Smart Move Media

14/03/2019

انتشر هاشتاق منذ بضع ساعات بين مستخدمي الفيسبوك بعد ظهور عطل فني منع بعض مستخدمي الموقع حول العالم من الإتصال به.
ويبدو أن بعض المواقع التابعة لشركة فيسبوك كماسنجر، انستقرام وواتساب تعاني أيضا من نفس العطل، حيث أفاد العديد من المستخدمين أنهم غير قادرين على الاتصال بتلك المواقع، أو انهم غير قادرين على إستعمال عدد من الخصائص داخل هذه المواقع كتحميل الصور أو كتابة التعليقات.

أعلن موقع فيسبوك على حسابه على تويتر بأنه على علم بالمشكلة وأنه يعمل على حلها.

نود أن ننوه أن مايشاع عن قيام فيسبوك بحظر المستخدمين غير صحيح بالمرة، كما أنه لايمكنك القيام بأي شي (كوضع الملصقات أو التعليقات) لتفادي هذا العطل، فقط علينا الانتظار حتى يتم معالجة هذا العطل من قبل الموقع نفسه.

01/12/2018

مساء الخير،
في كلام غير حقيقي منتشر في الفيسبوك في الفترة الأخيرة عن إمكانية حظر أو إغلاق حسابات بعض الأشخاص من قبل إدارة الفيسبوك؛
التعليق بملصقات او غيرها في اي نوع من البوستات ما ممكن يحمي حسابك من التهكير أو الإغلاق. بالعكس التعليق بكثافة وبصورة متكررة ممكن يتحسب عليك كنوع من أنواع إساءة استخدام أدوات الفيسبوك وممكن في الحالة دي يتم حظرك من التعليق لفترة معينة. واذا تم حظرك من التعليقات دا بيكون حظر مؤقت من قبل الفيسبوك ومافي ايي حاجة ممكن تعملها عشان تلغي الحظر دا لأنه عنده فترة زمنية معينة وبتلغي من نفسه. يعني كل العليك انك تعمله هو الانتظار، غير كدة مافي حاجة حتجيب نتيجة.
فيسبوك عنده ضوابط معينة على أساسها ممكن يغلق حسابك أو يحظرك "مثل إساءة استخدام الفيسبوك" ممكن تتعرف اكتر على الضوابط دي من خلال الرابط دا.
https://m.facebook.com/help/116393198446749?helpref=hc_fnav&refid=69

حاجة تانية انتشرت قبل فترة هي فكرة أن كل مازاد عدد متابعينك كل ماكان حسابك قوي وصعب اختراقه، دي كمان معلومة خاطئة ويمكن بالعكس كمان لو زاد عدد متابعينك دا يعرضك للتهكير بدل ما يحميك.
حماية حسابك بتم بطرق معروفة زي مثلاً انشاء كلمة سر قوية وعدم مشاركتها مع أي شخص.
https://m.facebook.com/help/116393198446749?helpref=hc_fnav&refid=69

نتمى احنا فريق سمارت موف ميديا أن نكون ساعدنا في توضيح اللبس وساهمنا في الحد من النوع دا من الشائعات.

27/11/2018

مقال جديد على موقع بزنس السودان

موقع بزنس السودان منصة رقمية مستقلة لأخبار المال والأعمال في السودان

27/11/2018

ما هو تنظيم المحتوى " Content curation "
هو عملية البحث في الانترنت عن المحتوى الأفضل والاكثر ملائمة لمتابعينك وإعادة نشره على قنوات التواصل الخاصة بك، وهو بيختلف عن المحتوى التسويقي، لانه ما بيتضمن إنتاج او خلق محتوى جديد، لكن مجرد إعادة نشر لمحتوى متوفر أصلا وإعادة عرضه بطريقة ذات معنى بالنسبة للمتابعين. الهدف من تنظيم المحتوى هو بناء علاقة مع المتابعين الحاليين وجذب متابعين جدد وبناء مجتمعك الخاص على الانترنت. بالاضافة لذلك؛ نشر مدونات او تقارير عن مواضيع عندها علاقة بأهداف عملك الاساسية يساهم بدرجة كبيرة في إظهاراك كجهة موثوقة ومطلعة في مجال عملك او مجال اهتمامتك ممايزيد نسبة التفاعل على قنوات التواصل الخاصة بك.

