടെ തുടർന്നുള്ള പ്രവർത്തനങ്ങളിലൂടെയും നേട്ടങ്ങളിലൂടെയും അദ്ദേഹത്തിന്റെ ഓർമ്മകൾ നിലനിൽക്കുമെന്നും സംഘടന അനുശോചനസന്ദേശത്തിൽ പറഞ്ഞു.

ഇന്ത്യൻ സഹകരണപ്രസ്ഥാനത്തിന്റെ പരമോന്നതസംഘടനയായ നാഷണൽ കോ-ഓപ്പറേറ്റീവ് യൂണിയൻ ഓഫ് ഇന്ത്യ (NCUI) അദ്ദേഹത്തിന്റെ നിര്യാണത്തിൽ തീവ്രമായ ദുഃഖം രേഖപ്പെടുത്തി. സഹകരണതത്ത്വങ്ങളും മൂല്യങ്ങളും ഉയർത്തിപ്പിടിക്കുന്നതിൽ രമേശൻ പാലേരി നൽകിയ സംഭാവനകൾ എന്നും ബഹുമാനത്തോടെയും ആദരവോടെയും ഓർമ്മിക്കപ്പെടുമെന്ന് എൻസിയുഐ അനുസ്മരിച്ചു.

GLOBAL AND NATIONAL COOPERATIVE BODIES MOURN THE DEMISE OF ULCCS CHAIRMAN RAMESHAN PALERI

International and national cooperative leaders from around the world have expressed deep grief and paid rich tributes to Sri. Rameshan Paleri, Chairman of Uralungal Labour Contract Co-operative Society (ULCCS) Ltd., on his sad demise.

Key international and apex organizations—including the International Cooperative Alliance Asia and Pacific (ICA-AP), the International Organisation of Industrial and Service Co-operatives (CICOPA), and the National Cooperative Union of India (NCUI)—issued heartfelt condolence messages recognizing Sri. Paleri's transformative leadership, visionary spirit, and lasting legacy in worker cooperation and socio-economic development.

In its tribute, the International Cooperative Alliance Asia and Pacific (ICA-AP) recalled Sri. Paleri's pivotal role in expanding ULCCS since he took charge in 1995 at the age of 35. Under his stewardship, ULCCS evolved from a local construction contract society in Vadakara into one of the world's most respected worker cooperatives. His vision expanded the cooperative's reach into information technology, education, housing, and cultural preservation, including projects like the Sargaalaya Arts and Crafts Village, while keeping governance firmly in the hands of its member-workers.

ICA-AP highlighted historic milestones achieved under his leadership, noting that in 2019, ULCCS became the first primary cooperative from India to join the ICA as a regular member. In 2023, ICA-AP honored ULCCS with the inaugural ICA Asia-Pacific Cooperative Excellence Award for Enterprising Cooperative, celebrating its innovation, sustainable growth, and contributions across the region. ICA-AP praised Sri. Paleri for his humility, generosity, and steadfast advocacy for young cooperators and workers' dignity.

The Brussels-based International Organisation of Industrial and Service Co-operatives (CICOPA) conveyed its sincere condolences to the family, friends, colleagues, and all members of the ULCCS community. CICOPA noted that Sri. Paleri's leadership contributed significantly to the growth and global recognition of ULCCS, reaffirming that his legacy will continue through the work, achievements, and community development efforts of the cooperative.

At the national level, the National Cooperative Union of India (NCUI), the apex organization representing the Indian cooperative movement, expressed profound grief over his demise. NCUI described Sri. Paleri as a distinguished leader whose visionary guidance, unwavering commitment, and dedicated service made an enduring impact on the cooperative movement. NCUI stated that his invaluable efforts in advancing cooperative principles and values will always be remembered with deep respect and admiration across the nation's cooperative fraternity.

