19/05/2021
شفت بزاف ناس يشكو من الانترنت وبما انو مجال تخصصي حبيت نقدم بعض التعريفات وكذلك بعض الارشادات
اول حاجة خاصة باللاعبين اونلاين ....نحكو على البينغ ping .... اول حاجة البينغ ليس له علاقة بسرعة الانترنت انما هو سرعة الاستجابة بين السارفر والراوتر تاعك وبما اننا في الجزائر ولا في شمال افريقيا لا نملك سارفر راح يكون البينغ طالع نوعا ما بسكو رانا نلعبوا في سيرفرات تاع اوروبا ...الحالة الوحيدة وقتاه يتاثر بالسرعة هي لما يكون شخص فالمنزل يثيليشارجي راح يكون عندك lag
الحاجة الثانية هي ليزوبستاكل .... اكبر عدو الانترنت هو الضوء والماء ... مثلا كاين اشخاص يقولك الانترنت تروحلي فالليل وترجع صباح ...والسبب هو انو الخيط تاعو فايت على عمود الانارة غير يشعل راح يكون تشويش على الذبذبات الكهربائية اللي فالكابل (نفس الشيء بالنسبة لاسلاك الكهربائية) والماء راكم عارفين بدون شرح خاصة الميديتي والصدأ
ثالث حاجة فيما يخص المشكل تاع الانترنت وين راه ....كل بلاصة والمشكل تاعها وكاين بلايص لاباس .... كاين اماكن مزالهم بالمعدات القدم بصح راهم تدريجيا يبدلوا فيهم (ايريكسون في الغرب و zte في الشرق ) وكاين اماكن وين تلقى الريزو هو اللي فاسد (ليكابل الكبار) بصح نفس الشيء راهم يعاودو فيهم
كاين نقطة اخرى وهي الفايبر اوبتيك .... حبيت نفهمكم فيها برك وهي انو اتصالات الجزائر يخدموا من بكري بالفايبر بصح مايوصلش للمنزل انما يحبس في البنايات كيما تاع سونالغاز (msan) في النقطة هذيك يتبدلوا النحاس .... المشروع الجديد هو انهم يوصلوا الفايبر حتى المودام يعني 0 نحاس ....
الحاجة الثالث وهي سرعة التحميل وحجم الملفات : سرعة التحميل تحسب بوحدة البت وحجم الملفات يحسب بالبايت ....هنا بش تفهموا لازم نعطيلكم مثال
نقولوا عندك فيلم فيه 800 ميغا (بايت) وانت مشترك في 4 ميغا (بت)
هنا بش نحسبوا شحال لازمك بش تطلع الفلم مانقسموش 800 على 4 لانهم ماشي نفس الوحدة
سرعة 1 ميغا بت تعطينا 128 كيلو بايت في الثانية (1000/8)
سرعة 2 ميغا بت تعطينا 256 كيلو بايت في الثانية (2000/8)
سرعة 4 ميغا بت تعطينا 512 كيلو بايت في الثانية (4000/8)
يعني في كل ثانية راح تحمل 512 كيلو بايت
الحساب يكون 800 ميغا بايت = 800000 كيلو بايت
800000/512 = 1562.5 sec = 26 min
