02/09/2026
خاوتي احييكم بتحية الإسلام اولا، السلام عليكم ورحمة الله وبركاته
عندي واحد الحاجة راني نلاحظ فيها في الاونة الأخيرة لي مكنتش نشوفها من قبل
******منشور طويل******
_نحط كامل معلومات الكرت، سعر حرارة صور... الخ
تجيني في الخاص تعاود تسقسيني عليهم كامل، هل هاذ الامر منطقي؟
الأمر هذا راه يكونصوميني و يستهلكني مليح، عوض نجاوب على ناس أخرى الميساج تاعك توجور طالع فوقهم و الناس لي انتيريسي تشري تهبط لغياهب الجب، لا نتا تشري لا هوما يشرو
_كون متريبونديش يقولك علاه راك تتقوعر و يبقا يكومونتيلك ماكش تريبوندي حبيبنا
_متحطش السعر مكش مليح، تحطو النتيجة أسوأ
كاين ناس أخرى في الميساجات تمدلك سوجي تاع أسئلة في البريفي و لازمك تجاوب عليها في ذيك اللحظة الناس لي تشري تستنا ربي يسهل عليها
_اخي كي نقولك السعر ثابت، متحاولش من فضلك لانو كون نقدر راني ساعدتك
_للناس لي راي دوموندي نعاودلها التاست الامر غير ممكن لانو اذا مقتنعتش بالتاست لي في المنشور مراحش اوفيسيال تقتنع بالتاست الجديد
_الناس لي راني نطولو باه نجاوبها ولا ننسا اصلا نكمل discussion معاهم اجدد اعتذاراتي الله غالب
_تاس واحدوخرا تسقسيك على كرت راك حاطو ديجا و حاط سعرو، امبعد يقولك عندي ختها اذا تشري!!!!!
_الناس لي تستهلكلك طاقتك و نتا تجاوب فيهم مثلا على كرت يسوى 12 مليون امبعد يقولك منا على شهر تكون ان شاء الله؟ sérieux خو،ضامن حياتك نتا لغدوة؟ ولا يمرضك بالاسئلة على الكرت هذاك امبعد يقولك حاليا عندي 7 ملاين راني نلايم، اتق الله اخي
_سؤال غريب آخر، و في كروت 580 فقط، يسقسيك شحال خادم!!!!!! متمسخرش كارطة مخدومة عام الفيل حبيت تعرف شحال خادمة؟ هذي بالقليل فاتت على 8-10 صح يسلمك
و عليه اخي الكريم ،
_اذا سقسيتني على حاجة ناقصة من المنشور سواء سعر صورة تاست.. الخ راح نجاوبك بواش ناقص فقط، نتا مذابيك تعرف كلش على الكارطة و انا مذابيا نبيع، يعني الاولوية للناس الجادة
_عندك استفسارات عديدة من الافضل عيطلي في الهاتف استفسر معندكش اينيتي؟ بيبيلي نعاودلك. التلفون نربح فيه مجهود و وقت
_حاجة كنت متردد فيها امبعد مدرتهاش***** التسبيق خويا العزيز***** منقدرش نبعثلك كرت حتى تدفع 2٪ من المبلغ الاجمالي، ماشي نبعثهالك امبعد تقولي امور عائلية (نفس القالب كامل يقولوه اذا بان اصلا)، يعني تبعثلي معلوماتك بلا ما تدفع 2٪ هذيك راك تعب في روحك برك
_نقطة أخرى حبيت نوضحها ايضا، التبديل إلى خارج العاصمة او الولايات المجاورة لها حبستو، اذا لحقك الكرت في حالة سيئة او ماشي كيما شفت الوصف ترجعها، اذا يلحقك كرت في حالة مليحة تشدو
انا اذا قدر ربي و لحق فيه مشكل او مكسر... الخ يقولك بعثتهالك لاباس بيها ماشي مشكلتي التوصيل او لقيت فيها مشكل
_الجماعة لي موسوسة و تبانلها نكذب، اخي الكريم راني جاير منشور أعلى الصفحة للناس لي تعاملت معانا بانولك كامل fake؟ خويا فوتك مني شوف صفحات أخرى او روح للحوانت أفضل ليك و ليا، ماشي كرت نكتبلك جديد بدون علبة تقولي كيفاه جديد هذي و تزيدلي الضحكة هذيك موراها
_خويا الصفحة هذي عمرها يقارب 4-5 سنين كون عينو الواحد يلجأ للكذب و السريقة كون راني طرطقتها لطاشمة عيباد قبلك و ضربت هذيك 400-500 مليون يا اما راني في الحبس يا اما راني حرقت، مبقاش 5 سنين كاملة و انا نسرق و نكذب على الناس و مزال مفاقوش. المهم بنتلك نكذب فوتك مني والله شوف جيهة اخرى
_اي سؤال على كرت شحال خادم اذا قتلك نهار نكذب نقولك 10 سنين نكذب، الله أعلم. انا نقوم الكرت على حساب l'état تاعها. قادر تلقاها خادمة عام برك و ليطا تاعها كلبة. اي كرت تسقيني شحال مشا راح نقولك الله أعلم اخي
هذي هي، و اعتذر مرة على طول المنشور لانو الامر صح ولا منهك جدا جدا جدا. هذا غيث من فيض برك كاين امور اخرى مطرقتش ليها لانها متستاهلش اصلا