30/07/2026

ജനലക്ഷങ്ങളുടെ കണ്ണീർപ്പൂക്കളാൽ അന്ത്യാഭിവാദനം;

രമേശൻ പാലേരിക്കു വികാരതീവ്രമായ അന്ത്യയാത്ര



ജനലക്ഷങ്ങളുടെ കണ്ണീർപ്പൂക്കൾ ഏറ്റുവാങ്ങി ഊരാളുങ്കൽ ലേബർ കോൺ‌ട്രാക്റ്റ് കോ-ഓപ്പറേറ്റീവ് സൊസൈറ്റി ചെയർമാൻ രമേശൻ പാലേരി ചരിത്രത്തിലേക്കു യാത്രയായി. പ്രതിപക്ഷ നേതാവ് പിണറായി വിജയൻ, മുൻ‌മന്ത്രിമാരായ ഡോ. ടി. എം. തോമസ് ഐസക്ക്, എ. കെ. ബാലൻ, ബിനോയ് വിശ്വം, ടി. പി. രാമകൃഷ്ണൻ, പി. എ. മുഹമ്മദ് റിയാസ്, കടന്നപ്പള്ളി രാമചന്ദ്രൻ, മുൻ കേന്ദ്രസഹമന്ത്രി മുല്ലപ്പള്ളി രാമചന്ദ്രൻ, മുസ്ലിം ലീഗ് അദ്ധ്യക്ഷൻ സാദിക്ക് അലി ശിഹാബ് തങ്ങൾ, സിപി‌ഐ നേതാവ് സത്യൻ മൊകേരി, വിവിധ രാഷ്ട്രീയപ്പാർട്ടിനേതാക്കൾ, ജനപ്രതിനിധികൾ, സാംസ്ക്കാരിക-സാമൂഹികപ്രവർത്തകർ, തൊഴിലാളികൾ തുടങ്ങി സമൂഹത്തിലെ നാനാമണ്ഡലങ്ങളിലുമുള്ളവർ അന്തിമോപചാരം അർപ്പിച്ചു. വീട്ടുവളപ്പിൽ ഉച്ചയ്ക്ക് 12 മണിക്കായിരുന്നു സംസ്ക്കാരം.

പുലരും‌മുമ്പുതന്നെ എല്ലാ നാട്ടുവഴികളും തങ്ങളുടെ പ്രിയപ്പെട്ട രമേശേട്ടന്റെ വസതിയായ പാലേരിയിലേക്ക് ഒഴുകിത്തുടങ്ങിയിരുന്നു. തലേന്ന് കോഴിക്കോട്ടും വടകരയിലും പൊതുദർശനത്തിനു വച്ചപ്പോഴും നിലയ്ക്കാത്ത ജനപ്രവാഹമായിരുന്നു. ഓരോരുത്തർക്കും സവിശേഷമായ അനുഭവങ്ങളും ഓർമ്മകളും സമ്മാനിച്ച മനുഷ്യസ്നേഹിയായ സഹകാരിയുടെ അന്ത്യദർശനം വൈകാരികമായ നിരവധി രംഗങ്ങൾക്കു സാക്ഷ്യം വഹിച്ചു.

പരേതൻ അംഗമായ ആത്മവിദ്യാസംഘത്തിന്റെ പ്രാർത്ഥനയെ തുടർന്ന് ഭാര്യ ശോഭയുടെയും മറ്റു കുടുംബാംഗങ്ങളുടെയും പുഷ്പാർച്ചനയ്ക്കുശേഷം മക്കളായ അശ്വിൻ, രമിൻ എന്നിവർ ചേർന്നു ചിതയ്ക്കു തീ കൊളുത്തി. എം‌എൽ‌എമാരായ കെ. കെ. രമ, പാറയ്ക്കൽ അബ്ദുള്ള, വനിതാക്കമ്മിഷൻ അദ്ധ്യക്ഷ പി. സതീദേവി, മുൻ എം‌എൽ‌എമാരായ എ. പ്രദീപ് കുമാർ, കുഞ്ഞഹമ്മദുകുട്ടി, കേരള ബാങ്ക് പ്രസിഡന്റ് പി. മോഹനൻ മാഷ്, എൻ‌സിപി പ്രതിനിധി പി. സത്യനാഥൻ, വടകര ബ്ലോക്ക് പഞ്ചായത്ത് പ്രസിഡന്റ് കോട്ടയിൽ രാധാകൃഷ്ണൻ, മുസ്ലിം ലീഗ് നേതാവ് ഇ. പി. ജാഫർ, ആർജെഡി നേതാവ് മനയത്ത് ചന്ദ്രൻ, ആർ‌എം‌പി സംസ്ഥാനസെക്രട്ടറി എൻ. വേണു, തുടങ്ങി നിരവധി പ്രമുഖർ അന്ത്യോപചാരം അർപ്പിച്ചു.

