20/09/2026
ፊልም ወዳጅ ነኝ። ረጃጅምና ብዙ ክፍል ያላቸው ለማየት ትዕግሥቱ ስለሌለኝ አላይም። ቢበዛ በ2:30 ጊዜ ውስጥ መጠናቀቅ አለበት። በተለይ በቂ ትምህርት ሰጥቶ የሚያልፈው ለረዥም ጊዜ አልረሳውም። ምሥሉ ላይ የሚታየው እውነተኛ ታሪክን መሠረት አድርጎ የተሠራው ''Coach Carter'' አንዱ ነው።
ሚ/ር ካርተር የራሱ መካከለኛ ቢዝነስ ያለው እንዲሁም የቅርጫት ኳስ አሰልጣኝ ነው። ማሸነፍ እንጂ ሌላ የማያውቅ የ highschool ቅርጫት ኳስ ቡድኑን እንዳይጫወት በማገድ የልምምድ ሜዳውን (basketball court)ም በመዝጋቱ በጣም መነጋገሪያ ሆኖ ነበር። ይህን ያደረገው ደግሞ ተጫዋቾቹ ሙሉ ትኩረታቸውን ቅርጫት ኳስ ላይ አድርገው በትምህርታቸው ዝቅተኛ ውጤት በማስመዝገባቸው ተበሳጭቶ ነው።
ሚ/ር ካርተር አሁንም በሕይወት ያለ እውነተኛ 'ሰው' መሆኑ ልብ ይባል። ልበ-ወለድ ካራክተር አይደለም።
ምን ዓይነት ኃላፊነት የሚሰማው ሰው ነው!? ተጫዋቾቹ ትምህርታቸው ላይ ካልበረቱ በቅርጫት ኳስ ብቻ የትም እንደማይደርሱ ያውቃል። በቁጥር በጣም ጥቂት የሆኑት እንዳጋጣሚ ሊሳካላቸው ይችላል። የስኬት በርን ሰፋ ለማድረግ ደግሞ አማራጮችን ማስፋት ምርጫ የሌለው ነው።
ኋላ ላይ ተጫዋቾቹ ተስማምተው ሰዓታቸውን አከፋፍለው ትምህርታቸው ላይ በረቱ፤ ቅርጫት ኳሳቸውም ላይ እይበገሬነታቸውን አሳዩ። ከሌሎች ትምህርት ቤቶች በተለየ አብዛኞቹ ተጫዋቾች በትምህርታቸው በጣም ጥሩ ውጤት በማምጣታቸው እንዲሁም በቅርጫት ኳስ ተጫዋችነታቸው ስኮላርሺፖችን አሸንፈው ኮሌጅ/ዩኒቨርሲቲ ገቡ። ለየት ባለ ዲሲፕሊን በመያዛቸው ስኬትን ተጎናጸፉ።
ትምህርት ባሕሪው ይቀያየር እንጂ ድሮም አሁንም ወደፊትም የዕድገት መሠረት ነው። የስልጣኔ መሠረት ነው። የሕልውና መሠረት ነው። ከትምህርት በመፆም በአቋራጭ የሚገኘው ቁልቁለት ገደል ነው።
ስለ ትምህርት ሳነሳ በዲግሪ ስለመመረቅ የማወራ የሚመስለው ብዙ የዋህ አለ። እንደዚያ አይደለም። የሀገራችንን ነባራዊ ሁኔታ (ኢኮኖሚ፣ ባሕል፣ ተፈጥሮ፣ አኗኗር፣ ፖለቲካል ሲስተም ወዘተ.) ባገናዘበ መልኩ የትምህርት ስርዓታችን ቢቃኝ እወዳለሁ። እንደ ወረደ የምዕራባውያንን ካሪኩለም መውሰዳችን ተገቢ ነው የሚል እምነት የለኝም። ለአገራችን እድገት እና ሥልጣኔ የሚመጥን እንዲሁም በአጭርም በረዥምም ጊዜ ውጤት የምናይበት ሥርዓተ-ትምህርት ቢኖረን ብዬ እመኛለሁ።
ከዚያ ውጪ የትምህርትን አስፈላጊነት ጥያቄ ውስጥ በማስገባት ''ሳይማሩ የተሳካላቸው''ን ምናልባት የዓለምን ሕዝብ ከ0.5% በታች ቁጥር የማይዙ ባለሃብቶችን እየጠቀሱ ቁጭ ብሎ በመማለልና ''ድንቁርና''ን በማስፋፋት የሚመጣ አንዳች ጠብብ የሚል ነገር የለም።
-Hawlet
