23/03/2020
7 حاجات لازم تاخد بالك منهم لو عندك كاميرات مراقبة ⚠️
1- هات كاميرا تعرف تغير الباسورد بتاعتها وياسلام لو ينفع تغير يوزر admin. لو مش بتتغير متجبهاش.😅
2- إشتري كاميرا الحماية بتاعتها قوية ودي بتعرفها من تقييم الناس ليها او موقع زي ده بيقيم الحاجة من ناحية الsecurity. 🧐
https://foundation.mozilla.org/en/privacynotincluded/
3- غير الباسورد لحاجة صعبة من 15 حرف علي الاقل وحط special characters واستخدم upper و lower case.💪
4- متستخدمش باسورد قديمة.😂
5- لو الكاميرا فيها اوبشن two factor authentication إستخدمه. ده بيبعت كود علي موبايلك.😉
6- دايما إعمل update للسوفتواير بتاع الكاميرا.👌
7- لومش عارف اسأل حد شغال في المجال يدلك 😎
مارك جيلبرت كان بيغسل المواعين يوم سبت بعد عيد ميلاده وسمع صوت غريب جاي من اوضة بنته اللي عندها سنتين.
مارك ومراته جريوا علي الاوضه وسمعوا واحد بيشتم بنتهم وبيقلها "ياغبية إصحي ياعاهرة"
اه قالها كده واكتر "effing moron,”” wake up you little slut”
لحسن حظ البنت إنها فاقدة للسمع وكانوا قافلين السماعة. الصوت كان طالع من baby monitor camera ودي كاميرا مخصصة لمراقبة الاطفال. مارك من الخضة شد الكاميرا فصلها.
اشلي وديلان اشتروا كاميرا ring بتاعت amazon وحطوها في اوضة بنتهم اللي عندها 3 سنين.
بعد 4 ايام السماعة اللي في الكاميرا شغلت اغنية "Tiptoe Through the Tulips” في الاوضة الضلمة. اليسا اللي عندها 8 سنين سمعت المزيكا وفتحت النور تشوف في ايه؟!!
كلمها شخص قالها انه سانتا وقعد يشتم فيها لحد ما البنت صرخت لمامتها
انت متخيل طفلة عندها 8 سنين مش مستوعبة ايه ده ولا عمرها هتفهم إن ده هاكر.
اليسا معرفتش تنام في البيت اليوم ده وامها بتفكر تسيب البيت وتمشي.
تقدر تشوف جزء من الفيديو هنا
https://edition.cnn.com/2019/12/12/tech/ring-security-camera-hacker-harassed-girl-trnd/index.html
في كونيتيكت, إد سلاتر سمع زعيق جاي من البدروم وحماته قامت مفزوعة برده الصوت كان طالع من الكاميرا.
في كايب كورال, هاكر كلم جوزيفين براون من خلال الكاميرا وسألها إذا كان إبنها من جوزها, بابون ولا لأ علشان هما من عرقين مختلفين. جوزيفين شاكة إنه نفس الشخص اللي كلم اليسا.
وحوادث تانية كتير.
صاحبنا بقي اندي جريج حظه حلو شوية. اندي كان قاعد في جنينة بيتهم ومرة واحدة حد كلمه وقاله إنه هاكر اخلاقي زي كمال ابوراية ودول ناس طيبين اوي ياخال. الراجل قال لأندي إن الباسورد اللي مستخدمها للكاميرا مخترقة غالبا علشان هي باسورد قدبمة او بيستخدمها كتير وان حظه حلو انها وقعت في ايده هو مش حد شمال. اندي شكر الراجل وكان عايز يعزمة علي حاجة ميصحش يمشي كده ايده فاضية.
في جزء لطيف من المحادثة هنا
https://www.vice.com/en_us/article/vbajqd/hacker-talks-to-arizona-man-directly-through-his-iot-security-camera
الكاميرا او IP camera زيها زي اي جهاز بيوصل علي الشبكة. زي مابيحميك لازم انت كمان تحميها.
في حالة مارك جيلبرت, السوفت واير بتاع الكاميرا كان فيه عيب وكان بيسمح لأي حد انه يخترق الكاميرا. كان في تحديث مارك لو كان نزله كان ممكن الوقعة دي متحصلش.
في حالة اليسا إحتمال يكونوا إستخدموا باسورد سهلة اي هاكر يقدر يفكها.
في حالة اندي الباسورد بتاعته بقي كانت اتعرفت من مكان تاني وعلشان اندي بيستخدم نفس الباسورد الهاكر قدر يخش علي الكاميرا بتاعته.
علشان الناس اللي عندها كاميرات متعرفش تغير الباسورد او بتستخدم باسورد سهلة في مواقع بتعرضلك الكاميرات دي وايه مقسماهم حسب البلد ومكانهم فين ومعلومات كتير. مصر مثلا فيها 54 كاميرا تقدر تخش تشفهم عادي. هدف الموقع ده اللي فيه حوالي 73 الف كاميرا انه يوريك ان قد ايه إختراق الكاميرات سهل.
في مواقع وgroups تانية بتبيع دخول علي الكاميرا او مشاهد منها. في واحد كان منزل إستفتاء انه يطلع رسالة مكان الكاميرا في مدينة معينة ويحط رقمة ويطلب فلوس.
في ناس طلبوا واحد يتفرج علي كاميرا في محل ويكتب ارقام الكريدت كارد اللي بتبان وياخد 15 دولار علي الثانية. بفكر اقدم الC.V 😂
دايلي مايل عملت مقال عن الكاميرات اللي موجودة علي النت ونزلت راحت للأماكن دي وطبعا الناس كانت بتتصدم لما تعرف إن الكاميرات بتاعتهم مشاع.
المقال اهو
https://www.dailymail.co.uk/news/article-2763664/How-home-hackers-spy-children-YOUR-webcam-The-shocking-evidence-shows-private-lives-snooped-streamed-live-web.html
كل الحوارات دي بتوريك إنك لازم تكون مركز ومصحصح وإنت بتشتري اي حاجة تحطها في بيتك. نص الحوادث دي إن مكانش كلها كان ممكن تفاديها لو الناس عندها المعرفة الكافية او حتي سؤال اي حد مختص.
