22/01/2026
20 il qabaq...
2005–2008-ci illər mənim həyatımda xüsusi bir mərhələ idi. Bu illər sadəcə oxumaq, imtahan vermək və diplom almaq dövrü deyildi. Bu illər mənim həkim kimi formalaşdığım, Endokrinologiyanı yalnız kitabdan yox, real klinik həyatdan öyrəndiyim illər idi.
Tibb Universitetini və internaturanı bitirdikdən sonra özümü daha da inkişaf etdirmək istədim. Düşünürdüm ki, əgər bu sahəni seçmişəmsə, onu səthi yox, dərindən bilməliyəm. Elə bu düşüncə ilə yolum Sankt-Peterburqa düşdü. Diplomdan Sonrakı Tibb Təhsili Akademiyasında Endokrinologiya üzrə təhsil almağa başladım.
3 il ərzində hər gün yeni bilik, yeni klinik vəziyyət, yeni suallar… Bəzən çətin, bəzən yorucu, amma hər zaman öyrədici idi. Orada mən təkcə xəstəliyi yox, xəstəni görməyi, analizə başqa cür yanaşmağı, qərar vermə məsuliyyətini öyrəndim.
Bu gün pasiyentlə söhbət edəndə, müalicə planı quranda, ya da riskləri dəyərləndirəndə, çox vaxt fərqinə varmadan həmin illərdə qazandığım təcrübəyə söykənirəm. Çünki insanın peşəkar təməli bir yerdə, bir dövrdə formalaşır.
Köhnə şəkillərə baxanda bunu daha aydın hiss edirəm. O illər uzaqda qalıb, amma təsiri hələ də mənimlədir.
