05/06/2022
RAM အကြောင်း သင်ဘာတွေသိထားလဲ 🤔
2022 မှာ ဖုန်းတစ်လုံးဝယ်ဖို့စဉ်းစားတဲ့အခါ RAM အနည်းအများကိုကြည့်ပြီး ရွေးချယ်ဝယ်ယူလာကြပါတယ်။ အချို့က RAM များများပါမှ ဖုန်းပိုသွက်မယ်၊ ဂိမ်းဆော့လို့ပိုကောင်းမယ်လို့ထင်ကြပေမယ့် အချို့က ဒီလိုမဟုတ်ဘူးလို့ပြောကြပြန်ပါတယ်။ ဒီတော့ ဖုန်းတစ်လုံးရဲ့မပါမဖြစ် RAM အကြောင်းကို Knowledge Sharing ကဏ္ဍကနေ ပြောပြပေးချင်ပါတယ်။
>> RAM ဆိုတာဘာလဲ?
RAM ဆိုတာ “Random Access Memory” ကိုအတိုကောက်ခေါ်ဆိုတာဖြစ်ပြီး အလွန်တရာမြန်တဲ့ မှတ်ဉာဏ်တစ်ခုလို့ အကြမ်းဖျင်းမှတ်ယူလို့ရပါတယ်။ ဖုန်းတွေမှာပါဝင်တဲ့ Data တွေသိမ်းဆည်းတဲ့၊ Internal Storage လို့လဲ ခေါ်ကြတဲ့ ROM (Read Only Memory) ထက် အဆပေါင်းများစွာ ပိုမြန်ပါတယ်။
>> ဖုန်းတစ်လုံးမှာ RAM ဘယ်လိုအလုပ်လုပ်လည်း?
ကိုယ့်ရဲ့ဖုန်းကို စဖွင့်လိုက်ပြီး Applications တွေစသုံးတာနဲ့ အဲ့ဒီ Apps တွေနဲ့ သူတို့ရဲ့ Data တွေကို RAM က မှတ်ပေးထားပါတယ်။လက်ရှိ App ကနေ နောက် App တစ်ခုကိုပြောင်းသုံးနေရင်း မူလ App ကိုပြန်သုံးတဲ့အခါ နဂိုအတိုင်းပဲကျန်ရှိနေတာက RAM ကြောင့်ဖြစ်ပါတယ်။
ဖုန်း Hardware တွေ အဆင့်မြင့်လာတာနဲ့အမျှ ဒီ Hardware တွေပေါ်မှာ အသုံးပြုမယ့် Software တွေရဲ့ Size ဟာလည်း တဖြည်းဖြည်းကြီးမားလာကြပါတယ်။ ပုံမှန် Software တစ်ခုရဲ့ RAM အပေါ်မှာ နေရာယူတဲ့ပမာဏဟာ 300 ကနေ 500 MB အထိရှိနိုင်ပါတယ်။ သိပ်မလေးလောက်ဘူးလို့ ထင်ထားကြတဲ့ Facebook နဲ့ Instagram တို့လို Social Media App တွေ၊ Chrome တို့လို Browser တွေဆို သုံးရင်သုံးသလောက်၊ Tab တွေ ဖွင့်ရင်ဖွင့်သလောက် RAM အသုံးပြုမှု ပိုများတတ်ကြတယ်။ ဘာလို့လဲဆိုတော့ ကျွန်တော်တို့ Display ပေါ်ရောက်လာသမျှ Image တွေ Data တွေကို အလွယ်တကူပြန်ကြည့်နိုင်ဖို့ သိမ်းထားပေးတဲ့ Cache File လေးတွေက Newsfeed ပွတ်တိုင်း, Web Page တွေ ကြည့်တိုင်းတိုးလာလို့ပါ။ ဆိုလိုတာက Cache File များလေလေ RAM ပြည့်လာလေပါ။
နောက်ပြီး PUBG လို Mobile Game တွေဆော့ကြတဲ့အခါ အဲ့ဒီဂိမ်း ရဲ့ Game File တွေထဲက Character ပုံတွေ၊ မြေပုံတွေ၊ သေနတ်တွေစတဲ့ File တွေကို ဖုန်းက RAM ထဲမှာခဏဆွဲယူသိမ်းထားလိုက်ပါတယ်။ Game အကြီးအသေးပေါ်မူတည်ပြီး RAM ပေါ်မှာ သူတို့ရဲ့နေရာယူမှုပမာဏက 1GB နဲ့အထက်ရှိတတ်ကြပါတယ်။ ဒီလောက်ဆို ဖုန်းတစ်လုံးမှာပါတဲ့ RAM တွေကို ဘယ်အရာတွေက ဘယ်လောက်ထိ ယူသုံးလဲဆိုတာ အကြမ်းဖျဉ်းသိလောက်ပြီထင်ပါတယ်။
>> RAM 6GB ပါရင် 6GB အပြည့်အဝသုံးလို့ရလား?
