02/12/2013
...अन् मला कम्प्युटरचे महत्त्व कळले!...........सचिन तेंडुलकर
सचिन तेंडुलकर म्हणजे क्रिकेट हे समीकरणच झाले आहे. सचिनने क्रिकेटलाच आपले सर्वस्व मानले. त्याचा दिवस सुरू व्हायचा तो क्रिकेटने अन् संपायचा तोदेखील क्रिकेटने. मग त्याला आजच्या पिढीसारखे कम्प्युटर किंवा नव्या गझेट्सचे आकर्षण कसे असणार ? सचिने कम्प्युटरबाबतचा असाच एक किस्सा शुक्रवारी मुंबईत पार पडलेल्या एका कार्यक्रमात सांगितला.
' ड्रेसिंगरुममध्ये कम्प्युटर! मी चकितच झालो होतो. ही कल्पनाच मला पटत नव्हती ', सचिनचे हे वाक्य ऐकल्यावर कान आपसूकच टवकारतात. ' १२-१३ वर्षांपूर्वीच म्हणजेच साधारण २००२-०३मध्ये ड्रेसिंगरुममध्ये कम्प्युटर आला. या उपकरणात आपली महत्वपूर्ण माहिती साठवून ठेवता येते , असे मला सांगण्यात आले. मला मात्र काही केल्या हे पटतच नव्हते. हे उपकरण माझ्यासाठी फलंदाजी करणार नव्हते की झहीर , भज्जीसाठी गोलंदाजी करणार नव्हते , मग याचा ड्रेसिंगरुममध्ये उपयोग काय ? कालांतराने मला कम्प्युटरचे महत्त्व कळत गेले. माझ्या जुन्या खेळींचे व्हिडिओ यात राहू शकतात अन् जेव्हा पाहिजेत तेव्हा अगदी काही सेकंदात ते प्लेदेखील होतात. यामुळे मला माझ्या खेळींचा अभ्यास करता आला , चुका सुधारल्या. १९९९मध्ये मी स्ट्रेट ड्राइव्ह कसा खेळायचो किंवा एखाद्या खेळीदरम्यान मी कोणते चेंडू सोडून दिले ते मला या कम्प्युटरमुळे पुन्हा-पुन्हा सहज बघता आले. अशाप्रकारे मी कम्प्युटरला आपलेसे केले. माझ्या सामन्याच्या तयारीत या उपकरणाची मदतच झाली ', कार्यक्रमासाठी जमलेल्या लहान मुलांना सचिन सांगत असतो. छोट्यांशी गप्पा मारताना तो त्यांच्यातलाच एक होऊन गेला होता.
स्वप्न बघा व त्यांना प्रत्यक्षात उतरवण्यासाठी अपार मेहनत करा , असा सल्ला मास्टर-ब्लास्टरने छोट्या चाहत्यांना दिला. ' फक्त वेळ वाया घालवायचा आणि काहीच करायचे नाही , हे चुकीचे आहे. आपल्या आयुष्याला गांभीर्याने घ्यायलाच हवे. मी असे म्हणत नाही की मजा करू नका. मला क्रिकेट खेळून आनंद मिळाला अन् मला इथे कारकीर्द घडवायची होती. क्रिकेटने मला खूप समाधान , आनंद , मजा दिली आहे. याची तुलना कशाचीच होऊ शकत नाही ', असे सचिनने सांगितले. गप्पांदरम्यान सचिनने आपली मुले सारा व अर्जुन यांचा उल्लेख केला. ' माझी मुलगी साराला तिच्या आईप्रमाणे डॉक्टर व्हायचे आहे. तर अर्जुनला क्रिकेटचे पॅशन आहे. हे दोन्ही मार्ग त्यांनी स्वतः निवडले आहेत , मी किंवा माझी पत्नी अंजली आम्ही आमची मते त्यांच्यावर लादली नाहीत. तुम्हाला जे करायचे आहे ते करा आमचा तुम्हाला पाठिंबा आहे , हे सारा व अर्जुनला मी नेहमीच सांगत आलो. माझ्या मते प्रत्येक पालकाने आपल्या मुलांना करियर निवडण्याचे स्वातंत्र द्यायला हवे. जमाना बदलतो आहे. २०-३० वर्षांपूर्वी किती पालकांनी आपल्या मुलाला शेफ बनण्याची परवानगी दिली असती. आज टीव्हीवरील कार्यक्रमांमध्ये लहान मुले जेवण तयार करताना दिसतात... ', सचिन उदाहरणासह स्पष्ट करतो.
स्वप्नांबद्दल बोलताना तो म्हणाला की , ' स्वप्नांना प्रत्यक्षात उतरवताना जीवापाड मेहनत करावी लागेल ; पण हार मानू नका. मार्गात अनेक चढउतार दिसतील. अडथळेदेखील येतील तुम्ही मात्र थांबू नका '. आपला मुद्दा स्पष्ट करून सांगताना सचिनने ' बी ', ' आय ', ' जी ' या इंग्रजी अक्षरांचा उल्लेख केलाः ' पहिला मुद्दा ' बी ', बी फॉर बीलिफः म्हणजेच विश्वास. तुम्हाला आपल्या ध्येयावर विश्वास हवा. आपले पॅशन काय आहे ते प्रथम ओळखा. त्यावर जीवापाड प्रेम करा. माझे पॅशन क्रिकेट आहे , अन् त्यावर माझी श्रद्धा आहे. दुसरे अक्षर आहे ' आय '. आय फॉर इग्नोर! ध्येयापासून तुमचे लक्ष विचलीत करणाऱ्या गोष्टींना इग्नोर करा. म्हणजे त्यांच्याकडे दुर्लक्ष करा. तरुण वयात बर्थडे पार्ट्या , सिनेमे अशा गोष्टींमुळे आपले कामातून दुर्लक्ष होते. मी अशा गोष्टींवर नेहमीच पाणी सोडले. अशा तडजोडी करायलाच हव्या. तिसरे अध्याक्षर आहे जी. जी फॉर गिविंग... ध्येयप्राप्तीसाठी प्रत्येक वेळी आपले सर्वोत्तम योगदान द्यायला शिका. मैदान कोणते आहे , प्रतिस्पर्धी कोण अशा गोष्टी माझ्यासाठी कधीच महत्त्वाच्या नव्हत्या. महत्त्वाचे होते ते सर्वोत्तम खेळ करणे. देशाचे प्रतिनिधित्व करणे माझे स्वप्न होते. अन् यासाठी मी नेहमीच सर्वस्व पणाला लावून खेळलो '. सचिनचे बोलणे ऐकताना बच्चेकंपनी भान हरपून ऐकत असते हे विशेष.
Source - http://maharashtratimes.indiatimes.com/sports/our-sachin/----/articleshow/26599259.cms