#السودان

31/10/2018

إتكلمنا المرة الفاتت عن عائد الإستثمار ROI وفوائد حسابه. اليوم حنواصل كلامنا عنه وحنحاول نشرح بعض الخطوات لحساب عائد الإستثمار الرقمي الممكن تساعدك في قياس مدى فعالية جهودك على الشبكات الاجتماعية:

1. تحديد أهدافك:
من الضروري إنشاء أهداف ذكية SMART تتوافق مع أهداف نشاطك التجاري. قسّم الحاجات الأنت حابب تحققها من خلال الشبكات الاجتماعية إستنادًا على هدف نشاطك التجاري. مثلا؛ هل هدفك هو زيادة مبيعات منتجاتك؟ أو هدفك زيادة عدد المتابعين؟ أو زيادة عدد الناس العندهم علم بمنتجك الجديد؟

2. اختار مقاييسك الخاصة لحساب معدل التحويل:
الخطوة الثانية هي اختيار أفضل مقاييس لحساب معدل التحويل الخاص بك Conversion Rate "معدل التحويل هو نسبة زوار موقعك أو صفحتك الانتقلوا من مجرد متصفحين الى انهم يبقوا زبائن أو عملاء".
باستخدام المقاييس الصحيحة تقدر تبدأ في الإجابة عن بعض الأسئلة المهمة حول نتائج نشاطاتك التسويقية وحتى مقارنة فترتين من الزمن لمعرفة الإستراتيجيات الأكثر فعالية لجذب العملاء وبالتالي تحقيق الأرباح.
عند تحليل المقاييس لتتبع أهداف التحويل، من المهم فهم وإدراج المقاييس من جميع القنوات الرقمية المختلفة ولازم تفهم كيف قنواتك الرقمية بتتفاعل مع بعض، لأن قياس معدلات التحويل يتداخل غالباً من قناة إلى أخرى. وكل هدف تقريباً قابل للقياس إذا كنت تتبنى النهج الصحيح.

3. حول أهدافك لقيم نقدية:
عشان تقدر تصل للناتج او Return المذكور في معادلة عائد الاستثمار، لازم تحدد القيم النقدية لمعدل التحويل. الحاجة دي ممكن شكلها يكون معقد خاصة وان بعض معدلات التحويل ممكن يكون حسابها أسهل من غيرها، مثلاً؛ حساب سعر الاشتراك أو العضوية في موقع معين أو حتى حساب سعر منتج بيتباع أونلاين أسهل من حساب معدل التحويل لمشاركات بوست على الفيسبوك. لكن في الاخر من المهم معرفة قيم تحويلاتك لأنها الطريقة الوحيدة البتساعك تحسب عائد الاستثمار لحملات معينة.
في طرق عديدة لحساب القيم النقدية أنت ممكن تختار منها:

- قيمة عمر العميل أو القيمة الدائمة للعميل Customer Lifetime Value: صافي الربح الذي تحققه من أي عميل.
- القيمة الدائمة للعميل مضروبة في معدل التحويل: قيمة كل زيارة لموقعك استنادًا على نسبة معدل التحويل.
- متوسط المبيعات.
- القيمة الموازية أو البديلة لإعلانات الدفع مقابل النقرات: الكلام دا ببساطة بقول ليك انك تحسب كنت حتدفع كم لو كنت بتستخدم إعلانات الدفع حسب النقرات Pay Per Click Ads" إعلانات الـ PPC هي نوع من أنواع الدعاية على شبكة الإنترنت بيضع المعلن من خلالها إعلانته أونلاين، لكن مابيدفع مقابل الاعلان الا بعد ما المتصفحين يضغطوا على الإعلان- بيدفع مقابل كل ضغطة Click"

4. حدد وتابع التكاليف:
بعد حساب العوائد ومعدلات التحويل حتحتاج تحدد التكاليف بتاعتك . اتذكر أنك تحسب الوقت والطاقة المستهلكة بالإضافة إلى النفقات النقدية الصعبة. إذا كنت تدير إعلانًا على فيسبوك مثلا، فتحتاج انك تحسب تكلفة تطويرالمحتوى و أو ساعات تصميم الإعلان بالإضافة إلى ما تفرضه فيسبوك عليك.

