11/10/2026
“ವನಸುಮದೊಲೆನ್ನ ಜೀವನವು ವಿಕಸಿಸುವಂತೆ ಮನವನನುಗೊಳಿಸು ಗುರುವೇ ಹೇ ದೇವ...” ಸರಳಾಳ ಬೆರಳುಗಳು ವೀಣೆಯ ತಂತಿಗಳ ಮೇಲೆ ನುಡಿಸುತ್ತಿದ್ದ ಕಾನಡಾ ರಾಗ ಹಠಾತ್ತನೆ ನಿಂತಿತು. ಭಾವಾವೇಶದಲ್ಲಿ ಕಣ್ಣಿಂದ ಹೊರಹೊಮ್ಮಿದ ಅಶ್ರುಬಿಂದು ಕೆನ್ನೆಯ ಮೇಲೆ ಉರುಳಿತು. ಹೃದಯ ಜೋರಾಗಿ ಹೊಡೆದುಕೊಳ್ಳತೊಡಗಿತು. ತಕ್ಷಣವೇ ಗೇಟಿನ ಕಡೆಯಿಂದ ಚಿಟಾರನೆ ಚೀರಿದ ಶಬ್ದ. ಗಾಡಿ ಉರುಳಿದ ಸದ್ದು. ಸರಳಾ ಗೇಟಿನ ಕಡೆಗೆ ಓಡಿದಳು. ಅವಳು ಕಂಡ ದೃಶ್ಯದಿಂದ ದಿಕ್ಕು ತೋಚಲಿಲ್ಲ. ಸುಮಾರು ಎರಡು ವರ್ಷದ ಮಗು ಚಕ್ರದ ಅಡಿಯಲ್ಲಿ ಬಿದ್ದಿತ್ತು ಸದ್ದಿಲ್ಲದೆ. ಹತ್ತಿರದಲ್ಲೇ ಬೋರಲು ಬಿದ್ದು ಮೂಗು ಜಜ್ಜಿ ರಕ್ತ ಸುರಿಯುತ್ತಿದ್ದ ಬಾಲಕಿಯನ್ನು ಬಾಚಿ ತಬ್ಬಿಕೊಂಡಳು. “ಅಪ್ಪಾ... ಅಮ್ಮಾ.. ಸರಳಾ... ಸರಳಾ ನನ್ನಮ್ಮ!” ದೂರದಲ್ಲಿ ಉರುಳಿ ಬಿದ್ದಿದ್ದ ಆಕೆ ಏದುಸಿರು ಬಿಡುತ್ತಾ ಎದ್ದು ನಿಂತು ಉದ್ಗಾರ ಎಳೆದಳು. ಸರಳಾ ತನ್ನ ಹೆಸರು ಆಕೆಗೆ ಹೇಗೆ ತಿಳಿಯಿತು ಎಂದು ಒಂದು ಕ್ಷಣ ಅಚ್ಚರಿಗೊಂಡಳು. ಆಕೆಯ ಹೆಸರು ಸುಮಿತ್ರಾ. ಆಕೆಯ ಕಂಕುಳಲ್ಲಿ ಇನ್ನೊಂದು ಮಗು ಮಾಧು. ಸರಳಾ ತಕ್ಷಣವೇ ಆ ತಾಯಿ ಮಕ್ಕಳನ್ನು ಒಳಗೆ ಕರೆತಂದಳು. “ನೋಡೀಮ್ಮ ಸ್ವಲ್ಪ ಸುಧಾರಿಸಿಕೊಳ್ಳಿ. ಅಷ್ಟರಲ್ಲಿ ನಾನು ನಿಮ್ಮ ಇನ್ನೊಂದು ಮಗುವನ್ನು ಎತ್ಕೊಂಡ್ಬರ್ತೀನಿ. ಸಂಕೋಚಪಟ್ಕೋಬೇಡಿ” ಎಂದು ಬಾಲಕಿಯನ್ನು ಮಂಚದ ಮೇಲೆ ಮಲಗಿಸಿ ಹೊರಟಳು. “ಅಯ್ಯೋ ನಾನೆಂಥಾ ಹೆಂಗಸು. ಮಗೂ ಜ್ಞಾನಾನೇ ಬೇಡ್ವೆ ನಂಗೆ” ಸುಮಿತ್ರಾಳ ದನಿ ನಡುಗಿತು. “ಛೆ ಛೆ ಹಾಗಲ್ಲಮ್ಮ. ಬಿದ್ದ ಆಘಾತದಲ್ಲಿ ನಿಮಗೇನೂ ತೋಚಿಲ್ಲ. ಮಗೂಗೆ ಏನೂ ಆದ ಹಾಗೆ ಕಾಣೋದಿಲ್ಲ. ನಾ ಕರ್ಕೊಂಡು ಬರ್ತೀನಿ” ಸರಳಾ ಆಶ್ವಾಸನೆ ನೀಡಿದಳು. ಗಾಡಿ ಚಾಲಕ ಮುದುಕ ಕುದುರೆಯ ಮುರಿದ ಕಾಲನ್ನು ನೋಡಿ ಕಣ್ಣೀರು ಹಾಕುತ್ತಿದ್ದ. “ಕುದ್ರೇಗೆ ಕಾಲು ಮುರದೈತೆ ತಾಯಿ. ಒಟ್ಟೆ ಕೆಟ್ದು. ಅಮ್ಮಾವ್ರು ‘ಬ್ಯಾಗ ಓಗ್ಬಹ್ದು ಬುಡು’ ಅಂದ್ರು ನಾನೂ ಆಸೇಗೆ ಮಣ್ಣು ತಿನ್ನೋ ಕೆಲ್ಸ ಮಾಡ್ದೆ” ಅವನ ದನಿ ದುಃಖದಿಂದ ತುಂಬಿತ್ತು. ಸರಳಾ ಅವನಿಗೆ ಧೈರ್ಯ ತುಂಬಿ ಪಶುವೈದ್ಯರನ್ನು ಕರೆತರಲು ತನ್ನ ಹೆಸರಿನ ಚೀಟಿ ಮತ್ತು ಹಣ ಕೊಟ್ಟಳು. ಒಳಗೆ ಬಂದು ಡಾಕ್ಟರ್ ಇಂದಿರಾಳಿಗೆ ಕರೆ ಮಾಡಿದಳು. “ಇಂದೂ ತಮಾಷೆಗೆ ಟೈಂ ಇಲ್ಲ. ನಮ್ಮನೆ ಮುಂದೆ ಒಂದು ಆಕ್ಸಿಡೆಂಟ್ ಆಗಿದೆ. ವಿಕ್ಟಿಂಸ್‍ನ ಮನೇಲಿ ಮಲಗ್ಸಿದೀನಿ. ಈಗ್ಲೇ ಬಾ ಅಷ್ಟೆ!” ಸರಳಾಳ ದನಿ ತುರ್ತಾಗಿತ್ತು. ಇಂದಿರಾಳ ಅಸಡ್ಡೆಗೆ ಸಿಟ್ಟಾದ ಸರಳಾ “ನೀನೀಗ ತಕ್ಷಣ ನಮ್ಮನೇಗೆ ಬರ್ದೆ ಹೋದ್ರೆ ಇನ್ಮೇಲೆ ನಾನು ನಿನ್ನ ಮಾತಾಡ್ಸೋದೇ ಇಲ್ಲ ತಿಳೀತಾ?” ಎಂದು ಬೆದರಿಸಿದಳು. ಇಂದಿರಾ ಒಪ್ಪಿದಳು. ಅಷ್ಟರಲ್ಲಿ ಗೋಪಿ ಮಾಧುವನ್ನು ಹೆಗಲ ಮೇಲೆ ಕೂರಿಸಿಕೊಂಡು ಬಂದ. “ಚಿಕ್ಕಮ್ಮ ಮಹಾ ನೀ ಕುದ್ರೆ ಇಲ್ಲಾಂದೆ. ನೋಡೀಗ ನಾನೇ ಕುದ್ರೆ ಆಗ್ಬಿಟ್ಟೆ ಮಾಧೂಗೆ.” “ಪುಟಾಣಿ ನಿನ್ನ ಹೆಸರೇನೋ?” ಸರಳಾ ಕೇಳಿದಳು. “ಮತುಚೂತನ” ತೊದಲಿತು ಮಗು. ಮಧುಸೂಧನ! ಯಾವುದೋ ಕಣ್ಣಿಗೆ ಕಾಣದ ಒಂದು ಬಾಣ ಬಂದು ಅವಳ ಹೃದಯವನ್ನು