Sary Shokry - Crafting Mobile Commerce

Sary Shokry - Crafting Mobile Commerce شركة أبجد للبرمجيات
طريقك لتحويل مدونتك الووردبريس لت?

📧 ليه إيميل الترحيب والسلة المتروكة أهم إيميلين في متجرك؟في البوست اللي فات اتكلمنا إن الإيميلات الأوتوماتيك، رغم إنها ب...
19/08/2026

📧 ليه إيميل الترحيب والسلة المتروكة أهم إيميلين في متجرك؟

في البوست اللي فات اتكلمنا إن الإيميلات الأوتوماتيك، رغم إنها بس 2% من إجمالي الإيميلات، بتجيب من 30% لـ37% من إيرادات الإيميل كلها.

النهارده هنركز على أهم إيميلين فيهم 👇

أولا إيميل الترحيب 👋
أول رسالة بتوصل للعميل بعد ما يسجل عندك أو يشترك في القائمة البريدية. معدل فتحه (Open rate) بيوصل لـ83.6%، وده أعلى معدل فتح لأي نوع إيميل موجود.

ليه بيحصل كده؟ لأن العميل لسه فاكرك ومهتم يعرف عنك أكتر.

اللحظة دي مش لازم تضيع في رسالة عامة، لازم تستغلها في: ترحيب بسيط وشكر، تعريف سريع بالمتجر ومميزاته، أو حتى كود خصم على أول طلب لو مناسب لموديل شغلك.

ثانياً إيميل السلة المتروكة 🛒
بيتبعت لما العميل يحط منتجات في السلة ويسيب الموقع من غير ما يكمل الشراء. معدل النقر (Click rate) عليه بيوصل لـ23%، وهو أعلى معدل نقر بين كل أنواع الإيميلات الأوتوماتيك.

العميل ده مش زائر عادي، هو شخص كان على بعد خطوة من الشراء. إيميل بسيط بيفكّره بالمنتج، وممكن يضيف حافز بسيط زي شحن مجاني أو خصم صغير، بيكفي يرجّعه يكمل الطلب.

الخلاصة ✅
الإيميلين دول لوحدهم، لو مظبوطين صح، بيغطوا جزء كبير من العائد اللي اتكلمنا عنه في البوست اللي فات.

في البوست الجاي، هنتكلم عن التقسيم (Segmentation) وليه إرسال نفس الإيميل لكل قائمة العملاء أضعف بكتير من تقسيمهم حسب سلوكهم.

المصدر:
Omnisend: Email marketing statistics 2026.


📧 التسويق بالإيميل... لسه بيبيع؟كتير من أصحاب المتاجر الإلكترونية بيركزوا كل ميزانية التسويق على السوشيال ميديا والإعلان...
18/08/2026

📧 التسويق بالإيميل... لسه بيبيع؟

كتير من أصحاب المتاجر الإلكترونية بيركزوا كل ميزانية التسويق على السوشيال ميديا والإعلانات المدفوعة، وبيتناسوا قناة من أقدم القنوات في التسويق وبترجع أعلى عائد من أي قناة تانية موجودة.

الأرقام بتقول إيه؟
في دراسة لموقع Omnisend، اكتشفت إن مقابل كل 1$ يتصرف على الإيميل ماركتنج بيرجع عائد في حدود 36$ و42$ في المتوسط، وممكن يوصل 72$ للمتاجر الإلكترونية اللي شغالة صح.
العائد ده كبير ومفيش قناة تسويق تانية بتوصل لنفس الـROI.

بس السر مش في "إيميلات أكتر"... السر في "الإيميل الصح في التوقيت الصح":

الإيميلات الأوتوماتيك (زي إيميل الترحيب، وتذكير السلة المتروكة، ومتابعة بعد الشراء) مش بتتعدى 2% بس من إجمالي الإيميلات اللي بتتبعت، ومع كده هي اللي بتجيب حوالي 30-37% من إجمالي إيرادات الإيميل كلها.

يعني نظام أوتوماتيك بسيط مكوّن من 3-4 إيميلات بس، بيقدر يعمل تأثير أكبر من عشرات الإيميلات اليدوية اللي بتتبعت كل أسبوع.

لو متجرك لسه معندوش نظام إيميل أوتوماتيك، إنت فعليًا واقف على قناة من أرخص وأعلى القنوات عائدًا وسايبها.