أدوات لقياس عائد الاستثمار:
في برامج وادوات عديدة أونلاين ممكن تساعدك تحسب عائد الإستثمار حنذكر، منها اثنين يعتبروا من أكبرها و أكثرها إنتشارا؛

- Google Analytics:
من الأدوات المجانية البتساعدك تضع أهداف ذكية ممكن متابعتها مراقبة معدلات التحويل الخاصة بيك
وحركة الزوار لجميع قنواتك الرقمية.

- Facebook Ads with Facebook Pixel:
أضف Facebook Pixel إلى الصفحات الرئيسية لموقعك على السوشيال ميديا عشان تعرف عدد الأشخاص الاتفاعلوا مع إعلاناتك على فيسبوك والإعلانات الجذبت العملاء واثرت على قرارات الشراء.

حاجة اخيرة؛ احنا في اسمارت موف ميديا بننصحك انك تبدأ في حساب عائد الإستثمار بخطوات صغيرة، حدد أهداف بسيطة وابني خبراتك من هنا. اعمل لنفسك جدول زمني قابل للتحقيق. ما تخاف من الفشل وكون صبور وخليك عارف انك عشان تكون خبير في حساب الROI الموضوع محتاج عدد كبير من التجارب الناجحة والفاشلة مع بعض.

www.smartmovesd.com
نتمنى ان الجزء الثاني من موضوعنا يكون عجبكم وانتظرونا في مواضيع قادمة.



Zienab Elrayah

22/10/2018

موضوعنا اليوم عن عائد الإستثمار Return Of Investment وهو عبارة عن مقياس بيساعدك تعرف الفائدة البترجع ليك من استثمار معين سواء كانت الفائدة نقدية أو غيرها "بعض الشركات بتحسب عائد الاستثمار كقيمة غير مالية مثلاً التعليقات على بوستات في فيسبوك أو عدد المتابعين على تويتر".

حساب عائد الإستثمار (ROI) لنشاطك التسويقي عملية مهمة لأنه ببساطة بيوضح ليك إذا كنت مستفيد من جميع الأنشطة والحملات القمت بيها ولا لا، وبوضح ليك الأجزاء الفعالة في إستراتيجيات التسويق الخاصة بيك، وبيساعدك كمان في تحديد ميزانيتك وتصنيفها بفعالية أكبر.
من الفوائد المهمة لحساب ال ROI انه بيديك فرصة إنك تكتشف التوجهات الجديدة لعالم التواصل الإجتماعي Social Media Trends وبتيح ليك فرصة أنك تشارك فيها.

كيف ممكن نحسب عائد الإستثمار ROI ؟
في الأول بنفتكر انه من المستحيل قياس عائد الاستثمار الخاص بالحملات التسويقية الرقمية مقارنة بالحملات التقليدية، وفي شركات ممكن نقول عليها "قديمة في السوق" ومتعودة على نشاطات التسويق التقليدية زي إعلانات الراديو أوالتلفزيون بيكون صعب عليها إستبدال التسويق التقليدي المعروف بالنسبة ليها ما لم يشوفوا دليل على مدى جدوى وربح التسويق الرقمي.
والأهداف التسويقية الواضحة هي العامل الرئيسي البساعدك انك تحسب الROI ، ودا لأنه الأهداف الواضحة بتخليك تخطط نشاطاتك التسويقية Marketing Activities بطريقة فعالة اكثر، وبالتالي تسهل عليك عملية تتبع العائد من مجهوداتك التسويقية.

حساب عائد الاستثمار يتم عن طريق استخدام مقياسين أساسيين: - التكلفة/Investment: حجم الإستثمار أو الصرف على حملات التسويق.
- النتائج/Return: العائد الاتحصلت عليه مقابل جهودك التسويقية.

