03/01/2015
** صحح معلوماتك **: هو خريخ حاسبات و معلومات بعد ما يتخرج بيشتغل ايه (الجزء الأول)
لفت نظري ان ده من الاسئلة الشائعة في محركات البحث . مش عيب انك تسأل السؤال ده حتى لو انت في الفرقة الرابعة , عموما خليني اجوابلك على قدر المستطاع عن طريق شوية قواعد نبسط بيها الموضوع عشان تحدد هدفك صح و تعرف تدور على الحاجة اللي ممكن تنجح فيها من دلوقتي حتى لو انت في سنة اولى
طبعا من الاخطاء الشائعة ان اغلب الطلبة حاطة في دماغها انها لازم تشتغل مبرمجين developers و الواقع مختلف شوية لان المبرمج أو المطور هي وظيفة واحدة من بين وظائف كتير احترافية مرموقة و فيها ابداع برضو و موجودة في سوق العمل لقطاع تكنولوجيا المعلومات واحيانا بتكون قيمتها اعلى (ماديا و معنويا ) و لو اضفنا كمان التقنيات المتاحة لكل وظيفة (يعني لو قلنا مثلا في مبرمج .NET و مبرمج Java ...الخ) هيبقى عندنا مئات الوظائف المختلفة اللي ممكن تدور على الحاجة اللي تناسبك فيها.
اكيد مش كل الناس اللي دخلت حاسبات بيستهويها كتابة الاكواد في ناس عندها مواهب مختلفة و ده مهم جدا انك تشوف الحاجة اللي انت لاقي نفسك فيها و تبحبها . طبعا واحد شاطر هيفكر و يقوللي اه احنا عارفين عندنا مادة اسمها database يبقى دي شغلانة تانية وعندنا ماده اسمها multimedia يبقى دي شغلانة تالتة .... لا برضو مش كدة . انسى مواد الكلية شوية و ركز معايا
القاعدة الأولى : اسم الوظيفة (كجملة مفيدة) بيتكون من 4 مقاطع (الاسم الرباعي )
-المسمى الوظيفي Title
- الدرجة الوظيفية Grade
- التقنية او المنتج Technology/Product
-الشركة المقدمة للوظيفة
كل مقطع من الاربعة مهم جدا سواءا وانت بتحدد هدفك أو و انت بتدور على شغل او بتقدم على شغل في شركة
ناخد مثال : senior oracle database administrator at grandmasters
بالعربي ( مدير قواعد بيانات اوراكل اول في جراند ماسترز)
المسمى الوظيفي : database administrator
التقنية : oracle
الدرجة الوظيفية : senior
الشركة المانحة للوظيفة : grandmasters
ناخدهم بالتفصيل شوية
** أولا المسمى الوظيفي Title
هو الجزء اللي بيعكس طبيعة الشغلانة او الدور الوظيفي role و المفاجأة ان المسمى الوظيفي قد يختلف اخلاف شاسع من شركة لشركة تانية , يعني ممكن تلاقي نفس الشغلانة بالضبط بس في شركة بيبقى اسمها developer و في شركة تانية اسمها programmer و في شركة تالتة اسمها software engineer و في شركة رابعة اسمها system analyst و في شركة خامسة اسمها technical specialist
و في النهاية تكتشف ان هو نفس الراجل الغلبان (المبرمج) اللي قاعد بيكتب كود . بس كل شركة و ليها policy بتحطها ال HR في موضوع المسميات الوظيفية . احيانا في الشركات الاكثر نضجا بتلاقي في دقة شوية في المسميات . فمثلا تلاقي المبرمج المبتدئ بيسميه developer و المبرمج اللي عنده خبرة اكتر و مهارات في design بيسميه software engineer
الخلاصة ان اي شركة لازم بتبقى حاطة حاجة اسمها وصف وظيفي job description لكل مسمى وظيفي عندهم و هو ده مربط الفرس لان جهة العمل هي اللي لازم تقول (الوظيفة دي عندنا بيشتغل دورها ايه)
** ثانيا الدرجة الوظيفية Grade / Band / Level
و دي بتعكس مستوى الخبرة العملية للوظيفة . و عدد سنين الخبرة في المجال. و برضو بتختلف الاسماء من شركة لشركة فمثلا
تطلق junior او associate على المبتدئ . يعني حديث التخرج او خبرة سنة او سنتين
و تطلق Senior أو Specialist على سنوات الخبرة الاعلى فوق 3 او 4 سنوات مثلا
و تطلق المسميات lead او architect على السنوات الاكثر (مثلا فوق 8 سنين خبرة)
وطبعا الانتقال من مستوى وظيفي الى مستوى وظيفي تاني يعتبر ترقية للموظف يترتب عليها زيادة في المرتب و زيادة في المسئوليات طبعا اي حديث تخرج بيكون junior يعني على اول السلم الوظيفي . حتى و لو كان سوبر مان بس كفائته بعد كدة بتفرق في سرعة الترقيات
الملحوظة الأهم هنا : ان ممكن تشتغل في شركة junior مثلا 3 سنين و بعدين تاخد ترقية senior و تيجي تنتقل لشركة تانية ممكن تلاقي نفسك رجعت junior تاني (مش عيب) لان الشركات الكبيرة غالبا بتاخد ناس خبرات عالية و الدرجات الوظيفية عندهم بتكون قيمتها اعلى (ماديا ) فممكن تلاقي junior في شركة بياخد ضعف مرتب senior في شركة تانية لان زي ما قلنا كل شركة بتحط الدرجات والوظيفية حسب نظامها هي و حسب ال HR policy بتاعتها
** ثالثا : التقنية technology / product
و ده مرتبط ارتباط وثيق بالشركة المنتجة للتقنية (vendor) .زي مثلا ميكروسوفت , اوراكل , اي بي ام ... الخ
في كل مسمى وظيفي هتلاق عشرات التقنيات و طبعا سوق تكنولوجيا المعلومات المنافسة في شرسة جدا بين الشركات العالمية و الخريطة التسويقية بتتغير بسرعة جدا لدرجة ان الناس اللي في قلب التكنولوجيا نفسها مش قادرة تتابع كل التغيرات الاستراتيجية اللي بتحصل في سوق العمل . يعني ما تاخدش معلومة معينة عن منتج و تحفظها و تفضل نايم عليها و تكتشف ان المعلومة دي اتغيرت
طيب انا مثلا عايز اشتغل في البرمجة اركز على (C #/.NET ) و لا (Java ) و لا (C++) و لا (php) ؟
انا عايز اشتغل قواعد بيانات , انهو افضل في السوق (SQL Server) ولا (Oracle) و لا (MySql) و لا (DB2) ؟
انا عايز اشتغل هندسة نظم . انهو اقوى ((windows server ولا (linux ) و لا (Unix) ؟
انا عايز اشتغل شبكات آخد كورس ايه (Cisco CCNA) و لا (Juniper ) و لا ( Comptia N+) ؟
كل الاسئلة بتلاقي الناس بتسألها وتلاقي عشرات الفتاوى المختلفة و في النهاية تلاقي نفسك متلخبط و حيران و مش عارف تعمل ايه
احنا ان شاء الله هنجاوب اجابة موضوعية هتخليك انت تختاربنفسك من غير ما حد يملي عليك حاجة و تعرف انت تنفع في ايه بالضبط
بس ان شاء الله خليها في الجزء التاني عشان الموضوع ما يبقاش طويل قوي