في البوست الجاي، هنتكلم بالتفصيل عن أول إيميلين لازم يكونوا موجودين في أي متجر: إيميل الترحيب، وإيميل السلة المتروكة.

المصدر:
Omnisend: Email marketing ROI: 2026 benchmarks.


📧 الخطيئة الكبري في حملات الايميلفي آخر بوستين اتكلمنا عن الـROI العالي للإيميل ماركتنج، وعن أهم إيميلين أوتوماتيك (التر...
18/08/2026

📧 الخطيئة الكبري في حملات الايميل

في آخر بوستين اتكلمنا عن الـROI العالي للإيميل ماركتنج، وعن أهم إيميلين أوتوماتيك (الترحيب والسلة المتروكة). النهارده هنقفل السلسلة بفكرة بسيطة بس فارقة جدًا.

معظم أصحاب المتاجر الالكترونيه بيبعتوا نفس الإيميل لكل القائمة البريدية، سواء كان العميل اشترى قبل كده أو لسه بيشوف المتجر لأول مرة، سواء كان مهتم بمنتج معين أو مش مهتم خالص.

المشكلة إن الرسالة الواحدة بتخاطب الكل بنفس الطريقة، وده بيضعّف تأثيرها على أغلب العملاء.

الحل هو التقسيم (Segmentation)، يعني تقسيم القوائم البريدية حسب سلوك العميل.
عميل جديد، عميل اشترى قبل كده، عميل سايب منتج في السلة، عميل مهتم بفئة معينة من المنتجات.

الفرق في النتيجة كبير جدًا:
الحملات المقسّمة بترجع إيرادات أعلى بشكل ملحوظ جدًا مقارنة بالإيميل الموحد اللي بيتبعت لكل القايمة من غير تصنيف.

يعني ببساطة، إيميل موجّه لعميل مهتم بمنتج معين، بيوصل أفضل بكتير من إيميل عام بيتبعت لآلاف العملاء المختلفين في اهتماماتهم.

لو لسه بتبعت إيميل واحد للكل، البداية المنطقية إنك تقسّم قائمتك على الأقل لعميل جديد وعميل قديم، وتبدأ من هناك.

الخلاصة من السلسلة كلها: الإيميل ماركتنج مش قناة تسويقية إضافية، هو قناة بترجع أعلى عائد موجود، وأهم حاجة فيه مش عدد الإيميلات اللي بتبعتها، لكن مين اللي بيوصله الإيميل وإمتى.

لو متجرك لسه معندوش نظام إيميل أوتوماتيك ومقسّم، دي فرصة تبدأ بيها بخطوات بسيطة قبل ما تفكر في زيادة ميزانية التسويق.

المصدر:
Omnisend: Email marketing statistics 2026.


17/08/2026

🎯 الإيموجي مش لغة واحدة... هو لغة مختلفة لكل شريحة

كتير من أصحاب المتاجر الإلكترونية بيستعملوا نفس أسلوب الإيموجي لكل العملاء، وده غلط مثبت إحصائيًا.
الأبحاث بتقول إن الإيموجي بيتفسر بشكل مختلف حسب عوامل كتير.

📊 حسب العمر: دراسة نشرتها Advance Social Science Archive Journal لقت فروق واضحة بين ثلاث أجيال:

- Generation Z (مواليد 1997-2012): بيستخدموا الإيموجي بمعاني ساخرة أو مقلوبة عن الأصل
- Millennials (مواليد 1981-1996): بياخدوا الإيموجي بمعناه الحرفي المباشر
- Baby Boomers (مواليد 1946-1964): بيستخدموه ببساطة، غالبًا بمعناه الأساسي

نفس الإيموجي ممكن يوصل رسالتين مختلفتين لعميلين من عمرين مختلفين. ودراسة Adobe لقت إن 50% من المستخدمين بيستخدموا الإيموجي بمعنى مختلف عن المقصود أصلًا، يعني سوء الفهم وارد حتى داخل نفس الجيل.

🛍️ حسب نوع المنتج: دراسة نشرتها International Journal of Consumer Studies لقت إن الإيموجي بيزود فعالية الحملات للمنتجات اللي فيها استمتاع زي الأكل والموضة، ومالوش نفس الأثر على المنتجات الوظيفية أو التقنية.