قانون حساب ال ROI هو كالتالي:
(الناتج أوالعائد-التكلفة)/ التكلفة
(Return-Investment/Investment)

من المهم جداً ان ننبه لنقطة مهمة فيما يتعلق بحساب عائد الإستثمار في مواقع التواصل الاجتماعي؛ وهي أنه مافي قاسم مشترك لقياس عائد الاستثمار، ودا البخلي ناس كتير تحسبه بشكل عشوائي، أو انها في كتيرمن الأحيان ماتقدر تتبع النتائج الخاصة بحملاتها التسوقية.
بالتالي، من الصعب أنك تقول ان عائد الإستثمار الحصلت عليه يعتبر جيد أو سئ، لأنه مافي مقياس عالمي بيحدد ليك الحاجة دي. لكن عشان تفهم مدى جودة عائد الاستثمار في وسائل التواصل الاجتماعي، انت بتحتاج انك تقارن عوائدك بالسوق الانت فيه؛ يعني راقب مجهودات وحملات منافسينك عشان تعرف حجم إستثماراتهم والعوائد البيحصلوا عليها وبكدة انت بتقدر تحدد إذا كان الROI بتاعك مناسب ولا انت بتحتاج انك تستثمر بي طرق وإستراتيجيات فعالة أكثر.
عالم الشبكات الاجتماعية بيتطور بإستمرار؛ في تغييرات في الخوارزميات والحملات الموسمية والمنافسين الجدد في السوق ودي كلها حاجات ممكن تؤثر في الأرباح، عشان كدة ومن خلال مراقبة تقلبات الأرباح في السوق، ممكن تحدد إذا كانت التغييرات البتحصل في الROI الخاص بيك تندرج ضمن تغيرات السوق العادية أو إذا كنت الشخص الوحيد المتأثر او لا، وهل يترتب على التغير دا انك تعدل في الإستراتيجية حقتك.

نتمنى في اسمارت موف ميديا ان نكون اديناكم فكرة عن عائد الإستثمار وفوائد حسابه. انتظرونا في الجزء التاني حنحاول نشرح خطوات حسب عائد على وسائل التواصل الإجتماعي.





Zienab Elrayah

20/10/2018

مقال جديد من سلسلة أفضل التطبيقات المفيدة لأصحاب المشاريع الناشئة ورواد الأعمال، نستعرض في هذه السلسلة التطبيقات التي تساعدك في تنظيم وقتك وأعمالك ومهامك

موقع بزنس السودان منصة رقمية مستقلة لأخبار المال والأعمال في السودان

12/09/2018

من حملات التسويق الرقمية المبتكرة مؤخراً لإحدى الشركات السودانية و التي نود الاشارة اليها هي حملة ( Makani مكاني ) بالتعاون مع صفحة شارع الحوادث على موقع الفيس بوك وتكمن فكرة الحملة في الدعوة لتحميل تطبيق مكاني من متجر التطبيقات أون لاين للمتابعين و اصدقاء صفحة شارع الحوادث و ستلتزم مكاني مقابل كل عملية تحميل للتطبيق بالتبرع بقيمة 1 جنيه وذلك للمساهمة في الصيانة الدورية لغرفة العناية المكثفة في مستشفي محمد الأمين حامد للأطفال.

يعد تطبيق مكاني دليل تجاري للبحث عن بيانات المؤسسات و الشركات السودانية بما في ذلك المحال التجارية و الخدمية. و تندرج مثل هذه الحملة ضمن مبادرات للشركات CSR وهم أمر تستحق فريق مكاني عليه الاشادة و التقدير.

#تسويق #السودان

11/09/2018

هل انتبهت في الفترة الاخيرة لزيادة الرسائل أو Pop-up Messages البتظهر وأنت بتتصفح بتطلب منك الإذن لإستعمال ملفات تعريف الإرتباط "Cookies"؟ وليه فجأة الحاجة دي زادت عن زمان؟
الليلة حنتكلم عن ملفات تعريف الإرتباط والسبب في اهتمام المواقع المفاجئ بيها.

ملفات تعريف الإرتباط أو بنقول عليها برضو سجل التتبع أو سجل المتصفح هي عبارة عن رسالة صغيرة أو ملف صغير بيُرسل لجهاز الكمبيوتر الخاص بيك عشان يقدر من خلاله الموقع الانت بتتصفحه أنه يخزن معلومات تساعده يصمم صفحة خاصة بيك وعشان ما يعمل صفحة جديدة ويبدأ يجمع معلوماتك كل ما دخلت الموقع نفسه. زي مثلاً الاغاني المفضلة عندك أو الحاجات الحفظتها في عربة التسوق على موقع معين.
ملفات التعريف مستعملة من زمان على كل المواقع وفي الغالب كانت سياسات إستخدام ملفات التعريف بتكون موجودة مع سياسات الخصوصية وشروط الاستخدام، لكن عشان اغلبنا مابنقرأها ناس كتيرة ما إنتبهت ليها قبل كدة.