സംസ്ക്കാരത്തെത്തുടർന്നു കെ. കെ. രമ എം‌എൽ‌എയുടെ അദ്ധ്യക്ഷതയിൽ സർവ്വകക്ഷിയോഗം ചേർന്നു. വടകര ബ്ലോക്ക് പഞ്ചായത്ത് അംഗം കെ. എം. സത്യൻ അനുശോചനപ്രമേയം അവതരിപ്പിച്ചു. കേരളത്തിന്റെ സഹകരണമേഖലയുടെയും തൊഴിലാളികളുടെയും അന്തസ്സും പെരുമയും ലോകത്തോളം വളർത്തിയ സമർപ്പിതചേതസ്സായ സഹകാരിയാണ് രമേശൻ പാലേരിയെന്ന് പ്രമേയത്തിൽ പറഞ്ഞു. അദ്ദേഹത്തിന്റെ കർമ്മമേഖലകൾ അനുസ്മരിച്ച പ്രമേയം ആ സവിശേഷവ്യക്തിത്വത്തിന്റെ മാനുഷികഭാവം ഇങ്ങനെ രേഖപ്പെടുത്തി: “അശരണരും ശാരീരികവെല്ലുവിളികൾ നേരിടുന്നവരും വാർദ്ധക്യത്തിന്റെ അവശതകൾ അനുഭവിക്കുന്നവരും മാരകരോഗങ്ങളാൽ കിടപ്പിലായവരും ആ സ്നേഹത്തണലിൽ സാന്ത്വനത്തിന്റെയും പ്രതീക്ഷയുടെയും ലോകത്തേക്കു ചുവടുവച്ചു.”

സഹകരണമേഖലയ്ക്കു പുതിയ ദിശാബോധവും വീക്ഷണവും ഊരാളുങ്കൽ സൊസൈറ്റിക്കു നല്കിയത് രമേശന്റെ നേതൃത്വമാണെന്നും ഇന്നത്തെ നിലയിലേക്കു സൊസസൈറ്റി ഉയർന്നുവരാൻ കാരണം അദ്ദേഹം കാട്ടിക്കൊടുത്ത വേറിട്ട വഴികളാണെന്നും എൽഡി‌എഫ് കൺ‌വീനറും മുൻ മന്ത്രിയുമായ ടി. പി. രാമകൃഷ്ണൻ പറഞ്ഞു. രാജ്യത്തെ സഹകരണപ്രസ്ഥാനത്തിന് അതികായനായ രക്ഷകർത്താവിനെയും ക്രാന്തദർശിയായ വഴികാട്ടിയെയുമാണു നഷ്ടമായതെന്ന് സിപി‌ഐ അസി. സെക്രട്ടറി സത്യൻ മൊകേരി അനുസ്മരിച്ചു.