💼 حسب السياق: استطلاع PC Magazine لقى إن 78% من الناس بيقولوا إن الإيموجي بيأثر على تقبلهم لشخص في سياق العمل. ودراسة Nielsen Norman Group لقت إن الإيموجي في عنوان الإيميل بيزود المشاعر السلبية بنسبة 26%.

الخلاصة: اسأل نفسك مين المستلم، وإيه طبيعة المنتج، وإيه القناة، قبل ما تحط أي إيموجي.

إنتم بتفرقوا في استخدام الإيموجي حسب شريحة عملائكم؟ 👇

المصادر:
Zahra & Ahmed, Advance Social Science Archive Journal (2025)
Adobe Emoji Trend Report
Mladenović et al., International Journal of Consumer Studies (2023)
PC Magazine survey
Nielsen Norman Group

:تعرف إن الدقن وحدها ممكن تفرق معاك 50% مبيعات؟ تفتكر الدقن بتبيع أكتر ولا أقل؟ 🧔متجر أمريكي لملابس رجالي اسمه AdonisClo...
16/08/2026

:
تعرف إن الدقن وحدها ممكن تفرق معاك 50% مبيعات؟ تفتكر الدقن بتبيع أكتر ولا أقل؟ 🧔

متجر أمريكي لملابس رجالي اسمه AdonisClothing اكتشف إن أغلب اللي بيدخلوا صفحة المنتج ويشتروا فعليًا مش الرجالة، دي نساء بيشتروا لشركائهم.
راح عملوا A/B test بسيط: صورة موديل بلحية مقابل صورة موديل من غير لحية.
النتيجة: النسخة باللحية زوّدت معدل التحويل 49.73%، والطلبات زادت 33%. 📈

المشكلة إن كتير من أصحاب المتاجر بيصمموا صفحة المنتج حسب توفعهم "اللي بيستخدم المنتج" مش حسب "اللي بيشتري فعليًا" أو اللي ببستخدم الموقع.
وده فرق كبير. صورة المنتج، زاوية التصوير، الألوان، حتى ترتيب المعلومات (السعر قبل ولا بعد المواصفات؟)... كل قرار من دول بيبان تأثيره في معدل التحويل، لكن بس لو اتبنى على فهم صح لمين اللي واقف قدام الشاشة فعلًا.
صفحة المنتج مش مجرد "معرض صور"، هي أقرب لحظة للعميل عشان يقرر يشتري أو يقفل التاب. أي تفصيلة فيها بتتكلم لصالحك أو ضدك.
قبل ما تصمم صفحة منتج جديدة، اسأل نفسك: 🤔 أنا بصمم للي بيستخدم المنتج، ولا للي بيدفع فلوسه فعليًا؟
شاركني في الكومنتات 👇: لاحظت فرق في المبيعات بسبب تفصيلة بسيطة في صفحة منتج عندك؟



المصدر: Amasty — A/B Testing Case Studies & Examples in Marketing

خطأ واحد بسيط في متجرك الالكتروني، ممكن يخسّرك نص مبيعات بدون ماتحس. 📉متجر إلكتروني دنماركي اسمه Manillo كان مقتنع إن أك...
16/08/2026

خطأ واحد بسيط في متجرك الالكتروني، ممكن يخسّرك نص مبيعات بدون ماتحس. 📉

متجر إلكتروني دنماركي اسمه Manillo كان مقتنع إن أكثر عملاءه هم "أمهات في سن الشباب"، وبنى استراتيجيته كلها على الافتراض ده. لما اختبروه فعليًا بـ A/B testing، اكتشفوا إن العملاء الأكتر ولاءً وصرفًا كانوا نساء فوق الستين مش الأمهات الشابات. لما عدّلوا استهدافهم للشريحة الصح، الـ ROI ارتفع 50%. 📈

الافتراضات الغلط عن عميلك مش بس بتأثر على الحملات الإعلانية، دي بتوصل لتصميم التطبيق نفسه. لون الأزرار، ترتيب المنتجات في الصفحة الرئيسية، حجم الخط، حتى صياغة وصف المنتج... كل ده بيتحدد (غالبًا من غير ما حد ياخد باله) بناءً على صورة معينة في دماغ المصمم عن "مين اللي هيستخدم التطبيق ده". لو الصورة دي غلط، التطبيق بيتصمم لعميل مش موجود، والعميل الحقيقي بيلاقي نفسه مش مرتاح من غير ما يعرف يقول ليه.

