19/06/2026
تھانہ بھکھی: ایس ایچ او رانا سرور کی آمد، جرائم پیشہ عناصر میں کھلبلی، منشیات فروشوں کو علاقہ چھوڑنے یا دھندہ بند کرنے کا حتمی الٹی میٹم
شیخوپورہ: تھانہ بھکھی میں ایس ایچ او رانا سرور کی تعیناتی کے ساتھ ہی علاقہ بھر کے جرائم پیشہ عناصر میں شدید خوف و ہراس پھیل گیا ہے۔ منشیات فروشوں، چوروں اور ڈاکوؤں نے اپنی سرگرمیاں محدود کر دی ہیں یا علاقے سے ان کی دوڑیں لگنا شروع ہو گئی ہیں۔
ایس ایچ او رانا سرور نے چارج سنبھالتے ہی اپنے فرائض کا آغاز سخت حکمت عملی کے ساتھ کیا ہے۔ انہوں نے جرائم پیشہ عناصر کو واضح الفاظ میں چیلنج کیا ہے کہ وہ یا تو فوری طور پر علاقہ چھوڑ دیں یا پھر منشیات فروشی اور دیگر غیر قانونی دھندے ہمیشہ کے لیے بند کر دیں۔ انہوں نے دو ٹوک موقف اختیار کیا ہے کہ امن و امان کی بحالی اور شہریوں کے جان و مال کا تحفظ ان کی اولین ترجیح ہے جس پر کوئی سمجھوتہ نہیں کیا جائے گا۔
واضح رہے کہ رانا سرور کا شمار محکمہ پولیس کے منجھے ہوئے اور فرض شناس افسروں میں ہوتا ہے۔ ان کا ٹریک ریکارڈ گواہ ہے کہ وہ جس تھانے میں بھی تعینات ہوتے ہیں، وہاں منشیات کے خاتمے اور جرائم کی بیخ کنی کو اپنا پہلا ٹارگٹ بناتے ہیں۔ عوامی حلقوں نے رانا سرور کی بطور ایس ایچ او تھانہ بھکھی تعیناتی پر اطمینان کا اظہار کیا ہے اور امید ظاہر کی ہے کہ ان کی آمد سے علاقے میں جرائم کی شرح میں نمایاں کمی آئے گی اور شہریوں کو ایک پرامن ماحول میسر ہوگا۔
ایس ایچ او رانا سرور نے عزم ظاہر کیا ہے کہ قانون کی بالادستی کو ہر صورت یقینی بنایا جائے گا اور معاشرے کے ناسور بننے والے عناصر کو قانون کے کٹہرے میں لایا جائے گا۔