ကျွန်တော်တို့ 64GB SD Card တစ်ခုကိုဝယ်ရင် 64 GB အပြည့်မပါသလိုပါပဲ၊ 6GB RAM ပါတယ်ဆိုတဲ့ ဖုန်းတစ်လုံးမှာ တကယ်သုံးလို့ရတဲ့ RAM ပမာဏဟာ 5.5GB ဝန်းကျင်လောက်ပဲ ရှိတတ်ပါတယ်။ အဲဒီမှာမှ ဖုန်းတစ်လုံးကိုမောင်းနှင်းမယ့် OS နဲ့ သက်ဆိုင်ရာ UI အသီးသီးအတွက် မဖြစ်မနေပေးရတဲ့ RAM ပမာဏဟာ 2 to 3 GB အထိရှိပါတယ်။ ဒါကလည်း ဖုန်းကုမ္ပဏီတွေရဲ့ သူတို့ UI တွေမှာ Feature တွေ ဘယ်လောက်ထိ ထည့်ပေးလဲအပေါ် မူတည်ပါတယ်။ ဆိုတော့ 6GB RAM ပါတဲ့ဖုန်းတစ်လုံးမှာ App တွေ Run ဖို့ ကျန်တဲ့ RAM ပမာဏဟာ 2 to 3 GB ဝန်းကျင်ပဲရှိတော့တာဖြစ်ပါတယ်။
အခုနောက်ပိုင်း Entry Level အနိမ့်ပိုင်းဖုန်းတွေကလွဲရင် ကျန်တဲ့ဖုန်းအားလုံးနီးပါးမှာ Memory Extension လုပ်လို့ရတဲ့ RAM Plus နည်းပညာကိုထည့်သွင်းပေးလာပါပြီ။ တကယ်က Phone Storage ကနေယူပြီး RAM လိုလုပ်သုံးလိုက်တာပါ။ နဂို 6GB ကို 2GB ထပ်ပေါင်းပြီး RAM 8GB တောင်သုံးလို့ရသွားပါတယ်။ ဒါပေမယ့် အကျိုးရှိသလားဆိုတော့လည်း သိပ်မရှိပါဘူး။ ဘာလို့လဲဆို Storage ROM ရဲ့ File ရေးနှုန်း ဖတ်နှုန်းက RAM ထက် အများကြီး ပိုနှေးကွေးလို့ပါ။ ဆိုတော့ ပိုတိုးသွားတဲ့ 2GB က လူပိန်လေးကို ဆန်အိတ်ထမ်းခိုင်းသလိုဖြစ်နေမှာမို့ပါ။ ဒါပေမယ့် RAM Extension နည်းပညာပါတာက မပါတာထက်စာရင်တော့ပိုကောင်းတယ်လို့ပြောလို့ရပါတယ်။
>> App များများထည့်ဖို့ RAM များများလိုလား ?
