Nour Homsi

16/10/2026

كيف تحصل هجمات XSS وكيف تقوم بصدها وحماية موقعك منها

15/10/2026

غوغل بكل جبروتها عم بتصارع بعالم الذكاء الاصطناعي. ومهما عم بتحاول انها تاخد السكوب. بعدها الناس مو قادرين يعطوهم الثقة الكاملة!

هاد نفس الشيء صار من زمان مع غووغل بلس بعد ما حاولت غوغل لمدة 8 سنوات من 2011-2019 انه تعمل بديل عن فيسبوك. ورغم انه ميزاته كانت تتضمن كل ما كان ينقص المستخدم من فيسبوك (في ذاك الحين). ولكن ما قدر الموقع يتجاوز عتبة الخمس ثواني كمعدّل لمدّة التصفّح.

يا ترى ليش مو قادرين نقتنع ب Gemini لحتى اليوم كوجهة رئيسية للذكاء الاصطناعية؟!

14/10/2026

بيوصلني سؤال: هل برأيك بعدها الجامعة مهمة؟ وغالباً بعد عدّة رسائل بتم طرح أمثلة عن أشخاص تركوا الجامعة ونجحوا وأهمّهم طبعاً: بيل غيتس, ستيف جوبز, مارك زوكربيرغ وغيرهن

وجوابي دائماً: هؤلاء ما تركوا "الجامعة".. وإنما تركوا "جامعة هارفرد". لأن انت مجرد وصولك لجامعة هارفرد هو بحد ذاته انجاز!!

وهؤلاء ما تركوا الجامعة بعدين بدأوا يشقّوا طريقهم. وإنما رسموا الطريق داخل الجامعة. وعندما بدأت تتوضح ملامح الطريق. اعتزلوا ما يشغلهم حتى لو كانت الدراسة!

13/10/2026

قصة حقيقية:

في صيف 2004 في دمشق، نشرت إعلان بالجريدة إني مبرمج بعمل حر، فاتصل فيني شخص بدو موقع. واتفقنا على موعد، ورحت للقاه ومعي اللابتوب وكل العتاد.

أنا: اتفضل شو طلبك؟
هو: بدي أعمل موقع إنترنت.
- طيب، شو طبيعة الموقع٫ عندك صور أو معلومات؟ متجر أو شركة؟
- لا، موقع شخصي لشغلي.
- ممتاز. شو اختصاصك؟ أو بدك تعلن عن حالك؟
- لا، إنت لاقي الاختصاص والشغل.
- كيف يعني؟
- برمجلي الموقع وحط الداتا والصور من عندك.
- طيب شو هدفك؟
- الهدف أربح مصاري شهريًا من أي موقع. الفكرة والتصميم حرّ لك، المهم تجيبلي ربح.

أنا: صمت طويل! ...
هو: عم تفكر بشي؟ إذا خطرت ببالك فكرة احكيلي، ممكن أساعدك.
أنا: صمت أطول! ...
هو: طيب، مو ضروري اليوم، بعرفكن انتوا تبع الكمبيوتر الكم مزاجكم الخاص.. بحكي معك المساء إذا خطر شي على بالك.

أنا: أوك…
وانتهت القصة.

09/10/2026

سألوا الخمسة الكبار في عالم الذكاء الاصطناعي:
- ماذا سيستفيد الناس من الذكاء الاصطناعي على النطاق الأوسع
- سنعالج الأمراض. وننهي الجوع. ونؤمن حياة أفضل لجميع الناس.... في المستقبل

- آه. في المستقبل. وماذا تطورون الآن
- لقد قمنا بتطوير مسيّرات حربية تعمل بالذكاء الاصطناعي.. وأسلحة عسكرية متفوقة.. وبرمجيات تعقب الار*ابيين....

08/10/2026

الدرس صار جاهز على يوتيوب:
https://www.youtube.com/watch?v=phAJQdgnyHw

في هذا الدرس بنيت موقع حجز مواعيد بمساعدة الذكاء الاصطناعي، ثم فحصته بعين المخترق. اكتشفت ثغرات حقيقية وأغلقتها خطوة بخطوة، على موقع منشور

00:00 ماذا سنتعلم في هذا الدرس
03:20 مدخل لفهم البرمجية
06:00 إخفاء الأخطاء البرمجية
08:00 اكتشاف ثغرات تسريب البيانات
12:00 أين يأتي دور المبرمج
12:40 حماية ملفات جذر المشروع
15:30 أهم برامج اكتشاف الثغرات
17:30 ثغرات اختراق Cross-Site Scripting (XSS)
23:30 ثغرات اختراق Cross-Site Scripting (XSS) النوع الثاني
27:00 اكتشاف ثغرات الاختبار الخاطئ
29:30 الذكاء الاصطناعي يهلوس
32:30 ثغرات التفكير المنطقي
38:00 ثغرات عميقة... جدا
40:30 ثغرات السيرفر
42:30 استخدام Hostinger MCP (CI-CD)
53:30 اصلاح الاخطاء بالذكاء الاصطناعي
55:30 ثغرات في إعدادات السيرفر

08/10/2026

هاد تماما الفرق بين صناع المحتوى السوريين والمصريين:
السيد أحمد سكماني منزعج من عدد المتابعين عندي٫ وعم يحكي عنّي ببوست منفصل باستخدام مصطلح "أحدهم" و أنه أنا عم بيع الناس الوهم بينما هو عم يقول الحقيقة الصعبة! ومتخبّي وراء الشاشة مو قادر حتى يعملي منشن حتى نتناقش بالكلام!

لما بشوف أحمد أبو زيد صاحب الملايين من المتابعين٫ عم يستضيف ضمن بودكاست صاحب قناة جديدة حتى يدعمه ويرفعه. ولما بشوف مصطفى مكرم عم يتعاون مع محمد خيال حتى يعملوا شي مفيد.. بحزن على عقلياتنا يلي بتخلينا ما نشوف بعض الّا أعداء بالمجال ونحكي على بعض من خلف الشاشات.

ولا مرة رضيت إني اتكلم على زميل بالمجال مهما اختلفت معه. سواء مجال الجرافيك أو صناعة المحتوى. بالعكس كنت دائما داعم للجميع٫ وفي أشخاص صاروا مشهورين أكتر مني كنت أنا نقطة البداية الهم والشواهد كثيرة.

07/10/2026

جاهزين للدرس القادم؟
موقع برمجناه بالذكاء الاصطناعي واكتشفت فيه ثغرات خطيرة جداً. رح علّمكم كيف كمان انتوا تكتشفوها

06/10/2026

رح قول شغلة يمكن تزعّل نص المصممين وأنا من بينهم

معرفة Photoshop وIllustrator ما عادت هي اللي بتحدد إذا إنت Graphic Designer شاطر أو لا. اليوم في أدوات أسهل، أسرع، وفي AI بيعمل شغلات كانت تاخد ساعات خلال دقائق.

المهارة الحقيقية صارت بالفكرة، الذوق، الـcomposition، وفهمك ليش التصميم لازم يطلع هيك أصلًا.

وهون لازم اطرح السؤال الأهم: هل المصمم اللي شاطر بالأفكار بس متوسط بالأدوات… أحسن من واحد محترف برامج بس أفكاره عادية؟

03/10/2026