25/07/2017
ماتيجوا نخرب بيوتهم ✊
في البداية أحب أقولكم إني بشتغل content creator
يعني أيه؟
يعني بكتب موضوعات زي اللي حضرتك هتقراه دلوقتي.
ليه بعمل كده؟
علشان شركتي بتقدم منتجات ومحتاجه تعرضها بشكل كويس
وساعات بكتب محتوي مش بغرض البيع
ولكن علشان ابني community يعني مجموعه من الفئات اللي احنا بندور عليها
وبنحاول نخليها تتابعنا باستمرار لعلها تكون في يوم من الايام client
ودايما بنسعي إننا نقدم الـ Valuable content
يعني لو أنا مقدرتش اكتب محتوي يجذب العميل بكل بساطه مش هكمل في مكاني
اللي فاتت دي مقدمه ...
أنا أو أي حد بيشتغل زيي بيقرر إنه إما يكتب محتوي محترم
أو يكتب أي هري ويحط عنوان يشد بيه الزبون
علشان يعمل traffic علي الموقع أو يعمل تفاعل علي صفحته
زي العنوان اللي أنا اخترته للبوست ده!!!
بس ماتقلقش احنا هنا مش بنعمل فرقعه
احنا قاصدين كل كلمه قلناها
طب ليه الناس دي بتعمل عناوين وتعمل فرقعه؟؟
مش خايفين إننا نشتمهم مثلا ؟؟
أقولك أنا ....
مش مهم إنك شتمته
مش مهم إنك تعمل شير وتقلل منه
المهم إنها اتحسبت زياره
ولما المواقع دي بتضرب أي كلام وتعمل ترافيك عالي
بتقدر تجذب إعلانات وتحقق من وراها أرباح
زي مثلا اللي يقولك
شاهد قبل الحذف
لك أن تتخيل إن العنوان اصلا هو بيكتبه قبل م يرفع الفيديو
إزاي هو عرف إن الفيديو هيتحذف قبل حتي م يرفعه
الحلقة الممنوعه من العرض
لما هي ممنوعه بتعرضها ليه
جبتها منين أصلا
طب بعد م بتشوفها بتطلع ممنوعه فعلا
شاهد فلان يشتم فلان
وأنا مالي 😤😤
حقيقة ظهور المسيخ الدجال
يعني ربنا قال هيظهر في آخر الزمان
وحددله ضوابط وانت اللي كسرت القاعده
جاي تغير الواقع ياحيلتها
لن تتخيل ماذا حدث
لا أنا خيالي واسع علي فكره 😕
عارفين ايه الضرر من كده؟
المقالات أو الفيديوهات اللي من النوع ده
بتضر بالمحتوي العربي بتبقي مش عارف توصل لمعلومه عليها القيمة
بتعمل أزمه عند أي حد عنده علم محترم ممكن يقدمه
بتطلع عنينا مع أدسنس وإن جوجل يتعامل معانا كبني أدمين بنقدم محتوي محترم ونستحق إننا نكسب من الإعلانات
بتساعد في جو الشائعات وإن أي جحش قاعد ورا كيبورد من السهل عليه جدا إنه يعلي سقف المنافسه لدرجه إن مؤسسات كبيره دلوقتي بقت بتنزل بالنوع ده من المقالات والأخبار علشان تلاقي لنفسها مكان في الليله المنيله بنيله دي
الخلاصه
لما تلاقي صفحه علي الفيسبوك
أو قناه علي يوتيوب أو أي حاجه في أي حته بتعمل كده
دور علي أقرب كلمة block
وأعمل unlike و unfollow
في عندك علي فيسبوك ممكن تقوله أنا مش عايز أشوف العك ده تاني
أعمل report دور علي أي طريقه ترد بيها الحركه اللي أتعملت فيك
إبعت feedback منيل بنيله علشان توقف السفه ده
خلي معاك دايما الـ Block site علشان لما يقابلك موقع بينشر النوع ده من الموضوعات تمنعه إنه يظهرلك تاني
عايزين نخرب بيوتهم بجد
ولما يلاقوا الطريقه دي مش بتجيب سكه مع الزبون هيدوروا علي طريقة غيرها
ووقتها نبقي نشوفلها حل
لو مقتنع بالكلام ده إبدأ نفذ من دلوقتي
