21/04/2026
🕯️ Chris van der Wal – ’n Lewe onthou, en steeds op soek na antwoorde 🕯️
Chris van der Wal is gebore op 10 Mei 1994 en was 31 jaar oud toe sy lewe tragies geëindig het op 28 September 2025 in Potchefstroom.
Hy was ’n geliefde seun, broer en vriend , iemand wat bekend was vir sy sagte hart, sy liefde vir musiek en sy passie vir kitaar speel. Chris het ook deelgeneem aan ’n band en was iemand wat altyd probeer het om goeie energie en musiek met die mense rondom hom te deel. Hy het vir jare by Gasworld gewerk en diep vriendskappe daar opgebou.
Volgens die inligting wat deur sy familie gedeel is, het Chris die aand van 27 September 2025 saam met sy vriend Tony gegaan om die Springbokke teen Argentinië by Impala te kyk.
Daarna het hulle na Gentlemen’s Paradise Pub gegaan om pool te speel en ’n paar biere te drink.
Tydens die aand het daar ’n argument ontstaan tussen Tony en ’n vroulike kliënt, wat later verbind is aan ’n familie-verwante konflik.
Volgens getuies het die situasie so erg geraak dat die bouncer Tony gewaarsku het dat hy homself moet gedra of gevra sou word om te loop.
Kort daarna het Chris en Tony die plek verlaat. In die parkeerarea het die situasie egter weer eskaleer, waar daar verdere konflik was. Volgens die familie is Chris in die proses per ongeluk in die gesig getref , ’n hou wat nie vir hom bedoel was nie.
Daarna het Chris en Tony in die voertuig geklim en weg gery.
Op pad huis toe het daar weer ’n argument ontstaan.
Chris het die voertuig langs die pad gestop. CCTV-beelde wat volgens die familie beskikbaar is, wys hoe Chris en Tony fisies betrokke geraak het in ’n stryery.
Daarna het Chris uit die voertuig geloop en Tony het weggery.
Volgens verdere CCTV-inligting is Chris later langs die pad gesien waar hy hardloop terwyl hy sy nek vashou, waarna hy ineengestort het.
Hy is kort daarna langs die pad gevind waar hy reeds oorlede was. Dit is bevestig dat hy aan ’n steekwond in sy nek gesterf het, en ’n moordsaak is geopen.
Sy swaer is in die vroeë oggendure gekontak om na die toneel te gaan en moes daarna die hartverskeurende nuus aan sy familie oordra.
Toe dit tyd geword het om Chris te identifiseer, beskryf die familie dat hulle met min empatie en koue hantering te doen gehad het.
Hulle is na die lykshuis geneem waar daar gewag moes word vir ure voordat hulle hom kon sien. Sy ma het tot op die laaste oomblik gehoop dit is ’n fout ,dat dit nie haar seun is nie maar daardie hoop is gebreek toe sy hom uiteindelik geïdentifiseer het.
Volgens die familie is almal wat betrokke was daardie aand deur die polisie ondervra, maar niemand is as ’n verdagte verklaar nie.
Ten spyte van die ondersoek, bly daar steeds baie onbeantwoorde vrae oor wat presies gebeur het in die tyd tussen Chris se vertrek uit die voertuig en toe hy gevind is.
💔 Vandag, maande later, sit daar steeds ’n ma en ’n familie met hartseer en sonder duidelike antwoorde.
Ons vra asseblief: As jy enige inligting het, of iets gesien of gehoor het wat kan help om lig op hierdie saak te werp, kontak asseblief die polisie of kom privaat in verbinding.
Elke stukkie inligting kan dalk help om antwoorde en vrede te bring.
🕯️ Rus sag Chris van der Wal. Jy word gemis en nooit vergeet nie.
