22/04/2026
الأكسيس بوينت اللي على الشبكة .. هو الباب الخلفي اللي المتطفلين ممكن يدخلوا منه للشبكة بتاعتك..
أمانك الإلكتروني..
الحلقة 2 من سلسلة "بيئتك مكشوفة ولا متأمنة؟"
الراوتر و اتكلمنا فيه.. الدور دلوقتي على
الأكسيس بوينت..
لو عندك "أكسيس بوينت" أو "مقوي شبكة" في الشبكة، فأنت غالباً فتحت ثغرة أكبر من الراوتر نفسه وانت مش واخد بالك!!الأكسيس بوينت الرخيص أو اللي متركب غلط = دعوة مفتوحة لأي حد في الشارع إنه يدخل على الكاميرات، وبرنامج الحسابات، والـ DVR.
هقولك ازاي نقفل الباب ده بـ 5 خطوات محدش بيعملها غير المحترفين:
1️⃣ كارثة الـ "Repeater Mode" أو مقوي الشبكة أبو 500جنيه:
ده أخطر جهاز ممكن تركبه. لأنه بياخد باسورد شبكتك الأساسية ويبثها تاني بإشارة ضعيفة وتشفير واقع. أي عيل بـ 2 جنيه خبرة يقدر يخترقه في دقيقة ويبقى جوه قلب شركتك.
بنعمل إيه؟ بنلغي الـ Repeater نهائي. الأكسيس بوينت لازم يتوصل بسلك لحد الراوتر. غير كده يبقى بتهزر.
لو مضطر للريبيتر مود لازم باسوورد الريبيتر يكون غير باسوورد الراوتر .. و أسماء الشبكتين مختلفين و تغير الآي بي الافتراضي بتاع الريبيتر و تعمل باسوورد قوي..
2️⃣ عزل الشبكات - مبدأ "افصل ده عن ده":
غلطة العمر إنك تعمل شبكة واحدة للكل. الموظفين والكاميرات والضيوف والـ DVR كله على نفس الشبكة.
بنعمل إيه؟ بنقسم الشبكة 3 أقسام VLANs: شبكة للإدارة: عليها الحسابات والمخازن ودي مقفولة ضبة ومفتاح.شبكة للكاميرات والـ IOT: معزولة لوحدها عشان لو كاميرا اتهكرت، متطولش باقي الأجهزة.شبكة للضيوف ليها إنترنت بس، ومستحيل تشوف أي جهاز تاني في الشركة.
3️⃣ التحكم في "مدى الإشارة" - القوة غباء مش شطارة:
في ناس بتفتخر إن الواي فاي بتاعها واصل لآخر الشارع. دي كارثة. انت كده بتعلن للهكر "تعالوا جربوا حظكم".
بنعمل إيه؟ بنقلل الـ Transmit Power بتاع الأكسيس بوينت بالميللي. بنخلي الإشارة تغطي مكانك و بس وشكراً. اللي في الشارع مش هيشوف الشبكة بتاعتك أصلاً.
4️⃣ القائمة البيضاء للماك أدريس MAC Filtering:
زي الراوتر بالظبط. حتى لو حد معاه الباسورد، أو حد سرق الباسورد، الأكسيس هيرفض يدخله. لأن جهاز الموبايل بتاعه مش متسجل عندنا في "كشف الأجهزة المسموحة".
5️⃣ تحديث السوفت وير وقفل الـ WPS:
90% من الأكسيس بوينت في السوق شغالة بسوفت وير من 2018 وفيها ثغرات قاتلة. وزرار الـ WPS اللي في الجنب ده = زرار "اخترقني من فضلك".
بنعمل إيه؟ بنحدث الـ Firmware لآخر إصدار، وبنقفل زرار الـ WPS من السوفت وير نهائي.
دي نقاط تديك حماية معقولة وأي حد يقدر ينفذها أما الالتأمين الاحترافي متعدد الطبقات فا دا هنفرد ليه بوست لوحده نتكلم عنه بالتفصيل لاحقا..
تذكر دايماً: شبكة واي فاي ضعيفة= كاميرات بتتذاع لايف + فواتير بتتسرق + ملفات بتتسحب.تأمين الأكسيس بوينت هو خط الدفاع التاني بعد الراوتر..
في البوست الجاي هنتكلم عن "المصيبة المتحركة" اللي في جيوبنا كلنا: الهواتف الذكية وإزاي موبايل واحد يوقع سيستم شركة كاملة.. إنتظرونا..
📞 الاستفسار واتساب: 01227070744 - م. محمد قاسم
#سوهاج
