17/11/2021
'Shugaban cushe-cushe', Shekarau ya yi wa Ganduje gugar-zana
Tsohon Gwamnan Kano, Malam Ibrahim Shekarau, ya yi wa gwamnan Kano mai ci, Abdullahi Ganduje gugar zana a wani taron siyasa da ya gudanar a gidansa na Kano a yau Talata.
Yayin da zai fara jawabi a gurin taron, Shekarau ya yi gugar zana ga Ganduje da cewa "shugaban cushe-cushe".
Idan an tuna, jaridar DAILY NIGERIAN ta wallafa fefen bidiyon Ganduje yana cusa dalolin Amurka a aljihu, wanda ake zargin cin hanci ne yake karba daga hannun wani dan kwangila.
Tun daga nan hakan ya zama abin shaguɓe da gugar zana ga gwamnan.
A yayin da zai fara jawabi a gurin taron ,Shekaru ya fara da cewa "Alhajiji [Na-goda] ya ce shi ne shugaban karɓe-karɓe. To amma ina jiran sa ya fada wa ‘yan Kano waye shugaban cushe-cushe?"
Shekarau ya na faɗar haka, sai magoya bayansa su ka ruɗe da ihu da shewa.
Daga nan ne Sanatan ya ci gaba da ƙorafi a kan abubuwan da su ke faruwa a jam'iyar da har su ka sanya ya ware na shi ɓangaren, in da ya ce ya yi hakan ne domin ya ƙwatar wa ƴan jam'iya da al'ummar Kano ƴancin su.
Bugu-da-ƙari, Shekarau ya ce tun da Ganduje ya yi gaiyar ƴan jam'iya, har da Shugaban ta na ƙasa, Adams Oshiomole, s**a yi masa magiya ya shiga APC, sannan a ka ci zaɓe, gwamnan bai sake yin wani abu da shi na jam'iya ba.
Ya ƙara da cewa ko zaɓen shugabannin jam'iya na mazaɓa, ƙanan hukumomi da na jiha, gwamnan ne yai don ransa ba tare da an tafi da mutanensa ba.
Ya nanata cewa shi fa ba zai bar APC ba har sai ya ceci al'ummar Kano da ga mulkin k**a karya da a ke yi a jam'iyar, inda ya ce "jam'iyar ta zama ta gwamna, matar gwamna da shugaban ta."
Source: Daily Nigerian
