31/07/2025
بسم الله الرحمن الرحیم
د پل علم د پوهنې ښاري آمریت د کمپیوټر زده کړو تخفیف لرونکی هوکړه لیک لاسلیک کړ
پل علم
د نشراتو او عامه اړیکو مدیریت
چهارشنبې، صفرالمظفر ۵ مه ، اسد ۸ مه
د لوګر مرکز پل علم د پوهنې ښاري آمریت خپلو بېوزله ښوونکو او زده کوونکو ته د کمپیوټرعملي زده کړو د ښه فرصت برابرولو په موخه له یوه خصوصي ښوونیز مرکز سره تخفیف لرونکی هوکړه لیک لاسلیک کړ.
دا هوکړه لیک د پل علم د پوهنې ښاري آمر انجینر حبیب نور حیدري او د راز کمپیوټر اکاډمي په نوم د یوه خصوصي ښوونیز مرکز مسوول محب الله تیمور ترمنځ لاسلیک شوی ، چې موخه یې د بېوزلو ښوونکو او زده کوونکو د استعدادونو پیاوړتیا او دوی ته د کمپیوټر زده کړو زمینې برابرول دي.
د دغه هوکړه لیک په لاسلیک کېدو سره د پل علم ښوونځیو شاوخوا ۴۰۰ ښوونکو او نږدې ۶۰۰ زده کوونکو ته په یاد ښوونیز مرکز کې د میاشتني فیس( پنځه څلوېښت فصیده تخفیف) په لرلو سره د درېیو کلونو لپاره د کمپیوټر زده کړو زمینه برابره شوه.
هغه بېوزله ښوونکي او زده کوونکي، چې په یاد خصوصي ښوونیز مرکز کې د کمپیوټرعملي زده کړو لېوالتیا ولري نو د پل علم د پوهنې ښاري آمریت ته د نوم لیکنې لپاره مراجعه وکړي او د معرفي کېدو مکتوب له اخیستلو وروسته خپل درسونه پیل کړي.
د پل علم د ښوونځیو بېوزله ښوونکي او زده کوونکي د یاد اقدام ستاینه کوي او زیاتوي، موږ ډېر خوشحاله یو، چې د لومړي ځل لپاره مونږ ته د ځانګړي تخفیف په لرلو سره د کمپیوټرعملي زده کړو زمینه برابره شوه او دا کار د ستایلو وړ دی.