طيب ليه كل المواقع قررت فجأة انها تضع السياسات دي في شكل pop-up messages أو في أعلى الصفحة أو حتى ترسلها عن طريق الإيميل؟
في عام 2016 اجاز الإتحاد الأوربي قانون لحماية البيانات الشخصية لمستخدمي الإنترنت اسمه General Data Protection Regulation ويعرف إختصاراً ب GDPR، ويعتبر ملزم لكل المواقع الأوربية أو المواقع البتقدم خدماتها للأوربيين. القانون بيفرض على كل المواقع البتجمع معلومات عن مستخدميها انها تخطرهم بالحاجة دي، وتاخد موافقتهم وتشرح للمستخدمين فائدة الاحتفاظ بمعلوماتهم. وحسب خطة الإتحاد الأوربي كان الموعد النهائي لتنفيذ القانون مايو 2018. ودا بيفسر سبب زيادة الرسائل بخصوص ملفات الإرتباط في الفترة الأخيرة.
بالإضافة لي كدة، النقاشات الكثيرة عن خصوصية بيانات مستخدمي الإنترنت خاصة بعد فضيحة فيسبوك وكامبردج أنالتيكا الاخيرة، خلت كثير من المواقع والشركات حريصة أنها تشرح للمستخدمين كيف بتجمع وبتستخدم البيانات الخاصة بيهم.

طيب هل بيانات تعريف الإرتباط بتمثل خطر على الخصوصية؟
ملفات تعريف الإرتباط في حد ذاتها ما بتشكل تهديد على الخصوصية لأنه ماممكن إستخدامها إلا لتخزين المعلومات الانت اخترت انك تديها للموقع. لكن احتمال بيع معلوماتك لطرف ثالث ممكن يستفيد منها مازال قائم.
عموماً نقول ان خصوصية وسرية البيانات الإلكترونية ماحاجة مضمونة ابداً. عشان كدة احنا في سمارت موف ميديا بننصح اي شخص انه يراجع من البداية اذا كان هو اصلاً محتاج انه يوفر بياناته للمواقع دي ولا لا.
لو حابيين تتطلعوا على قوانين الإتحاد الأوربي المتعلقة بي حماية البيانات ممكن تتطلعوا على الرابط دا:
https://ec.europa.eu/commission/priorities/justice-and-fundamental-rights/data-protection/2018-reform-eu-data-protection-rules_en.
إن شاء الله موضوعنا المرة دي عجبكم، ولو حابيين اننا نناقش
مواضيع معينة أو إذا عندكم اي إستفسار ممكن تراسلونا على بريد الصفحة أو الكومنتات.

03/09/2018

بناء محتوى رقمي قوي بقى هدف أساسي للشركات في كل العالم؛ أهمية المحتوى القوي أو الجيد بتجي من رغبة الشركات انها تكون معروفة والناس تتفاعل معاها وتتابعها، وبكدة تقدر تحقق أهدافها التجارية المختلفة زي مثلاً انها تجمع أفكار ومعلومات أكثر عن عملائها عشان تصمم منتجات تناسبهم وبالتالي تحقق إيرادات أعلى، وتخفض تكاليف الانتاج وتزيد الوعي بمنتجاتها وخدماتها.

ما هو المحتوى التسويقي؟
في تعاريف كثيرة للمحتوى التسويقي، لكن واحد من اكثر التعاريف دقة للمصطلح دا هو تعريف Godot Media "المحتوى التسويقي او ال Content Marketing هو نوع من التسويق يتضمن إنشاء ومشاركة المواد عبر الإنترنت (مثل مقاطع الفيديو والمدونات ومشاركات وسائل التواصل الاجتماعي) التي لا تروج بشكل صريح للعلامة التجارية ولكنها تهدف إلى تحفيز الاهتمام بمنتجات أو خدمات الشركة."

ليه المحتوى التسويقي ؟
المحتوى الجيد بيساعد على بناء علاقة بين الشركة والافراد، وبيفتح باب حوار بين الطرفين تقدر الشركة من خلاله انها تفهم الأفراد المستهدفين بمنتجاتها وخدماتها وتجمع معلومات حقيقة ولحظية عن المنتجات المفضلة لمتابعينها. الحاجة دي بتساعدها إنها تطور منتجاتها بالشكل المناسب للسوق وحسب رغبات العملاء "الإستهداف الدقيق للعملاء" وفي النهاية تحقيق الربح المطلوب.

