13/08/2018
شوية نصايح لازم تعرفها قبل ما تركب كاميرات مراقبة 😎
1-- مفيش حاجة اسمها اعلى جودة بأقل سعر
انت عمرك ما هتركب مرسيدس 2018 ب 50 الف جنية 😂
ولا عمرك هتشيل Iphone X ب 2000 ج 😭
فخليك واقعى واعرف انت بتشترى ايه
فيه حاجة اسمها جودة مناسبة على أد فلوسك
وفيه حاجة اسمها جودة عالية بفلوس عالية برضة
2-- مفيش حاجة اسمها خصم 30 % و 40 % و 50 % .. فيه حاجة ب 100 ج اتكتب عليها انها ب 200 ج واتعملك خصم 50 % فرجعت لسعرها الاصلى قديمة الحركة دى 😠
3-- لما تيجى تختار كاميرات المراقبة حدد هدفك مظبوط
عاوز تتابع الدنيا وخلاص ولا عاوز تشوف تفاصيل ووشوش بنى أدمين ولا عاوز تجيب ارقام العربيات و كمان حدد العربيات دى ثابتة ولا متحركة ولو متحركة بتتحرك بسرعة كام ؟ كل العوامل دى بتفرق مع المهندس اللى هيصمملك السيستم ..
4-- دايما اهتم ان يكون فيه سيستم يشغل الكاميرات لما الكهربا بتقطع لان اول حاجة بيعملها الحرامى انه يفصل الكهربا عن المكان عشان يكون على راحته
5-- اهتمامك بالسعر على حساب الكواليتى هيلبسك فى الحيط .. بلاش توفر فى الكاميرات بالذات وركب حاجة محترم هى مره فى العمر
6-- مش معنى ان عم عبده البقال بقا شغال فى الكاميرات ان الموضوع بقا سهل ومش مستاهل -- الفيس بوك ملاااااااان فيديوهات لعمليات سرقة وخطف وسطو مسلح وكل الفيديوهات مشترك فيها ان وش المجرم مش باين :D -- وده مش ذنب عم عبده بس -- ده ذنبك انت انك ركبت حاجة رخيصة غير مطابقة للمواصفات ومش متناسبة مع المكان اللى انت فيه
7 -- التركيب والفنش للسيستم يعتبر عامل كبير فى سلامة النظام وعمله بشكل سليم وده اللى بيفرق من شركة للتانية -- ودايما اهتم بحماية الكابلات جوة مواسير PVC او ع الاقل مواسير حرار -- او روح لشركة محترمة وهى تقولك تعمل ايه
لازم تعرف كمان ان العنصر المسئول عن التسجيل هو الهارد ديسك وده بيركب جوة جهاز التسجيل الدى فى آر والهارد منه انواع كتير فيه هارد بيانات بيركب فى الكمبيوتر وهارد فيديو بيركب مع كاميرات المراقبة جوة ال دى فى ار .. متروحش تركب هارد كمبيوتر للكاميرات عشان مش هيعمر اكتر من 6 شهور .. اللهم بلغت
8-- قبل ما تفكر تمارس هواية الفصال -- من حقك كعميل تاخد حاجة اسمها عرض اسعار وده عبارة عن ورقه فيها مكونات السيستم وكل مكون ادامة رقم الموديل بتاعة بالكامل عشان تقدر انك تلف وتسأل عن طريق رقم الموديل وتوصل لاقل سعر وده حقك على اى شركة --
لو اخدت عرض سعر من شركة بدون ارقام الموديلات و بيان مختتصر للمواصفات فدى حاجة من الاتنين يا اما شركة جاهلة ياما نصابة - وفى كلتا الحالتين متتعاملش معاها
مهو برضة مينفعش اروح اسال الموبايل السامسونج بكام !
سامسونج عملت اكتر من 100 موبايل المفروض تحدد الموديل بالظبط عشان على اساسه هتوصل لافضل سعر
نفس الكلام فى كاميرات المراقبة كلهم شبة بعض تقريبا بس الموديل بيفرق فى المواصفات وجودة الصورة و بالتأكيد بيفرق فى السعر
9 -- لازم تبقى عارف انك لما تصور الحرامى كويس ان محدش هيجيبهولك -- عشان كده لازم السيستم ينبهك قبل السرقة ما تحصل اصلا وده اللى مش كل الشركات بتقوله للعملاء
10-- اهتم دايما بجهاز التسجيل لان ده عليه عامل كبير جدا فى وضوح الصورة سواء فى العرض او فى التسجيل -- وخللى بالك مش كل الاجهزة بتسجل زى ما بتعرض
يعنى ممكن جهاز التسجيل يعرض على الشاشة كاميرا 2 ميجا بيكسل - بس لما يجى يسجل هيسجل بدقة 1 ميجا بيكسل فقط وده الفخ اللى بيقع فيه ناس كتير عن جهل
بتروح تشترى كاميرات غالية ومش بتستفاد بيها
11-- متعتمدش على الرؤية الليلية بتاعت الكاميرا لانها غالبا مش هتوضحلك حاجة -- لو معاك فلوس ركب كاميرات star light غير كده الصورة مش هتعجبك
12-- اهتم ان يكون جهاز التسجيل مستخبى لانه شبة الرسيفر واول حاجة بتتسرق
13-- مفيش كاميرا تنفع مكان التانية -- كل مكان له كاميرات معينة - اللى يركب فى محل غير اللى يركب على طريق غير اللى يركب على بوابة غير اللى يركب جوة فرن
احمد مش زى الحاج احمد فى الحالة دى
14-- متهتمش الكاميرات صينى ولا تايوانى ولا بتنجانى لان كله متقفل فى الصين
اهتم بالمواصفات وشوف بعينك قبل ما تركب
15 -- كاميرات المراقبة قبل ما بتكون عامل ردع فى بعض الاوقات -- بتكون عامل ارتياح نفسى واطمئنان على نفسك واسرتك
16-- مفيش حد هيبيعلك بالرخيص ويديك ضمان استبدال لمدة سنة .. الحداية مش بتحدف كتاكيت 😂
17-- لو محتار تختار على الكواليتى ولا السعر .. دايما اختار نفسك :)
