21/05/2026
فقیروالی: مدینہ کالونی کا ٹرانسفارمر ایک سال سے غائب، اہل علاقہ اندھیرے میں ڈوب گئے
فقیروالی (احسن علی بیورو چیف نیو سما نیوز فقیروالی)
مدینہ کالونی، نزد مدینہ مسجد کے رہائشی واپڈا حکام کی مبینہ غفلت اور لاپرواہی کے باعث گزشتہ ایک سال سے شدید مشکلات کا شکار ہیں۔
تفصیلات کے مطابق، گزشتہ سال واپڈا ملازمین نے مدینہ کالونی سے بجلی کا ٹرانسفارمر خراب ہونے پر مرمت کے بہانے اتارا تھا۔ اہل علاقہ کا کہنا ہے کہ ایک سال کا طویل عرصہ گزر جانے کے باوجود واپڈا کا عملہ نہ تو ٹرانسفارمر ٹھیک کر سکا اور نہ ہی متبادل ٹرانسفارمر فراہم کیا گیا۔
مکینوں نے شدید احتجاج کرتے ہوئے بتایا کہ شدید گرمی اور حبس کے موسم میں بجلی کی عدم دستیابی نے ان کا جینا محال کر دیا ہے، جبکہ بچے اور بزرگ سب سے زیادہ متاثر ہو رہے ہیں۔ متعدد بار واپڈا کے مقامی دفاتر کے چکر کاٹنے کے باوجود صرف دلاسے دیے جا رہے ہیں۔
اہلِ علاقہ نے چیف ایگزیکٹو آفیسر (CEO) واپڈا اور ایس ڈی او (SDO) فقیروالی سے پرزور مطالبہ کیا ہے کہ اس سنگین مسئلے کا فوری نوٹس لیا جائے اور مدینہ کالونی میں جلد از جلد ٹرانسفارمر نصب کر کے عوام کو اس عذاب سے نجات دلائی جائے، بصورت دیگر وہ سخت احتجاج پر مجبور ہوں گے۔