الـ Buyer Persona مش استمارة بتتملى مرة واحدة وتتنسى 📝، هي حاجة لازم تتراجع وتتختبر بالبيانات كل فترة، خصوصًا لما السوق يتغير أو المنتج يتوسع.

قبل ما تصمم شاشة جديدة في تطبيقك، اسأل نفسك: 🤔 التصميم ده بيخدم مين فعليًا اللي بيشتري مني، ولا بس اللي أنا متخيله؟

شاركني في الكومنتات 👇: حصل معاك افتراض غلط عن عملائك كلفك مبيعات؟

📉 إزاي تقلل نسبة الاسترجاع | الجزء 2: الصور والفيديوالصور والفيديو هما أقرب حاجة لتجربة العميل للمنتج بإيده قبل ما يشتري...
15/08/2026

📉 إزاي تقلل نسبة الاسترجاع | الجزء 2: الصور والفيديو

الصور والفيديو هما أقرب حاجة لتجربة العميل للمنتج بإيده قبل ما يشتري. كل ما التجربة قربت من الواقع، كل ما زاد رضا العميل عن المنتج لما يوصله. وممكن تنجح في تقليل نسبة الارتجاع اكتر من30% طبقا لدراسة عملتها Shopify.

📸 إزاي تستخدم الصور والفيديو صح؟

🔄 زوايا متعددة وسياق واقعي
مش كفاية صورة واحدة على خلفية بيضاء. اعرض المنتج من زوايا مختلفة، وفي سياق استخدام حقيقي.

📐 مرجع للحجم
حط عنصر يوضح الحجم الفعلي للمنتج (زي شخص لابسه، أو جنب حاجة معروف حجمها)، عشان العميل يقدر الحجم صح.

🎥 فيديو للتفاصيل اللي الصورة مش بتوصلها
الفيديو بيوضح حاجات زي خامة القماش، طريقة سقوطه على الجسم، الوزن، والملمس.

👥 تنوع في عرض المقاسات لو بتبيع ملابس
اعرض المنتج على أجسام مختلفة، مش شكل واحد بس.

🎨 دقة الألوان
لو المنتج ظهر فيروزي في الصورة ووصل أخضر بحري في الواقع، ده مرتجع مضمون. اتأكد إن الألوان في الصور قريبة قد الإمكان من اللون الحقيقي.

🕶️ خطوة أبعد: تجربة افتراضية (AR)
تجربة الواقع الافتراضي لو ميزانيتك تسمح، يعني تعرف شكل قطعة الأثاث في بيتك هتبقى إيه قبل ما تشتريها، أو تشوف شكلك بالنظارة والإكسسوار هيبقى إزاي.

مش لازم تبدأ بالـ AR من الأول. ابدأ بتحسين الصور والفيديو الأساسي، وده هيوريك فرق حقيقي في الاسترجاع قبل ما تفكر في أي تقنية متقدمة.

الحلقة الجاية هنتكلم عن الوصف الصادق للمنتج، وإزاي المبالغة في الوصف بتخلق فجوة توقعات بترجع عليك في شكل مرتجعات.

إنت بتستخدم فيديو في صفحات منتجاتك ولا لسه؟ 👇

المصادر:
Claimlane – How to Reduce Returns in Ecommerce (2026)
Shopify (تقرير عن أثر المحتوى ثلاثي الأبعاد)

إزاي تقلل نسبة الاسترجاع | (الجزء ١)تختلف نسبة المرتجعات بشكل كبير حسب المجال اللي بتبيع فيه.النهاردة هنتكلم عن مجال الم...
15/08/2026

إزاي تقلل نسبة الاسترجاع | (الجزء ١)

تختلف نسبة المرتجعات بشكل كبير حسب المجال اللي بتبيع فيه.

النهاردة هنتكلم عن مجال الملابس، اللي بتوصل فيه نسبة الاسترجاع لأكتر من 20%، وهنركز بالتحديد على المرتجعات بسبب المقاس، اللي بتشكل 44% من أسباب الاسترجاع.

إزاي تعرض المقاسات في صفحة المنتج بطريقة تقلل المرتجعات؟

📏 قياسات حقيقية مش جدول عام
القياسات (S-M-L) لوحدها مش كفاية. حط قياسات فعلية بالسم لكل مقاس Size Guide، وتكون مرتبطة بالمنتج نفسه، مش جدول عام لكل الموقع.

