03/05/2025
الهيئة القومية للتأمين الاجتماعي في مصر حصل لها هاكينج "اختراق" واتنشر على موقع الدارك ويب قاعدة بيانات أكتر من 107 ألف مصري يوم 27 إبريل اللي فات.
ومافيش أي حد اتكلم في الموضوع رغم إنه قالب الدنيا في الدارك ويب والموضوع ممكن يكون له تباعيات كارثية.
طيب إيه الحكاية؟
اللي حصل إن مجموعة القرصنة "J27DN” أعلنت عن اختراق الهيئة القومية للتأمين الاجتماعي في مصر، وفقًا للي نُشر على منتدى DarkForums في الدارك ويب.
قاعدة البيانات اللي اتسرقت بتضم 107 ألف سجل لمواطنين مصريين.
البيانات اللي تم اختراقها بتضم الأسماء الكاملة للمواطنين.
اسم الأم.
بطاقات الهوية الوطنية "الرقم القومي".
عناوين البريد الإليكتروني.
أرقام التليفونات.
عناوين السكن.
تواريخ الاشتراك والمدد التأمينية.
الموضوع مش بس كدا، دا كمان يُقال إن السجلات اللي تم اختراقها فيها معلومات حساسة بتتعلق بالحالة الوظيفية.
الرواتب.
معلومات عن سجلات المعاشات التقاعدية.
سجلات الاشتراكات.
وإمكانية الوصول لخدمات التأمينات الاجتماعية كلها.
خليني اصدمك وأقول لك إن الاختراق لما تم لقوا إن الباسورد في الداتا بيز متسجل Plain Text من غير hash.
ودا معناه إن الباسورد كان باسورد عادي جدًا سهل يُخترق ومش معمول له تحويل باستخدام خوارزمية زي SHA-256 أو bcrypt، ودي خوارزمية بتخلي الباسورد يتحول لسلسلة مش مفهومة من الحروف والأرقام والعلامات وصعب تُخترق.
طيب دا ممكن يأذيني أنا ازاي كمواطن تم اختراقه بالشكل دا؟
خليني أقول لك إن الهاكينج اللي نشروا المعلومات دي على الدارك ويب يقدروا يستخدموا اسمك ورقم بطاقتك واسم والدتك علشان مثلًا يفتحوا حسابات بنكية أو ياخدوا قروض باسمك.
أو يعملوا خطوط موبايل أو اشتراكات من غير ما تعرف.
ولو ليك تأمين أو معاش ممكن حد ياخده مكانك أو يحول الفلوس لنفسه.
وبما إن عنوانك ورقمك وإيميلك بقى معاهم ممكن حد يبعت لك تهديد أو يبتزك بشكلٍ ما.
ممكن كمان يبعتوا لك رسايل شكلها رسمي وفيها بياناتك الحقيقية علشان تدخل على لينكات معينة.
كشف البيانات بالشكل دا مش أمان.
خليني أقول لك المشكلة الأكبر لو واحد من المستثمرين الكبار في شركات مصر اتعرف الداتا بتاعته، أو اتسربت داتا لشخصية مهمة واتعرف أكونته لشركة مشهورة، وله صلاحيات كبيرة بالأكونت بتاعه في الشركة، ممكن يهكروا من خلاله باقي أكونتات الشركة.
فلازم تخلي بالك من أي تعاملات ورسايل توصل لك.
إنتَ متعرفش إذا كنت من ضمن الـ107 ألف شخص دول ولا لا.
ووارد جدًا بياناتك ومعلوماتك كلها سواء السرية أو الغير سرية تكون موجودة دلوقتي مع شخص ما في أي دولة.
-
في النهاية، متنساش تشير المقال علشان غيرك يعرف.
وأنا بكتب مقالات ومعلومات على صفحتي.
لو مهتم باللي بقدمه اعمل لي فولو.
وشكرًا.
!¡