ပထမဆုံး Android Phone ဖြစ်တဲ့ HTC Dream (T-Mobile G1) မှာ RAM 192MB ပဲပါပါတယ်။ ဒီနေ့ခေတ်မှာတော့ သာမန်ဖုန်းတစ်လုံးမှာတောင် RAM 4GB လောက်အထိပါဝင်လာတဲ့အတွက် အရင်ကထက်စာရင် 22 ဆ လောက် RAM ကို ပိုပြီး လိုအပ်လာတာဖြစ်ပါတယ်။ ဒါဟာလဲ အရင်ခေတ်က Android ဖုန်းတစ်လုံးနဲ့ ခုခေတ်ဖုန်းတွေလုပ်ဆောင်နိုင်မှု လုံးဝမတူတော့တာကြောင့်ဖြစ်သလို ကျွန်တော်တို့ နေ့စဥ်သုံးနေတဲ့ Apps နဲ့ Games တွေဟာလဲ ပိုမိုတိုးတက်လာကာ OS ရဲ့ Size တွေလဲ တဖြည်းဖြည်းကြီးမားလာကြတာကြောင့် ဖြစ်ပါတယ်။
စမ်းသပ်ချက်တွေအရ ယနေ့ခေတ်ရဲ့ သာမန် Apps တွေဖြစ်တဲ့ YouTube, WhatsApp, Candy Crush စတဲ့ ပေါ့ပေါ့ပါးပါး Apps and Games တွေဟာ 130MB ကနေ 400MB RAM ကို အကြမ်းဖျင်း လိုအပ်တယ်လို့ သိရပါတယ်။ Instagram နဲ့ Facebook တို့လို App တွေကတော့ 400MB ကနေ 700MB RAM အထိ လိုအပ်တယ်လို့ သိရပါတယ်။ Games အကြီးစားတွေဖြစ်တဲ့ League of Legends နဲ့ PUBG Mobile တို့လို App တွေကတော့ 800MB ကနေ 1GB RAM အထိ လိုအပ်တယ်လို့ သိရပါတယ်။
>> ဒါဆိုရင် RAM များတာ ကောင်းလား?
ကောင်းလားဆိုရင် ကောင်းပါတယ်။ Apps နဲ့ Games တွေကို အများကြီး ထည့်ထားနိုင်ပြီး အများကြီးကို တစ်ပြိုင်နက်တည်း Run နိုင်၊ Multitasking ကောင်းကောင်းကြီး ပြုလုပ်နိုင်ပါတယ်။
ဒီနေရာမှာ တချို့လွဲမှားနေတဲ့ အသိလေးတစ်ခုရှိပါတယ်။ RAM များရင် ဖုန်းရဲ့ စွမ်းဆောင်ရည်လပိုကောင်းတယ်ဆိုတာပါပဲ။ တကယ်တော့ ဖုန်းရဲ့ စွမ်းဆောင်ရည်ဟာ RAM နဲ့ အနည်းငယ်ပဲ ပတ်သက်ပြီး CPU and GPU နဲ့ပဲ တိုက်ရိုက်အချိုးကျတာဖြစ်ပါတယ်။ ဒါကြောင့် RAM 8GB နဲ့ Midrange CPU ဖုန်းဟာ RAM 6GB ပဲပါတဲ့ Flagship SOC ဖုန်းလောက် Performance မကောင်းတာကိုတွေ့ရမှာပါ။
>> SmartPhone တစ်လုံးမှာ RAM ဘယ်လောက်ဆို အဆင်ပြေမလဲ?
သာမန် အသုံးပြုသူတွေအတွက် 4GB RAM ဆိုရင် လုံလောက်ပါတယ်။ Standard Apps ရှစ်ခုလောက်အထိ ကို တစ်ပြိုက်နက်တည်း ကောင်းကောင်း အသုံးပြုနိုင်ပါတယ်။ ဒါထက်ပိုပြီး Games တွေဆော့မယ်၊ Apps တွေများများ Multitasking လုပ်မယ်ဆိုရင် RAM 6GB ဟာ လုံလောက်တယ် ပြောလို့ရပါတယ်။ Heavy Users တွေနဲ့ Flagship SOC အသုံးပြုချင်တဲ့ သူတွေအတွက်တော့ 8GB RAM ဟာအတိုင်းထက်အလွန်လို့ ပြောလို့ရပါတယ်။
RAM 10GB တို့ 12GB တို့ဆိုတာ Smart Phones တွေအတွက် သိပ်ပြီးမလိုအပ်သေးပေမဲ့ အကောင်းဆုံး အမြင့်ဆုံးဖုန်းကို လိုချင်တဲ့သူတွေကတော့ RAM များများပါတဲ့ဖုန်းတွေကို ဝယ်ယူနိုင်ပါတယ်လို့ပြောရင်း ဒီနေ့ RAM အကြောင်း တစေ့တစောင်းပြောခဲ့တာတွေကို နိဂုံးချုပ်ပါရစေခင်ဗျာ။