📝 ملاحظة صريحة عن التلبيس
لو المنتج تلبيسه Fit ضيق أو واسع عن المتوقع، وضحها صراحة في صفحة المنتج: "المقاس ده بيجي أصغر من العادي، خد مقاس أكبر."

⭐ فيدباك حقيقي من عملاء اشتروا
شجّع العملاء إن تقييماتهم تتضمن معلومات عن المقاس (جه مظبوط / كبير / صغير) — العميل بيثق في تجربة عميل زيه أكتر من أي وصف مكتوب من التاجر.

📍 مكان دليل المقاسات يكون واضح
دليل المقاسات لازم يكون قريب من مكان اختيار المقاس، مش مدفون في تبويب تحت أو صفحة منفصلة العميل مش هيدور عليها.

الاستثمار في التفاصيل دي مش تكلفة زيادة، ده استثمار بعائد محترم سواء في تقليل المرتجعات أو زيادة ثقة العميل في نفس الوقت.

المرة الجاية هنتكلم عن السبب التاني من أسباب الاسترجاع: المنتج اللي بيوصل تالف، وإزاي التغليف والصور بتأثر في القرار ده.

إيه أكتر حاجة بتلاحظها بتسبب ريتيرن عندك؟ 👇

المصدر: Claimlane – How to Reduce Returns in Ecommerce: 12 Strategies (2026)

📱 هل الإيموجي بيبيع... ولا بيبوظ الصفقة؟في تجربة معملية اتنشرت في International Journal of Consumer Studies، النتيجة كان...
14/08/2026

📱 هل الإيموجي بيبيع... ولا بيبوظ الصفقة؟

في تجربة معملية اتنشرت في International Journal of Consumer Studies، النتيجة كانت غريبة: التعرض للإيموجي لوحده مالوش تأثير مباشر على نية الشراء، لكن لما الإيموجي بيثير مشاعر إيجابية عند العميل، وقتها بيأثر فعلاً على قرار الشراء.

إيموجي في إشعارات الموبايل ممكن يزود نسبة الفتح بشكل كبير، لكن نفس الإيموجي في سياق تاني زي صفحة المنتج ممكن يقلل الثقة في العلامة التجارية.
الموضوع مش استخدم إيموجي أو متستخدمش، الموضوع سياق.
يعني الإيموجي مش أداة تسويقية في حد ذاتها، هو ناقل مشاعر. لو استخدمته صح، بينقل إحساس إيجابي، ولو استخدمته غلط، ممكن يبان استخفاف أو عدم احترافية.

في المتجر الإلكتروني بالذات، الفرق بيبان في 3 أماكن:

📩 إشعارات الموبايل: إيموجي واحد بسيط زي 🎉 أو 🔥 بيزود معدل الفتح بشكل ملحوظ، لأنه بيكسر الرتابة وسط عشرات الإشعارات التانية.

🛍️ صفحة المنتج: هنا الإيموجي بيبقى خطر أكتر. أي حاجة بتلمس الثقة، السعر، الضمان، سياسة الاسترجاع، لازم تفضل نص واضح ورسمي من غير إيموجي، عشان العميل بيقيّم مصداقية المتجر من هنا بالذات.

💬 الرد على العملاء، شات أو تعليقات: إيموجي بسيط زي 🙏 أو 😊 بيقرب المسافة النفسية بين المتجر والعميل، وده بيأثر بشكل غير مباشر على تكرار الشراء.

القاعدة اللي بستخدمها مع عملائي: الإيموجي في التواصل نعم، الإيموجي في الالتزامات لأ.

تفتكر هل التفسيرات دي كلها بتفرق حسب الشريحة المستهدفة ولا ثابته عند الكل؟
لو مهتم تعرف ممكن تعمل Follow وتنتظر البوست الجاي.


المصادر:
Mladenović et al., International Journal of Consumer Studies (2023), Emojis to conversion on social media.

Address

Hurghada
84519

Opening Hours

Monday 9am - 5pm
Tuesday 9am - 5pm
Wednesday 9am - 5pm
Thursday 9am - 5pm
Friday 9am - 11:30am
Sunday 9am - 5pm

Telephone

+201009207290

Website

Alerts

Be the first to know and let us send you an email when Sary Shokry - Crafting Mobile Commerce posts news and promotions. Your email address will not be used for any other purpose, and you can unsubscribe at any time.

Contact The Business

Send a message to Sary Shokry - Crafting Mobile Commerce:

Shortcuts

Share