26/03/2023
शेतकऱ्याची व्यथा...
बाजारच्या वाटेवरून येताना बायकोने कोथिंबीरीची जुडी आणली ...आल्या आल्या नवऱ्याला कौतुकान म्हणली...
"आहो एकजण फुकट देत हुता.. बरीच गर्दी हुती माणसं हसत कोथिंबीर नेत होती.....मी एक आणली आता तुम्ही जाऊन एक घेऊन या... मीच दोनदा गेले तर बर दिसणार नाही.."
लगेच विचार आला कि जो शेतकरी फुकट देतोय तो कसा दिसत असेल... आतून किती तुटला असेल...! भांडवल तर सोडाच पण वाटखर्ची सुद्धा निघाली नसलं त्याची...!
हा लागलीच जाऊन शेतकऱ्याच्या हातावर हजारभर ठेवून कोथिंबीरच्या दोन जुड्या घेऊन आला..! शेतकऱ्यांन भरल्या डोळ्यांनी आशिर्वाद दिला बायकोलाही आनंद झाला..!
पण याला मात्र त्या पेंडीच्या मुळाशी लागलेल्या मातीत बापाचं कष्ट दिसत होत...आत्महत्येच्या आदल्या दिवशी अशीच मिथी फुकट वाटली होती म्हणे त्यानं..!