في ظل المنافسة الشديدة الحاصلة بين الشركات على مواقع التواصل الإجتماعي، بتكون عملية إنشاء محتوى رقمي تسويقي ممكن يجذب انتباه الناس حاجة ماساهلة ابداً، وكثير من الشركات حالياً بتستعين بناس مختصين في المجال عشان تجذب العملاء وتحافظ عليهم.

كيف تصمم المحتوى التسويقي؟
قبل ماتبدأ في صناعة المحتوى الخاص بك، لازم تتأكد ان كل حاجة تانية جاهزة ومكتملة: بداية بتحديد جمهورك المستهدف، وبناء خطة وإستراتجية التسويق الرقمي"الأهداف والغايات" وتحديد المواقع المفضلة لجمهورك والبتقدر من خلالها تقيس مدى نجاح إستراتجيتك.
بعد ما تتأكد ان كل الحاجات دي جاهزة ممكن تبدأ في إنشاء المحتوى، وهنا حنتكلم عن شوية حاجات ممكن تكون مفيدة وأنت بتصمم المحتوى:

1. راقب منافسينك: متابعة نشاطات الشركات المنافسة على مواقع التواصل بتساعدك أنك تحدد الحاجات البتميزك من غيرك أو مايعرف بال competitive advantage حقتك. ودا بيخليك تكْون شخصيتك الفريدة على الإنترنت.

2. أختر لهجتك الخاصة: اختار طريقة معينة للكلام مع المتابعين في كل موقع؛ لأنه ببساطة كل موقع من مواقع التواصل الاجتماعي في حاجة واحدة على الاقل بتميزه عن غيره. فأنت لازم تبني شخصيتك في كل موقع منهم بناءاً على الاختلاف البينهم. لكن دا مابيعني ان محتوى كل موقع لازم يكون مختلف، بالعكس انت ممكن تنشر نفس المحتوى لكن بطرق مختلفة.

3. شارك في المواضيع الرائجة: خليك دايماً مواكب واعرف المواضيع البيتكلم عنها المتابعين او الأحداث الشاغلاهم. تابع الهاشتاقات والمواضيع الشائعة في كل فترة وأعرف الموضوع أو الهاشتاق الممكن تشارك فيه بطريقة تساعد نشاطاتك، عن طريق إدخال او إستعمال كلمات أساسية او رئيسية رائجة حالياً في المحتوى البتقدمه.

4. أحكي قصص: عشان تضمن تفاعل الناس معاك أنت محتاج تتكلم معاهم وتديهم مواضيع ممكن يتفاعلوا معها. لكن طبعاً تتكلم عن قصص عندها علاقة بي نشاطك. مثلاً؛ إذا فترضنا انك عندك محل هواتف، مامفروض تنشر محتوى عن شوارع المدينة القديمة، لكن نشر قصة عن أول هاتف محمول اتعمل وسؤال متابعينك عن قصصهم مع أول مرة شافوا هاتف محمول حيكون اثره أكبر وحيخلق نسبة تفاعل أكبر.

5. أعمل جدول لمواعيد نشر المحتوى: حتتكلم عن شنو؟ متين؟ ووين؟ دي ثلاثة أسئلة مهمة لازم تخليها في بالك وانت بتبني المحتوى بتاعك عشان تضمن أن رسالتك وصلت للمتابعين بأحسن طريقة ممكنة. يعني مثلا ماممكن تنشر محتوى عن أهمية وجبة الفطور لطلاب المدارس في اخر أيام العام الدراسي.
في ادوات ومواقع كتيرة ممكن تساعدك على جدولة المحتوى في مختلف المواقع على سبيل المثال وليس الحصر موقع sproutsocial.com

نقطة اخيرة: اتذكر دايماً انك تراجع شغلك من فترة للثانية، قيم وضعك الحالي مقارنة بخططك الموضوعة، وعدل شغلك بناءاً على ذلك.

نتمنى أن موضوعنا المرة دي كان مفيد وإن شاء الله كل الناس العايزة تبدأ نشاطها على السوشيال ميديا خاصة أصحاب الأعمال والمشاريع الناشئة يكونوا استفادوا من المقال.