ಇರಿದಂತಾಯಿತು. ತನ್ನ ಸ್ಮೃತಿ ಪಟಲದಲ್ಲಿ ಅದುಮಿ ಅದುಮಿ ಇಟ್ಟು ಹೊರಗೆ ಬರಲೇ ಕೂಡದೆಂದು ಕಟ್ಟಪ್ಪಣೆ ಮಾಡಿದ್ದ ಒಂದು ತೆರನಾದ ಬಾಧೆ ಅವಳನ್ನು ಬಹಳ ಕಂಗೆಡಿಸಿತು. ಎಲ್ಲಾ ಸರಿಹೋಗಿದ್ದರೆ ತಾನು ತನ್ನ ಮಗುವಿಗೆ ಇಡಬಯಸಿದ್ದ ಹೆಸರದು. ಇಂದಿರಾ ಬಂದಾಗ “ನಿಂಗೆ ಮಕ್ಕಳೂಂದ್ರೆ ಇಷ್ಟು ಇಷ್ಟವಲ್ಲಾ. ನೀ ಯಾಕೆ ಒಂದು ಮದ್ವೆ ಮಾಡ್ಕೋಬಾರ್ದು?” ಎಂದು ಕೇಳಿದಳು. ಸರಳಾಳ ಮುಖ ರಸಪೂರ್ತಿ ಹಿಂಡಿಬಿಟ್ಟ ಕಬ್ಬಿನ ಸಿಪ್ಪೆಯಂತೆ ಬಿಳಿಚಿಕೊಂಡಿತು. “ಮದುವೆ ನಂಗಿಷ್ಟ ಇಲ್ಲ ಅಷ್ಟೆ” ಎಂದು ಕಣ್ಣು ತುಂಬಿ ನುಡಿದಳು. “ನಿನ್ನ ಹೃದಯದಲ್ಲಿ ಅಡಗಿರೋ ಅಗ್ನಿಪರ್ವತಾನ್ನ ಒಂದ್ಸಲ ಹೊರಗಟ್ಟದೆಹೋದ್ರೆ ನೀನು ಬಹಳ ಕಾಲ ಉಳಿಯೋಲ್ಲ” ಇಂದಿರಾ ಎಚ್ಚರಿಸಿದಳು. ಸರಳಾಳ ಕಣ್ಣಲ್ಲಿ ನೀರು ತುಂಬಿತ್ತು. “ಗೊತ್ತು ಇಂದಿರಾ. ಹೇಳ್ತೀನಿ. ಕಣ್ಣು ಮುಚ್ಚೋದ್ರೊಳ್ಗೆ ಒಂದ್ಸಲ ಯಾರಿಗಾದ್ರೂ ಹೇಳ್ತೀನಿ. ಆದ್ರೆ ಇನ್ಮೇಲೆ ದಯವಿಟ್ಟು ನನ್ನನ್ನ ಈ ವಿಷಯವಾಗಿ ಪ್ರಶ್ನಿಸೋದು ಬೇಡ” ಎಂದು ಗೋಗರೆದಳು. ಯಾವ ಅಗ್ನಿಪರ್ವತ ಸರಳಾಳ ಹೃದಯದಲ್ಲಿ ಅಡಗಿದೆ? ಮಧುಸೂಧನ ಎಂಬ ಹೆಸರು ಅವಳನ್ನು ಏಕೆ ಇಷ್ಟು ಕಾಡುತ್ತದೆ? ಮದುವೆಯೆಂದರೆ ಅವಳಿಗೆ ಏಕೆ ಇಷ್ಟು ಅಸಹ್ಯ?
ಈ ಕಥೆಯನ್ನು ಪೂರ್ತಿಯಾಗಿ ಓದುವ ಆನಂದ ನಿಮ್ಮದಾಗಿಸಿಕೊಳ್ಳಲು ಕೆಳಗಿನ ಲಿಂಕ್ ಮೇಲೆ ಕ್ಲಿಕ್ ಮಾಡಿ...
ಆಕಸ್ಮಿಕವಾಗಿ ಪರಿಚಯವಾದ ಸುಮಿತ್ರಳ ಎದುರಿಗೆ ತನ್ನ ಬಾಳಿನ ರಹಸ್ಯ ಪುಟಗಳನ್ನು ತೆರೆದಿಡುತ್ತಾಳೆ ಸರಳ. ಅವಳ ಬಾಳಿನ ಮುಳ್ಳುಗಳಾದ ರಾಜ,...