വനിതാക്കമ്മിഷൻ അദ്ധ്യക്ഷ പി. സതീദേവി, കേരള ബാങ്ക് പ്രസിഡന്റ് പി. മോഹനൻ, ലേബർ ഫെഡ് ചെയർമാൻ എ. സി. മാത്യു, വടകര ബ്ലോക്ക് പഞ്ചായത്ത് പ്രസിഡന്റ് കോട്ടയിൽ രാധാകൃഷ്ണൻ, സിപി‌ഐ(എം) ജില്ലാസെക്രട്ടറി എം. മെഹബൂബ്, ബിജെപി ജില്ലാപ്രസിഡന്റ് അഡ്വ. കെ. ദിലീപ് കുമാർ, ആർജെഡി ജില്ലാപ്രസിഡന്റ് മനയത്ത് ചന്ദ്രൻ, ആർ‌എം‌പി‌ഐ സംസ്ഥാനസെക്രട്ടറി എൻ. വേണു, കോൺഗ്രസ് ബ്ലോക്ക് പ്രസിഡന്റ് പറമ്പത്ത് പ്രഭാകരൻ, സിപി‌ഐ(എം) ഒഞ്ചിയം ഏരിയ സെക്രട്ടറി ടി. പി. ബിനീഷ്, കോൺഗ്രസ് മണ്ഡലം പ്രസിഡന്റ് പി. സോമശേഖരൻ, മുസ്ലിം ലീഗ് മണ്ഡലം സെക്രട്ടറി, വി. പി. ജാഫർ, എൻസിപി മണ്ഡലം പ്രസിഡന്റ് പി. സത്യനാഥൻ, മുൻ എം‌എൽ‌എ എ. പ്രദീപ് കുമാർ, ഒഞ്ചിയം ഗ്രാമപഞ്ചായത്ത് പ്രസിഡന്റ് ഷെജിന കൊടക്കാട്, വടകര മുനിസിപ്പൽ കൗൺസിലർ അഡ്വ. ലതിക ശ്രീനിവാസൻ, ഒഞ്ചിയം പഞ്ചായത്ത് അംഗങ്ങൾ അനിൽ കുമാർ, ബിന്ദു വള്ളിൽ, ആത്മവിദ്യാസംഘം പ്രസിഡന്റ് വി. കുമാരൻ മാസ്റ്റർ, എസ്ഡിപിഐ അംഗം ഷംസീർ ചോമ്പാല, യുഎൽസിസിഎസ് വൈസ്-ചെയർമാൻ എം എം സുരേന്ദ്രൻ, എംഡി എസ്. ഷാജു എന്നിവർ രമേശൻ പാലേരിയെ അനുസ്മരിച്ചു.

29/07/2026

ഊരാളുങ്കലിന്റെ നായകന് വിട. ശ്രീ. രമേശൻ പാലേരി അനുശോചന യോഗം - തത്സമയം

ഊരാളുങ്കലിന്റെ നായകന് വിട. ശ്രീ. രമേശൻ പാലേരി അനുശോചന യോഗം - തത്സമയം

28/07/2026

ഊരാളുങ്കൽ ലേബർ കോൺട്രാക്റ്റ് കോ-ഓപ്പറേറ്റീവ് സൊസൈറ്റി ചെയർമാൻ രമേശൻ പാലേരി അന്തരിച്ചു. 💐
കോയമ്പത്തൂരിലെ സ്വകാര്യാശുപത്രിയിൽ രാവിലെ 8 30-ന് ആയിരുന്നു അന്ത്യം. 66 വയസ് ആയിരുന്നു. കുറച്ചുനാളായി രോഗബാധിതനായി ചികിത്സയിൽ ആയിരുന്നു. ഇന്നു വൈകിട്ട് 4 30-ന് കോഴിക്കോട് ടൗൺ ഹാളിലും, വൈകിട്ട് 8-ന് വടകര ടൗൺ ഹാളിലും രാത്രി 10-ന് മടപ്പള്ളി ജിവിഎച്ഛ്എസ്എസിലും പൊതുദർശനത്തിനു വയ്ക്കും. നാളെ (29) രാവിലെ 11 മണിക്കു നാദാപുരം റോഡിലെ വീട്ടുവളപ്പിൽ സംസ്ക്കാരം.