23/07/2024
OFF THE BEATEN PATH! Exploring Aruvikkal Waterfalls & Temple | അരുവിക്കൽ വെള്ളച്ചാട്ടം
#അരുവിക്കൽ_വെള്ളച്ചാട്ടം
#അരുവിക്കൽ_അമ്പലം
#കേരള_സൗന്ദര്യം
#വെള്ളച്ചാട്ട_സൗന്ദര്യം
#അമ്പല_വിശേഷങ്ങൾ
#കേരള_ടൂറിസം
സോഷ്യൽ മീഡിയ വഴി പ്രശസ്തമായിക്കൊണ്ടിരിക്കുന്ന ഒരിടം പരിചയപ്പെടാം.ഇത് അരുവിക്കൽ ശിവ - സുബ്രഹ്മണ്യ ക്ഷേത്രം. കോട്ടയം ജില്ലയിലെ കുറവിലങ്ങാടിന് അടുത്ത്, കളത്തൂരിലാണ് ഈ ക്ഷേത്രം. ക്ഷേത്രത്തിന് മുന്നിലെ അരുവിയും, വെള്ളച്ചാട്ടവുമാണ് ഇവിടുത്തെ ഏറ്റവും വലിയ ആകർഷണം. പ്രകൃതിയുടെ മടിത്തട്ടിൽ, ശാന്തമായി കുറച്ച് സമയം ചെലവഴിക്കാൻ അനുയോജ്യമാണ് ഇവിടം വർഷത്തിൽ എല്ലാ സമയത്തും ഇവിടെ വെള്ളം ഉണ്ടാവും എന്ന് പറയപ്പെടുന്നു. മഴക്കാലത്താണ് ക്ഷേത്രത്തിൻ്റെയും, അരുവിയുടെയും മനോഹാരിത കൂടുതലായി ആസ്വദിക്കാൻ കഴിയുക. അരുവിയുടെ തുടർച്ചയായി ഒരു ചെറിയ വെള്ളച്ചാട്ടവും ഇവിടെയുണ്ട്. പാറയുടെ മുകളിലൂടെ ഒഴുകുന്ന തെളിഞ്ഞ വെള്ളത്തിലൂടെ നടന്നാൽ മാത്രമേ ക്ഷേത്രത്തിൽ പ്രവേശിക്കാൻ കഴിയൂ. വെള്ളത്തിന് അത്യാവശ്യം നല്ല ഒഴുക്കുണ്ട്. മുട്ടിന് മുകളിൽ വരെ നടവഴിയിൽ വെള്ളം ഉണ്ടാവും. ഒഴുക്കുള്ള സമയത്ത് ഭക്തർക്ക് സുരക്ഷിതമായി നടക്കുന്നതിന് വേണ്ടി ഇരുമ്പിൻ്റെ കൈവരികൾ ഒരുക്കിയിട്ടുണ്ട്. തെളിനീരിൽ മീനുകൾ നീന്തി തുടിക്കുന്നത് സുന്ദരമായ കാഴ്ചയാണ്. വെള്ളച്ചാട്ടത്തിൽ സുരക്ഷിതമായി കുളിക്കാൻ കഴിയും. വെള്ളച്ചാട്ടത്തിൻ്റെ അടിയിലായി പുരാതനമായ ഒരു ഗുഹ ആരംഭിക്കുന്നു. അതിലൂടെ കൊറേ ദൂരം സഞ്ചരിച്ച അനുഭവങ്ങൾ പങ്ക് വെക്കാനുണ്ട് സമീപ വാസികളിൽ ചിലർക്ക്. നിറയെ വെള്ളം ഉള്ളതിനാൽ ഗുഹയുടെ ഭാഗം ദൃശ്യമായില്ല. ഏകദേശം 1000 വർഷം പഴക്കമുണ്ടെന്ന് വിശ്വസിക്കപ്പെടുന്നു ഈ ക്ഷേത്രത്തിന്. ശിവൻ, സുബ്രഹ്മണ്യൻ, ഭദ്രകാളി, നാഗങ്ങൾ എന്നിവയാണ് പ്രതിഷ്ഠ. ഭക്തിയും, വിനോദവും ലക്ഷ്യമാക്കി നിരവധി ആളുകൾ ഇവിടം സന്ദർശിക്കാൻ ആരംഭിച്ചിട്ടുണ്ട്. സന്ദർശകരുടെ എണ്ണം ഉയരുന്നതിന് അനുസരിച്ച് അനുബന്ധ സൗകര്യങ്ങളും, ചില നിയന്ത്രണങ്ങളും വരുത്തേണ്ടതുണ്ട്. തെളിനീർ ഒഴുകുന്ന അരുവി മലിനമാകാതെ സൂക്ഷിക്കാൻ കഴിഞ്ഞാൽ ഭക്തിയും, വിനോദവും സമന്വയിക്കുന്ന മനോഹര കേന്ദ്രമായി അരുവിക്കൽ ക്ഷേത്രം മാറും.എഴുതിയത്
മനു നീഹാരം
